Gall staff a myfyrwyr nawr ddefnyddio’r adran Ynganiad ar dudalen Proffil Blackboard i recordio eu henw. Gallant hefyd ddewis y rhagenwau maen nhw’n eu defnyddio. I gael rhagor o wybodaeth, gweler ein Cwestiwn Cyffredin
Mae Panopto bellach wedi’i osod yn barod ar gyfer 2025-26.
Mae capsiynau awtomatig bellach wedi cael ei osod yn holl ffolderi 2025-26 yn Panopto. Mae iaith y capsiwn yn cyfateb â iaith templed eich cwrs Blackboard.
Ar gyfer cyrsiau dwyieithog, rydyn ni’n awgrymu creu is-ffolder i ddal yr holl recordiadau ar gyfer un o ieithoedd cyflwyno eich cwrs (gweler Cwestiwn Cyffredin)
Pan fyddwch yn gwneud eich recordiadau, rhaid i chi ddewis yr iaith gywir cyn pwyso ‘record’. Y rheswm am hyn yw oherwydd na ellir ychwanegu capsiynau Cymraeg at recordiadau sy’n cael eu copïo neu’u symud o ffolderi eraill
Ceir gwybodaeth am gapsiynau awtomatig ym Mholisi Cipio Darlithoedd PA (rhan 12)
Gallwch greu dolen i’r ffolder Panopto yn eich cwrs Blackboard. Golyga hyn y gall myfyrwyr weld y recordiadau ar gyfer y cwrs mewn un lle.
Mae ffolderi Panopto ar gyfer yr holl fodiwlau eleni yn y ffolder 2025-26.
I ddod o hyd i’r ffolder Panopto yr hoffech recordio ynddi:
Mewn nifer fach o gyrsiau, ni chrëwyd y ffolder Panopto dros yr haf. Os na allwch ddod o hyd i’ch ffolder Panopto gan ddefnyddio’r camau uchod, gallwch greu ffolder o Blackboard:
Nawr dylech allu dod o hyd i’r ffolder Panopto i recordio ynddi.
Croeso cynnes i aelodau newydd o staff sy’n ymuno â Phrifysgol Aberystwyth
Ein nod yn y blogbost hwn yw rhoi gwybodaeth i chi am dechnoleg wrth ddysgu ac addysgu, ein darpariaeth o ran hyfforddiant, sianeli cymorth, a digwyddiadau rydyn ni’n eu cynnal.
Mae’r holl wybodaeth sydd ei hangen arnoch ar ein tudalennau gwe.
Rydyn ni’n ysgrifennu blog sy’n llawn o’r newyddion diweddaraf, manylion am ddigwyddiadau a sesiynau hyfforddi, ac adnoddau.
Os oes arnoch angen cysylltu â ni, gallwch wneud hynny trwy ddefnyddio eddysgu@aber.ac.uk.
Mae gan bob modiwl ei gwrs pwrpasol ei hun yn Blackboard. Gall myfyrwyr ddod o hyd i wybodaeth am y modiwl, deunyddiau dysgu, a chanllawiau e-gyflwyno, yn ogystal â dolenni i restrau darllen a recordio darlithoedd.
Mae gan y Brifysgol bolisi Isafswm Presenoldeb Gofynnol Blackboard ar gyfer pob modiwl.
Gweler ein canllaw i staff i gael rhagor o wybodaeth.
Wrth addysgu wyneb yn wyneb, cofiwch y dylid recordio pob darlith (hynny yw, addysgu lle mae’r ffocws ar wybodaeth sy’n cael ei throsglwyddo gan staff i fyfyrwyr) gan ddefnyddio Panopto, ein meddalwedd recordio darlithoedd.
Gweler manylion ein Polisi Cipio Darlithoedd
Ym Mhrifysgol Aberystwyth, rhaid i fyfyrwyr gyflwyno’r holl waith testun a phrosesu geiriau yn electronig fel yr argymhellir ym mholisi E-gyflwyno’r Brifysgol.
