Blackboard Ultra: Trosolwg o’r Dewisiadau Eraill yn lle Blog

Blackboard Ultra icon

Mae’r postiad blog hwn yn amlinellu’r datrysiadau y mae’r Uned Datblygu Dysgu ac Addysgu yn gweithio arnynt ar gyfer gweithgareddau Blog. Ar ôl rhoi tro ar y datrysiadau hyn, byddwn yn gweithio ar ddarparu cyfarwyddyd i gydweithwyr.

Y Cefndir

Mae Blogiau yn offer cydweithio a ddefnyddir ar gyfer nifer o weithgareddau a asesir a gweithgareddau na chaiff eu hasesu ym Mhrifysgol Aberystwyth.

Nid yw’r offer ar gael ar hyn o bryd yn Blackboard Ultra (er gwaethaf ein ceisiadau i’w ddiwygio) ac nid yw ar fap datblygu Blackboard.

Mae anargaeledd yr offer Blog wedi’i gynnwys ym mhob rhan o’r broses o wneud penderfyniadau i dynnu sylw at hyn fel risg wrth symud i Blackboard Ultra.

Mae union natur blogiau yn rhoi cyfle i fyfyrwyr fyfyrio ar eu dysgu, trefnu eu meddyliau a’u syniadau’n gronolegol, a rhoi sylwadau ar negeseuon y naill a’r llall.

Er nad oes blogiau yn Ultra, mae dau ddarn o offer cyfrannu ac ymgysylltu cwbl integredig a fydd yn cynnig dewisiadau eraill: Dyddlyfrau a Thrafodaethau.

Dewis 1: Defnyddio’r offer Dyddlyfr

Er nad yw blogiau’n bodoli yn Blackboard Ultra, mae’r offer dyddlyfr yn parhau. Defnyddir dyddlyfrau mewn ffordd debyg i flogiau ond maent yn breifat rhwng tiwtoriaid cwrs a myfyrwyr. Os gall y gweithgaredd weithredu heb wneud negeseuon myfyriwr yn weladwy i bawb, rydym yn argymell defnyddio’r offer hwn.

Gallwch gael trosolwg o’r offer dyddlyfr trwy wylio hwn Tiwtorial trosolwg dyddlyfr.

Dewis 2: Defnyddio’r offer Trafodaethau

Os oes angen elfen ryngweithiol rhwng myfyrwyr ar y gweithgaredd, rydym yn argymell defnyddio’r teclyn trafod. Yma gallwch greu edefyn, trefnu eich trafodaethau drwy ffolderi, gosod y trafodaethau i’w graddio, annog cyfranogiad myfyrwyr drwy beidio ag edrych ar yr edefyn nes bod y myfyrwyr wedi cwblhau eu postiad cychwynnol.

I gael syniad ynglŷn â sut mae trafodaethau’n gweithio, edrychwch ar hwn fideo arddangos.

Er bod yr offer bwrdd trafod wedi newid, mae ein hegwyddorion ar ddyluniad byrddau trafod ac ymgysylltiad yn aros yr un fath. Edrychwch ar ein neges flog dyluniad bwrdd trafod i gael awgrymiadau a chwestiynau i chi ofyn i’ch hunain wrth ddylunio’r gweithgaredd.

Dewis 3: Defnyddio offer blogio WordPress

Er ein bod yn argymell bod gweithgarwch y bwrdd trafod yn aros ar Blackboard er mwyn sicrhau y gall ymgysylltiad ac asesiad myfyrwyr barhau, mae yna declyn blogio arall a gefnogir gan y Brifysgol: WordPress. Os ydych chi’n meddwl mai WordPress yw’r unig ddewis i chi, rydyn ni’n argymell eich bod chi’n cysylltu â ni’n gyntaf i drafod eich gweithgaredd ac yna fe allwn ni roi cyngor pellach (eddysgu@aber.ac.uk).

Astudiaethau Achos Offer Rhyngweithiol Blackboard – Byrddau Trafod

Mae’n bleser gennym gyflwyno’r astudiaeth achos gyntaf ar ddefnyddio offer rhyngweithiol Blackboard, sef defnyddio byrddau trafod gan Dr Martine Garland o Ysgol Fusnes Aberystwyth.

Roedd byrddau trafod felly yn ffordd o ail-greu’r drafodaeth y gallem fod wedi’i chael yn y dosbarth, ac yn sgil hynny fe gafwyd dros 900 o bostiadau yn ystod y semester.’

Pa offer ydych chi’n ei ddefnyddio a sut?

Rwy’n defnyddio byrddau trafod ar fodiwl marchnata craidd blwyddyn 1af gyda 97 o fyfyrwyr. Caiff y byrddau trafod eu defnyddio mewn ffordd strwythuredig iawn i roi cyfle i fyfyrwyr gymhwyso theori, model neu fframwaith y maen nhw newydd ddysgu amdano. Yn sgil y dull cyfunol y dechreuwyd ei ddefnyddio mewn ymateb i Covid-19, mi sylwais nad oedd myfyrwyr yn astudio’r cynnwys a recordiwyd yn ei drefn addas, ac nid yn yr wythnos y bwriadwyd iddynt astudio’r pwnc. Roedd hyn yn golygu ei bod yn anodd defnyddio’r sesiynau byw yn MS Teams i wneud ymarferion pwnc-benodol a chreu dadl gan nad oedd llawer o fyfyrwyr wedi astudio’r pwnc eto. Roedd byrddau trafod felly’n ffordd o ail-greu’r drafodaeth y gallem fod wedi’i chael yn y dosbarth, ac yn sgil hynny fe gafwyd dros 900 o bostiadau yn ystod y semester.

