Yn yr wythnos yn dechrau 12 Gorffennaf cynhaliodd yr Uned Datblygu Dysgu ac Addysgu y prosiect Beth yw modiwl Blackboard wedi’i gynllunio’n dda? Dewiswyd 9 myfyriwr yn Llysgenhadon Dysgu i weithio gyda ni. Roedd y grŵp yn cynnwys: un myfyriwr Hanes israddedig 3edd flwyddyn, un myfyriwr Astudiaethau Plentyndod israddedig 3edd flwyddyn, dau fyfyriwr israddedig Llenyddiaeth Saesneg ac Ysgrifennu Creadigol 2il flwyddyn, un myfyriwr Economeg israddedig 3edd flwyddyn, un myfyriwr Hawliau Dynol a Chyfraith Ddyngarol Ryngwladol uwchraddedig, un myfyriwr 3edd flwyddyn a dau fyfyriwr 2il flwyddyn Seicoleg israddedig.
Trwy gydol y prosiect bu’r myfyrwyr yn gweithio ar y tasgau canlynol, yn annibynnol ac yn rhan o’r grŵp:
taflu syniadau am yr hyn mae’n ei olygu i fodiwl fod wedi’i gynllunio’n dda
cynhyrchu rhestr o eitemau y dylid eu cynnwys mewn modiwl Blackboard
categoreiddio’r rhestr o eitemau
cymryd rhan mewn profion defnyddioldeb ar ddau fodiwl Blackboard sy’n bodoli eisoes
rhoi taith i ni drwy fodiwl Blackboard yn eu hadran oedd yn un hylaw
ysgrifennu blog byr ar un agwedd ar gynllun modiwl sy’n bwysig iddyn nhw gydag awgrymiadau ymarferol i staff addysgu
nodi problemau cyffredin mewn modiwlau Blackboard, myfyrio ar eu heffaith, a chreu set o argymhellion ynglŷn â’u datrys
cynnig newidiadau i Isafswm Presenoldeb Gofynnol Blackboard
Dros yr wythnosau nesaf, byddwn yn cyhoeddi canfyddiadau’r prosiect yn cynnwys blogiau gan y Llysgenhadon eu hunain. Rydyn ni’n ddiolchgar iawn i Angela, Erin, Katie, Ammaarah, Elisa, Lucie, Charlotte, Gabriele a Nathalia am eu gwaith caled ar y prosiect. Credwn y bydd yr holl staff yn ystyried y canfyddiadau yr un mor ddefnyddiol ag y gwnaethom ni.
Wrth i fy nghyfnod i fel Arbenigwr Dysgu Ar-lein yr Uned ddod i ben, rwy’n hynod o falch a diolchgar i allu gorffen drwy gynnal y prosiect hwn. Rydw i wir yn credu y dylai cynnwys myfyrwyr yn weithredol wrth gynllunio eu dysgu fod yn flaenoriaeth ac rwy’n gobeithio am fwy o gyfleoedd ar gyfer partneriaethau staff-myfyrwyr. Hoffwn ddiolch i’r holl staff y cefais gyfle i weithio gyda nhw dros y misoedd diwethaf, diolch am eich gwaith ysbrydoledig a’ch ymrwymiad parhaus i ddarparu’r profiad gorau bosibl i’n myfyrwyr.
Fel rhan o raglen DPP eleni, cawsom groesawu nifer o siaradwyr gwadd a’n cyflwynodd i safbwyntiau newydd ac arbenigedd unigryw ar amrywiol agweddau ar ddysgu ac addysgu. Er mwyn paratoi am y flwyddyn sydd i ddod, hoffem eich atgoffa o rai o’r pynciau a drafodwyd a’r adnoddau sydd ar gael i chi. Ein gobaith yw, trwy ddatblygu ar y sesiynau hyn a sesiynau eraill a drefnwyd i chi gan yr Uned eleni, y byddwch yn teimlo’n barod i addasu ac arloesi wrth addysgu.
Yng Nghynhadledd Fach gyntaf y flwyddyn, cawsom gyfle i wrando ar Dr Naomi Winstor oedd yn dadlau mai mater o ddyluniad, yn y bôn, yw cynyddu’r defnydd a wneir gan fyfyrwyr o adborth, ac y gellir trawsffurfio rhan y myfyrwyr mewn asesiad trwy roi cyfleoedd iddynt ddatblygu’r sgiliau angenrheidiol i ddefnyddio adborth yn effeithiol, a rhoi cyfleoedd iddynt ddefnyddio adborth,.
Ym mhrif araith y Gynhadledd Fach hon, dysgodd y gynulleidfa am elfennau allweddol seicoleg gadarnhaol yng nghyd-destun addysg uwch a strategaethau ymarferol er mwyn gwella eu lles eu hunain.
Edrychodd Kate Lister o Advance HE ar greu cymunedau digidol effeithiol a all gyfrannu at roi ymdeimlad o berthyn a phwrpas i fyfyrwyr, hyrwyddo cysylltiadau ystyrlon, a rhoi cefnogaeth heb ddibynnu ar y campws.