Ar gyfer hyn, rydym yn defnyddio ein hadnoddau e-gyflwyno: Turnitin a Blackboard Assignment. Mae Turnitin yn darparu nodwedd paru testun awtomatig. Rydym yn defnyddio Profion Blackboard i gynnal arholiadau ar-lein.
Vevox yw adnodd pleidleisio Prifysgol Aberystwyth.
Gellir defnyddio’r adnodd pleidleisio mewn gweithgareddau dysgu ac addysgu yn ogystal â chyfarfodydd i wneud y sesiwn yn rhyngweithiol ac yn gydweithredol. Mae sawl ffordd wahanol o’i ddefnyddio.
Mae gennym nifer o Ganllawiau a Chwestiynau Cyffredin i’ch helpu i ddefnyddio ein meddalwedd.
Er mwyn cefnogi’r holl staff gyda’u haddysgu rydym yn cynnal cyfres o sesiynau hyfforddi ar draws y meysydd canlynol:
Ceir hyd i fanylion am ein rhaglen DPP flynyddol a gallwch archebu eich lle i fynychu drwy’r dudalen Archebu Cwrs.
Rydyn ni’n rhedeg ystod o ddigwyddiadau, gan gynnwys y Gynhadledd Dysgu ac Addysgu Flynyddol a Chynadleddau Byr
Mae’r rhain oll yn gyfleoedd gwych i gwrdd â phobl ar draws y brifysgol a thrafod materion a datblygiadau’n ymwneud â Dysgu ac Addysgu
Edrychwn ymlaen at eich gweld mewn digwyddiad cyn hir. Yn y cyfamser, mae croeso i chi gysylltu â ni trwy eddysgu@aber.ac.uk os oes gennych unrhyw gwestiynau.
Fel arweinydd ein rhaglen TUAAU, rwy’n cadw llygad allan am adnoddau i helpu staff i addysgu’n effeithiol. Mae’r rhain yn cynnwys gweminarau, podlediadau, pecynnau cymorth ar-lein, cyhoeddiadau a mwy. Mae’r pynciau’n cynnwys dysgu gweithredol, addysgu ar-lein/cyfunol, hygyrchedd/cynhwysiant, a dylunio dysgu effeithiol yn seiliedig ar wyddoniaeth wybyddol. Rwyf wedi rhestru isod eitemau y sylwais arnynt yn ystod yr wythnos ddiwethaf. Er mwyn eglurder, ein polisi yw dangos y teitlau a’r disgrifiadau yn yr iaith y cyflwynir yr adnoddau ynddi.
Ewch i’r dudalen archebu Hyfforddiant Staff i weld pa hyfforddiant a gynigir gan yr Uned Datblygu Dysgu ac Addysgu a staff eraill Prifysgol Aberystwyth. Gobeithio y bydd y crynodeb wythnosol hwn o adnoddau yn ddefnyddiol ichi. Os oes gennych unrhyw gwestiynau neu awgrymiadau, cysylltwch â’n tîm ar lteu@aber.ac.uk. Cyfryngau cymdeithasol: BSky, X.com.
Mae Blackboard Ally yn parhau i fod yn rhan boblogaidd o Blackboard gyda mwy o staff a myfyrwyr yn ei ddefnyddio yn ystod blwyddyn academaidd 2024-25.
Mae nifer y lawrlwythiadau i fformat amgen wedi mwy na dyblu y llynedd – lawrlwythwyd dros 62,000 o ddogfennau i fformatau amgen. A defnyddiodd dros 4000 o ddefnyddwyr yr opsiwn hwn.
Gwnaeth staff hefyd fwy o ddefnydd o’r offer i ddatrys problemau hygyrchedd yn eu cyrsiau – cafodd dros 800 o ffeiliau eu trwsio y llynedd (o’i gymharu â 295 yn 2024-25).
Am y tro cyntaf eleni, mae ein Hisafswm Presenoldeb Gofynnol Blackboard yn nodi y dylai’r holl gyrsiau Blackboard gael sgôr Ally o 70%. I wirio sgôr Ally eich cwrs, edrychwch ar y canllawiau ar ein blog. Gallwch hefyd archebu lle ar un o’r cyrsiau hyfforddi Hanfodion E-ddysgu: Cyflwyniad i Blackboard Ally ym mis Medi.
