Cynhadledd Fer: Addysg Gynhwysol, dydd Mercher 10 Ebrill, 1yp

Cynhadledd Fer Mini Conference

Ddydd Mercher 10 Ebrill, bydd y Grŵp E-ddysgu’n cynnal Cynhadledd Fer yr Academi eleni. Mae’r Gynhadledd Fer yn fersiwn llai o’n Cynhadledd Dysgu ac Addysgu Flynyddol sy’n ein galluogi i gasglu ynghyd gyfres o gyflwyniadau a gweithdai sy’n ymwneud â phwnc dysgu ac addysgu penodol. Thema’r Gynhadledd Fer eleni yw Addysg Gynhwysol.

Mae’n bleser gennym gadarnhau ein rhaglen ar gyfer y prynhawn:

Bydd y cyflwyniadau hyn yn cynnig cyfres o awgrymiadau ymarferol a fydd yn helpu i wneud eich dogfennau a’ch amgylcheddau dysgu yn fwy cynhwysol. Yn ogystal â hyn, byddwn yn edrych ar sut y gellid defnyddio’r strategaethau hyn yn ymarferol ac o fewn cyd-destun addysgu.

Gobeithio y bydd modd i chi ymuno â ni ar gyfer y digwyddiad hwn. Nifer cyfyngedig o leoedd sydd ar gael yn y Gynhadledd Fer felly archebwch le drwy’r dudalen archebu hon.

A allaf ddefnyddio meddalwedd pleidleisio ar gyfer Dysgwyr o Bell?

Yn sgil y neges ar ddefnyddio meddalwedd pleidleisio ar gyfer addysgu cawsom ymholiad ynghylch y posibilrwydd o ddefnyddio meddalwedd pleidleisio megis PollEverywhere neu Mentimeter ar gyfer modiwlau Dysgwyr o Bell.

Isod ceir canlyniadau ein profi a’n hymchwil.

Mentimeter

Gan fod gan bob cyflwyniad god gwahanol ar gyfer cael mynediad i’r pôl, gallwch bleidleisio hyd yn oed pan nad yw’r cyflwyniad yn cael ei arddangos. Ond, os nad yw’n cael ei ddefnyddio ar gyfer pleidleisio byw, dylai pob cyflwyniad gynnwys un sleid yn unig. Os yw’r cyflwyniad yn cynnwys dau neu fwy o sleidiau (ac nad yw wedi’i arddangos gan awdur y pôl) dim ond i’r sleid gyntaf y caiff y cyfranogwyr fynediad iddi.

PollEverywhere

  • Mae gan PollEverywhere swyddogaeth sy’n caniatáu i chi grwpio cwestiynau/polau a’u troi’n arolwg y gellir ei rannu a’i lenwi gan gyfranogwyr yn eu hamser eu hunain. Ond bydd yn rhaid i chi ‘ysgogi’r arolwg a dim ond un cyflwyniad y gallwch ei ysgogi ar y tro (https://www.polleverywhere.com/faq cwestiwn: Can I combine multiple questions (polls) into a survey?)
  • Mae offer arolygon ar-lein eraill ar gael megis Google Forms neu Wufoo. Gellir eu defnyddio gan nifer anghyfyngedig o gyfranogwyr (ond nid yw hyn yn wir am PollEverywhere, y cyfyngiad gyda’r cynllun rhad ac am ddim yw 25 o ymatebwyr). Fodd bynnag, nid oes gan yr offer hyn gymaint o amrywiaeth o gwestiynau (yn arbennig o’i gymharu â PollEverywhere) ac nid ydynt mor ddeniadol eu golwg.

Y dewis arall i’r holl raglenni uchod yw profion neu arolygon Blackboard.

Rhannu arolygon â myfyrwyr:

Gellir rhannu’r ddolen i unrhyw un o’r arolygon ar-lein gyda myfyrwyr drwy e-bost, cyhoeddiad neu ddolen yn yr ardal gynnwys ar Blackboard (yn achos PollEverywhere dim ond un arolwg ar y tro y cewch ei rannu, yr un sydd wedi’i ‘ysgogi’).

