Mudiadau Blackboard Learn Ultra:  Gwybodaeth Bwysig

Fel rhan o brosiect Blackboard Learn Ultra, rydym bellach yn troi ein sylw at Fudiadau yn barod ar gyfer Medi 2024. 

Safleoedd ar Blackboard yw Mudiadau sydd at ddibenion anacademaidd.   Yr un yw eu swyddogaeth â Chyrsiau Blackboard a gellir eu defnyddio i roi gwybodaeth, hyfforddiant ar-lein, a mynediad at ddeunyddiau. Yn wahanol i Gyrsiau, mae Mudiadau yn cael eu creu heb unrhyw dempled.   Mae gan Fudiadau yr un nodweddion a swyddogaethau ymarferol â Chyrsiau. 

Mae yna 3 math o Fudiad: 

Mudiadau Adrannol

Mae gan bob adran 3 Mudiad adrannol: 1 ar gyfer myfyrwyr Israddedig, 1 ar gyfer myfyrwyr Uwchraddedig, ac 1 ar gyfer staff Adrannol.  Mae’r rhain yn cael eu creu yn awtomatig.

Mudiadau Pwrpasol a Mudiadau Hyfforddi

Mudiadau yw’r rhain y mae unigolion wedi gofyn amdanynt.  Gellir eu creu i gynnwys ffrydiau awtomatig, megis mathau o fyfyrwyr, myfyrwyr ar gynlluniau astudio penodol, neu aelodau o staff mewn adran benodol.  Mae gan rai o’r Mudiadau hyn becynnau hyfforddi y gofynnir i ni eu gwneud.

Mudiadau Ymarfer

Mae’r rhain yn unigol ar gyfer pob aelod o staff ac nid oes myfyrwyr wedi cofrestru arnynt.  Fel rhan o’r newid i Ultra, rydym wedi creu Mudiad Ymarfer Ultra personol i bob aelod o staff.

Wrth i ni symud i Blackboard Learn Ultra i Fudiadau, rydym wedi gweithio ar bolisi Mudiadau newydd sy’n amlinellu’r mathau o weithgareddau y gellir defnyddio Mudiadau ar eu cyfer yn ogystal â’u cyfnod cadw.  Cymeradwywyd y polisi newydd hwn gan y Pwyllgor Gwella Academaidd ar 7 Chwefror a gellir ei weld ar ein tudalennau gwe.

Mudiadau Adrannol

Bydd Mudiadau Ultra Adrannol Newydd yn cael eu creu yn fuan ond ni fyddant ar gael i fyfyrwyr tan fis Medi 2024. 

Bydd gan bob adran Fudiad ar wahân ar gyfer myfyrwyr Israddedig, Uwchraddedig, a Staff yn eu hadran.   

Mae’r rhain ar ffurf:  

DEPT-[llythyren adrannol]-UG (e.e. DEPT-N-UG) 

Bydd myfyrwyr newydd ac aelodau newydd o staff yn cael eu ffrydio’n awtomatig i’r Mudiad unwaith y byddant wedi actifadu eu cyfrif.    Unwaith y bydd y Mudiadau hyn ar gael, byddwn yn cysylltu â Chyfarwyddwyr Adrannol Dysgu ac Addysgu, Cofrestryddion y Cyfadrannau, a Phenaethiaid Adran i helpu i hwyluso’r symud i Fudiadau Ultra.

Mudiadau Pwrpasol a Mudiadau Hyfforddi

Mudiadau yw’r rhain y gofynnwyd amdanynt yn unigol at ddiben penodol.  Nid ydym erioed wedi dileu Mudiad o’r blaen (oni bai y gofynnwyd am hyn). 

Fel rhan o’r gwaith hwn, byddwn yn: 

  1. Rhwystro mynediad i’r holl Fudiadau pwrpasol nad ydynt wedi cael eu defnyddio am 3 blynedd gyda’r bwriad o ddod â’r Mudiad i ben.
  2. Cysylltu â’r rhai sy’n dal i fod â chyfrifoldeb am Fudiadau sy’n bodoli eisoes i weld a oes eu hangen a hwyluso’r newid i Ultra ar gyfer y Mudiadau hyn. 