Yn y diweddariad ym mis Awst, rydym am dynnu eich sylw at y nodwedd tabl cynnwys sy’n cael ei hychwanegu at Fodiwlau Dysgu.
Yn ogystal â hyn, mae gwelliannau i ddogfennau gydag opsiynau steilio blociau, a mwy o hygyrchedd ar draws llyfr graddau myfyrwyr a thudalennau trosolwg myfyrwyr.
Rydym wedi ailgynllunio’r profiad Modiwl Dysgu i fyfyrwyr trwy ychwanegu Tabl Cynnwys cwympadwy. Mae’r diweddariad hwn yn gwella llywio, cyfeiriadedd, ac olrhain cynnydd.
Yn rhan o’r gwelliant hwn, mae asesiadau bellach yn agor mewn panel llawn yn hytrach na phanel llai.
Mae gan fyfyrwyr bellach ffordd symlach o lywio ac olrhain cynnydd mewn Modiwlau Dysgu. Mae’r diweddariadau’n cynnwys:
Delwedd 1: Mae Modiwlau Dysgu bellach yn cynnwys panel Tabl Cynnwys i gyfeirio myfyrwyr o fewn Modiwlau Dysgu ar gyfer eu cyrsiau. Gellir cwympo’r panel gyda’r botwm saeth ar frig y Tabl Cynnwys.
Delwedd 2: Mae’r botymau llywio Blaenorol a Nesaf bellach yn ymddangos yn agosach at ei gilydd yn y rhyngwyneb defnyddiwr o fewn Modiwlau Dysgu i roi profiad defnyddiwr gwell.
Asesiadau o fewn Modiwlau Dysgu. Mae asesiadau bellach yn agor mewn panel llawn, gan ddarparu profiad cyson nad yw’n tynnu sylw.
Delwedd 3: Mae’r tudalennau Asesiadau o fewn Modiwlau Dysgu bellach yn ymddangos fel panel maint llawn.
Dilyniant gorfodol mewn Modiwlau Dysgu. Pan fydd dilyniannu’n cael ei orfodi, rhaid i fyfyrwyr ddefnyddio’r botymau Nesaf a Blaenorol i symud trwy gynnwys mewn trefn. Ni all myfyrwyr neidio ymlaen gan ddefnyddio’r tabl cynnwys oni bai eu bod eisoes wedi cwblhau’r eitem maen nhw’n llywio iddi. Mae neidio ymlaen heb gwblhau eitem Modiwl Dysgu wedi’i analluogi yn y modd hwn.
Fe wnaethom ychwanegu’r adnodd steilio blociau i Ddogfennau, gan roi ffyrdd newydd i hyfforddwyr wella apêl weledol a thywys sylw myfyrwyr. Mae’r opsiynau steilio yn cynnwys lliw ac eiconau. Bydd yr opsiynau arddull yn cynnwys:
Llun 1: Gall hyfforddwyr ddewis opsiynau steilio o gwymplen sy’n ymddangos yn y modd Golygu ar bob math o flociau.
Bydd ein sesiwn hyfforddi sydd ar ddod E-ddysgu Uwch: Dod yn Arbenigwr Dogfennau yn ystyried hyn ac ymarferoldeb arall dogfennau i helpu cydweithwyr i greu cynnwys deinamig. Gallwch archebu eich lle ar-lein.
Er mwyn gwella hygyrchedd, fe wnaethom ddiweddaru Llyfr Graddau’r myfyrwyr i ddefnyddio strwythur tabl HTML semantig. Mae’r newid hwn yn disodli’r cynllun blaenorol, a oedd yn dibynnu ar elfennau <div>. Mae’r strwythur newydd yn gwella’r gefnogaeth darllenydd sgrin a llywio bysellfwrdd.
Er mwyn gwella hygyrchedd, fe wnaethom ddiweddaru tudalen trosolwg y myfyrwyr i ddefnyddio strwythur tabl HTML semantig. Mae’r newid hwn yn disodli’r cynllun blaenorol, a oedd yn dibynnu ar elfennau <div>. Mae’r strwythur newydd yn gwella’r gefnogaeth darllenydd sgrin a llywio bysellfwrdd.
