Mae gwirio dealltwriaeth myfyrwyr yn chwarae rhan hollbwysig yn y broses ddysgu ac addysgu a gall gadarnhau i’r darlithydd beth sy’n cael ei ddysgu tra hefyd yn rhoi cyfle i fyfyrwyr fyfyrio ar eu dysgu eu hunain. Gwirio dealltwriaeth yw un o’r heriau mwyaf wrth addysgu ac mae gorfod gwneud hynny mewn ystafell ddosbarth rithwir hyd yn oed yn fwy heriol nag yn yr ystafell ddysgu draddodiadol lle addysgir wyneb-yn-wyneb! Fodd bynnag, mae sawl nodwedd ddefnyddiol o fewn MS Teams y gellir eu defnyddio i’ch helpu i wirio dealltwriaeth. Dyma ychydig o awgrymiadau ar sut i wneud y mwyaf o’r nodweddion hyn:

Y nodwedd sgwrsio (chat).
Gallwch ddefnyddio’r nodwedd sgwrsio mewn amrywiaeth o ffyrdd i wirio dealltwriaeth. Mae rhai syniadau’n cynnwys gofyn i’r myfyrwyr grynhoi cysyniad neu syniad, neu aralleirio damcaniaeth mewn ychydig o frawddegau a phostio hynny yn y nodwedd sgwrsio. Gall y nodwedd hon hefyd fod yn werthfawr iawn i wirio dealltwriaeth myfyrwyr tawelach sydd efallai’n dymuno peidio ag ymateb ar lafar i’ch cwestiynau. Dyma rai awgrymiadau ar sut i reoli’r sgwrs yn effeithiol yn MS Teams.

Emojis.
I godi bach o hwyl yn yr ystafell ddosbarth ac fel ffordd o osgoi ymatebion “ie/na”, gallech ofyn i’ch myfyrwyr ymateb i’ch sylw yn y sgwrs i fynegi sut maen nhw’n teimlo am bwnc neu gysyniad. Er enghraifft:

Nodwedd codi eich llaw.
Mae’r nodwedd codi eich llaw o fewn Teams yn caniatáu i ddefnyddwyr hysbysu’r darlithydd fod ganddynt gwestiwn neu sylw i’w wneud, ond gallech hefyd ei ddefnyddio i wirio dealltwriaeth. Beth am ofyn i fyfyrwyr ddefnyddio’r nodwedd mewn ymateb i gwestiwn? Er enghraifft, “codwch eich llaw os ydych am i mi ddangos i chi sut i wneud hynny eto“.
Gallech hefyd ddefnyddio’r nodwedd i annog myfyrwyr i ymhelaethu ar eu hatebion yn y sgwrs, er enghraifft “codwch eich llaw os gallwch ddweud mwy wrthyf am hynny“. Os yw’r myfyrwyr yn bryderus am ymateb ar lafar, gallwch eu hannog i ymateb gydag ymhelaethu yn ysgrifenedig yn y sgwrs.

Read More

Hoffem gynnig cyfle i staff y Brifysgol ymuno â ni yn ein sesiynau galw heibio ar ddefnyddio offer e-ddysgu (Blackboard, Panopto, Turnitin a MS Teams) ar gyfer gweithgareddau dysgu ac addysgu. Bydd y rhain yn gyfle anffurfiol i chi siarad â’n Harbenigwyr Dysgu Ar-lein ac i fynd i’r afael ag unrhyw broblemau sydd gyda chi.

Cynhelir pob sesiwn galw heibio drwy MS Teams ac nid oes angen archebu lle, dim ond clicio ar y dolenni isod. *Noder y bydd sesiynau gyda seren (*) yn sesiynau dwyieithog, a bydd pob sesiwn heb seren yn cael ei rhedeg fel sesiynau cyfrwng Saesneg.

Bydd y sesiynau galw heibio hyn yn cael eu cynnal ar:

19.01.2021 (10:00-11:00):Ymunwch â Chyfarfod MS Teams*
21.01.2021 (14:00-15:00):Ymunwch â Chyfarfod MS Teams
26.01.2021 (10:00-11:00):Ymunwch â Chyfarfod MS Teams*
28.01.2021 (14:00-15:00):Ymunwch â Chyfarfod MS Teams
02.02.2021 (10:00-11:00):Ymunwch â Chyfarfod MS Teams*
04.02.2021 (14:00-15:00):Ymunwch â Chyfarfod MS Teams

Gobeithiwn y bydd y sesiynau hyn yn rhoi cyfle i chi gael atebion i unrhyw gwestiynau am eich anghenion addysgu.

