Rydym yn gwybod bod myfyrwyr yn defnyddio cyfarpar symudol, ond mae’r ffaith bod bron yr un cyfartaledd o fyfyrwyr yn cefnogi eu dysgu trwy ddefnyddio ffonau clyfar (30%) yn hytrach na defnyddio gliniaduron (33.1%), yn annisgwyl. Roedd yn ddefnyddiol cael data o’r fath i bwysleisio’r newidiadau yn arferion myfyrwyr a chadarnhau mor bwysig ydyw.
Teimlai 62% yr hoffent weld technolegau digidol yn cael eu defnyddio i’r un graddau ag y maent yn cael eu defnyddio ar hyn o bryd, yn hytrach na mwy. Mae yna dueddiad i feddwl ‘rydyn ni wedi gwneud rhywbeth, gadewch i ni weld sut y gallwn wthio i gyflawni’r peth nesaf/rhywbeth gwahanol’. Efallai bod angen i ni ganolbwyntio ar y pethau rydym yn eu gwneud ar hyn o bryd sy’n dda iawn, a gwella’r pethau hynny, yn hytrach na cheisio cyflwyno gwasanaethau newydd.
Roedd hefyd yn ddiddorol gweld beth roedd y myfyrwyr yn eu hystyried yn dechnolegau cynorthwyol. Doedden ni ddim yn siŵr a oedd y myfyrwyr wedi camddeall y cwestiwn, neu a oedd eu dealltwriaeth o’r cwestiwn yn wahanol. Ni fyddem yn ystyried llawer o’r pethau a nodwyd gan y myfyrwyr yn dechnolegau cynorthwyol (e.e. ap myfyrwyr, google, end note). Rydym yn tueddi i feddwl am dechnoleg gynorthwyol fel rhywbeth sy’n eich helpu os oes gennych angen penodol – efallai bod myfyrwyr yn gweld technoleg gynorthwyol fel ‘rhywbeth sy’n fy helpu’.
Y neges nesaf o’r gyfres ar DigiTracker:
Manteision rhedeg y traciwr a beth fyddwn ni’n ei wneud gyda’r canfyddiadau?
Heddiw (30/07/2018) crëwyd modiwlau lefel 0 ac 1 gwag ar gyfer y ddwy adran gyntaf yn rhan o’r broses copi gwag o gyrsiau. Mae IBERS a Gwleidyddiaeth Ryngwladol wedi cytuno bod eu templedi adrannol a’u modiwlau’n barod i’w diweddaru. Dyma bron i chwarter yr holl fodiwlau lefel 0 ac 1 fydd yn cael eu cynnal ym mlwyddyn academaidd 2018-19.
Mae staff o’r Grŵp E-ddysgu wedi bod yn gweithio gyda phob adran i egluro’r broses a’u helpu i benderfynu pa eitemau dewislen ychwanegol yr hoffent eu hychwanegu i’r templed craidd. Mae’r modiwlau bellach ar gael, a gall staff ddechrau ychwanegu neu gopïo deunyddiau dysgu drosodd. Mae Cwestiwn Cyffredin ar gael ar sut i gopïo eitemau gwahanol drosodd.
Ceir hyd i fodiwlau 2018-19 yn y tab Modiwlau 2018-19 sydd bellach ar gael ar y dudalen Fy Modiwlau.
Diolch yn fawr i Mike Rose a James Vaughan sydd wedi gweithio gyda’r Grŵp E-ddysgu trwy gydol y broses hon. Os ydych chi’n aelod o staff yn yr adran Gwleidyddiaeth Ryngwladol neu IBERS a’ch bod eisiau cymorth i osod eich modiwl newydd, edrychwch ar y Cwestiwn Cyffredin, neu cysylltwch â elearning@aber.ac.uk a byddwn yn barod iawn i helpu.
Os nad ydych chi’n siŵr beth yw ystyr Copi Gwag o Gyrsiau, edrychwch ar ein ffeithlun neu e-bostiwch elearning@aber.ac.uk.
Eleni, cymerodd Prifysgol Aberystwyth ran am y tro cyntaf yn Nhraciwr Profiad Digidol Myfyrwyr JISC – arolwg ar-lein a luniwyd gan JISC i gasglu gwybodaeth am ddisgwyliadau a phrofiadau myfyrwyr wrth ddefnyddio technoleg.
