Rydym nawr yn gwahodd cynigion ar gyfer y 14eg Gynhadledd Addysg a Phrofiad y Myfyrwyr Flynyddol, a gynhelir rhwng dydd Mawrth 8 Medi a dydd Iau 10 Medi 2026.
Cyd-greu Dyfodol Cynhwysol: Dysgu Hyblyg, Amrywiol sydd wedi’i ysgogi gan Gymhwysedd
Prif feysydd cynhadledd eleni yw:
Creu Cwricwlwm mwy Amrywiol ar gyfer Tegwch ac ymdeimlad o Berthyn
Adeiladu cwricwlwm cynhwysol, dad-drefedigaethol sy’n adlewyrchu hunaniaethau a phrofiadau amrywiol, gan hyrwyddo’r Siarter Cydraddoldeb Hil.
Dysgu Hyblyg ar gyfer Tirwedd sy’n Newid
Cynlluniau dysgu cymysg, cyfunol a hygyrch sy’n cefnogi anghenion amrywiol dysgwyr trwy osod cyflymder, strwythur a thechnoleg feddylgar.
Dysgu sydd wedi’i ysgogi gan Gymhwysedd
Integreiddio sgiliau, nodweddion graddedigion, a chymhwyso cymwyseddau yn y byd go iawn yn glir ac ystyrlon.
Myfyrwyr fel Cyd-grewyr a Chydweithwyr
Cydweithredu dilys rhwng myfyrwyr a staff wrth gynllunio’r cwricwlwm, asesu, ymchwil, a gwneud penderfyniadau.
Mae croeso i staff a myfyrwyr gynnig sesiynau ar unrhyw bwnc sy’n berthnasol i ddysgu ac addysgu, yn enwedig os ydynt yn canolbwyntio ar ymgorffori a defnyddio technoleg wrth ddysgu. Mae croeso i chi gyflwyno pynciau eraill, hyd yn oed os nad ydynt yn cyd-fynd ag un o’r meysydd uchod.
Rydym yn annog cyflwynwyr i ystyried defnyddio fformatau amgen sy’n cyd-fynd â’r hyn a drafodir yn eu sesiynau. Felly, nid ydym yn pennu fformat cyflwyno safonol.
Helo! Mae’n braf cael cyflwyno fy hun yn fy nghyhoeddiad blog cyntaf yn fy rôl newydd. Dan ydw i, ac ymunais â’r Tîm Addysg Ddigidol ar ôl y Pasg fel Cydlynydd Addysg Ddigidol ran-amser. Rwy’n gwneud y rôl ochr yn ochr â fy ngradd PhD gyda’r Adran Gwleidyddiaeth Ryngwladol.
Symudais i Aberystwyth yn 2022 i ddechrau fy nghwrs ymchwil 1+3 yn y brifysgol. Ar ôl gorffen y rhan hyfforddiant ymchwil o’r cwrs, dechreuais fy PhD yn 2023 ar y pwnc ‘llywodraethiant aml-lefel y maes polisi ail gartrefi’. Yn fy nghyfnod fel myfyriwr ymchwil yma, rydw i hefyd wedi cael profiad defnyddiol iawn fel tiwtor seminar yn yr Adran Gwleidyddiaeth Ryngwladol, ac fel Tiwtor Sgiliau Astudio gyda Gwasanaethau Myfyrwyr.
Wrth i mi nesáu at ran olaf fy PhD, rwy’n edrych ymlaen yn fawr at y rôl newydd gyffrous hon. Rwy’n ddiolchgar iawn am yr holl gyfleoedd mae’r brifysgol wedi’u rhoi imi hyd yn hyn, ac rwy’n frwdfrydig i gael cyfrannu at waith gwych y Tîm Addysg Ddigidol.
Cyn symud i Aberystwyth, astudiais fy ngraddau blaenorol ym Mhrifysgol Caerdydd, cyn gweithio mewn ambell i rol yn y sector gwleidyddiaeth ym Mae Caerdydd. Rydw i o hyd yn talu sylw at wleidyddiaeth, felly byddaf yn cadw llygad barcud ar ymgyrch etholiad Senedd Cymru dros y mis nesaf!