Mudiadau Ymarfer

Ar hyn o bryd mae gan aelodau o staff fynediad at ddau Fudiad Ymarfer – un yn Blackboard Original ac un yn Ultra. 

Byddwn yn dod â Mudiadau Blackboard Originial i ben ym mis Medi 2024.   Rhaid i gydweithwyr gopïo unrhyw ddeunyddiau y maent am eu cadw i fersiwn Ultra y Mudiad. 

Os oes gennych unrhyw gwestiynau am Fudiadau, cysylltwch â’r Uned Datblygu Dysgu ac Addysgu (eddysgu@aber.ac.uk). 

Diweddariad Blackboard Learn Ultra: Building Blocks yn dod i ben

Ar 31 Rhagfyr 2023, mae Blackboard yn dod â Building Blocks i ben fel datrysiad integreiddio ar gyfer offer trydydd parti ac ni fyddant yn gweithredu mwyach yn Blackboard. Ni fydd hyn yn effeithio ar gyrsiau Blackboard Learn Ultra.

Er ein bod wedi defnyddio Building Blocks yn y Blackboard Learn gwreiddiol (cyrsiau a gynhaliwyd cyn 2023-24), nid yw eich Cyrsiau Blackboard Learn Ultra yn eu defnyddio.

Building Blocks yw pecynnau meddalwedd sydd wedi’u gosod i integreiddio offer megis Panopto a Turnitin (ymhlith llawer o rai eraill) i Blackboard. Dros y ddwy flynedd ddiwethaf rydym wedi uwchraddio’r offer hyn i integreiddiadau LTI (Learning Tools Interoperability). Dod â Building Blocks i ben oedd un o’r gyrwyr ar gyfer symud i Blackboard Learn Ultra.

Mae LTI yn cynnig mynediad i ddiweddariadau rheolaidd, atgyweirio namau, a datblygiadau a gwelliannau parhaus a gynlluniwyd ar gyfer Blackboard Ultra. Roedd angen uwchraddio Building Blocks â llaw ac anaml iawn yr oedd yn cael ei ddiweddaru wrth i’r dull hwn o integreiddio agosáu at ddod i ben.

Mae’r Uned Datblygu Dysgu ac Addysgu wedi gwneud profion helaeth i sicrhau y bydd y newid hwn yn cael cyn lleied o effaith â phosibl ar gyrsiau Blackboard Learn Ultra cyfredol.

Byddwn yn ymgymryd â’r gwaith o analluogi Building Blocks ar ddydd Mawrth 12 Rhagfyr yn ystod cyfnod cynnal a chadw rheolaidd GG ar fore Mawrth i baratoi ar gyfer dod â hwy i ben yn derfynol.

Os ydych chi’n cael unrhyw broblemau, cysylltwch ag eddysgu@aber.ac.uk.

Llif Gwaith Aseiniad Panopto yn Blackboard Learn Ultra

Yn ein neges flog flaenorol amlinellwyd rhai o’r newidiadau i Panopto wrth i ni symud i Blackboard Learn Ultra.

Yn y neges flog hon byddwn yn amlinellu’r newidiadau i ddefnyddio Panopto ar gyfer Aseiniadau. Defnyddir Aseiniadau Panopto i fyfyrwyr gyflwyno recordiad neu gyflwyniad.

Yn rhan o’r newid hwn, rydym yn argymell:

  1. Eich bod yn Creu Aseiniad Blackboard
  2. Bod myfyrwyr yn cyflwyno drwy Blackboard Assignment ac yn uwchlwytho drwy’r adnodd cyflwyno Panopto

Y manteision i’r llif gwaith newydd hwn yw:

  1. Mae’r llif gwaith ar gyfer cyflwyno a marcio yn haws
  2. Mae marciau ac adborth yn mynd yn awtomatig i’r Llyfr Graddau
  3. Mae myfyrwyr yn cael derbynneb e-bost ar gyfer eu cyflwyniad

Er mwyn cefnogi staff gyda’r broses hon, mae gennym ganllaw Aseiniad Panopto sy’n mynd â chi drwy osod yr aseiniad, cyflwyniad y myfyrwyr, a marcio ar ein tudalennau gwe Cipio Darlithoedd.