Pam benderfynon ni gymryd rhan yn y prosiect?
Mae’r Traciwr yn offeryn syml sydd wedi’i ddylunio’n dda. Mae’n ganddo hygrededd ledled y sector ac mae’r fethodoleg yn ddibynadwy.
Mae’n cynnwys data meincnodi gan sefydliadau Addysg Uwch ac Addysg Bellach yn ein sector.
Dyma’r unig arolwg sy’n canolbwyntio’n llwyr ar y profiad dysgu digidol.
Cafodd y sefydliadau a gymerodd ran yn y prosiect gryn dipyn o gymorth gan JISC i addasu, hyrwyddo a dadansoddi’r arolwg.
Ac yn bwysig dros ben – roedd eisoes wedi’i gyfieithu i’r Gymraeg.
Byddwn yn rhannu’r manteision o gymryd rhan yn y prosiect a rhai canfyddiadau allweddol o’r dadansoddiad data ar lefel sefydliadol ac ar lefel y sector yn y negeseuon nesaf 🙂
Y neges nesaf o’r gyfres ar DigiTracker:
Canfyddiadau allweddol a beth oedd yn arbennig o ddiddorol.
Rydym yn falch o gyhoeddi y bydd enillwyr Gwobrau Cwrs Eithriadol Blackboard yn derbyn eu gwobrau yn ystod seremonïau graddio’r wythnos hon.
Bydd Adam Vellender, Catherine O’Hanlon, Daniel Low a Stephen Chapman, enillwyr Gwobrau Cwrs Eithriadol 2017-2018 yn derbyn eu gwobrau yn ystod seremoni raddio eu hadran. Dangosodd yr holl fodiwlau buddugol safon uchel y dysgu a’r addysgu ym Mhrifysgol Aberystwyth a gwnaethant ysbrydoli eraill i arloesi ac ymgysylltu’r myfyrwyr ag addysgu gweithredol ac roeddent yn cynnwys nifer o arferion eithriadol.Roedd modiwlau’r enillwyr yn cynnwys nifer o arferion eithriadol a chawsant Wobrau Cymeradwyaeth Uchel.
Bellach yn eu pumed flwyddyn, mae’r Gwobrau Cwrs Eithriadol yn cydnabod rhagoriaeth mewn dylunio cyrsiau, rhyngweithio a chydweithio, asesu a chefnogi dysgwyr. “Mae’r Gwobrau Cwrs Effeithiol yn rhoi cyfle arbennig i staff rannu eu gwaith gyda chydweithwyr eraill, myfyrio ar eu defnydd o offer megis Blackboard, a chael adborth am eu gweithgareddau addysgu gan eu cyfoedion. Rydym yn llongyfarch ein staff Cymeradwyaeth Uchel eleni ac yn annog staff eraill i ystyried cyflwyno eu modiwlau yn y dyfodol. Mae’r Grŵp E-ddysgu’n hapus i roi cyngor a chymorth i unrhyw un sydd â diddordeb mewn cael gwybod mwy am y Gwobrau Cwrs Eithriadol.” Kate Wright, Rheolwr y Grŵp E-ddysgu
Nid yw amser segur ar y systemau yr ydym yn dibynnu arnynt yn beth poblogaidd. Penderfynu pryd i drefnu amser segur ar gyfer Blackboard yw un o benderfyniadau mwyaf anodd y swydd. Mae jyglo’r meysydd gwaith gwahanol yn y Brifysgol yn ogystal â gwneud yn siŵr ein bod yn ymgynghori â’r holl bobl berthnasol yn cymryd llawer o amser. Rydym yn ceisio osgoi gorffen y gwaith cynnal a chadw ar ddydd Gwener – mae’n well sicrhau nad oes problemau’n codi dros y penwythnos pan nad yw’r staff cymorth yma. Yn yr un modd, nid ydym yn gwneud gwaith yn ystod cyfnodau pan fo’r Brifysgol ar gau (mae’n anodd cael cymorth gan gwmnïau meddalwedd oherwydd yn aml iawn maen nhw ar wyliau hefyd).