Cafodd Dr Kate Exley ei gwahodd i gyflwyno gweithdy ar y dasg o symud darlithoedd, a arferai gael eu cyflwyno mewn darlithfeydd ac ystafelloedd dosbarth mawr, er mwyn eu cyflwyno ar-lein.
Yn ystod ein Gŵyl Fach ar asesu, arweiniodd Dr Sally Brown a Dr Kay Sambell weithdy a gynlluniwyd i atgyfnerthu’r hyn a ddysgwyd yn ystod y newidiadau cymhleth a wnaed gan academyddion y llynedd, ac edrych yn fanwl ar y syniad o ddulliau asesu dilys.
Gwahoddwyd yr Athro Mick Healey a Dr Ruth Healey i gyflwyno gweithdy ynglŷn â phartneriaethau rhwng myfyrwyr ac aelodau staff, a chawsant eu holi ynghylch cael myfyrwyr i gymryd rhan yn y prosiectau a’r darpariaethau rydym yn eu cyflwyno ar hyn o bryd.
Cawsom gyfle hefyd i wrando ar Andy McGregor o JISC yn sôn am ddyfodol asesu. Sgwrs yn seiliedig ar bapur JISC: The future of assessment: five principles, five targets for 2025, sy’n gosod pum targed am y bum mlynedd nesaf er mwyn datblygu asesu i fod yn fwy dilys a hygyrch, a’i awtomeiddio’n briodol ac yn ddiogel.
Cyflwynodd Joe Probert ac Izzy Whitley o Vevox, sef meddalwedd pleidleisio’r brifysgol, sesiwn ar sut i ddefnyddio pleidleisio’n effeithiol er mwyn ennyn diddordeb dysgwyr.
Mae’r ail astudiaeth achos ar ddefnyddio offer rhyngweithiol Blackboard yn dangos defnydd effeithiol o brofion ar gyfer asesiadau adolygol a ffurfiannol gan Dr Ruth Wonfor o IBERS.
Pa offeryn ydych chi’n ei ddefnyddio a sut?
Rwy’n defnyddio profion Blackboard un ai ar gyfer profion adolygol neu brofion ffurfiannol yn y rhan fwyaf o’m modiwlau.
Pam dewis yr offeryn hwn?
Rydw i wedi dewis defnyddio profion Blackboard am amrywiaeth o resymau. O ran y profion adolygol, rydw i wedi eu defnyddio mewn modiwl i’r flwyddyn gyntaf ar anatomeg a ffisioleg. Mae’r modiwl hwn yn rhoi llawer o wybodaeth sylfaenol ar fywydeg elfennol a ddefnyddir gan y myfyrwyr ym modiwlau’r dyfodol, felly roedd arna i eisiau cynllunio asesiad a fyddai’n fodd i roi prawf ar amrywiaeth eang o bynciau ar draws y modiwl sy’n bodloni canlyniadau dysgu eithaf eang. Mae profion aml-ddewis wedi gweithio’n dda iawn ar gyfer hyn ac mae’n cyd-fynd yn dda â’r gwaith rwy’n ei wneud yn y modiwl i geisio annog y myfyrwyr i ddefnyddio cardiau fflach i ddysgu. Mae budd y cardiau fflach yn amlwg i’r myfyrwyr yn y prawf hwn.
Ar gyfer yr asesiadau ffurfiannol, rydw i wedi dewis defnyddio profion Blackboard am amrywiaeth o resymau. Yn y gorffennol, rydw i wedi tueddu i’w defnyddio fel ffordd i fyfyrwyr brofi eu dealltwriaeth ar ddiwedd pwnc. Ond, yn ystod y cyfnod o ddysgu ar-lein rydw i wedi dechrau eu defnyddio i ofyn cwestiynau y byddwn i wedi eu gofyn yn y ddarlith i wneud yn siŵr bod pawb yn deall. Mae hyn wedi bod yn wych er mwyn fy helpu i strwythuro’r addysg a gwneud yn siŵr nad yw’r myfyrwyr yn brysio ymlaen i adrannau newydd heb ddeall yn iawn beth oedd angen iddynt ei wneud yn yr adran flaenorol.
Sut wnaethoch chi gynllunio’r gweithgaredd gyda’r offeryn hwn?
Rwy’n cynllunio’r profion Blackboard yn unol â’u defnydd yn llwyr. Mae’r profion adolygol yn eithaf anhyblyg gyda chwestiynau aml-ddewis yn unig. Rwy’n tueddu i ddefnyddio cwestiynau safonol eu ffurf; dewis yr ateb cywir i gwestiwn, dewis y datganiad cywir neu ofyn at ba strwythur yn y ddelwedd mae saeth yn pwyntio. Yn ystod cyfnod Covid-19 pan oedd y myfyrwyr yn sefyll y profion hyn gartref, rydw i wedi bod yn cynnwys rhywfaint o gwestiynau ateb byr yn y prawf aml-ddewis hefyd. Mae’r cwestiynau hyn wedi gweithio’n dda iawn er mwyn atal myfyrwyr rhag chwilio am yr ateb i bob cwestiwn aml-ddewis ac wedi rhannu’r marciau’n dda.