Os oes gennych unrhyw gwestiynau, e-bostiwch udda@aber.ac.uk.

Mae cynnwys anghydamserol a recordiwyd o flaen llaw wedi dod yn ffactor allweddol wrth gyflwyno cyrsiau a galluogi’r profiad dysgu gorau i fyfyrwyr ym Mhrifysgol Aberystwyth. Mae sawl strategaeth y gall darlithwyr eu defnyddio i sicrhau bod y recordiadau hyn yn ennyn brwdfrydedd ac yn rhyngweithiol.

Mae sawl mantais i ddarlithoedd anghydamserol a recordiwyd o flaen llaw, ac mae’r rhan fwyaf o fyfyrwyr – y genhedlaeth YouTube – yn adnabod y dull hwn o ddysgu yn dda iawn (Scagnoli, Choo a Tian, 2019). Rhai manteision yw y gall myfyrwyr reoli eu hymgysylltiad â’r cynnwys a’u bod yn gwerthfawrogi’r cyfleustra a’r hyblygrwydd y mae recordiadau anghydamserol yn ei roi iddynt, yn arbennig o ran cyflymdra’r dysgu a bod modd iddynt wylio drosodd a throsodd (Dale a Pymm, 2009; Ramlogan et al., 2014; Scagnoli, Choo a Tian, 2019).

Mae hi’n hanfodol felly bod staff yn amlinellu beth maent yn ei ddisgwyl gan y myfyrwyr o ran ymgysylltu â’r deunyddiau dysgu, a hynny yn y fideos a recordiwyd yn ogystal â’r sesiynau wyneb yn wyneb.

Darganfu Scagnoli, Choo a Tian (2019) bod dros hanner myfyrwyr israddedig yn llai tebygol o ymgysylltu â chynnwys anghydamserol a recordiwyd o flaen llaw os oeddent yn teimlo nad oedd yn cysylltu’n uniongyrchol â’r gweithgareddau yn y sesiynau neu ag aseiniadau. Mae gwneud cyswllt eglur rhwng elfennau gwahanol o fodiwl, yn y cynnwys a recordiwyd eisoes a’r sesiynau wyneb yn wyneb, felly yn eithriadol o bwysig.

Mae myfyrwyr yn gwerthfawrogi cymdeithas a phresenoldeb wrth addysgu, ac yn fwy tebygol o fod yn wybyddol bresennol eu hunain (h.y. gwneud penderfyniad ymwybodol i ymgysylltu â’r ddarlith sydd wedi’i recordio yn unig, yn hytrach na cheisio amldasgio), os ydynt yn teimlo’n gysylltiedig â’r gymuned ddysgu. Yn syml: mae eich presenoldeb yn y deunyddiau wedi’u recordio yn hanfodol. Os yw’n bosibl, dangoswch eich wyneb, edrychwch ar y camera, a byddwch yn bresennol yn y recordiad . Yn enwedig gan fod y myfyrwyr, o bosibl, ond yn adnabod hanner uchaf eich wyneb, os o gwbl, mae gallu ymgysylltu â darlithwyr fel pobl yn ffordd allweddol o sicrhau bod eich cynnwys a recordiwyd yn ennyn mwy o frwdfrydedd.

Ystyriwch fod y myfyrwyr yn debygol iawn o ymgysylltu â darlithoedd a recordiwyd ar eu pennau eu hunain. Mae’r fideos felly’n sgwrs uniongyrchol, un i un. Addaswch eich cyflwyniad i fod yn fwy uniongyrchol, yn hytrach na’r modd y byddech chi’n traddodi darlith i ddarlithfa gyda 100 o fyfyrwyr.