Rydym yn ceisio trefnu dyddiad – rydym yn gweld pa ymrwymiadau eraill sydd gan bobl, ar lefel y tîm, lefel yr adran a lefel y Brifysgol. Mae yna amseroedd y mae’n rhaid i ni eu hosgoi – ni ellir cael amser segur yn ystod amser dysgu (gan gynnwys y myfyrwyr TAR sy’n dechrau’n gynt ac yn gorffen yn hwyrach nag eraill, yn ogystal â’r rhai sy’n Ddysgwyr o Bell neu sy’n astudio Cyrsiau Dysgu Gydol Oes). Hefyd, mae unrhyw amser pan fo myfyrwyr angen adolygu neu pan fyddant angen defnyddio Blackboard ar gyfer arholiadau allan ohoni. Pan fyddwn ni’n meddwl bod gennym ddyddiad addas, rydym yn gofyn i grŵp llai o unigolion am eu barn – Rheolwyr Athrofeydd, Uwch Reolwyr, AQRO a chysylltiadau allweddol eraill. Os ydyn nhw’n dod o hyd i broblem, rhaid cychwyn o’r cychwyn.
Pan fyddwn wedi cadarnhau dyddiad, byddwn yn dechrau hysbysebu. Rydym bob amser yn rhoi neges ar faner yn Blackboard, yn defnyddio’r E-bost Wythnosol a chyfrifon Twitter a Facebook y Gwasanaethau Gwybodaeth.
Felly nid ydym yn trefnu amser segur Blackboard ar chwarae bach. Rydym yn gofyn i bobl, yn dweud wrth bobl, yn ei drefnu ac yn gwneud ein gorau i leihau ei effaith. Nid ydym bob amser yn cael pethau’n iawn i bawb, ond rydym yn gwneud ein gorau i gydbwyso holl ofynion cystadleuol sefydliad cymhlyg.
Gallwch gofrestru nawr ar gyfer y chweched gynhadledd Dysgu ac Addysgu flynyddol. Eleni bydd y gynhadledd Dysgu ac Addysgu yn dwyn y thema Mynd â Dysgu Myfyrwyr i’r Lefel Nesaf ac fe’i cynhelir rhwng dydd Mawrth 11 a dydd Iau 13 Medi 2018.
Gallwch gofrestru ar gyfer y gynhadledd trwy lenwi’r ffurflen ar-lein.
Eleni, mae gennym raglen gyffrous ac amrywiol o weithgareddau, gweithdai a chyflwyniadau sy’n dangos yr arferion dysgu arloesol a geir yn y Brifysgol. Mae copi drafft o’r rhaglen ar gael yma.
Os oes gennych chi unrhyw ymholiadau, mae croeso i chi gysylltu â ni.
Rydym yn falch o gyhoeddi’r newyddion cyffrous mai’r Athro Jonathan Shaw, Lauren Heywood ac Oliver Wood o Disruptive Media Learning Lab (DMLL) Prifysgol Coventry fydd yn rhoi’r prif anerchiad a darparu gweithdai i’r gynhadledd Dysgu ac Addysgu eleni. Cyfarwyddwr y DMLL, yr Athro Jonathan Shaw, fydd yn rhoi’r prif anerchiad, a Lauren Heywood ac Oliver Wood, Cynhyrchwyr Arloesol a Chymunedol y DMLL fydd yn darparu gweithdai rhyngweithiol.
Nod DMLL Prifysgol Coventry yw “torri ac ail-wneud y dulliau presennol o ddarparu addysg uwch” ac maent wedi ymrwymo i ysbarduno gwaith arloesol a mabwysiadu dulliau arloesol o gynllunio cwricwla ac ymarfer, a mentrau technoleg addysg. Maent hefyd yn pwysleisio gwerth chwarae yn “rhan bwysig o ddysgu!” Maent yn cynnig cronfa o strategaethau ar gyfer cynyddu rhyngweithio, cynorthwyo â sgiliau datrys problemau ac ysbrydoli dadleuon. Mae eu cronfa i’w chael yma ac mae fideos o’u gwaith i’w gweld yma.
Rydym yn awyddus i glywed y trafodaethau, y syniadau a’r hwyl a gynhyrchir gan Disruptive Media Learning Lab, a gobeithio y byddant yn cynnig inni ddulliau arloesol y gallwn eu rhoi ar waith yn uniongyrchol yn ein dysgu.
Cewch gofrestru am y gynhadledd yma. Gweler ein blog am y newyddion diweddaraf am y gynhadledd. Ceir drafft o amserlen y gynhadledd eleni, a fydd yn canolbwyntio ar Fynd â Dysgu Myfyrwyr i’r Lefel Nesaf ar ein gwefannau cyn hir.