Rwy’n defnyddio ystod ehangach o opsiynau ar gyfer y profion ffurfiannol er mwyn cyd-fynd â’r hyn rydw i eisiau i’r myfyrwyr ei ddysgu. Er enghraifft, rydw i wedi defnyddio’r cwestiynau paru ar ôl mynd trwy’r derminoleg, fel bod yn rhaid i’r myfyrwyr baru’r termau â’r disgrifiad cywir. Rydw i hefyd yn ceisio defnyddio’r adborth i’r cwestiynau ffurfiannol hyn i annog y myfyrwyr i lywio eu dysg eu hunain. Felly yn hytrach na dweud wrth y myfyrwyr eu bod wedi ateb cwestiwn yn anghywir a rhoi’r ateb cywir iddynt, rwy’n defnyddio’r adborth i gyfeirio’r myfyrwyr at y sleid neu’r rhan o’r ddarlith lle mae’r ateb i’w gael. Y gobaith yw bod hyn yn eu hannog i strwythuro mwy ar eu gwaith dysgu ac adolygu.
Yn olaf, yn ystod y cyfnod o ddysgu ar-lein rydw i’n gweld bod rhyddhau deunyddiau’n ymaddasol (adaptive release) ar y cyd â’r profion BB yn fuddiol iawn er mwyn strwythuro pynciau. Byddaf yn aml yn dechrau rhai darlithoedd trwy adolygu rhywfaint o wybodaeth y dylai’r myfyrwyr fod wedi ei astudio yn y modiwlau blaenorol sy’n sail i’r pwnc y byddwn yn ei astudio yn y sesiwn honno. Felly rydw i wedi defnyddio profion BB i wneud y gwaith adolygu hwn. Rwy’n defnyddio’r adborth i gyfeirio’r myfyrwyr at wybodaeth bellach os oes angen iddynt roi sglein ar eu dealltwriaeth ac yna’n defnyddio dull rhyddhau deunyddiau’n ymaddasol i ryddhau’r pwnc iddynt ar ôl iddynt roi cynnig ar y cwis adolygu yn unig. Mae’r myfyrwyr yn cael cyfarwyddiadau clir er mwyn gallu rhoi cynnig ar y cwis a byddant wedyn yn cael mynd ymlaen i bwnc y ddarlith. Roedd hyn i weld yn gweithio’n dda ac felly rwy’n gobeithio dal ati gyda hyn er mwyn rhoi’r gorau i adolygu yn y darlithoedd a threulio mwy o amser yn defnyddio’r wybodaeth a ddysgir yn y darlithoedd.
Beth yw barn eich myfyrwyr am yr offeryn hwn?
Rydw i wedi cael adborth eithaf da gan y myfyrwyr ar y profion BB. Mae llawer ohonynt wedi sôn eu bod yn eu helpu i astudio a mynd dros bynciau er mwyn deall lle mae angen iddynt ymdrechu fwy gyda’u hastudiaeth bellach. Rydw i hefyd wedi helpu i leihau gorbryder myfyrwyr ynglŷn â’r profion adolygol terfynol trwy ddefnyddio profion ffurfiannol trwy gydol y modiwl. Gan fod y prawf adolygol rwy’n ei ddefnyddio yn un ar fodiwl y flwyddyn gyntaf yn semester 1, mae’r myfyrwyr yn aml yn eithaf pryderus ynglŷn â’r hyn i’w ddisgwyl ar lefel prifysgol. Gallaf felly eu cyfeirio at y profion ffurfiannol fel enghreifftiau o lefel y cwestiynau y bydd disgwyl iddynt eu hateb yn yr arholiad.
Oes gennych chi unrhyw gyngor defnyddiol i bobl sydd eisiau defnyddio’r offeryn hwn?
Fy mhrif gyngor fyddai rhoi digon o amser i chi’ch hun i lunio’r profion. Mae’r cam cychwynnol o ysgrifennu cwestiynau ac adborth da i’r myfyrwyr yn cymryd peth amser. Ond ar ôl i chi dreulio’r amser hwnnw, mae’r profion yn barod i’w defnyddio bob blwyddyn. Heb os, mae’n werth yr amser a dreulir er mwyn helpu’r myfyrwyr ac i gael syniad o’u dealltwriaeth, a gweld lle gall fod angen rhoi mwy o eglurhad ar bynciau. Gwnewch yn siŵr hefyd eich bod yn sefyll y profion eich hun! Wrth wneud y prawf fy hun, rydw i wedi sylwi ar ambell i gamgymeriad neu gwestiynau sydd angen bod yn fwy eglur ac mae’n ddefnyddiol iawn er mwyn gweld sut bydd fformat terfynol y cwestiynau yn ymddangos i’r myfyrwyr.