Wrth ymgysylltu â’r fideos, mae talpio yn hanfodol. Nid yw’n ddigon recordio darlith a’i rhannu’n ddwy. Mae cynnwys tasg bob 5 i 10 munud yn torri’r ddarlith i fyny, yn gosod cyfrifoldeb am y dysgu ar y myfyrwyr, ac yn cynyddu’r rhyngweithio. Gallai hyn gynnwys

• Cwisiau (gellir ychwanegu’r rhain yn Panopto, ac oedi’r recordiad nes eu bod wedi’u cwblhau)
• Ysgrifennu sydyn (rhoi 2-3 munud i’r myfyrwyr ysgrifennu unrhyw wybodaeth bresennol sydd ganddynt neu grynhoi eu dealltwriaeth o bwnc hyd yma)
• Defnyddio’r nodweddion Nodiadau a Thrafodaeth yn Panopto (gellid defnyddio’r rhain ar gyfer Ysgrifennu Sydyn)
• Polau rhyngweithiol (gall y canlyniadau ffurfio sail i drafodaeth wyneb yn wyneb wedyn)

Yn yr un modd, mae gweithgareddau cyfochrog y gallech eu cynnwys ar gyfer eich myfyrwyr, megis cwestiynau am y pwnc, wedi’u darparu fel copi digidol o flaen llaw, y gall y myfyrwyr eu hateb wrth iddynt ymgysylltu â’r ddarlith (neu gallant ddewis eu defnyddio fel strwythur ar gyfer tasg Ysgrifennu Sydyn). Mae herio’r myfyrwyr i ddod â chwestiynau sydd wedi codi yn ystod darlith anghydamserol i sesiwn wyneb yn wyneb yn ffordd arall o annog ymgysylltiad â chynnwys a recordiwyd.

Dyma rai strategaethau eraill ar gyfer annog ymgysylltiad

• Egluro’n gwbl glir beth fydd y myfyrwyr yn ei elwa o’r sesiwn
• Defnyddio sleidiau clir, syml a graffig (cofiwch hygyrchedd)
• Crëwch fwrdd stori neu sgript ar gyfer eich cynnwys, os oes angen, i gynnal strwythur eglur o’r dechrau i’r diwedd
• Gorffennwch drwy atgoffa’r myfyrwyr o’r prif bwyntiau a beth yw’ch disgwyliadau o ran y gweithgareddau annibynnol cyn y sesiwn nesaf

Rydym yn argymell ein cyfarwyddyd ar ‘y ffordd orau o ddefnyddio’ch llais wrth recordio’ (isdeitlau dwyieithog yn y fideo) ac yn eich gwahodd i ymuno ag unrhyw sesiynau hyfforddi DPP perthnasol (dolen i’r sesiynau yma).

Er mwyn cefnogi myfyrwyr yn y flwyddyn arbennig o heriol hon, fe wnaethon ni greu Canllaw Cyflym i Lwyddiant Myfyrwyr gydag awgrymiadau ar reoli amser, yr arferion astudio mwyaf effeithiol, a sut i’ch ysbrydoli’ch hun i ddal ati. Gofynnwn i chi rannu’r fersiwn ryngweithiol hon o’r canllawiau â’ch myfyrwyr (sydd hefyd yn gydnaws â darllenwyr sgrin).

Read More

 

Gan ein bod yn defnyddio mwy a mwy o nodweddion ym modiwlau Blackboard, mae’r modd y cânt eu trefnu wedi dod yn gynyddol bwysig. Rydym yn cael nifer o ymholiadau gan fyfyrwyr sy’n cael trafferth dod o hyd i eitemau gwahanol neu fannau cyflwyno yn Blackboard.

I gynorthwyo â hyn, rydym wedi nodi ein prif awgrymiadau ar gyfer trefnu cynnwys.

Os oes gennych chi unrhyw gwestiynau am hyn neu os hoffech wneud cais am MOT modiwl, e-bostiwch eddysgu@aber.ac.uk.

Awgrymiadau ar gyfer Trefnu Cynnwys Blackboard

Cyn dechrau creu a threfnu cynnwys ar eich modiwlau Blackboard, meddyliwch beth yw’r ffordd orau o’i drefnu fel bod modd i’r myfyrwyr gael mynediad ato’n rhwydd a bod y gweithgareddau a’r adnoddau dysgu gyda’i gilydd mewn lle rhesymegol. 