Rhannu canlyniadau â myfyrwyr:

Nid yw’r offer adrodd am ganlyniadau yn Mentimeter a PollEverywhere ar gael o fewn y cynllun rhad ac am ddim. Gallech rannu’r canlyniadau â’r myfyrwyr drwy gymryd sgrinluniau o’r graffiau gyda’r ymatebion a’u cyflwyno fel delwedd, eitem neu un o’r sleidiau mewn cyflwyniad PowerPoint ar Blackboard.

Yn Google Forms a Wufoo gallwch lawrlwytho’r canlyniadau i Excel. Ond, os hoffech gyflwyno’r canlyniadau mewn modd hygyrch a gweledol, byddai’n well defnyddio’r dull sgrinlun a ddisgrifir uchod. Pan fyddwch yn defnyddio profion neu arolygon Blackboard, gallwch weld yr ystadegau drwy’r Ganolfan Raddau ac naill ai eu lawrlwytho i Excel neu’u cadw fel dogfen pdf.

Os oes gennych chi unrhyw gwestiynau neu awgrymiadau, mae croeso i chi eu rhannu â ni.

 

 

Galwad am Gynigion: Cynhadledd Dysgu ac Addysgu 2019

Gwahoddir staff, cynorthwywyr dysgu uwchraddedig a myfyrwyr i gyflwyno cynigion ar gyfer 7fed Cynhadledd Dysgu ac Addysgu, Dydd Llun 8 Gorffennaf – Dydd Mercher 10 Gorffennaf 2019.

Gallwch gyflwyno a gweld yr alwad am gynigion yma.

Mae thema’r gynhadledd eleni, Dysgu o Ragoriaeth: Arloesi, Cydweithio, Cymryd Rhan!, yn adlewyrchu’r ymroddiad sydd gan staff Prifysgol Aberystwyth i wella profiad dysgu eu myfyrwyr. Dyma dair prif gangen y gynhadledd eleni:

  • Sut mae myfyrwyr yn dysgu
  • Cynllunio dysgu effeithiol ac arloesol
  • Addysgu drwy ymchwil i ehangu dysgu
  • Profiadau dysgu cydweithredol a chyfranogol

Mae croeso i staff, cynorthwywyr dysgu uwchraddedig, a myfyrwyr gynnig sesiynau ar unrhyw bwnc sy’n berthnasol i ddysgu, yn enwedig os ydynt yn canolbwyntio ar ymgorffori a defnyddio technoleg wrth ddysgu. Mae croeso i chi gyflwyno pynciau eraill, hyd yn oed os nad ydynt yn cyd-fynd ag un o’r canghennau uchod.

Rydym yn annog cyflwynwyr i ystyried defnyddio fformatau amgen sy’n cyd-fynd â’r hyn a drafodir yn eu sesiynau. Gan hynny, ni fyddwn yn gofyn am fformat cyflwyno safonol.

Gofynnwn i chi lenwi’r ffurflen hon erbyn 10 Mai 2019.

Os oes gennych chi unrhyw gwestiynau, mae croeso i chi gysylltu â’r Grŵp E-ddysgu am eddysgu@aber.ac.uk, neu ffonio ar estyniad 2472.

Blackboard SaaS – diweddariad 1

Blackboard LogoBydd llawer ohonoch wedi gweld y cyhoeddiad bod Prifysgol Aberystwyth yn symud i lwyfan cwmwl Blackboard SaaS. Rydym yn bwriadu rhoi diweddariad misol ar gynnydd y prosiect trwy’r blog E-ddysgu, a dyma’r diweddariad cyntaf.