Hoffem ddiolch i Dr Ruth Wonfor am rannu ei phrofiadau o ddefnyddio profion Blackboard.
Yn ddiweddar, traddododd yr Athro Rafe Hallett o Brifysgol Keele brif araith a oedd yn ymchwilio i’r cysyniad o fyfyrwyr fel cynhyrchwyr digidol.
Roedd ei gyflwyniad yn annog addysgwyr i ddarganfod pa ddulliau y mae myfyrwyr eisoes yn eu defnyddio i gyd-greu ac sy’n eu galluogi i gydweithredu wrth gynhyrchu gwybodaeth. Yn ôl yr Athro Hallett, mae’r dull saernïol hwn o weithio yn arwain at brofiad mwy ystyrlon. Mae’r myfyrwyr yn creu allbynnau sydd ar gael yn allanol i systemau prifysgol a gellir eu dangos a’u rhannu fel eu hallbynnau ‘nhw’. Mae hyn yn cyfrannu at yr ymdeimlad bod eu gwaith ‘o bwys’, ac mae’n hollol wahanol i gyflwyno asesiad gan ddilyn y diwyg arferol, h.y. asesiad sy’n cael ei ddarllen, ei farcio a’i archifo.
Mae galluogi myfyrwyr i fod yn gynhyrchwyr digidol yn golygu bod angen iddynt adeiladu ar y sgiliau sydd ganddynt eisoes ac i ddatblygu critigolrwydd digidol er mwyn dewis yr adnoddau digidol cywir ar gyfer yr hyn y maent yn ceisio’i wneud. Mae’n un ffordd o hwyluso asesiadau mwy dilys, sy’n gysyniad a drafodwyd gan Kay Sambell a Sally Brown yn ein gŵyl fach yn ddiweddar.
Mae bron yn amser paratoi ar gyfer addysgu yn 2021/22. Er bod llawer o ansicrwydd o hyd ynghylch yr hyn y byddwn yn gallu ei ddarparu, hoffem rannu rai pwyntiau gyda chi sy’n werth eu hystyried wrth gynllunio ar gyfer y flwyddyn nesaf. Mae’r pwyntiau hyn yn codi o’n myfyrdodau a’n profiadau o gefnogi staff a myfyrwyr dros y flwyddyn academaidd ddiwethaf, yn ogystal ag ystyriaethau gan gydweithwyr ar draws y sector.
Sut fyddwn ni’n mesur i ba raddau mae myfyrwyr yn ymgysylltu?
Mae’r hyn mae ymgysylltiad myfyrwyr yn ei olygu a sut rydym ni’n ei fesur wedi newid dros y flwyddyn ddiwethaf. O’r blaen mae’n bosibl y byddem ni’n mesur ymgysylltiad myfyrwyr drwy edrych ar eu cyfranogiad yn ystod sesiynau wyneb yn wyneb neu fonitro eu presenoldeb. Ers i ni fod yn addysgu ar-lein, rydym ni efallai’n talu mwy o sylw i ystadegau Panopto, eu cyfranogiad mewn gweithgareddau rhyngweithiol ar Blackboard a sgwrsio yn Teams. Gall egluro’r hyn mae ymgysylltu’n ei olygu i chi a sut rydych chi am ei fesur mewn fformat cyflwyno sy’n debygol o fod yn newydd i chi a’ch myfyrwyr, eich helpu i werthuso eich dulliau a helpu myfyrwyr i ddeall yr hyn a ddisgwylir ganddynt (Love & El Hakim, 2020).
Yn ystod y pandemig fe wyddom fod llawer o fyfyrwyr yn dioddef unigedd, yn astudio mewn amrywiol amgylcheddau cartref ac yn brwydro gyda gorbryder a chymhelliad. O hyn ymlaen bydd angen i ni roi ystyriaeth i hyn a chydbwyso’r angen cynyddol am oriau cyswllt a chymdeithasoli gydag arferion addysgegol gorau. Er na allwn edrych ymlaen at y flwyddyn nesaf gyda sicrwydd, mae’n hanfodol ein bod yn darparu ymdeimlad o strwythur i’n myfyrwyr lle bo’n bosibl. Un o’r arferion gorau a bwysleisiwyd dros y misoedd diwethaf yw creu ‘mapiau’ sy’n dweud wrth y myfyrwyr beth sydd angen iddyn nhw ei wneud ac erbyn pryd. Thema arall sy’n ymddangos ar draws y sector yw adeiladu cymuned o ddysgwyr i fynd i’r afael ag unigedd.