1: Trefnu Cynnwys:

Dewiswch yr eitem gywir o’r ddewislen ar gyfer eich cynnwys	Mae gan bob adran ei thempled ei hun. Gwnewch yn siŵr eich bod yn rhoi’r cynnwys yn y lle mwyaf rhesymegol i’r myfyrwyr ddod o hyd iddo.
Defnyddiwch strwythur ffolder i drefnu eich cynnwys	Defnyddiwch ffolderi i sicrhau nad yw’r myfyrwyr yn gorfod sgrolio i lawr tudalen hir a’u helpu i ddod o hyd i gynnwys yn haws. Defnyddiwch ffolder wahanol ar gyfer pob wythnos neu bwnc.
Cyfyngwch ar sawl gwaith y mae’n rhaid clicio cyn gweld y cynnwys	Gofalwch rhag rhoi gormod o gliciau - dylai myfyriwr allu gweld y cynnwys angenrheidiol mewn 3 chlic ar y mwyaf.

2. Enwi Cynnwys:

Defnyddiwch derminoleg a chonfensiynau enwi cyfarwydd	Os ydych chi’n ychwanegu dolen i recordiad Panopto, gwnewch yn siŵr eich bod yn addasu enw’r ddarlith.
Byddwch yn gyson gyda chonfensiynau enwi	Defnyddiwch yr un derminoleg drwy gydol y modiwl a rhowch enwau ystyrlon i eitemau.
Defnyddiwch ddisgrifiadau ar ffolderi cynnwys	Amlinellwch gynnwys y ffolderi yn y disgrifiadau ffeil er mwyn i’r myfyrwyr wybod beth sydd ynddynt

3. Dealltwriaeth o’r Cynnwys:

Crëwch eitem Blackboard gyda throsolwg o’r modiwl	Defnyddiwch strwythur wythnos wrth wythnos i roi gwybod i fyfyrwyr beth y gallant ei ddisgwyl. Cofiwch gynnwys unrhyw ddyddiadau allweddol ar gyfer aseiniadau neu dasgau. Gall hyn fod ar ffurf tabl.
Defnyddiwch Panopto i recordio taith fideo o’r modiwl	Gwnewch sgrinlediad o daith o’r modiwl yn amlygu’r ardaloedd allweddol i fyfyrwyr. Crëwch ddolen i’r recordiad o dan Gwasanathau Modiwl
Defnyddiwch gyhoeddiadau gyda dolenni i’r cwrs i dynnu sylw’r myfyrwyr	Bydd defnyddio dolen i’r cwrs yn galluogi myfyrwyr i lywio i’r adran honno o’r cyhoeddiadau. Defnyddiwch hyn i dynnu sylw eich myfyrwyr at eitem, ffolder neu offer penodol megis man cyflwyno.

4. Adolygu Cynnwys:

Defnyddiwch ragolwg myfyriwr	Pan fyddwch wedi creu eich cynnwys, defnyddiwch y nodwedd rhagolwg myfyriwr i weld sut mae’n edrych i’r myfyrwyr.
Symudwch unrhyw gynnwys y mae’r myfyrwyr yn cael trafferth dod o hyd iddo	Hyd yn oed ar ôl creu cynnwys, mae’n bosibl ei symud o hyd. Gofynnwch i’ch myfyrwyr a ydynt yn gallu dod o hyd i’r cynnwys a’r gweithgareddau dysgu a gwneud unrhyw addasiadau os oes angen.

Mae gennym Isafswm Presenoldeb Gofynnol diwygiedig ar gyfer dysgu yn ein cyd-destun presennol. Os oes gennych chi unrhyw gwestiynau, e-bostiwch eddysgu@aber.ac.uk.

I gael rhagor o syniadau sut i drefnu eich modiwlau, edrychwch ar rai o enillwyr ein Gwobr Cwrs Nodedig.

Dyma drosolwg o’r holl sesiynau Datblygu Proffesiynol Parhaus bydd yr UDDA yn eu cynnig i staff y Brifysgol yn ystod mis Ionawr.

Ewch i’r Wefan Hyfforddi Staff i gadw lle ac am fwy o wybodaeth.