Mae gennym hefyd gwestiwn cyffredin ar gyfer staff a myfyrwyr.

Os oes gennych unrhyw gwestiynau, cysylltwch â’r Uned Datblygu Dysgu ac Addysgu (eddysgu@aber.ac.uk).

Diweddariad Panopto ar gyfer Staff: Medi 2023

Fel rhan o brosiect Blackboard Ultra ehangach, mae integreiddiad Panopto wedi’i uwchraddio i weithio gyda Blackboard Ultra. Mae hyn wedi rhoi cyfle i ni wneud rhai newidiadau a gwelliannau.

Mynediad i Panopto

Gallwch nawr gael mynediad i weinydd Panopto trwy Panopto.aber.ac.uk

Ffolderi Panopto

Mae ffolderi Panopto bellach wedi’u trefnu yn ôl y flwyddyn academaidd.

Mae staff wedi gofyn sawl gwaith bod eu ffolderi Panopto ar gyfer eu cyrsiau Blackboard yn cael eu trefnu yn ôl blwyddyn academaidd yn hytrach nag fel rhestr hir. Rhoddodd y gwaith uwchraddio gyfle i ni ailstrwythuro ein ffolderi yn ôl y gofyn.

Bydd ffolderi blwyddyn lefel uchaf yn ymddangos yn llwyd, ond bydd gennych fynediad i’ch ffolderi Panopto o fewn y ffolderi hyn o hyd.

Pan fyddwch chi’n agor recordydd Panopto mewn ystafell addysgu

Gallwch naill ai ddod o hyd i’r ffolder Panopto yr hoffech recordio ynddi drwy’r ffolderi neu chwilio am y ffolder Panopto yr ydych am recordio ynddi.

I ddod o hyd i’r ffolder Panopto yr ydych am recordio ynddi drwy’r ffolderi:

  • Cliciwch ar y botwm cwymplen yn y maes Folder.
  • Cliciwch ddwywaith ar ffolder blwyddyn academaidd i’w ehangu.
    or
  • Cliciwch ar y saeth cwymplen i’r chwith o’r ffolder blwyddyn academaidd i’w ehangu.
  • Dewiswch y ffolder Panopto yr hoffech recordio ynddi.
gif animeiddiedig o gael mynediad i ffolder Panopto yn y Recordydd Panopto.

I chwilio am y ffolder Panopto yr hoffech recordio ynddi.

  • Yn y maes Folder dechreuwch deipio cod modiwl neu enw’r ffolder Panopto yr ydych am recordio ynddi
  • Dewiswch y ffolder yr hoffech recordio ynddi.
gif animeiddiedig o gael mynediad i ffolder Panopto drwy ddefnyddio’r adnodd chwilio yn y Recordydd Panopto.

Rhannu recordiadau Panopto o flynyddoedd blaenorol.

I rannu recordiadau Panopto o ffolderi Panopto blynyddoedd blaenorol, copïwch y recordiadau i ffolder blwyddyn gyfredol y cwrs. Mae hyn yn rhoi mynediad i bob myfyriwr sydd wedi cofrestru ar flwyddyn gyfredol y cwrs yn Blackboard i weld y recordiadau. Gweler y Cwestiynau Cyffredin hwn.

My Folder

Erbyn hyn mae gan bawb ffolder yn Panopto o’r enw My Folder y gallant recordio ynddi. Yn y Recordydd Panopto gellir dod o hyd iddi o dan Quick Access.

Mae My Folder yn ddefnyddiol ar gyfer recordiadau nad yw staff neu fyfyrwyr eisiau eu rhannu ag eraill ar unwaith neu pan na allant ddod o hyd i ffolder addas i recordio ynddi.