Dyw rheoli disgwyliadau myfyrwyr byth yn hawdd a gall fod yn fwy heriol fyth dros y flwyddyn nesaf. Un ffordd o reoli disgwyliadau’n effeithiol yw drwy gynnal sgwrs barhaus gyda myfyrwyr a gallu addasu lle bo’n bosibl. Mae trin myfyrwyr fel partneriaid wrth gynllunio eu dysgu hefyd yn cynnwys esbonio pam ein bod yn eu haddysgu yn y ffordd a wnawn, hyd yn oed os nad dyma oedden nhw’n ei ddisgwyl. Yn olaf, mae sgaffaldio eu dysgu ym mha bynnag ffurf mae’n digwydd yn debygol o gynyddu eu boddhad.
Sut fydd ein rôl fel addysgwyr a gweithwyr addysg proffesiynol yn newid?
Mae dull yr ystafell ddosbarth wyneb i waered a hyrwyddwyd gan ein sefydliad yn ystod y flwyddyn academaidd hon yn newid dynameg grym yn yr ystafell ddosbarth. Mae’n caniatáu mwy o ddewis i fyfyrwyr o ran sut a phryd maen nhw’n dysgu. Mae hefyd yn gosod mwy o bwyslais ar diwtoriaid fel mentoriaid a hwyluswyr yn hytrach na darlithwyr. Yn y dyfodol, mae’n debygol y bydd y berthynas rhwng myfyrwyr a staff yn trawsnewid ymhellach. Fel y nodwyd yn gynt, gallai fod yn gyfle i weithio mewn partneriaeth gyda myfyrwyr, gan ganiatáu iddynt fod yn asiantau eu profiad dysgu eu hunain.
Mae’n bleser gennym gyflwyno’r astudiaeth achos gyntaf ar ddefnyddio offer rhyngweithiol Blackboard, sef defnyddio byrddau trafod gan Dr Martine Garland o Ysgol Fusnes Aberystwyth.
‘Roedd byrddau trafod felly yn ffordd o ail-greu’r drafodaeth y gallem fod wedi’i chael yn y dosbarth, ac yn sgil hynny fe gafwyd dros 900 o bostiadau yn ystod y semester.’
Pa offer ydych chi’n ei ddefnyddio a sut?
Rwy’n defnyddio byrddau trafod ar fodiwl marchnata craidd blwyddyn 1af gyda 97 o fyfyrwyr. Caiff y byrddau trafod eu defnyddio mewn ffordd strwythuredig iawn i roi cyfle i fyfyrwyr gymhwyso theori, model neu fframwaith y maen nhw newydd ddysgu amdano. Yn sgil y dull cyfunol y dechreuwyd ei ddefnyddio mewn ymateb i Covid-19, mi sylwais nad oedd myfyrwyr yn astudio’r cynnwys a recordiwyd yn ei drefn addas, ac nid yn yr wythnos y bwriadwyd iddynt astudio’r pwnc. Roedd hyn yn golygu ei bod yn anodd defnyddio’r sesiynau byw yn MS Teams i wneud ymarferion pwnc-benodol a chreu dadl gan nad oedd llawer o fyfyrwyr wedi astudio’r pwnc eto. Roedd byrddau trafod felly’n ffordd o ail-greu’r drafodaeth y gallem fod wedi’i chael yn y dosbarth, ac yn sgil hynny fe gafwyd dros 900 o bostiadau yn ystod y semester.
Pam wnaethoch chi ddefnyddio’r offer hwn?
Dewisais yr offer hwn gan ei fod yn rhwydd iawn ei ymgorffori yn y strwythur dysgu wedi’i recordio a chyfeirio myfyrwyr ato ar yr adeg berthnasol yn eu hastudiaethau. Roedd gan bob darlith a recordiwyd dri ‘phwynt trafod’ wedi’u cynllunio i gyflawni deilliannau dysgu yn ymwneud â chymhwyso dysgu. Ar ôl gweithio trwy gynnwys dysgu ar-lein ar bwnc, gofynnai’r pwynt trafod iddynt rannu eu profiad neu enghraifft berthnasol, a dechrau sgwrs ddyfnach am gymhwyso damcaniaeth i’r byd go iawn.
Sut wnaethoch chi gynllunio’r gweithgarwch hwn yn defnyddio’r offer hwn?
Yn PowerPoint y ddarlith a recordiwyd, defnyddiais eicon cyson i nodi trafodaeth, yna cynnwys cyfarwyddiadau y dylent oedi’r fideo, gwneud rhai nodiadau, yna pan fyddant wedi gorffen y ddarlith, mynd i’r ‘gofod trafod’ a rhannu eu meddyliau.
Mi wnes i hefyd ddefnyddio swyddogaeth y bwrdd trafod i osod a derbyn gweithgareddau ‘tasg gydweithredol’. Fe allen nhw ddarllen y briff ar frig yr edefyn, ac yna postio allbynnau eu grwpiau yn yr edefyn. Yr enw arno oedd ‘Safle cydweithredu’ ond defnyddio offer y bwrdd trafod yr oedd.
Beth yw barn myfyrwyr am yr offer hwn?