Mae’n bleser gan yr Uned Gwella Dysgu ac Addysgu gyhoeddi gweithdy ar-lein arbennig a gynhelir gan Dr Kate Exley ddydd Mercher 17 Chwefror.

Bydd y gweithdy yn ddefnyddiol i gydweithwyr sy’n addasu a throsglwyddo eu darlithoedd traddodiadol ar gyfer dysgu ar-lein.

Archebwch eich lle ar-lein [link].

Er mwyn i gymaint o gydweithwyr â phosibl allu dod, rydym yn cynnal y gweithdy ddwywaith (11yb-12yp ac 1yp-2yp). Dewiswch ba sesiwn yr hoffech ddod iddi wrth archebu.

Nifer cyfyngedig o leoedd sydd ar gael felly archebwch cyn gynted â phosibl.

Trosolwg o’r Sesiwn:

Mae nifer o gydweithwyr wedi bod yn addysgu’n gyfunol neu ar-lein ers nifer o flynyddoedd ond mae pandemig Covid wedi golygu ei bod yn rhaid i ni gyd ddarparu llawer o’n dysgu ac addysgu o bell. Mae hyn wedi golygu symud ein darlithoedd, a draddodwyd o’r blaen mewn darlithfeydd ac ystafelloedd dosbarth mawr, i lwyfannau ar-lein. Mae’r cyflymder y mae’r newid mawr hwn wedi digwydd yn ei hun wedi achosi heriau sylweddol i staff a myfyrwyr fel ei gilydd. Mae’r gweithdy cyfunol hwn yn bwriadu darparu cyfarwyddyd, enghreifftiau a fforwm i gydweithwyr rannu eu profiadau a’u syniadau ar gyfer gwella’r ddarpariaeth hon.

Cyflwynir y gweithdy mewn dwy ran:

• Bydd cyfres o 3 fideo byr ar gael ar neu cyn 5 Chwefror 2021 a dylid eu gwylio’n annibynnol cyn ymuno â’r fforwm drafod – oddeutu 45 munud o astudio annibynnol.
• Fforwm drafod a gynhelir ar Teams ar 17 Chwefror, ble bydd gan gyfranogwyr gyfle i ofyn cwestiynau, rhannu profiadau a thrafod y pwnc – 1 awr o hyd.

Read More

Mae Prifysgol Aberystwyth yn lansio’r broses fewnol ddwyieithog ar gyfer Fframwaith Ymarfer Goruchwyliol Da Cyngor y DU dros Addysg i Raddedigion. Gellir dod o hyd i fersiwn Gymraeg a Saesneg o’r fframwaith drwy’r ddolen hon.

“Mae’r Fframwaith Ymarfer Goruchwyliol Da yn cydnabod, am y tro cyntaf ar lefel genedlaethol, y set eang, hynod gymhleth a heriol o rolau a gyflawnir gan oruchwylwyr ymchwil modern.” Gwefan Cyngor y DU dros Addysg i Raddedigion.

Datganiad gan Yr Athro Colin McInness, Dirprwy Is-Ganghellor (Ymchwil, Cyfnewid Gwybodaeth ac Arloesi):

“Gall goruchwylio myfyrwyr ymchwil fod yn un o’r pethau mwyaf boddhaus a wnawn fel cymuned academaidd, ond yn un o’r pethau anoddaf hefyd. Mae’r heriau hyn yn effeithio ar bawb ohonom ni o bryd i’w gilydd, ac yn dal i ymffurfio wrth i ymarfer, dulliau a gwybodeg ymchwil ddatblygu. Bydd y Fframwaith hwn yn rhoi’r adnoddau a’r hyder i’n cymuned ymchwil ni yn Aberystwyth gael parhau gyda’n harferion goruchwylio ardderchog a chefnogi ein Myfyrwyr ymchwil.”

Mae Annette Edwards, o’r Uned Datblygu Dysgu ac Addysgu a Reyer Zwiggelaar, Pennaeth Ysgol y Graddedigion, yn cydweithio ar ran y Brifysgol, er mwyn marchnata a datblygu dealltwriaeth o’r fframwaith hwn. Bydd proses fewnol ar gael i bawb sydd â diddordeb mewn ymgeisio am yr achrediad hwn. Ewch i’r dudalen we hon am fwy o wybodaeth ac i fynegi diddordeb mewn gwneud cais trwy’r ffurflen ar-lein.