Y tu allan i wleidyddiaeth, mae gen i ddiddordeb mawr yn chwaraeon. Yn wreiddiol o Borth Tywyn yn Sir Gaerfyrddin, rwy’n gefnogwr brwd o’r Scarlets a chlwb pêl-droed Abertawe. Rydw i hefyd yn mwynhau cymryd rhan mewn chwaraeon fy hun, a dros yr haf byddaf yn defnyddio tirwedd hyfryd Ceredigion i helpu fi hyfforddi ar gyfer y nifer o driathlons rydw i wedi cofrestru amdano fel rhan o’r Gyfres Triathlon Cymru. Y llynedd, gwnes i hefyd penderfynu dychwelyd o ymddeoliad fy ngyrfa rygbi i ymuno â chlwb rygbi Tregaron, lle rwy’n chwarae fel cefnwr.
Pan fydda i eisiau cymryd hoe fwy hamddenol o’r gwaith, rydw i’n mwynhau mynd am dro gyda fy mhartner i weld yr anifeiliaid fferm ger ein fflat yng Ngelli Angharad, neu fynd am dro ar hyd y prom yn Aberystwyth i fwyta hufen iâ.
Rydw i’n edrych ymlaen yn fawr at ddod i nabod mwy o staff a myfyrwyr ar draws y brifysgol dros yr wythnosau a’r misoedd nesaf!
Ymgorffori cyflwyniadau PowerPoint yng ngwedd gyflwyno Vevox
Gallwch nawr ymgorffori cyflwyniad yng ngwedd cyflwynydd Vevox, sy’n golygu nad oes angen i chi newid tabiau – mae’r PowerPoint wedi’i ymgorffori’n llwyr.
Addasu nifer y lleoedd degol
Gellir diwygio nifer y lleoedd degol yn eich gosodiadau pleidleisio. 0 lle degol yw’r rhagosodiad, ond gellir ffurfweddu hyn i ddangos 1 neu 2 le degol.
Y mis diwethaf, roeddem yn falch o groesawu derbynwyr ein Grant Addysg a Phrofiad y Myfyrwyr i ddigwyddiad.
Lansiwyd cronfa Grant Addysg a Phrofiad y Myfyrwyr llynedd yn ein Cynhadledd Addysg a Phrofiad y Myfyrwyr.
Nod y digwyddiad oedd darparu gwybodaeth am gynnydd diweddar i’n cydweithwyr ar y prosiectau a’u cefnogwyr, yn ogystal ag i’r panel. Roeddem yn rhannu llwyddiannau ac yn codi unrhyw heriau y mae ein cydweithwyr wedi dod ar eu traws.
Cafwyd cyflwyniad gan bob un o’r pedwar prosiect.
Isod y cewch grynodeb pob prosiect a’r ffeiliau PDF sy’n cyd-fynd â phob cyflwyniad.
Prosiect 1: Gardd Ffisig Ganoloesol Aber
Dan arweiniad Elizabeth New (Hanes a Hanes Cymru) gyda Sian Nicholas, Eleri Phillips, a phwyllgor llywio myfyrwyr. Nod y prosiect hwn yw creu amwynder awyr agored a fydd yn cefnogi addysg a hamdden i staff a myfyrwyr ar y campws. Mae’r prosiect yn ceisio cyfoethogi profiad dysgu myfyrwyr drwy fentora a chydweithredu ar ymchwil hanesyddol, garddio, a meithrin cyswllt â’r cyhoedd.
Prosiect 2: Datblygu Canolfan Cyfarpar Cynaliadwy i Fyfyrwyr.
Arweinir y prosiect hwn gan Emma Sheppard (Daearyddiaeth a Gwyddorau Daear) gyda Toni Beardmore, Eleri Phillips, Morgan Jones, Emma Butler-Wray, Hywel Griffiths, a Tom Holt.
Nod y prosiect hwn yw hybu hygyrchedd, cynhwysiant, a chynaliadwyedd yn Adran Daearyddiaeth a Gwyddorau Daear drwy ddatblygu ‘llyfrgell pethau’ y gall myfyrwyr eu benthyg a’u defnyddio.
Bydd y llyfrgell yn defnyddio adnoddau ail-law ond mewn cyflwr da, a bydd myfyrwyr yn gallu mynychu ‘caffis atgyweirio,’ a fydd yn sicrhau bod y llyfrgell yn gynaliadwy.