Os oes gennych unrhyw welliannau yr hoffech i Blackboard eu gwneud, cysylltwch â ni trwy eddysgu@aber.ac.uk.
Ni fydd Turnitin ar gael i’w ddefnyddio rhwng 16:00 a 22:00 ddydd Sadwrn 9 Awst 2025 oherwydd gwaith cynnal a chadw rheolaidd.
Yn ystod y cyfnod, ni fydd modd i chi gyflwyno na graddio asesiadau.
Ymddiheurwn am unrhyw anghyfleustra a achosir.
Rydyn ni wrthi’n gweithio ar gyfres o astudiaethau achos er mwyn rhannu arferion wrth ddefnyddio Deallusrwydd Artiffisial Cynhyrchiol mewn Gweithgareddau Dysgu ac Addysgu.
Yn y gyfres yma o flogiadau, bydd cydweithwyr sy’n defnyddio Deallusrwydd Artiffisial Cynhyrchiol wrth addysgu yn rhannu sut yr aethon nhw ati i ddylunio’r gweithgareddau hyn.
Mae’n bleser croesawu Dr Gareth Hoskins (tgh@aber.ac.uk) o’r Adran Daearyddiaeth a Gwyddorau Daear yn y blogiad yma.
Gwerthusiad yn y dosbarth oedd hwn, o grynodeb a gynhyrchwyd gan ddeallusrwydd artiffisial (AI) o’r cysyniad gwyddonol ‘cof bylb fflachio’ fel rhan o ddarlith ar ‘gof unigol’ yn y modiwl daearyddiaeth ddynol/cymdeithaseg yn y drydedd flwyddyn GS37920 Diwylliannau’r Cof: treftadaeth, hunaniaeth a phŵer.
Ysgoges i ChatGPT gyda’r cyfarwyddyd: “Create 200 word summary of the concept flashbulb memory”, creu sgrinlun o’r testun a ddeilliodd o hynny a’i ymgorffori yn fy sleidiau darlith gan roi tair munud i’r dosbarth ei ddarllen a’i drafod wrth eu byrddau gan ofyn yn benodol am ymatebion i’r cwestiynau hyn:
Wnaeth y drafodaeth ddim cyffwrdd yn ormodol â’r cwestiynau ofynnes i ond canolbwyntio’n fwy ar gynnwys ChatGPT lle roedd y myfyrwyr yn llawer mwy beirniadol o’r cynnwys nag roeddwn i wedi’i ddisgwyl. Nodwyd y dôn ddiflas, yr ailadrodd, yr ansicrwydd ynghylch ffeithiau, yr ymagwedd amwys a’r diffyg pendantrwydd yn gyffredinol. Dangosodd y myfyrwyr hynny fesur annisgwyl o lythrennedd AI cynhyrchiol a gafodd ei gyfleu i’r dosbarth yn ei gyfanrwydd. Yn ystod y trafod, daeth y myfyrwyr yn fwy ymwybodol o ddefnyddioldeb offer AI cynhyrchiol, yn fwy cyffyrddus yn siarad am sut maen nhw’n ei ddefnyddio a sut y gallen nhw o bosibl fynd ymlaen i’w ddefnyddio, a sut y gallai ei gyfyngiadau a’i wendidau effeithio ar y cynnwys y mae’n ei gynhyrchu.
Datblyges i’r ymarfer drwy ddefnyddio tudalen gwe canllawiau UCL ‘Designing Assessments for an AI-enabled world’ https://www.ucl.ac.uk/teaching-learning/generative-ai-hub/designing-assessments-ai-enabled-world ac ail-lunies i fy nghwestiynau arholiad ar y modiwl i gael gwared ar arfarniadau generig o gyfraniadau academyddion enwog at wahanol drafodaethau yn y ddisgyblaeth gan eu disodli â chwestiynau damcaniaethol wedi’u seilio ar senarios oedd yn llawer mwy cymhwysol.