Rwy’n credu ei fod yn gymysg, wnaeth rhai myfyrwyr ddim cymryd rhan o gwbl, er i’r mwyafrif wneud hynny (cofiwch eu bod yn cael marciau am gymryd rhan ac ymgysylltu). Cyfeiriodd sawl myfyriwr at y byrddau trafod yn eu hadborth yn yr holiadur gwerthuso modiwl:
“Roeddwn i wrth fy modd â’r modiwl hwn. Roedd yr athrawes yn rhagorol, ac roedd hi’n glir ei ffocws trwy gydol y modiwl. Y bwrdd trafod oedd rhan orau’r modiwl gan ei fod yn rhoi lle inni gymhwyso’r damcaniaethau. Drwyddi draw, un o’r modiwlau gorau yn fy mlwyddyn gyntaf.”
“Gyda phopeth oedd yn digwydd, mae’r modiwl hwn wedi cael ei redeg yn dda iawn y semester hwn. Mae llawer o gynnwys ar-lein i’w wneud ac mae’r fforymau i fyfyrwyr drafod y pynciau dan sylw wedi ei wneud yn fodiwl difyr iawn.”
A oes gennych unrhyw awgrymiadau i bobl sydd eisiau defnyddio’r offer hwn?
Dylech ei gwneud hi’n glir iawn beth rydych chi’n gofyn iddyn nhw ei wneud a ble gallan nhw ddod o hyd iddo. Anogwch y myfyrwyr i lwytho rhith-ffurf (avatar) fel nad yw’r drafodaeth mor ddi-wyneb. Yn sicr ar gyfer modiwlau blwyddyn 1, ystyriwch ddyfarnu marciau am gymryd rhan ac ymgysylltu â phethau fel byrddau trafod, wici ac ati. Mae adroddiadau Blackboard yn rhoi ffordd gyflym a hawdd i chi weld pwy sy’n gwneud beth, ble a phryd.
Yn ddiweddar rydym wedi prynu meddalwedd pleidleisio’r Brifysgol – Vevox a all fod yn ychwanegiad ardderchog i’r offer yr ydych yn eu defnyddio eisoes. Yn ystod y Gynhadledd Dysgu ac Addysgu Flynyddol (archebu lle ar y gynhadledd)) bydd ein rheolwr cyfrif Vevox, Joe Probert yn egluro sut y gellir defnyddio Vevox ar gyfer gweithgareddau dysgu. Ddydd Mercher, byddwn hefyd yn cael cyfle i ymuno â gweminar ar sut i ddefnyddio Vevox yn eich ystafell ddosbarth hybrid. Os hoffech weld sut mae Vevox wedi cael ei ddefnyddio gan sefydliadau eraill, gallwch hefyd edrych ar yr astudiaethau achos hyn.
Offer arall yr ydym wedi ysgrifennu amdano o’r blaen yw Padlet sy’n rhad ac am ddim ac yn cael ei ddefnyddio’n eang ar draws y sector. Edrychwch ar ein blogbost blaenorol sy’n cynnwys rhai syniadau ar sut y gallai gael ei ddefnyddio i addysgu. Mae yna hefyd recordiad o gyflwyniad ar Padlet gan Danielle Kirk a gyflwynwyd yn ystod y 7fed Gynhadledd Dysgu ac Addysgu Flynyddol.
Yn seiliedig ar ddarganfyddiadau’r Arolwg Mewnwelediad Digidol rydym hefyd wedi cyhoeddi rhestr o offer digidol ac apiau defnyddiol ar gyfer dysgu. Efallai yr hoffech argymell y rhain i’ch myfyrwyr drwy rannu’r neges hon â hwy neu eu cyfeirio at offer penodol a fydd yn eu helpu gyda’r hyn y maent ei angen.
Os ydych chi’n penderfynu defnyddio unrhyw feddalwedd trydydd parti ar gyfer dysgu ac addysgu, mae yna rai ystyriaethau i’w gwneud i’ch cadw chi a’ch myfyrwyr yn ddiogel ar-lein.
Yn arolwg Mewnwelediad Digidol 2018/19 gwnaethom ofyn i fyfyrwyr roi enghreifftiau o’r offer digidol sy’n ddefnyddiol iawn ar gyfer dysgu yn eu barn hwy. Rydym am rannu rhai o’r enghreifftiau ar ein blog.