Tom Beardmore ac Eleri Phillips a gyflwynodd yn y digwyddiad. Gweler eu sleidiau isod:
Prosiect 4: Cyd-dynnu – cefnogi asesiadau gwaith tîm yn fwy effeithiol
Mae Scott Tompsett o Adran y Gwyddorau Bywyd yn cydweithio â Cal Walters-Davies a Caroline White o Wasanaethau Taith y Myfyriwr er mwyn dysgu beth yw’r anawsterau cyffredin i fyfyrwyr o ran gweithio mewn grwpiau.
Maent yn ymchwilio i ddulliau gweithio mewn grwpiau sy’n fwy hygyrch i fyfyrwyr niwroamrywiol.
Maent yn bwriadu datblygu cyfres o adnoddau i fyfyrwyr a’r staff dysgu er mwyn hwyluso gweithio mewn grwpiau’n well. Byddant yn eu profi mewn sawl modiwl.
Scott a gyflwynodd yn y digwyddiad; gweler sleidiau’r cyflwyniad isod.
Rydym yn sicr y byddwch yn cytuno mai prosiectau gwerthfawr yw’r rhain.
Gallwch glywed rhagor amdanynt yn 14eg Gynhadledd Addysg a Phrofiad y Myfyrwyr rhwng 08 a 10 Mis Medi.
Gallwch archebu’ch lle yn y gynhadledd nawr, ac mae’r alwad am gynigion bellach yn agor. Gellir dod o hyd i ragor o wybodaeth ar ein blog ni.
Rydym yn falch iawn o ddatgan y byddwn yn cynnal y Grantiau Addysg a Phrofiad y Myfyrwyr eto y blwyddyn nesaf. Cysylltir y grantiau â thema’r gynhadledd ac y byddant ar gael i’r cynadleddwyr.
Yn y diweddariad ym mis Ebrill, hoffem dynnu eich sylw at y gwelliannau Blackboard canlynol:
Aseiniadau
Dull cyflwyno ar gyfer Aseiniadau
Maint ffeil SafeAssign
Addasu graddau unigol mewn cyflwyniadau grŵp
Profion
Sgyrsiau DA
Trafodaethau
Cyhoeddiadau
Aseiniad Blackboard
Nodi’r dull cyflwyno ar gyfer Aseiniadau
Hyfforddwyr
Wrth greu neu olygu aseiniad, gall hyfforddwyr ddiffinio’r dull cyflwyno disgwyliedig i lywio sut mae myfyrwyr yn cyflwyno eu gwaith. Mae dewis dull penodol o gyflwyno yn symleiddio profiad y myfyriwr ac yn lleihau amwysedd ynghylch yr hyn sy’n ofynnol.
Gall hyfforddwyr ddewis un neu fwy o ddulliau cyflwyno disgwyliedig wrth ffurfweddu aseiniad:
Uwchlwytho Ffeil
Ychwanegu testun
Yn ddiofyn mae Llwytho ffeiliau i fyny ac ychwanegu testun ill dau wedi’u dewis.
Mae’r dull o gyflwyno a ddewiswyd i’w weld yn y gosodiadau aseiniad a’r manylion y mae myfyrwyr yn eu gweld. Gall hyfforddwyr newid y dull o gyflwyno a ddewiswyd hyd nes y bydd myfyrwyr yn dechrau cyflwyno eu hymdrechion.
Delwedd 1: Gall hyfforddwyr ddewis un neu fwy dull o gyflwyno wrth ffurfweddu aseiniad.
Myfyrwyr
Mae myfyrwyr yn cael gwybod am y dull disgwyliedig o gyflwyno ac yn gweld llif gwaith cyflwyno wedi’i optimeiddio ar gyfer y fformat hwnnw.
Mae cyflwyno ffeiliau yn dangos parth gollwng ffeiliau pwrpasol lle gall myfyrwyr uwchlwytho, gweld rhagolwg (pan fydd yn cael ei gefnogi), a thynnu ffeiliau.
Mae cyflwyno testun yn darparu profiad golygydd testun cyfoethog symlach heb opsiwn atodiad ffeil cyffredinol ac yn cynnwys mynediad i’r Farchnad Gynnwys ar gyfer offer a gefnogir.
Delwedd 2: Mae gan fyfyrwyr lif gwaith cyflwyno wedi’i optimeiddio ar gyfer y dull o gyflwyno a ddewiswyd.
Noder, os ydych chi’n defnyddio Blackboard ar gyfer aseiniadau Panopto, mae angen i chi alluogi Ychwanegu Testun.