Y bwriad oedd cydnabod ein bod yn bodoli mewn byd sydd wedi’i alluogi gan AI sy’n creu cyfleoedd ond hefyd problemau ar gyfer dysgu. Defnyddies i’r ymarfer i gyflwyno’r risgiau sy’n ymwneud ag asesu, ac amlinellu fy strategaeth fy hun ar gyfer asesu ar y modiwl yma drwy ddefnyddio cwestiynau arholiad sydd wedi’i seilio ar broblemau mewn bywyd go iawn ac sy’n gofyn am ddefnyddio sgiliau lefel uwch mewn gwerthuso a meddwl yn feirniadol wedi’u cymhwyso at gynnwys “modiwl-yn-unig” a chyhoeddiadau academaidd diweddar y mae offer ysgrifennu traethodau AI cynhyrchiol yn ei chael yn anodd i’w cyrchu.
Helpodd y gweithgaredd y myfyrwyr i ddod yn fwy cyfarwydd â defnyddio AI cynhyrchiol fel “cynorthwyydd ymchwil” (at greu amlinelliadau a dod o hyd i ffynonellau) a chreodd amgylchedd ar gyfer trafodaeth agored am gyfyngiadau cynnwys sy’n cael ei gynhyrchu gan AI o ran amwysedd, rhithwelediadau, diffyg dealltwriaeth, a diffyg mynediad at gynnwys modiwlau mewnol ar Blackboard neu ymchwil gyfredol (erthyglau a gyhoeddwyd yn y ddwy flynedd diwethaf).
Byddwn i’n cyfeirio at systemau eraill gan gynnwys DeepSeek, Gemini, Microsoft Co-Pilot a Claude AI yn ogystal â thrafod eu tarddiad, eu manteision a’u hanfanteision, ac yn hanfodol ddigon fe fyddwn i’n rhybuddio am y canlyniadau amgylcheddol a’r canlyniadau o ran eiddo deallusol.
Cadwch lygad am ein blogiad nesaf ar AI cynhyrchiol mewn astudiaethau achos Dysgu ac Addysgu.
Rhwng 8 a 10 Gorffennaf, cynhaliodd yr Uned Datblygu Dysgu ac Addysgu yr 13eg Gynhadledd Dysgu ac Addysgu Flynyddol.
Mae deunyddiau’r gynhadledd bellach ar gael ar ein tudalennau gwe.
Hoffem ddiolch i’n holl gyfranwyr a’r rhai oedd yn bresennol. Roedd y sesiynau o ansawdd mor uchel.
Rydym eisoes yn cynllunio ein 14eg Gynhadledd Dysgu ac Addysgu Flynyddol a gynhelir ym mis Medi 2026 (dyddiad i’w gadarnhau).
Gobeithiwn eich gweld mewn digwyddiad sydd i ddod.
Yn y diweddariad ym mis Gorffennaf, rydym yn arbennig o gyffrous am welliant i nodiant mathemategol gyda MathJax a ffordd o fesur ymgysylltiad myfyrwyr â Chyhoeddiadau Blackboard.
Gwelliannau yw’r rhain i’r llywio mewn Aseiniadau Grŵp, ychwanegu capsiynau at ddelweddau mewn dogfennau, a gwella effeithlonrwydd hyfforddwr yn y dudalen gweithgaredd.
Rydym yn falch iawn o weld y gwelliant hwn, sy’n rhywbeth yr ydym wedi bod yn gofyn amdano ers symud i Blackboard Ultra.
Mae Blackboard wedi gwella’r profiad o drosi fformiwla yn y Golygydd Cynnwys trwy weithredu MathJax, offer ar gyfer arddangos nodiant mathemategol:
Mae’r diweddariad hwn yn gwella cywirdeb gweledol a chysondeb fformiwlâu sy’n seiliedig ar LaTeX, gan eu halinio’n agosach â safonau gwyddonol ac academaidd.