Mae SaaS yn golygu ‘Software as a Service’, ac fe fydd symud i ddefnyddio Blackboard SaaS yn cynnig nifer o fanteision. Y brif fantais o bosib yw na fydd cyfnodau lle nad yw’r gwasanaeth ar gael (downtime) ar ôl i ni fudo i SaaS. Ar hyn o bryd mae dau gyfnod cynnal a chadw a drefnir ymlaen llaw bob blwyddyn – sef dau ddiwrnod yn ystod Gwyliau’r Nadolig a dau ddiwrnod yn ystod yr haf. Bydd y rhai ohonoch sy’n dilyn y blog hwn yn gwybod pa mor anodd y gall fod i drefnu’r rhain, a’i bod bron yn amhosibl dod o hyd i amser sy’n gyfleus i bawb. Mae Blackboard SaaS yn cael ei ddiweddaru heb darfu ar y gwasanaeth o gwbl (i gael gwybod mwy am hyn a nodweddion eraill SaaS gweler https://uk.blackboard.com/learning-management-system/saas-deployment.html).

Ni fydd y gwasanaeth ar gael am gyfnod yn ystod y broses fudo, ond byddwn yn rhoi gwybod i chi am hyn yn agosach at yr amser. Ac unwaith y byddwn wedi symud y newyddion da fydd – dim mwy o gyhoeddiadau yn rhoi gwybod nad yw’r gwasanaeth ar gael dros y Nadolig neu’r haf!

Caiff SaaS ei ddiweddaru trwy ddefnyddio dull diweddaru parhaus – mae hyn yn golygu y bydd Blackboard yn cael ei ddiweddaru i’r fersiwn ddiweddaraf bob mis. Mae’r diweddariad hwn yn cynnwys trwsio bygiau a chyflwyno nodweddion newydd. Felly, dylech weld bod problemau’n cael eu trwsio’n gynharach ac ni fydd rhaid i chi aros yn rhy hir am offer newydd neu ddiweddariadau i offer cyfredol.

Mae digonedd o wybodaeth am Blackboard SaaS ar gael ar-lein; os byddwch yn mynd ati i chwilio am ragor o wybodaeth, cofiwch fod dwy fersiwn wahanol o Blackboard ar gael ar SaaS, sef Original ac Ultra. Rydym yn bwriadu symud i’r fersiwn Original i ddechrau – a byddwn yn ystyried Ultra yn y dyfodol.

Ers i ni anfon y cyhoeddiad gwreiddiol, mae’r tîm E-ddysgu ac Integreiddio Systemau wedi treulio llawer o amser yn ymgyfarwyddo ag SaaS. Un o’r pethau mwyaf cyffrous oedd cael defnyddio fersiwn newydd a hollol ffres o Blackboard. Nid yw’r rhan fwyaf ohonom erioed wedi gweld Blackboard heb unrhyw gyrsiau na defnyddwyr – roedd ychydig bach fel wynebu ardal o eira ffres!!

Ein blaenoriaethau cyntaf fydd sicrhau bod yr holl brif nodweddion yn gweithio yn ôl y disgwyl, a gwneud yn siŵr bod yr holl ychwanegion (neu Flociau Adeiladu) yr ydym yn eu defnyddio yn gweithio’n iawn. Rydym yn defnyddio Blociau Adeiladu ar gyfer llawer o wahanol bethau, o Turnitin a Panopto i’r faner sy’n sgrolio ar hafan y safle.

Os oes gennych unrhyw gwestiynau ynglŷn â Blackboard SaaS, cysylltwch â ni ar elearning@aber.ac.uk

Cipio Darlithoedd yn Effeithiol: Awgrymiadau i staff a myfyrwyr

Yn y blog hwn byddwn yn edrych at sut y gallwn gipio darlithoedd yn fwy effeithiol i ehangu dysgu a chofio gwybodaeth. Byddwn yn adeiladu ar ein blog blaenorol o’r enw Defnyddio’r adnodd capsiynau a chwis yn Panopto.