Cynyddu terfyn maint ffeil SafeAssign i 25 MB ar gyfer Cyflwyno Uniongyrchol
Mae terfyn maint ffeil SafeAssign ar gyfer Cyflwyno Uniongyrchol wedi cynyddu i 25 MB Mae’r newid hwn yn cefnogi dogfennau mwy sy’n cynnwys delweddau, tablau, a fformatio cymhleth, gan leihau problemau cyflwyno i fyfyrwyr.
Mae cyflwyniadau presennol ac adroddiadau SafeAssign yn parhau i fod yn gwbl gydnaws, ac adolygwyd terfynau system cysylltiedig i sicrhau sefydlogrwydd parhaus.
Addasu graddau ar gyfer ymdrechion myfyrwyr unigol mewn cyflwyniadau grŵp
Mae Graddio Hyblyg wedi’i ymestyn i ganiatáu i hyfforddwyr addasu graddau ymgais ar gyfer myfyrwyr unigol o fewn cyflwyniad grŵp. Mae’r diweddariad hwn yn sicrhau bod graddau ar gyfer cyflwyniadau grŵp yn gallu adlewyrchu cyfraniad unigol pob myfyriwr yn gywir, hyd yn oed pan fo gwaith yn cael ei gyflwyno fel ymgais un grŵp.
Gall hyfforddwyr ddiystyru sgôr ymgais grŵp ar gyfer aelodau unigol y grŵp yn uniongyrchol o’r rhyngwyneb graddio. Mae’r rhyngwyneb yn nodi’n glir pan fo graddau’n wahanol ar draws aelodau’r grŵp, a gellir dileu addasiadau trwy adfer gradd myfyriwr i gyd-fynd â sgôr ymgais y grŵp.
Llun 1: Gall hyfforddwyr addasu graddau ar gyfer myfyrwyr unigol o fewn cyflwyniad grŵp.
Profion
Gwelliannau i gwestiynau amlddewis ac aml-ateb
Gweler isod am newidiadau i gwestiynau amlddewis ac aml-ateb:
Ar gyfer y cwestiwn amlddewis, mae nifer diofyn yr opsiynau ateb y gall myfyriwr eu dewis o 4 i 1 wedi’i addasu.
Wrth greu neu olygu cwestiwn amlddewis neu aml-ateb, gall hyfforddwyr newid nifer yr opsiynau ateb y gall myfyriwr eu dewis.
Mae labeli opsiynau ateb amlddewis yn nhrefn yr wyddor (A, B, C, CH) hefyd wedi’u hadfer.
Sgyrsiau DA
Defnyddio Terfyn ar gyfer Negeseuon
Gall hyfforddwyr nawr arwain hyd sgyrsiau a gefnogir gan DA, gan gynnwys Cwestiynau Socrataidd, trwy osod terfynau ar negeseuon. Mae’r rheolyddion hyn yn helpu myfyrwyr i ddeall pryd i orffen rhyngweithio a sicrhau bod sgyrsiau’n canolbwyntio ar y gweithgaredd dysgu arfaethedig.
Hyfforddwyr
Pan fydd hyfforddwyr yn ffurfweddu sgwrs DA, gallant osod cap ar nifer y negeseuon i reoli hyd y sgwrs.
Delwedd 1: Gosodiadau terfyn negeseuon ar gyfer sgwrs DA
Myfyrwyr
Mae myfyrwyr yn olrhain nifer yr ymatebion sy’n weddill yn ystod sgwrs trwy label deinamig. Mae’r label yn dangos eicon rhybudd pan fo dau ymateb ar ôl. Ar ôl i’r sgwrs gyrraedd y cap ar nifer y negeseuon, ni all myfyrwyr ychwanegu mwy o ymatebion. Mae’r terfyn negeseuon yn gosod disgwyliadau clir ar gyfer cyfranogiad a chwblhau.
Delwedd 2: Canllawiau negeseuon myfyrwyr yn ystod rhyngweithio gweithredol.
Trafodaethau
Adolygu’r ddwy set o ddyddiadau cyflwyno ar gyfer Trafodaethau ar draws sawl gwedd yn Blackboard
Mae Blackboard bellach yn dangos y ddwy set o ddyddiadau cyflwyno a gofynion cyfranogiad ar gyfer Trafodaethau ar draws meysydd allweddol y rhaglen. Mae’r gwelliant hwn yn adeiladu ar ychwanegiad diweddar o ail ddyddiad cyflwyno a gofyniad cyfranogiad. Mae gan hyfforddwyr a myfyrwyr ddisgwyliadau cliriach pan fônt yn edrych ar y manylion ynghylch Trafodaethau.