Mae MathJax yn cynnig arddull trosi fwy manwl gywir a ffefrir gan lawer o hyfforddwyr STEM. Pan gaiff ei ysgogi, bydd MathJax yn trosi cod LaTeX a fewnbynnwyd yn uniongyrchol yn y Golygydd Cynnwys yn awtomatig ar draws ardaloedd a gefnogir o Blackboard. Mae Wiris ar gael o hyd fel y rhagosodiad i drosi fformiwlâu ar gyfer y Golygydd Cynnwys. Os nad yw MathJax wedi’i ysgogi, bydd Wiris yn trosi fformiwlâu.
Mae mwy o wybodaeth ar gael ar y dudalen gymorth a ddiweddarwyd. Golygydd Mathemateg.
Gall hyfforddwyr nawr wirio pa fyfyrwyr sydd wedi marcio eu bod wedi gweld cyhoeddiad. Trwy ddewis cyfrif y gwylwyr ar y brif dudalen Cyhoeddiadau, gall hyfforddwyr agor rhestr sy’n dangos pwy sydd wedi cydnabod a phwy sydd heb gydnabod y neges. O’r rhestr hon, gall hyfforddwyr anfon neges ddilynol at fyfyrwyr nad ydynt wedi gweld y cyhoeddiad i gadarnhau bod gwybodaeth allweddol wedi’i derbyn. Mae hyn yn helpu hyfforddwyr i ddeall pa mor effeithiol y mae eu cyhoeddiadau yn cyrraedd myfyrwyr.
Llun 1: Mae pob cyhoeddiad yn cynnwys colofn Gwylwyr ar y dudalen Cyhoeddiadau.
Llun 2: Mae’r rhestr o wylwyr ar gyfer cyhoeddiad yn dangos bod dau fyfyriwr wedi darllen y cyhoeddiad ac un heb.
Mae Blackboard Assignment yn cynnig nodwedd Cyflwyno Grŵp. Mae hyn yn caniatáu i un aelod o’r grŵp gyflwyno ar ran y myfyrwyr yn eu grŵp. Ar gyfer marcwyr, mae hyn yn golygu marcio un cyflwyniad, gyda marciau ac adborth yn cael eu clustnodi i holl aelodau’r grŵp.
Yn y diweddariad y mis hwn, mae Blackboard wedi gwneud adolygu a graddio cyflwyniadau grŵp yn fwy effeithlon trwy ychwanegu rheolaethau llywio Blaenorol a Nesaf. Gall hyfforddwyr symud yn effeithlon rhwng cyflwyniadau grŵp gan ddefnyddio rheolaethau bar pennawd, gan greu profiad graddio haws gyda llai o gliciau.
Gall hyfforddwyr nawr lywio rhwng cyflwyniadau grŵp heb orfod dychwelyd i’r rhestr gyflwyno. Mae’r botymau Blaenorol a Nesaf yn ymddangos yn y bar pennawd:
Gall hyfforddwyr nawr ychwanegu capsiynau uwchben neu islaw blociau delwedd yn Dogfennau.
Llun 1: Gall hyfforddwyr fynd i Opsiynau Golygu Ffeil i ychwanegu capsiynau delweddau a gosod safleoedd.
Llun 2: Mae pennawd y ddelwedd yn ymddangos uwchben y ddelwedd ac yn darparu mwy o gyd-destun.
Noder, i ddefnyddio’r nodwedd hon, mae angen i chi uwchlwytho’r cynnwys fel delwedd yn y golygydd dogfennau.
Mae’r Ffrwd Gweithgareddau ar gyfer hyfforddwyr wedi newid i gynnwys cyrsiau, cyhoeddiadau, a diweddariadau am weithgareddau mewn un lle.
Nodweddion newydd ar y dudalen Gweithgaredd:
Llwybrau Byr: Mae llwybrau byr newydd wedi’u hychwanegu i wella effeithlonrwydd hyfforddwyr.
Cyhoeddiadau: Darllenwch gyhoeddiadau sefydliadol pwysig.
Llun 1: Mae gan y dudalen Gweithgaredd newydd adrannau ar gyfer cyhoeddiadau, cyrsiau, a’r ffrwd gweithgaredd.
Os oes gennych unrhyw welliannau yr hoffech i Blackboard eu gwneud, cysylltwch â ni trwy eddysgu@aber.ac.uk.