Pam wnaethoch chi ddefnyddio’r offer hwn?

Dewisais yr offer hwn gan ei fod yn rhwydd iawn ei ymgorffori yn y strwythur dysgu wedi’i recordio a chyfeirio myfyrwyr ato ar yr adeg berthnasol yn eu hastudiaethau. Roedd gan bob darlith a recordiwyd dri ‘phwynt trafod’ wedi’u cynllunio i gyflawni deilliannau dysgu yn ymwneud â chymhwyso dysgu. Ar ôl gweithio trwy gynnwys dysgu ar-lein ar bwnc, gofynnai’r pwynt trafod iddynt rannu eu profiad neu enghraifft berthnasol, a dechrau sgwrs ddyfnach am gymhwyso damcaniaeth i’r byd go iawn.

Sut wnaethoch chi gynllunio’r gweithgarwch hwn yn defnyddio’r offer hwn?

Yn PowerPoint y ddarlith a recordiwyd, defnyddiais eicon cyson i nodi trafodaeth, yna cynnwys cyfarwyddiadau y dylent oedi’r fideo, gwneud rhai nodiadau, yna pan fyddant wedi gorffen y ddarlith, mynd i’r ‘gofod trafod’ a rhannu eu meddyliau.

Mi wnes i hefyd ddefnyddio swyddogaeth y bwrdd trafod i osod a derbyn gweithgareddau ‘tasg gydweithredol’. Fe allen nhw ddarllen y briff ar frig yr edefyn, ac yna postio allbynnau eu grwpiau yn yr edefyn. Yr enw arno oedd ‘Safle cydweithredu’ ond defnyddio offer y bwrdd trafod yr oedd.

Beth yw barn myfyrwyr am yr offer hwn?

Rwy’n credu ei fod yn gymysg, wnaeth rhai myfyrwyr ddim cymryd rhan o gwbl, er i’r mwyafrif wneud hynny (cofiwch eu bod yn cael marciau am gymryd rhan ac ymgysylltu). Cyfeiriodd sawl myfyriwr at y byrddau trafod yn eu hadborth yn yr holiadur gwerthuso modiwl:

“Roeddwn i wrth fy modd â’r modiwl hwn. Roedd yr athrawes yn rhagorol, ac roedd hi’n glir ei ffocws trwy gydol y modiwl. Y bwrdd trafod oedd rhan orau’r modiwl gan ei fod yn rhoi lle inni gymhwyso’r damcaniaethau. Drwyddi draw, un o’r modiwlau gorau yn fy mlwyddyn gyntaf.”

“Gyda phopeth oedd yn digwydd, mae’r modiwl hwn wedi cael ei redeg yn dda iawn y semester hwn. Mae llawer o gynnwys ar-lein i’w wneud ac mae’r fforymau i fyfyrwyr drafod y pynciau dan sylw wedi ei wneud yn fodiwl difyr iawn.”

A oes gennych unrhyw awgrymiadau i bobl sydd eisiau defnyddio’r offer hwn?

Dylech ei gwneud hi’n glir iawn beth rydych chi’n gofyn iddyn nhw ei wneud a ble gallan nhw ddod o hyd iddo. Anogwch y myfyrwyr i lwytho rhith-ffurf (avatar) fel nad yw’r drafodaeth mor ddi-wyneb. Yn sicr ar gyfer modiwlau blwyddyn 1, ystyriwch ddyfarnu marciau am gymryd rhan ac ymgysylltu â phethau fel byrddau trafod, wici ac ati. Mae adroddiadau Blackboard yn rhoi ffordd gyflym a hawdd i chi weld pwy sy’n gwneud beth, ble a phryd.

Diolch o galon i Dr Martine Garland am rannu’r astudiaeth achos hon. Os hoffech ddysgu rhagor am fwrdd trafod, edrychwch ar bostiad Offer Blackboard ar gyfer Gwaith Grŵp (Blog-bost 4): Trafodaethau a’r cwestiynau a holir yn aml am fyrddau trafod.

Galwad am Astudiaethau Achos – Offer Rhyngweithiol Blackboard

Rydym yn chwilio am staff a hoffai rannu eu profiadau o ddefnyddio nodweddion rhyngweithiol Blackboard, e.e. blogiau, cyfnodolion, wicis, profion, byrddau trafod. Rydym yn croesawu achosion achos mewn unrhyw fformat, e.e. testun byr, fideo, memo llais. Byddai’r astudiaethau achos hyn yn cael eu cynnwys ar ein blog ac yn cael eu defnyddio mewn sesiynau hyfforddi yn y dyfodol. Anfonwch eich astudiaethau achos i lteu@aber.ac.uk 

I ddysgu mwy am nodweddion rhyngweithiol gwahanol Blackboard:

Blogiau a chyfnodolion:

Interactive Blackboard Tools Series – Journals and Blogs (Part 1)

Offer Blackboard ar gyfer Gwaith Grŵp (Blogpost 2): Blogiau

Wicis:

Offer Blackboard ar gyfer Gwaith Grŵp (Blogpost 3): Wicis

Profion:

Profion Blackboard – Creu Gweithgaredd Asesu Ar-lein i’ch Myfyrwyr

Byrddau trafod:

Offer Blackboard ar gyfer Gwaith Grŵp (Blogpost 4): Trafodaethau