Hyfforddwyr a myfyrwyr
Pan fydd hyfforddwyr yn creu trafodaeth gyda dau ddyddiad cyflwyno a gofynion cyfranogiad, mae’r ddwy set o ofynion yn ymddangos ar dudalen Cynnwys y Cwrs, tudalennau Trafodaethau, gwedd y myfyrwyr a’r hyfforddwyr o’r Llyfr Graddau, a phanel dadansoddi Trafodaethau’r hyfforddwr. Gall myfyrwyr olrhain disgwyliadau trwy gydol y llif gwaith heb lywio’n ôl i’r drafodaeth ei hun.
Delwedd 1: Ar dudalen Cynnwys y Cwrs, dangosir dyddiadau cyflwyno a gofynion cyfranogiad. Ar gyfer pob pwynt mynediad ar gyfer Trafodaethau, dangosir dyddiadau cyflwyno a gofynion.
Ar y tudalennau Cynnwys y Cwrs a Thrafodaethau, mae’r ddau ddyddiad cyflwyno a’u gofynion yn ymddangos gyda’i gilydd fel canllaw cyflym.
Yng ngwedd Llyfr Graddau’r myfyriwr, mae’r ddau ddyddiad yn ymddangos.
Mae hyfforddwyr hefyd yn cael adran Dyddiadau Cyflwyno a Gofynion newydd yn y wedd raddio ar gyfer myfyriwr unigol. Mae’r adran hon yn dangos dyddiadau cyflwyno a chynnydd y myfyriwr o ran pob gofyniad.
Cyhoeddiadau
Trin delweddau fel dolenni mân-lun mewn negeseuon e-bost Cyhoeddiadau
Mae e-byst Cyhoeddiadau bellach yn dangos delweddau fel dolenni mân-lun yn hytrach nag URL hir. Mae’r diweddariad hwn yn rhoi rhagolwg cliriach i ddefnyddwyr o gynnwys y cyhoeddiad ac yn darparu llwybr uniongyrchol yn ôl i’r cyhoeddiad llawn yn Blackboard. Pan fydd defnyddwyr yn dewis mân-lun, mae’r system yn agor y cyhoeddiad gwreiddiol fel y gallant ei ddarllen gyda chyd-destun llawn.
Hyfforddwyr a myfyrwyr
Mae e-byst Cyhoeddiadau yn arddangos mân-lun bach ar gyfer pob delwedd y mae hyfforddwyr yn ei chynnwys mewn cyhoeddiad. Mae pob mân-lun yn cysylltu â’r cyhoeddiad yn Blackboard, felly mae defnyddwyr yn dychwelyd i’r cynnwys cyflawn yn hytrach nag agor y ffeil ddelwedd ar ei phen ei hun. Mae hyfforddwyr yn parhau i greu cyhoeddiadau yn yr un modd ag yr oeddent o’r blaen.
Delwedd 1: E-bost Cyhoeddiadau sy’n dangos delweddau fel dolenni mân-lun sy’n agor y cyhoeddiad yn Blackboard.
Os oes gennych unrhyw welliannau yr hoffech i Blackboard eu gwneud, cysylltwch â ni trwy eddysgu@aber.ac.uk.
Mae gennym bynciau ar niwroamrywiaeth a DA, niwroamrywiaeth a chyflogadwyedd, a gwella’r addysgu i fyfyrwyr niwroamrywiol ymhlith llawer o bynciau eraill.
Byddwn yn cynnal cyfres o weithdai yn y prynhawn y gall mynychwyr gofrestru i’w mynychu.
Mae’n bleser gennym gyhoeddi enillydd y Wobr Cwrs Eithriadol eleni.
Llongyfarchiadau i’n cyd-enillwyr:
Dr Christopher Phillips o’r adran Gwleidyddiaeth Ryngwladol am y cwrs buddugol: IP25320: Warfare after Waterloo: Military History 1815-1918
Dr Catrin Wyn-Edwards o’r adran Gwleidyddiaeth Ryngwladol am y cwrs buddugol: IPM3120: Race, (Im)mobility, and Incarceration.