Llun drwy garedigrwydd Disruptive Media Learning Lab, Prifysgol Coventry.
Mae Cyfarwyddwr DMLL, yr Athro Jonathan Shaw, yn ysbarduno gwaith arloesol wrth gynllunio cwricwla, mannau dysgu ac yn arwain ar “roi mentrau technoleg addysg blaengar ar waith”.
Arweinir y gweithdai gan Gynhyrchwyr Arloesol a Chymunedol DMLL Prifysgol Coventry.
Mae Oliver a Lauren yn hybu dysgu gwrthdro a chwareus fel y bydd pobl yn gallu ailystyried y dulliau traddodiadol o ddysgu. Cydweithiant â staff dysgu er mwyn eu helpu i greu “profiadau addysgol newydd, cyffrous a chyfoethog” https://dmll.org.uk/about/.
Mae’r Grŵp E-ddysgu’n helpu staff a myfyrwyr trwy’r Brifysgol i ddefnyddio technoleg i wella dysgu, addysgu ac asesu. Yn ddiweddar dyfarnwyd gwobr Aur yn y Fframwaith Rhagoriaeth Addysgu (FfRhA) i Brifysgol Aberystwyth a chafodd y ddarpariaeth E-ddysgu ei chrybwyll fel un o gryfderau’r sefydliad. I’r holl rai sydd â diddordeb mewn gwybod sut y gall technoleg wneud dysgu ac addysgu’n fwy effeithiol dilynwch ein blog. Bydd pob aelod o’r Grŵp E-ddysgu’n ysgrifennu blogiau am eu harbenigeddau a’u diddordebau. Rydym yn croesawu eich sylwadau a’ch awgrymiadau!
Pwy yw’r Grŵp E-ddysgu yn Aber?
Kate Wright, Rheolwr y Grŵp E-ddysgu
Fi yw Rheolwr y Grŵp E-ddysgu, ac rwyf wedi gweithio ym maes e-ddysgu ers 2003. Yn ystod y cyfnod hwn rwyf wedi gweld llawer o newidiadau; pan ddechreuais, roedd Blackboard yn cael ei ddefnyddio’n wirfoddol gan staff oedd â diddordeb ac roeddem yn treulio llawer o amser yn egluro i fyfyrwyr nad oedd modd iddynt weld modiwlau yn Blackboard oherwydd nad oedd eu darlithwyr yn ei ddefnyddio. Ers hynny rwyf wedi gweithio ar nifer o brosiectau newid i gynyddu nifer y bobl sy’n ymwneud ag e-ddysgu, gan gynnwys cyflwyno isafswm presenoldeb gofynnol Blackboard, e-gyflwyno ac e-adborth, a chipio darlithoedd. Mae gennyf ddiddordeb penodol mewn asesu ar-lein, ac rwyf wedi chwarae rhan fawr yn y defnydd o Questionmark Perception yn y brifysgol.
Rwyf wedi bod yn rhan o nifer o brosiectau a gyllidir yn allanol gan gynnwys Meincnodi E-ddysgu HEA, prosiect Gwella CCAUC, Grant Bach Technoleg ar gyfer Dysgu JISC RSC Cymru, Traciwr Profiad Digidol Staff a Myfyrwyr JISC. Rwyf wedi gwneud cyflwyniadau mewn nifer o gynadleddau rhyngwladol, fi yw cadeirydd Grŵp Defnyddwyr Blackboard Cymru, ac rwyf wedi cyhoeddi erthygl ar y cyd yn y British Journal of Educational Technology.
Dr. James Woolley, Arweinydd Thema, Gwella ac Ymgysylltu E-ddysgu
Helo, Jim ydw i, a fi yw’r Arweinydd Thema Gwella ac Ymgysylltu E-ddysgu. Ymunais â’r Grŵp E-ddysgu ym mis Chwefror 2018 ar ôl cwblhau PhD, 3 blynedd fel llyfrgellydd a rhai blynyddoedd cyn hynny fel Cynorthwyydd Dysgu Uwchraddedig, y cyfan yma ym Mhrifysgol Aberystwyth.