Gellir symud recordiadau o My Folder i ffolder Panopto arall yn ddiweddarach. I gopïo neu symud recordiad Panopto Gweler y Cwestiwn Cyffredin hwn.

Blackboard Ally

Mae’r Uned Datblygu Dysgu ac Addysgu yn falch o gyhoeddi bod y Wasanaethau Gwybodaeth wedi caffael Blackboard Ally fel rhan o’r symud i Blackboard Learn Ultra.

Mae Blackboard Ally yn integreiddio i’n hamgylchedd Blackboard Learn Ultra ac yn canolbwyntio ar wneud cynnwys digidol yn fwy hygyrch.

Ar gyfer cydweithwyr sy’n creu cynnwys, bydd modd i chi newid hygyrchedd eich cynnwys. Mae hyn yn golygu y bydd eich cynnwys yn fwy hygyrch i dechnolegau cynorthwyol, megis darllenwyr sgrin.

Mantais arall Blackboard Ally yw y gellir lawrlwytho cynnwys mewn sawl fformat. Mae hyn yn golygu y gellir trosi eich nodiadau darlith, PowerPoint a dogfennau eraill i lawer o fformatau gwahanol, gan gynnwys:

  • Darllenwyr ymgolli
  • Ffeiliau sain
  • Braille electronig

Nid oes angen gwneud unrhyw beth i alluogi Ally ar eich cwrs. Bydd yn cael ei alluogi’n awtomatig ddydd Llun 11 Medi ar Gyrsiau 2023-24 ymlaen a Mudiadau.

Os hoffech gael rhagor o wybodaeth am greu deunyddiau dysgu hygyrch, edrychwch ar ein hadnoddau.

Am fwy o wybodaeth am ddefnyddio Blackboard Ally, edrychwch ar ein Cwestiynau Cyffredin i staff neu fyfyrwyr.

Newidiadau i’r ategyn PowerPoint Vevox

Mae Vevox, adnodd pleidleisio a gefnogir gan y Brifysgol, wedi diweddaru ei ategyn PowerPoint.

O fis Medi 2023, dylai cydweithwyr sy’n defnyddio’r ategyn ddefnyddio’r fersiwn diweddaraf.

Gweler ein Cwestiwn Cyffredin am wybodaeth ynghylch sut i ddefnyddio’r ategyn PowerPoint newydd.

Yn ein neges flog ddiweddar, gwnaethom ysgrifennu am y cynhyrchydd cwestiynau deallusrwydd artiffisial newydd.

Os yw Vevox yn newydd i chi yna edrychwch ar ein deunyddiau cymorth a’n negeseuon blog blaenorol.

Byddwn hefyd yn cynnal sesiwn hyfforddi ddydd Llun 18 Medi, 14:00-15:00. Cynhelir y sesiwn hon gan gydweithwyr o Vevox. Archebwch eich lle ar-lein.

Mae Vevox yn ffordd wych o sicrhau bod eich addysgu yn rhyngweithiol ac yn datblygu dysg y myfyrwyr.

Awst 2023: Diweddariad Blackboard Learn Ultra

Un o fanteision symud i Blackboard Learn Ultra yw’r gwelliannau cynyddol i’r amgylchedd dysgu rhithwir.

Yn y blogbost hwn, byddwn yn amlinellu rhywfaint o’r nodweddion newydd sydd ar gael yn y diweddariad y mis hwn.

1.   Grwpiau

Mae’r lleoliad i reoli’r nodwedd Grwpiau wedi newid. Gallwch gael mynediad at hwn yn uniongyrchol o’r ddewislen ar frig eich cwrs:

sgrinlun o eitem dewislen gyda grwpiau wedi’i amlygu

Gweler Canllawiau grwpiau i gael rhagor o wybodaeth.