Nododd y panel y meysydd isod o ran arferion eithriadol:
Ethos cymunedol a gweithgareddau lle bo myfyrwyr yn cyd-greu
Pecynnau seminar gyda chanllawiau clir a deunyddiau ychwanegol i ehangu ar y prif bwnc
Ethos y modiwl fel rhan o’r croesawu a chynefino
Strwythurau clir a hygyrch i’r modiwlau
Amrywiaeth o ffynonellau
Amrywiaeth o gyfleoedd asesu ac adborth
Ymarferion dewisol ar gyfer datblygu sgiliau ysgrifennu traethodau a meddwl yn feirniadol
Rhestr ddarllen wedi’i threfnu’n wahanol adrannau
Ymgorffori canlyniadau dysgu drwy gydol y cwrs
Llongyfarchiadau i’r rhai a dderbyniodd ganmoliaeth a chanmoliaeth uchel:
Dr Tristram Irvine-Fynn a Dr Hywel Griffiths, yr Adran Daearyddiaeth a Gwyddorau Daear, am y cwrs GS25520: Glacial and Fluvial Processes a Dr Lara Kipp, Astudiaethau Theatr, Ffilm a Theledu, am y cwrs FM22120: Production Design Skills.
Yn y 2 gwrs hyn fe gafwyd rhai arferion rhagorol, gan gynnwys gweithgareddau taith maes rithwir arloesol, mecanweithiau adborth myfyrwyr dienw, dylunio asesiadau dilys, ac eglurder ar ddefnyddio DA cynhyrchiol. Asesir y wobr ar sail pedwar maes:
Cynllun y Cwrs
Rhyngweithio a Chydweithio
Asesu
Cymorth i’r Dysgwyr
Roedd y cyrsiau o safon mor uchel, ac edrychwn ymlaen at rannu eu harferion â chi maes o law.
Llongyfarchiadau mawr i’r buddugwyr haeddiannol eleni.
Yn y diweddariad ym mis Mawrth, hoffem dynnu eich sylw at y gwelliannau Blackboard canlynol:
Diweddariadau i Brofion:
Graddio dienw yn ôl cwestiwn
Maes teitl cwestiwn wedi’i adleoli
Cwestiynau amlddewis ac aml-ateb credyd rhannol
Golygydd Cynnwys Cynorthwyydd Dylunio DA
Trafodaethau wedi’u Graddio
Cyfyngiadau ffeil Aseiniad Blackboard
Graddio dienw yn ôl cwestiwn ym Mhrofion Blackboard
Gall hyfforddwyr nawr raddio’n ddienw yn ôl cwestiwn yn ogystal â graddio’n ddienw yn ôl myfyriwr.
Wrth raddio cyflwyniadau prawf dienw yn y wedd cwestiwn, mae’r rhyngwyneb yn disodli enw, avatar, a chyfeirnod y myfyriwr gyda dynodwr dienw ac avatar gwag. Mae’r holl swyddogaethau sydd ar gael wrth raddio cyflwyniadau nad ydynt yn ddienw yn ôl cwestiwn hefyd ar gael wrth raddio’n ddienw. Pan fydd graddio dienw wedi’i alluogi, nid yw API cysylltiedig bellach yn dychwelyd gwybodaeth adnabod. Mae hyn yn berthnasol i’r Cwestiwn Traethawd.
Maes teitl cwestiwn wedi’i adleoli
Fe wnaethom symud y maes Teitl Cwestiwn o ddechrau’r llif gwaith ysgrifennu cwestiwn i’r gwaelod, o dan y maes Metadata cwestiwn . Mae symud y maes hwn yn sicrhau bod teitlau yn parhau i fod yn elfen metadata dewisol ac yn lleihau llwyth gwybyddol wrth greu cwestiynau.
Delwedd 1: Cyn y gwelliant hwn, roedd y maes Teitl Cwestiwn ar frig y llif gwaith ysgrifennu cwestiynau.
Delwedd 2: Nawr mae’r maes Teitl Cwestiwn ar waelod y llif gwaith ysgrifennu cwestiwn, o dan y maes Metadata cwestiwn .
Cyfyngiadau credyd rhannol wedi’u dileu ar gyfer Cwestiynau amlddewis ac aml-ateb
Fe wnaethom ddiweddaru’r system credyd rhannol ar gyfer cwestiynau Amlddewis ac Aml-ateb i ganiatáu i hyfforddwyr neilltuo gwerthoedd credyd heb y gofyniad bod yr holl werthoedd dynodedig yn dod i swm o 100%. Mae’r newid hwn yn cefnogi strategaethau graddio mwy hyblyg ac yn galluogi hyfforddwyr i gynrychioli lefelau amrywiol o ddealltwriaeth gysyniadol heb addasu gwerthoedd i gwrdd â chyfanswm sefydlog.