Mae fy swydd yn golygu gweithio gyda chydweithwyr academaidd i ddarparu’r cymorth gorau posibl wrth ddefnyddio ein portffolio o wasanaethau. Rwy’n trefnu ein cynllun hyfforddi E-ddysgu a’r Gynhadledd Dysgu ac Addysgu flynyddol. Hoffwn glywed gennych os ydych chi’n gwneud rhywbeth arloesol gyda thechnoleg a dysgu neu os hoffech arbrofi gyda thechnoleg newydd. Rwy’n edrych ymlaen at weithio gyda staff ar brosiectau i ehangu’r ddarpariaeth E-ddysgu. Mae gennyf ddiddordeb penodol yn y modd y mae darpariaeth E-ddysgu’n cynorthwyo dulliau mwy cydweithrediadol o ddysgu.
Os oes sesiwn hyfforddi yr ydych chi’n credu y dylem ni ei drefnu neu os hoffech gwrdd â ni, anfonwch e-bost atom.
Robert Francis, Swyddog Cymorth E-ddysgu
Rwy’n cefnogi defnydd ymarferol o amrywiaeth eang o offer TEL ym Mhrifysgol Aberystwyth. Yn ogystal â Blackboard mae hyn yn cynnwys; Panopto, Turnitin ar gyfer asesu a Questionmark ar gyfer arholiadau ar-lein. Rwy’n ymwneud yn uniongyrchol â darparu cymorth technegol a datrysiadau i Staff a Myfyrwyr sy’n defnyddio’r feddalwedd hon. Rwy’n cynorthwyo’r Brifysgol i weithredu ei strategaeth o ran dysgu trwy gyfrwng technoleg, hygyrchedd, darparu hyfforddiant, ymgynghori, deunyddiau cymorth a chymorth technegol.
Mae gen i gefndir mewn dysgu Hanes a Saesneg yn y DU a thramor. Rwy’n mwynhau arbrofi gyda thechnoleg newydd. Rwyf wedi gweithio yn y sector Addysg Uwch yn darparu cymorth technegol ers 2010.
Rwy’n siaradwr Cymraeg ail-iaith ac rwy’n frwdfrydig ynghylch siarad yr iaith.
Susan Ferguson, Cynorthwyydd Hyfforddi E-ddysgu
Fel Cynorthwyydd Hyfforddi E-ddysgu rwy’n cynorthwyo staff a myfyrwyr sy’n defnyddio offer e-ddysgu, megis Blackboard, Questionmark Perception, Turnitin, Panopto, a Qwizdom ymhlith eraill, dros y ffôn, ar e-bost ac wyneb i wyneb. Mae hyn yn cynnwys cynorthwyo staff i ddefnyddio’r offer yn yr ystafelloedd dysgu, darparu sesiynau hyfforddi, ymchwilio i offer a meddalwedd newydd, a chreu canllawiau i ddefnyddwyr.
Anna Udalowska, Swyddog Cymorth E-ddysgu
Dechreuais weithio gyda’r Grŵp E-ddysgu yn 2017 fel myfyriwr graddedig dan hyfforddiant. Roedd yr elfen datrys problemau ac arloesedd y swydd yn apelio ac felly fe ymgeisiais am swydd Swyddog Cymorth E-Ddysgu, sef fy swydd bresennol.
Dros y misoedd diwethaf rwyf wedi bod yn gweithio ar yr ymgyrch hyrwyddo a dadansoddi darganfyddiadau’r Traciwr Profiad Digidol Myfyrwyr a gynhaliwyd ym Mhrifysgol Aberystwyth am y tro cyntaf. Ynghyd â Rheolwr y Grŵp E-ddysgu, Kate Wright, rwyf wedi cyflwyno darganfyddiadau Traciwr Digidol PA mewn cynhadledd genedlaethol o’r enw DigiFest18 a drefnwyd gan JISC. Rwyf hefyd wedi bod yn gweithio ar weithredu’r Offer Trosglwyddo Marciau Cydrannol.
Fel rhan o’r Grŵp E-ddysgu rwy’n cynorthwyo staff a myfyrwyr sy’n defnyddio Panopto, Blackboard a Turnitin yn ogystal â goruchwylio bod yr arholiadau ar-lein yn rhedeg yn esmwyth gan ddefnyddio’r system Question Mark Perception. Mae gennyf ddiddordeb penodol yn y modd y mae technoleg yn helpu i ddarparu dulliau gwahanol, dynamig a chynhwysol o gyfathrebu, dysgu ac addysgu.