2.   Delweddau ar gyfer Modiwlau Dysgu

Nawr gallwch ychwanegu delweddau at Fodiwlau Dysgu.

delwedd o Fodiwl Dysgu gyda delwedd

Mae Modiwlau Dysgu yn cynnig ffordd i chi drefnu’ch cynnwys. Am fwy o wybodaeth, gweler Canllaw Modiwlau Dysgu.

3.   Gwiriwr Hygyrchedd Ultra

Er mwyn sicrhau bod eich cynnwys mor hygyrch â phosibl, defnyddiwch y gwiriwr hygyrchedd.

Sgrinlun o gyfrifiadur Disgrifiad a gynhyrchir yn awtomatig.

delwedd o ddogfen yn cael ei chreu gyda'r sgôr gwiriwr hygyrchedd wedi’i amlygu

Wrth i chi greu eich cynnwys, cynhyrchir eich sgôr hygyrchedd i’ch hysbysu am unrhyw newidiadau y gallech eu gwneud o bosibl.

4.   Graddio Profion Hyblyg

O ran graddio profion, gallwch bellach raddio yn ôl cwestiwn neu fyfyriwr yn Ultra. Gweler Canllawiau profion Blackboard a Graddio hyblyg i gael rhagor o wybodaeth.

Am ddiweddariadau eraill y mis hwn, edrychwch ar Nodiadau rhyddhau Blackboard.

Os oes gennych unrhyw gwestiynau am ddefnyddio unrhyw un o’r nodweddion hyn neu Blackboard Learn Ultra, cysylltwch â ni eddsygu@aber.ac.uk.

Dogfennau Cydweithredol ar gael yn Blackboard Ultra

Icon Blackboard Ultra

Un o’r gwelliannau newydd gwych sydd gennym yn Blackboard Ultra yw’r gallu i gynnwys dogfennau cydweithredol.

I’r rhai ohonom a wnaeth lawer o’n gwaith dysgu ar-lein yn ystod pandemig Covid, byddwch yn cofio inni glodfori manteision llwytho dogfen gydweithredol yn y sgwrs. Rydym wedi bod yn gweithio ar alluogi hyn yn ein Cyrsiau Blackboard ac rydym yn falch o ddweud bod y nodwedd hon ar gael i chi ei defnyddio yn eich cyrsiau ar gyfer 2023-24.

Mae hyn yn golygu y bydd eich myfyrwyr yn gallu cydweithio y tu hwnt i’r ystafell ddosbarth, ar Blackboard, yn eu hamser eu hunain. Mae 3 math o ddogfen ar gael i fyfyrwyr gydweithio arnynt:

  1. Word
  2. PowerPoint
  3. Excel

Byddwn ni’n defnyddio’r dogfennau cydweithredol ar gyfer dewisiadau eraill yn lle blogiau a wicis. Ond, os ydych chi eisiau i’ch myfyrwyr lunio mapiau meddwl, creu syniadau, neu adeiladu ar sail eu nodiadau ei gilydd, edrychwch ar y dogfennau cydweithredol. Gallech hefyd eu defnyddio i gael myfyrwyr i gofrestru ar gyfer grwpiau. Gallwch ddefnyddio’r nodwedd grŵp mewn cyrsiau Ultra i gyfyngu eitem i fyfyriwr penodol neu grŵp penodol o fyfyrwyr.  Hoffech chi wybod sut i wneud hynny? Edrychwch ar ganllawiau Blackboard ar Microsoft OneDrive a dogfennau cydweithredol.

Tynnu Turnitin Building Block yn ôl

Yn ystod haf 2022 symudon ni i fersiwn newydd o Turnitin. Gan fod cefnogaeth i’n fersiwn blaenorol o Turnitin bellach wedi dod i ben, caiff y fersiwn hanesyddol (a elwir yn Turnitin Building Block) ei dynnu’n ôl ar 31 Awst 2023.

Mae hyn yn golygu na fydd staff a myfyrwyr bellach yn gallu cael gafael ar aseiniadau sydd wedi’u marcio.

Dylai myfyrwyr lawrlwytho a chadw unrhyw aseiniadau hanesyddol (cyn blwyddyn academaidd 2022-23).