Mae’r system bellach yn caniatáu i hyfforddwyr fewnbynnu unrhyw werth credyd rhannol ar gyfer pob opsiwn o fewn ystod o –100% i +100%. Mae dilysu yn parhau i rybuddio hyfforddwyr os yw cyfanswm y gwerthoedd yn fwy na 100%, ond nid yw bellach yn rhwystro gosodiad y cwestiynau. Gall hyfforddwyr nawr hefyd nodi gwerthoedd credyd positif ar gyfer opsiynau nad ydynt wedi’u marcio fel yr ateb cywir. Dylai cyfanswm gwerth y credyd rhannol ar gyfer atebion cywir fod yn 100% o leiaf, a gall fod yn fwy na 100%. Mae marcio negyddol yn parhau i weithredu pan gaiff ei alluogi. Gall hyfforddwyr addasu gwerthoedd credyd yn ystod ailraddio hefyd.
Delwedd 1: Gall hyfforddwyr gael opsiynau ateb nad ydynt yn dod i swm o 100%.
Cynhyrchu Gwiriadau Gwybodaeth gyda DA
Fe wnaethom ehangu awduro â chymorth DA i gefnogi cynhyrchu Gwiriadau Gwybodaeth amlddewis o fewn Dogfennau. Mae’r gwelliant hwn yn caniatáu i hyfforddwyr greu asesiadau ffurfiannol just-in-time gan ddefnyddio cwestiynau a gynhyrchir gan DA yn seiliedig ar gynnwys eu Dogfen ac unrhyw ddeunyddiau cwrs a ddetholwyd.
Wrth fewnosod Gwiriad Gwybodaeth, cyflwynir dau opsiwn i hyfforddwyr nawr: Rhoi fy nghwestiwn neu Creu cwestiwn yn awtomatig. Mae dewis Creu cwestiwn yn awtomatig yn agor y panel Creu Cwestiwn yn Awtomatig , sy’n addasu’r panel Cwestiwn presennol a ddefnyddir mewn profion a banciau cwestiynau.
Wrth ddefnyddio’r dewis Creu cwestiwn yn awtomatig , gall hyfforddwyr ddiffinio mewnbynnau cynhyrchu gyda’r meysydd canlynol:
Maes testun disgrifiad
Dewisydd i ddewis eitemau cwrs i lywio cynhyrchu
Llithrydd lefel cymhlethdod gydag ystod o Isel i Uchel
Opsiynau uwch gan gynnwys dewisydd iaith allbwn
Baner wybodaeth sy’n nodi: “Cynnwys a gynhyrchir yn awtomatig yw hwn ac mae angen ei wirio am gywirdeb a rhagfarn.”
Mae’r system yn cynhyrchu pedwar cwestiwn amlddewis ar y tro. Mae pob cwestiwn a gynhyrchir yn cael ei arddangos gyda botwm radio fel y gall yr hyfforddwr ddewis un cwestiwn i’w ychwanegu at y Ddogfen. Yna gall yr hyfforddwr addasu’r cwestiwn, opsiynau ateb, ac adborth ar ôl ei fewnosod. Os yw’r hyfforddwr yn agor yr opsiwn Gwirio Gwybodaeth ond nad yw’n ychwanegu cwestiwn, mae’r bloc dalfan yn parhau i fod yn wag ac yn ymddwyn yn yr un modd â blociau cynnwys gwag eraill.
Mae’r holl gwestiynau yn cael eu cynhyrchu gan ddefnyddio cynnwys testun o’r Ddogfen yn unig. Bydd ystyried cyfryngau neu ffeiliau ychwanegol yn cael eu trin fel rhan o ddiweddariad yn y dyfodol.
Delwedd 1: Gall hyfforddwyr ddewis Rhoi fy nghwestiwn neu Cynhyrchu Cwestiwn yn Awtomatig wrth greu gwiriad gwybodaeth.
Delwedd 2: Ar ôl i’r system gynhyrchu cwestiynau, mae’r hyfforddwr yn dewis pa gwestiwn i’w ychwanegu at y Ddogfen. Ar ôl ychwanegu cwestiwn, gall hyfforddwyr olygu’r cwestiwn, opsiynau cwestiwn, a gosodiadau cwestiwn.