Endnote – meddalwedd rheoli cyfeirnodau (am ddim i’w lawrlwytho i staff a myfyrwyr PA)
Mendeley – meddalwedd rheoli cyfeirnodau a rhwydwaith ymchwilwyr
Trefnu a monitro eich cynnydd
ApAber– gwirio eich amserlen, gweld pa gyfrifiaduron sydd ar gael ar y campws, gweld balans eich Cerdyn Aber, edrych ar amserlenni bysiau lleol a llawer mwy
GradeHub – offer i olrhain eich cynnydd a rhagfynegi pa farciau sydd eu hangen arnoch i gael eich gradd
Asana – rhaglen ar y we a dyfeisiau symudol a luniwyd i helpu timau i drefnu, olrhain a rheoli eu gwaith
MyStudyLife – yn anffodus mae’r gwasanaeth hwn yn dod i ben ond rhowch gynnig ar myHomework (ap) yn lle hynny, bydd yn eich helpu i drefnu eich llwyth gwaith
Study Blue – cardiau fflach ar-lein, cymorth gyda gwaith cartref a datrysiadau gwerslyfrau
Quora – llwyfan i ofyn cwestiynau a chysylltu â phobl sy’n cyfrannu mewnwelediad unigryw ac atebion o safon
Memrise – llwyfan iaith sy’n defnyddio cardiau fflach fel cymhorthion cofio, ond sydd hefyd yn cynnig cynnwys a grëwyd gan ddefnyddwyr ar amrywiaeth eang o bynciau eraill
GeoGebra – rhaglen geometreg, algebra, ystadegau a chalcwlws ryngweithiol
KhanAcademy – cyrsiau, gwersi ac ymarferion ar-lein rhad ac am ddim
Tomato Timers – Mae ‘Techneg Pomodoro’ yn ddull o reoli amser, mae’r dechneg yn defnyddio amserydd i dorri’r gwaith yn gyfnodau, fel rheol 25 munud o hyd, wedi’u gwahanu gan egwyliau byr
Yn ystod yr Ŵyl Fach yr wythnos ddiwethaf, cynhaliom ni sesiwn ‘Cynllunio Asesiadau sy’n Rhydd o Bryder’. Roedd y sesiwn yn seiliedig ar A review of the literature concerning anxiety for educational assessments gan Ofqual sy’n amlinellu’r cysylltiadau rhwng pryder am asesiadau, perfformiad myfyrwyr ac iechyd meddwl. Mae hefyd yn cynnig ymyriadau posibl ar gyfer pryder am asesiadau y gellir eu cymhwyso i gynllunio yn ogystal â gweithredu asesiadau.
Ar sail yr adolygiad yn ogystal â thrafodaethau o’r sesiwn rydym ni wedi paratoi rhestr o gamau syml y gallwch eu cymryd i sicrhau nad yw asesiadau’n peri cymaint o bryder i’ch myfyrwyr:
Defnyddio anogaeth gadarnhaol yn lle apelio at ofn.
Mae wedi’i ddangos bod apelio at ofn, gyda negeseuon sy’n pwysleisio pwysigrwydd asesiadau arfaethedig, yn cyfrannu at lefelau uwch o bryder am brofion, ymgysylltu dosbarth is a pherfformiad is mewn tasgau (Putwain & Best, 2011; Putwain, Nakhla, Liversidge, Nicholson, Porter & Reece, 2017; Putwain & Symes, 2014). Yn lle symbylu myfyrwyr drwy apelio at ofn, ceisiwch ail-eirio eich negeseuon yn anogaeth gadarnhaol.
Helpu’r myfyrwyr i osod nodau y gellir eu cyflawni.
Yn ogystal â darparu gwybodaeth i fyfyrwyr ar sut y dylai eu perfformiad neu bapur terfynol edrych, mae’n werth ychwanegu gwybodaeth ar y camau sydd eu hangen i gyrraedd yno. Gall rhannu asesiadau’n gamau ac awgrymu tua faint o amser y dylid ei dreulio ar bob rhan fod yn ddefnyddiol i fyfyrwyr, yn enwedig y rheini sydd heb brofiad o reoli asesiadau prifysgol.
Hwyluso amgylchedd dysgu cadarnhaol.
Fel y disgrifir yn yr adolygiad ‘gall amgylcheddau dysgu cadarnhaol gynnwys: cynllunio gwersi sy’n canolbwyntio ar gryfderau a galluoedd myfyrwyr ac yn adeiladu arnynt yn hytrach na nodi gwendidau; rhoi adborth cadarnhaol a chywir; annog perthnasoedd cydweithredol yn hytrach na chystadleuol rhwng cymheiriaid; ac annog cymhelliad cynhenid y myfyrwyr i astudio, yn hytrach na chael eu gorfodi neu ganolbwyntio ar bwysigrwydd deilliannau asesu (Jennings & Greenberg, 2009 dyfynnir yn Ofqual, 2020). Sut allwch chi feithrin yr elfennau hyn yn eich dosbarth?
Addasu’r dull asesu (os yw’n bosibl!).
Mae llawer o ffactorau penodol mewn asesiadau’n effeithio ar faint o bryder y gallant ei achosi. Gall gwneud addasiadau bach i’r dull asesu wneud gwahaniaeth i’ch myfyrwyr:
Cyfryngiad (faint o effaith mae’r asesiad i’w weld yn ei gael ar radd gyffredinol y myfyriwr): Bydd rhannu neu ledaenu asesiadau cymhleth â phwysau uchel yn ddarnau llai yn helpu myfyrwyr gyda rheoli eu hamser yn well a chreu llai o bwysau i wneud yn dda.