Mae’r awgrymiadau a’r drafodaeth isod yn seiliedig ar bapur sy’n cael ei gyhoeddi eleni gan seicolegwyr o Brifysgolion Glasgow, Dundee, Sheffield ac Aberdeen, ar y cyd â staff o’r Gwasanaethau TG ym Mhrifysgol Manceinion. Mae’r papur, ‘Lecture capture: Practical recommendations for students and lecturers’, wedi cael ei ysgrifennu o fewn cyd-destun dysgu hunanreoledig ac mae’n cynnig cyfarwyddyd i staff a myfyrwyr ar sut i fanteisio i’r eithaf ar recordiadau darlith. Gwnaeth Prifysgol Aberystwyth gyflwyno ei Pholisi Cipio Darlithoedd yn 2016 yn sgil cyflwyno Panopto yn 2013. Gan fod cipio darlithoedd wedi cynyddu ledled y sector Addysg Uwch yn y DU[1], mae’r ffocws yn symud nawr i sut mae’n gweithio o ran dysgu.

Mae’r erthygl ar gael ar-lein ac mae wedi’i rhannu’n 4 adran:

  1. Cyflwyniad
  2. Dysgu hunanreoledig fel fframwaith damcaniaethol ar gyfer gweithredu cipio darlithoedd
  3. Argymhellion i fyfyrwyr
  4. Argymhellion i staff

Yn ogystal â hyn, mae awduron yr astudiaeth wedi creu ffeithlun i fyfyrwyr sy’n cynnwys eu prif ddarganfyddiadau:

Nordmann et al. 2018.

Mae’r ffeithlun llawn ar gael ar-lein.

Trafododd y Grŵp E-ddysgu’r papur hwn yn rhan o’r awr hyfforddiant tîm rheolaidd. Isod ceir rhai o’r pwyntiau yr hoffem eu hamlygu i staff a myfyrwyr:

  • Dylai myfyrwyr ystyried y recordiadau fel ychwanegiad at eu dysgu ac nid i gymryd lle presenoldeb. Mae astudiaethau wedi dangos bod presenoldeb yn y sesiwn fyw yn golygu perthynas gryfach o ran y radd derfynol gyda chipio darlithoedd yn cael ei ddefnyddio i gynorthwyo’r dysgu.[2]
  • Cyflwynwch y myfyrwyr i system cymryd nodiadau Cornell a’u hannog i gymryd nodiadau yn ystod darlithoedd. Mae cymryd nodiadau yn helpu’r gallu i gadw gwybodaeth, ond mae’n dasg sy’n golygu ymdrech gwybyddol felly gall defnyddio strategaethau megis system cymryd nodiadau Cornell helpu myfyrwyr i fanteisio i’r eithaf arno. Mae fideo sy’n cyflwyno nodiadau Cornell ar gael yma.
  • Ymgorfforwch adolygu recordiadau fideo i’r gweithgareddau ‘gwaith cartref’, gan eu hannog i fynd drwy’u nodiadau ac ail-wylio adrannau penodol o’r recordiadau’n unig. Dylai myfyrwyr ail-wylio’r ddarlith o fewn rhai diwrnodau i fynychu’r sesiwn, ond nid yn syth ar ôl y sesiwn. Mae cael toriad rhwng adolygu yn cynyddu’r gallu i gadw gwybodaeth. Mae gwylio’r fideo yn llawn yn ei gwneud hi’n fwy tebygol y byddant yn cael trafferth canolbwyntio, felly dylai myfyrwyr ganolbwyntio ar yr adrannau hynny nad ydynt yn eu cofio na’u deall a defnyddio’r recordiad i wella’r nodiadau y gwnaethant eu cymryd yn y lle cyntaf. Dylent adolygu eu nodiadau wrth wylio’r recordiad.
  • Os bydd myfyriwr yn colli darlith fe’u cynghorir i wylio’r recordiad yn llawn cyn gynted â phosibl ac yna ail-wylio’r recordiad ymhen rhai diwrnodau gan wylio adrannau penodol fel y nodwyd uchod. Dylent wylio’r recordiad ar y cyflymder arferol a chymryd nodiadau wrth wylio yn yr un modd ag y buasent yn ei wneud mewn sesiwn fyw.
  • Defnyddio’r gweithgareddau dysgu gweithredol – gallai’r rhain gynnwys trafodaethau gyda chymheiriaid, cwestiynau ymarfer ar ddiwedd y sesiwn, pleidleisio yn y dosbarth. Mae tystiolaeth yn dangos bod mwy o weithgareddau rhyngweithiol yn fwy tebygol o annog myfyrwyr i ddod i’r darlithoedd yn hytrach na gwylio’r recordiad. Ystyriwch ddefnyddio cwisiau yn Panopto i brofi eu gwybodaeth neu i weld a ydynt wedi deall y deunydd: https://faqs.aber.ac.uk/index.php?id=2771