Dyma drosolwg o’r sesiynau Hanfodion E-ddysgu y mae’r Uned Datblygu Dysgu ac Addysgu yn eu cynnig i staff y Brifysgol yn ystod mis Ionawr. Cynigir sesiynau drwy gyfrwng y Gymraeg a’r Saesneg a bydd sesiynau cyfrwng Cymraeg yn ymddangos â theitlau Cymraeg isod ac ar y wefan hyfforddi staff.

Dyddiad	Teitl	Amser	Manylion
06-01-2021	E-learning Essentials: Introduction to Blackboard (L & T: Online)	15:00 - 16:00	Manylion
07-01-2021	E-learning Essentials: Introduction to Turnitin (L & T: Online)	11:00 - 12:00	Manylion
08-01-2021	E-learning Essentials: Introduction to Panopto (L & T: Online)	14:00 - 15:00	Manylion
11-01-2021	E-learning Essentials: Introduction to Component Marks Transfer (L & T: Online)	11:00 - 12:00	Manylion
12-01-2021	Hanfodion E-ddysgu: Cyflwyniad i Blackboard, Panopto a Turnitin (D & A: Ar-lein)	10:00 - 11:30	Manylion
14-01-2021	E-learning Essentials: Moving to Online Teaching (L & T: Online)	10:00 - 11:30	Manylion
15-01-2021	E-learning Essentials: Using MS Teams for Learning and Teaching Activities (L & T: Online)	11:00 - 12:00	Manylion
18-01-2021	Hanfodion E-ddysgu: Defnyddio MS Teams a symud i Addysgu Ar-lein (D & A: Ar-lein)	14:00 - 15:30	Manylion

Am restr lawn o’r holl sesiynau yn ystod y tymor ac i archebu lle ar unrhyw gwrs, ewch i’r wefan hyfforddi staff. Byddwn ni hefyd yn rhedeg cyfres o sesiynau E-ddysgu Uwch tymor nesaf ac fe gyhoeddwn wybodaeth bellach am y rhain yn y flwyddyn newydd.

Os oes gennych unrhyw gwestiynau am unrhyw un o’n sesiynau, mae croeso i chi anfon e-bost at udda@aber.ac.uk.

Gan bawb o’r Uned Datblygu Dysgu ac Addysgu, hoffwn ddiolch o galon i chi am gefnogi ein gwaith drwy gydol y flwyddyn, a hoffwn ddymuno Nadolig Llawen a Blwyddyn Newydd Dda i chi gyd!

Ar gyfer y Fforwm Academi ddiwethaf yn Semester Un gwnaethom ddewis un o’r pynciau mwyaf cyffredin a godir gan staff dysgu; sef sut mae ysgogi myfyrwyr, yn arbennig yng nghyd-destun dysgu ar-lein?

Yn rhan gyntaf y semester cafwyd trafodaeth gyffredinol a ddechreuodd wrth fyfyrio ar bryd yr ydym ni’n teimlo wedi’n hysgogi fwyaf, ac amlygwyd ffactorau megis: 

• Os oes pwysau allanol (dyddiad cau)
• Os yw’n bleserus
• Os yw’n ymwneud â phobl eraill
• Os nad yw’r tasgau’n anodd, pwysig neu amlochrog
• Os ydych chi’n cael adborth cadarnhaol

Gwnaeth y rhai a fynychodd hefyd rannu eu strategaethau ar gyfer cynnal eu hysgogiad  :

• Newid rhwng tasgau
• Torri prosiectau mawr yn dasgau llai
• Gofyn i’ch hun pam mae angen i chi wneud y gwaith?
• Cwblhau tasg fach, rwydd a defnyddio’r ysgogiad a’r ymdeimlad o lwyddiant a ddaw yn sgil hynny i weithio ar rywbeth arall
• Cwyno llai am orfod gwneud y dasg a mynd ati i’w gwneud
• Defnyddio rhestrau a gallu croesi pethau allan
• Gosod targedau realistig
• Gofalu amdanoch chi eich hun (ceisio ystyried y gwaith o fewn persbectif ehangach)

Read More