Dylai staff gysylltu â’r Uned Datblygu Dysgu ac Addysgu (eddysgu@aber.ac.uk) os byddant yn dal i fod angen cael gafael ar aseiniadau Turnitin yn Building Block at ddibenion marcio.

Er na fydd modd i chi gael gafael ar yr aseiniadau a farciwyd, bydd yr Uned Datblygu Dysgu ac Addysgu yn dal i allu gofyn amdanynt drwy gymorth Turnitin. Os bydd angen hyn arnoch ar ôl 31 Awst 2023, cysylltwch â’r Uned Datblygu Dysgu ac Addysgu (eddysgu@aber.ac.uk).  

Blackboard Ultra: Trafodaethau â Chyfarwyddwyr Dysgu ac Addysgu

Blackboard Ultra icon

Ar 1 a 2 Mawrth, cyfarfu’r Uned Datblygu Dysgu ac Addysgu â Chyfarwyddwyr Dysgu ac Addysgu yr Adrannau i roi’r wybodaeth ddiweddaraf iddynt am brosiect Blackboard Ultra a thrafod ein cynlluniau ar gyfer hyfforddiant, sut y gallwn fynd i’r afael â heriau, a’r gefnogaeth sydd ei hangen ar gyfer prosiect Ultra.

Gellir lawrlwytho sleidiau’r sesiwn o’r ddolen hon.

Mae’r sleidiau’n cynnwys diweddariad ar amserlen y prosiect, yr hyn y bydd angen i gyd-weithwyr academaidd ei wneud, a chyflwyniad i’n trefn hyfforddi.

Crynodeb o’r drafodaeth

  • Cyswllt er mwyn cael cymorth – os ydych yn cael unrhyw anawsterau wrth ddefnyddio offer e-ddysgu cysylltwch ag eddysgu@aber.ac.uk a byddwn yn fwy na pharod i’ch helpu.
  • Ychwanegu dolenni at restrau darllen a Panopto – Bydd yn rhaid i aelodau o staff ychwanegu’r dolenni hyn at eu modiwlau. Nid oes modd gwneud hyn yn awtomatig ar hyn o bryd, ond byddwn yn parhau i geisio canfod ffyrdd o wneud hynny.
  • Bydd adrannau’n cael dewis a ydynt eisiau sesiwn hyfforddi wyneb yn wyneb ynteu un ar-lein.
  • Bydd yr uned yn parhau i gynnig hyfforddiant ar ddefnyddio Ultra dros yr haf ac ar ddechrau’r flwyddyn academaidd newydd
  • Bydd cyd-weithwyr academaidd yn gallu gweld a chopïo deunydd o fodiwlau’r gorffennol – y cyfnod cadw presennol yw 5 mlynedd + y flwyddyn bresennol.
  • Os oes modd, dylai cyd-weithwyr ddefnyddio nodweddion golygu testun Blackboard i sicrhau bod eu cynnwys mor hygyrch â phosibl.
  • Bydd rhestr wirio yn cael ei pharatoi fel y gall cyd-weithwyr wirio eu bod wedi gwneud popeth sydd ei angen wrth adeiladu eu modiwlau.
  • Byddai cyd-weithwyr yn hoffi cael negeseuon cyson gan y Gwasanaethau Gwybodaeth am y prosiect.
  • Bydd sesiynau hyfforddiant yn cael eu cynnig i bob tîm yn y Gofrestrfa yn ogystal ag i arholwyr allanol a champysau rhyddfraint.
  • Bydd y negeseuon cyfathrebu a’r dull gweithredu yn tanlinellu manteision symud i Ultra ac yn rhoi rhestr o’r nodweddion newydd.
  • Os oes modd, bydd deunyddiau fideo yn cael eu creu.

Os oes gennych unrhyw gwestiynau neu bryderon, neu os hoffech siarad â ni am agwedd benodol ar eich cwrs, cysylltwch â ni ar eddysgu@aber.ac.uk.