Byddwn yn mewnosod yr awgrymiadau o’r papur hwn i’n sesiynau hyfforddi sydd i ddod

  • E-ddysgu Uwch: Defnyddio Offer E-ddysgu ar gyfer Gweithgareddau Adolygu (27 Mawrth am 3yp yn E3, Ystafell Hyfforddi E-ddysgu)

Gallwch archebu lle ar y sesiynau hyn yma.

Rydym bob amser yn chwilio am flogwyr gwadd felly os ydych chi’n defnyddio Panopto mewn ffordd benodol, e-bostiwch ni.

Cyfeiriadau

Credé, M., Roch, S.G., & Kieszczynka, U. M. (2010). Class attendance in college: A meta-analytic review of the relationship of class attendance with grades and student characteristics. Review of Educational Research, 80 (2), 272-295. https://doi.org/10.3102%2F0034654310362998

Newland, B. (2017). Lecture Capture in UK HE: A HeLF Survey Report. Heads of eLearning Forum, a gafwyd o https://drive.google.com/file/d/0Bx0Bp7cZGLTPRUpPZ2NaaEpkb28/view

Nordmann, E., Kuepper-Tetzel, C. E., Robson, L., Phillipson, S., Lipan, G., & Mcgeorge, P. (2018). Lecture capture: Practical recommendations for students and lecturers. https://doi.org/10.31234/osf.io/sd7u4

[1] Mae Newland, 2017 yn adrodd bod gan 86% o Sefydliadau Addysg Uwch dechnoleg cipio darlithoedd.

[2] Gweler Credé, Roch a Kieszcynka (2010).

Gwasanaethau arolygon barn ar-lein a materion preifatrwydd

Os ydych chi eisoes wedi darllen Rhan Un o’r gyfres hon, byddwch yn gwybod mor ddefnyddiol yw gwasanaethau pleidleisio ar-lein at ymgysylltu’n uniongyrchol â’r myfyrwyr yn y dosbarth (os nad ydych – cymerwch olwg).

Yn ogystal â dewis offeryn sy’n addas at eich gwaith addysgu a dysgu chi, fe all fod angen hefyd ichi edrych ar Bolisi Preifatrwydd y gwasanaeth sydd o ddiddordeb ichi. Bydd hyn yn eich helpu i ddeall:

  • pa ddata personol y mae’r cwmni dan sylw yn ei gasglu amdanoch;
  • pa ddata personol y gall fod rhaid i’ch myfyrwyr ei roi;
  • gwybodaeth am sut mae’ch cyflwyniadau’n cael eu storio;
  • sut a ble mae’ch data’n cael ei gadw.

https://flic.kr/p/8ouBhQ

Mae’r rhan fwyaf o gwmnïau’n sicrhau bod eu Polisi Preifatrwydd yn eithaf hawdd dod o hyd iddo (ar y rhan fwyaf o wefannau roedd dolen ar waelod y tudalen hafan o dan y pennawd Preifatrwydd).