Cymhlethdod (pa mor gymhleth mae’r asesiad yn ymddangos): oes unrhyw beth yng nghynllun yr asesiad y gellid ei symleiddio?
Gwerthuso (a gaiff eu perfformiad ei werthuso gan eraill): lle bo’n bosibl ystyriwch leihau effaith yr elfen gwerthuso cymdeithasol mewn asesiadau drwy gyfyngu ar faint y gynulleidfa neu ganiatáu i’r myfyrwyr gyflwyno cyflwyniad wedi’i recordio ymlaen llaw.
Amseru (a yw eu perfformiad yn cael ei amseru): mae hwn yn gymwys yn enwedig mewn perthynas ag arholiadau sydd â therfynau amser caeth fel arfer. Mae’n werth ystyried ai arholiadau wedi’u hamseru yw’r ffordd orau i fesur cynnydd myfyrwyr ar y deilliant dysgu neu a oes cynllun asesu amgen y gallech ei ddefnyddio.
Helpu’r myfyrwyr i deimlo’n barod.
Gall cynyddu pa mor barod maen nhw’n teimlo hefyd helpu i leddfu pryder asesu. Rhai o’r pethau y gallwch eu gwneud i helpu eich myfyrwyr deimlo’n barod yw:
sicrhau bod yr asesiad yn glir, yn fanwl ac yn hygyrch;
cysylltu asesiadau’n glir ac yn amlwg â deilliannau dysgu;
cysylltu sgiliau a ddysgwyd drwy’r modiwl â’r rheini sy’n eu helpu mewn asesiadau;
cyfleu disgwyliadau (e.e. faint o amser y dylent ei dreulio ar asesiad) yn glir dro ar ôl tro.
Yn olaf, efallai mai’r ffordd fwyaf effeithiol i wneud myfyrwyr yn fwy parod a’u helpu i arfer â chael eu hasesu yw ffug arholiadau ac asesiadau ffurfiannol eraill (Ergene, 2011).
Rhoi gwybodaeth i fyfyrwyr ar bryder am asesiadau a sut i’w reoli.
Gallwch helpu drwy roi gwybodaeth i fyfyrwyr fod pryder am asesiadau’n gyffredin ymhlith myfyrwyr a rhoi dolenni iddynt at adnoddau sydd ar gael (gweler isod).
Adnoddau
Cefnogi eich Dysgu: modiwl ar gael i’r holl fyfyrwyr drwy Blackboard sy’n cynnig gwybodaeth hanfodol ar asesiadau yn cynnwys adran fer ar ymdrin â phryder am asesiadau.
Canllaw Cyflym i Lwyddiant Myfyrwyr: man cychwyn da ar gyfer helpu myfyrwyr i feithrin sgiliau academaidd fel rheoli amser, strategaethau astudio effeithiol a’r gallu i’w cymell eu hunain.
Tudalennau SgiliauAber (hefyd ar gael drwy Blackboard): cymorth i fyfyrwyr ar amrywiol sgiliau hanfodol yn cynnwys ysgrifennu academaidd, cyfeirnodi neu gyflogadwyedd.
Adnoddau Lles Myfyrwyr: amrywiol adnoddau i fyfyrwyr sy’n gallu eu helpu i feithrin strategaethau ymdopi.
Er efallai nad yw’n bosibl cynllunio asesiadau sy’n gwbl rydd o bryder, gall rhai o’r camau hyn gael effaith gadarnhaol ar berfformiad a lles myfyrwyr.
Mae’r Uned Datblygu Dysgu ac Addysgu yn chwilio am nifer o Lysgenhadon Dysgu Myfyrwyr i weithio ar brosiect o’r enw ‘What is a well-designed Blackboard module?’. Mae ystyriaethau ynghylch cysondeb a llywio o amgylch modiwlau Blackboard yn cael eu codi’n aml yn yr adborth a gawn gan fyfyrwyr (e.e. drwy Arolwg Defnyddwyr y Gwasanaethau Gwybodaeth neu arolwg Mewnwelediad Digidol JISC). Hoffem gasglu cymuned fach o fyfyrwyr a fydd, drwy ddulliau Profiad Defnyddwyr amrywiol, yn gweithio ar y cwestiwn hwn. Yn rhan o’r rôl, byddwch yn cymryd rhan mewn grwpiau ffocws, yn adeiladu eich modiwl Blackboard eich hun ac yn gweithio ar y cyd i adrodd ar eich darganfyddiadau.
Hoffem recriwtio 8 myfyriwr. Cynhelir y prosiect rhwng 5 ac 17 Gorffennaf 2021. Gan ddibynnu ar y grŵp, bydd gofyn i’r Llysgenhadon ymrwymo i oddeutu 13 awr o waith naill ai yn ystod wythnos gyntaf neu ail wythnos y prosiect.
Gofynnwn i chi ystyried annog eich myfyrwyr i wneud cais am y rôl drwy borth GwaithAber lle ceir hyd i ragor o wybodaeth. Y dyddiad cau yw 21 Mehefin.