Defnyddio’r Cynorthwyydd Dylunio DA i awgrymu cynlluniau Dogfennau
Os ydych chi’n chwilio am ffyrdd y gallwch wneud eich Dogfennau Blackboard yn fwy apelgar yn weledol, defnyddiwch y Cynorthwyydd Dylunio DA i awgrymu cynlluniau Dogfennau.
Ewch i’ch Dogfen a chlicio i olygu’r cynnwys. Yna dewiswch yr eicon Cynorthwyydd Dylunio DA:
Delwedd 1: Eicon Cynorthwyydd Dylunio DA wedi’i amlygu.
Gallwch ddarparu rhagor o wybodaeth i ddiffinio’r cynllun:
Delwedd 2: Yr opsiynau sydd ar gael yn y cynllun.
Dewiswch Defnyddio cynllun i gadw’r cynllun a awgrymir.
Ychwanegu ail ofyniad cyfranogiad a dyddiad cyflwyno mewn Trafodaethau
Gall hyfforddwyr nawr ychwanegu ail ddyddiad cyflwyno gyda gofyniad cyfranogiad ar gyfer Trafodaethau. Mae’r diweddariad hwn yn adeiladu ar welliannau diweddar ar gyfer gofynion cyfranogiad trafodaeth ac yn cyflwyno dulliau cliriach i hyfforddwyr osod disgwyliadau ar gyfer gweithgarwch trafod. Mae myfyrwyr yn cael cyfarwyddyd tryloyw ar gyfer disgwyliadau trafod, a dangosyddion cynnydd ar gyfer eu cyfranogiad.
Hyfforddwyr
Gall hyfforddwyr osod faint o negeseuon ac atebion y mae’n rhaid i fyfyrwyr eu cwblhau ar draws dau ddyddiad cyflwyno.
Rhaid dewis yr opsiwn Trafodaeth graddau i ychwanegu dyddiadau cyflwyno a gofynion cyfranogiad. Rhowch amser a dyddiad o dan Dyddiad Cyflwyno a nodi gofynion cyfranogiad. Mae dewis Ail Ddyddiad Cyflwyno yn ychwanegu dyddiad cyflwyno arall gyda’i ofynion ei hun.
Gall hyfforddwyr wahardd negeseuon neu atebion myfyrwyr ar ôl y dyddiad cyflwyno terfynol trwy ddewis Atal gweithgaredd trafod ar ôl y dyddiad cyflwyno diwethaf.
Delwedd 1: Gall hyfforddwyr nawr ychwanegu ail ddyddiad cyflwyno ar gyfer Trafodaethau Gallant hefyd nodi nifer a math o negeseuon neu atebion y mae’n ofynnol i fyfyriwr eu gwneud.
Myfyrwyr
Pan fydd myfyrwyr yn agor trafodaeth, fe ddônt o hyd i ddau ofyniad cyfranogiad clir gyda dyddiadau cyflwyno ar wahân. Wrth iddynt bostio ac ateb, mae dangosyddion cynnydd yn diweddaru mewn amser real.
Gall myfyrwyr gwblhau gofynion mewn unrhyw drefn, ond ni fydd cyfraniadau ar ôl dyddiad cyflwyno yn cyfrif tuag at y gofyniad hwnnw. Pan fydd yr holl ofynion wedi’u bodloni, caiff y drafodaeth ei marcio fel ‘wedi’i chwblhau’ ac mae’r Olrhain Cynnydd yn diweddaru.
Delwedd 2: Mewn Trafodaeth, gall myfyriwr ddod o hyd i ddyddiadau cyflwyno yn yr adran Manylion a Gwybodaeth yn yr aseiniad trafodaeth.
Cyfyngiadau ffeil Aseiniad Blackboard
Rydym wedi cynyddu’r uchafswm maint ffeil SafeAssign a gefnogir o 10 MB i 25 MB. Mae’r gwelliant hwn yn cefnogi llifoedd gwaith academaidd modern lle mae myfyrwyr yn aml yn cyflwyno dogfennau mawr. Mae’r cynnydd o ran maint y ffeil yn berthnasol i aseiniadau a phrofion. Bydd Cyflwyno Uniongyrchol yn cael ei gynnwys mewn diweddariad yn fuan.
Os oes gennych unrhyw welliannau yr hoffech i Blackboard eu gwneud, cysylltwch â ni trwy eddysgu@aber.ac.uk.