Dyma’n prif gynghorion ni ar ddefnyddio arolygon barn ar-lein:

  1. Gwelsom fod Telerau ac Amodau’r rhan fwyaf o wasanaethau yn eithaf byr a hawdd i’w deall – roedd rhai hyd yn oed yn darparu crynodeb byr o’r prif bwyntiau.
  2. Gan amlaf, nid yw’n ofynnol i’r myfyrwyr greu cyfrifon neu gofrestru ar gyfer gwasanaeth i gymryd rhan mewn gweithgaredd pleidleisio. Mae hyn yn golygu mai’r unig wybodaeth sy’n cael ei chasglu am y mwyafrif o’r myfyrwyr yw manylion y porwr neu’r ddyfais etc a ddefnyddiwyd i gysylltu â’r bleidlais. A fydd hyn ddim yn cael ei gysylltu â’u henw na’u cyfeiriad ebost.
  3. Ym mhob achos, mae angen i’r staff gofrestru gyda gwasanaeth er mwyn cael creu arolygon a’u dangos. Yn y mwyafrif o’r gwasanaethau, gallwch naill ai creu enw defnyddiwr a chyfrinair, neu gysylltu â chyfrif sydd eisoes ar gael (megis Google neu Facebook).
    1. Os byddwch yn creu’ch cyfrif eich hun, peidiwch â defnyddio’ch cyfrinair Prifysgol Aberystwyth fel cyfrinair i’r gwasanaeth pleidleisio. Dilynwch ein cynghorion i greu cyfrinair cryf ar wahân (https://faqs.aber.ac.uk/index.php?id=25)
    2. Os ydych yn defnyddio cyfrif sy’n bodoli eisoes, cofiwch y gall y data gael ei rannu rhwng y ddau wasanaeth. Bydd eich cyfrif Facebook neu Google yn cynnwys llawer o wybodaeth amdanoch, sef gwybodaeth na fyddwch am iddi gael ei rhannu o bosibl. Efallai yr hoffech edrych ar osodiadau’r cysylltiad er mwyn sicrhau eich bod yn fodlon ar lefel y data fydd yn cael ei rannu.
  4. Edrychwch ar yr hawliau sydd gennych ar eich arolygon. Mae rhai gwasanaethau’n caniatáu i ddefnyddwyr eraill bori a rhannu cyflwyniadau, felly efallai yr hoffech ystyried pa mor weledol yw eich cyflwyniadau.
  5. Ystyriwch pa drydydd partïon y bydd eich data’n cael ei rannu gyda nhw. Rydym yn argymell yn gryf eich bod yn dewis gwasanaeth lle mae’r data naill ai yn seiliedig yn yr UE, neu lle mae’r cwmni yn defnyddio safon Tarian Ddiogelwch yr UE-Unol Daleithiau. A gwiriwch eich dewisiadau – hoffech chi optio allan o restrau postio, hysbysebion etc?

Ar hyn o bryd, does gan Brifysgol Aberystwyth ddim trwydded safle ar gyfer gwasanaeth arolygon barn ar-lein. Felly, pan fyddwch yn cofrestru ar gyfer un o’r gwasanaethau hyn byddwch yn cofrestru fel unigolyn, ac nid fel cynrychiolydd i Brifysgol Aberystwyth neu ar ei rhan.

Dewis dull ar-lein ar gyfer arolygon barn

Image of students using polling handsets

https://flic.kr/p/9wNtHp

Mae cynnal arolwg barn neu bleidlais yn y dosbarth yn ffordd wych i sicrhau bod myfyrwyr yn cymryd rhan ac yn cydadweithio’n fwy yn yr ystafell ddosbarth (gweler er enghraifft: Shaw et al, 2015; Boyle a Nicol 2003; Habel a Stubbs, 2014; Stratling, 2015). Fe’i defnyddir yn helaeth mewn addysg bellach ac uwch, ac mae nifer o staff Prifysgol Aberystwyth yn defnyddio arolygon barn yn y dosbarth yn gyson. Yn ogystal â’r setiau llaw Qwizdom sydd ar gael yn offer i’w benthyca mae mwy a mwy yn defnyddio gwasanaethau ar-lein fel Poll Everywhere, Socrative a Mentimeter (ymysg eraill). Mae’r gwasanaethau hyn yn fodd i’r myfyrwyr ddefnyddio’u dyfeisiau eu hunain (megis ffonau symudol, tabledi a gliniaduron) i gymryd rhan mewn arolygon barn, rhoi adborth a gofyn cwestiynau.

Gall y Grŵp E-ddysgu roi ystod eang o wybodaeth a chymorth i unrhyw un sydd â diddordeb mewn defnyddio arolygon barn wrth addysgu. Mae hyn yn amrywio o gyngor ar sut i gynnwys arolygon barn yn llwyddiannus yn eich arferion addysgu, i gymorth ymarferol ar greu a defnyddio arolygon yn y dosbarth.

Ar hyn o bryd, nid yw Prifysgol Aberystwyth yn cynnig dull pleidleisio ar-lein a gefnogir yn ganolog ar gyfer dyfeisiau symudol. Er hynny, mae ystod eang o wasanaethau ar gael, llawer ohonynt â fersiynau di-dâl neu fersiynau prawf. Bwriad y blog hwn yw eich helpu i asesu pa ddull sy’n fwyaf addas i chi a’ch myfyrwyr.

  1. Beth hoffech chi ei wneud? Fel ym mhob technoleg ddysg sy’n cael ei rhoi ar waith, y cwestiwn cyntaf y mae angen ichi ei ofyn yw ‘Beth hoffwn i weld y myfyrwyr yn ei wneud?’ Bydd y gwasanaeth a ddewiswch yn dibynnu ar yr ateb. Er enghraifft, os ydych chi am i’ch myfyrwyr gyflwyno cwestiynau, neu roi adborth ysgrifenedig, chwiliwch am wasanaeth sy’n cynnig mwy na chwestiynau amlddewis
  2. Faint o fyfyrwyr fydd yn y dosbarth? Mae llawer o’r fersiynau di-dâl neu’r fersiynau cyfyngedig o feddalwedd sy’n codi tâl yn gosod cyfyngiad ar nifer y myfyrwyr sy’n cael eu defnyddio. Edrychwch yn ofalus ar fanylion yr hyn sy’n cael ei gynnwys yn y fersiwn di-dâl.
  3. Rydym yn argymell yn gryf hefyd y dylech edrych ar Bolisi Preifatrwydd y gwasanaeth, er mwyn sicrhau eich bod yn gwybod pa ddata personol amdanoch chi a’ch myfyrwyr fydd yn cael ei gasglu (edrychwch ar ein blogiadau ar y mater hwn).

Mae’r Grŵp E-ddysgu wedi llunio rhywfaint o wybodaeth ar rai gwasanaethau a allai fod o fudd ichi.

Pan fyddwch chi wedi penderfynu pa wasanaeth i’w ddefnyddio, dyma gynghorion ar ddefnyddio pleidleisio’n llwyddiannus yn y dosbarth.

  1. Meddwl am eich cwestiwn/cwestiynau. Mae llawer o adnoddau ar gael ynghylch llunio cwestiynau da, yn enwedig cwestiynau aml-ddewis. Peidiwch â theimlo bod rhaid ichi ofyn cwestiwn sydd ag ateb cywir neu anghywir. Weithiau gall cwestiwn sy’n ennyn trafodaeth neu sy’n dangos ehangder y safbwyntiau ar bwnc yn fuddiol.
  2. Defnyddio arolwg barn i ddechrau trafodaeth. Mae amryw o ffyrdd ichi ddefnyddio arolygon barn a thrafodaethau grŵp gyda’i gilydd – dwy ffordd boblogaidd yw Cyfarwyddyd Cymheiriaid (yn enwedig gwaith Eric Mazur) neu Gyfarwyddyd Dosbarth Cyfan (Dufresne, 1996)
  3. Ymarfer. Gofalwch ymarfer cyn y sesiwn fel eich bod yn gyffyrddus ac yn gyfarwydd â defnyddio’r cwestiynau a dangos y canlyniadau. Gallwch wneud hyn o’ch swyddfa drwy ddefnyddio dyfais symudol megis tabled neu ffôn symudol.
  4. Neilltuo amser yn y ddarlith. Os ydych yn defnyddio gweithgareddau arolygon barn yn y dosbarth, gofalwch adael digon o amser i’r myfyrwyr gael gafael ar eu dyfeisiau, meddwl am yr atebion ac ymateb. Efallai y bydd angen amser hefyd i gywiro unrhyw gamddealltwriaeth neu esbonio’r atebion.
  5. Rhoi gwybod i’ch myfyrwyr ymlaen llaw. Gofalwch fod eich myfyrwyr yn gwybod bod angen dod â’u dyfeisiau a bod y rhain ganddyn nhw yn y dosbarth. Gallwch wneud hyn drwy wneud cyhoeddiad yn Blackboard. Gallwch chi hefyd ddarparu cysylltiadau â Chwestiynau Cyffredin perthnasol megis sut i gysylltu â wifi Prifysgol Aberystwyth (Android: https://faqs.aber.ac.uk/index.php?id=692, Windows: https://faqs.aber.ac.uk/index.php?id=870, iOS: https://faqs.aber.ac.uk/index.php?id=700 )

Mae yna ystod eang o gyfleoedd i ddefnyddio arolygon barn – o gasglu gwybodaeth am faint mae’r myfyrwyr yn ei wybod ar ddechrau modiwl i ddarganfod pa bynciau y mae angen ichi ymdrin â nhw mewn sesiwn adolygu. Gallwch hefyd gasglu barn, cael adborth ar sut mae’r ddarlith yn mynd, neu gasglu cwestiynau dienw. Os ydych chi’n defnyddio arolygon barn wrth addysgu, cysylltwch â ni i sôn mwy – gallen ni hyd yn oed gynnwys eich gwaith ar y blog!

Webinar: Instilling Self-Regulation in Learners & Using Sway for Online Learning

Mae’r Academi Arddangos yn lle i rannu arferion da ymhlith staff o Aberystwyth, Bangor a sefydliadau Addysg Uwch eraill. Bob blwyddyn rydym yn cynnal dwy sesiwn gyda dau gyflwyniad ym mhob sesiwn, un o Aber ac un o Fangor. Gall unrhyw un ymuno â’r Academi Arddangos o’u peiriannau eu hunain drwy ddefnyddio’r ddolen sydd ar gael yma

Rydym yn edrych ymlaen at y cyflwyniadau eleni a gobeithio y bydd modd i rai ohonoch ymuno â ni.

 


20 Mawrth 2019 am 1yp-2yp

Instilling Self-Regulation in Learners by Dr Simon Payne (Aberystwyth)

We asked AU students and staff questions such as, “Why do students underachieve or even drop out?,” “What distractions do students face that interfere with their best intentions to study and improve?,” and “What happens to ‘turn students off’ from learning and striving to achieve?” The answers were remarkably similar from both groups, suggesting agreement on the problem and potential alignment on solutions. Self-regulation is the voluntary control of impulses which can facilitate or hinder us from achieving our goals. Hence, self-regulation includes the ability to regulate cognitive processes and activities, e.g. to plan, monitor and reflect on problem solving activities. Self-regulation also includes the control of one’s competing/conflicting motivational and emotional impulses and processes, e.g., overcoming social anxiety to contribute in class. Clearly, the development of self-regulation skills will help students achieve their objectives for entering HE. This presentation will provide techniques for tutors to help their students and tutees to be better self-regulators, and introduce and rationalise an ambitious AU-wide programme of studies that target student self-regulation ability.


Using Sway for Online Learning by Helen Munro (Bangor)

 

Cynhelir y sesiynau yn Saesneg.