Bydd modiwlau Blackboard Uwchraddedig ar gyfer blwyddyn academaidd 2019/20 yn cael eu creu heb gynnwys. Yn flaenorol, roedd y cynnwys yn cael ei gopïo drosodd bob blwyddyn yn awtomatig ar gyfer holl fodiwlau Blackboard.
Bydd paratoi modiwlau Uwchraddedig ar gyfer y flwyddyn nesaf yn golygu bod cydlynwyr y modiwlau’n copïo deunydd presennol drosodd neu’n uwchlwytho deunydd newydd i’r ailadroddiad o’u modiwl. Bydd yr holl fodiwlau’n cynnwys templed o ddewislen adrannol y cytunwyd arni a bydd rhaid trefnu’r cynnwys yn unol â’r ddewislen hon.
Hoffem gynorthwyo staff i baratoi modiwlau gymaint ag y gallwn. Rydym yn fodlon dod i’r swyddfa neu i chi ddod i ymweld â ni. Os hoffech drefnu apwyntiad gydag aelod o’r Grŵp E-ddysgu, rhowch wybod i ni lle a phryd yr hoffech gwrdd.
Rydym wedi paratoi’r Cwestiynau Cyffredin hyn sydd â chanllawiau manwl ar sut i gopïo elfennau gwahanol ar Blackboard ac wedi cynhyrchu’r daflen wybodaeth sy’n cael ei harddangos ar yr ochr chwith.
Rydym yn edrych ymlaen at weithio’n agos â’r holl staff a’ch cynorthwyo mewn unrhyw ffordd sy’n gyfleus i chi.
Yn dilyn y Gynhadledd Fach ddiweddar ar Addysg Gynhwysol, rydym wedi bod yn myfyrio ar ein profiad o’r digwyddiad. Mae pob aelod o’r Grŵp E-ddysgu wedi ysgrifennu darn byr ar un agwedd ar y Gynhadledd Fach.
Niwroamrywiaeth
Roedd sesiwn Janet a Caroline yn ddiddorol o ran y pwnc a’r ffordd y cafodd ei gyflwyno. Fel hyfforddwr, rwy’n chwilio byth a hefyd am syniadau newydd a ffyrdd newydd o gyflwyno gwybodaeth, ac roedd llawer yn y sesiwn hwn. O ymarferion paru i waith grŵp, roedd hwn yn gyflwyniad arbennig o weithredol.
Yn ogystal â helpu i ddeall bod ymennydd pawb yn gweithio’n wahanol iawn, a bod y rheiny â chyflwr niwroamrywiaeth yn aml yn gorfod gweithio’n galed iawn i gyflawni tasgau y byddai pobl niwronodweddiadol yn eu cymryd yn ganiataol. Er y gallai hyn arwain at fwy o straen a llwyth gwaith, y mae hefyd yn fanteisiol gan y gall pobl â niwroamrywiaeth hefyd fod yn gryf, yn greadigol a chanfod ffyrdd newydd ac arloesol o weithio er mwyn cyrraedd eu deilliannau.
Roedd y sesiwn yn amlygu’r ffaith fod llawer o arwyddion allanol niwroamrywiaeth yn debyg iawn, ac y gall newidiadau bach i’r ffordd yr ydym yn addysgu fod o gymorth.
Cyflwynodd Janet a Caroline eu sesiwn mewn ffordd ryngweithiol oedd yn ennyn diddordeb – a byddaf yn sicr yn cofio’r ymarfer lle gwnaethom geisio egluro gwyliau heb ddefnyddio’r llythyren e! Rhowch gynnig arni … bydd yn rhoi syniad sydyn i chi o sut mae gweithio o gwmpas rhywbeth y mae pawb yn ei gymryd yn ganiataol yn arwain at waith caled iawn, a cham-gychwyn dro ar ôl tro – ond hefyd ffordd newydd a gwahanol o fynegi eich hun.
Gwirydd Hygyrchedd
O ganlyniad i’r sesiwn, mae gennyf bellach agwedd newydd tuag at yr offerynnau a ddefnyddiaf a’r deunyddiau a luniaf ar gyfer fy myfyrwyr fel addysgwr. Byddaf yn gwneud ymdrech i beidio â meddwl am fyfyrwyr ag anghenion dysgu penodol fel unigolion y mae’n rhaid imi greu deunyddiau pwrpasol personol ar eu cyfer. Nid oes gan fyfyrwyr ag anawsterau dysgu penodol arddull ddysgu unigryw. Maen nhw’n gwneud dewis fel ag y mae gweddill y myfyrwyr i ryw raddau. Mae’n well meddwl y gall eu harddulliau dysgu neu ddewisiadau penodol fod o fudd i’r holl fyfyrwyr.
Byddaf yn defnyddio offerynnau cynwysedig fel y gwirydd hygyrchedd yn Word. Nid oes angen anfon fy ngwaith at arbenigwr neu ddefnyddio rhaglenni cymhleth. Po fwyaf syml yw’r deunyddiau a gynhyrchaf, gorau oll yw hynny ar gyfer cydweddu â thechnoleg gynorthwyol. Nid yw hygyrchedd yn golygu bod yn rhaid imi ddefnyddio ffont ‘comic sans’ ar gyfer pob dim. Pethau bach fel ychwanegu testun amgen ar gyfer llun, defnyddio teitlau a phenawdau’n gywir yn hytrach na chwarae gyda ffontiau. Nid oes disgwyl i bob dim a gynhyrchaf gyfateb i lawysgrif euraidd. Rhaid iddo fod yn ymarferol er mwyn iddo ateb y gofyn o gyflwyno gwybodaeth, sef yr hyn a wnaf wrth addysgu beth bynnag.
Beth hoffech chi ei wneud yn wahanol (1)?
Defnyddio Profion Blackboard i ehangu mynediad i ddysgu
Mae Profion Blackboard yn ffordd wych o greu adnodd dysgu i fyfyrwyr. Fel technolegydd dysgu a rhywun sy’n aml ond yn gweld ochr dechnegol profion, roedd yn ddefnyddiol iawn i glywed Jennifer Wood yn cyflwyno ei phrofiad ei hun o’r manteision niferus o ddefnyddio’r offeryn hwn. Mae Jennifer yn addysgu Sbaeneg yn yr Adran Ieithoedd Modern ac mae defnyddio profion wedi galluogi Jennifer i ryddhau amser gwerthfawr yn y dosbarth i ganolbwyntio ar drafodaethau mwy defnyddiol. Cyn defnyddio Profion Blackboard, byddai myfyrwyr yn treulio cyfran o’u hamser yn y dosbarth yn gwneud profion. Bellach gall myfyrwyr brofi eu gwybodaeth a’u dysgu y tu allan i’r ystafell ddosbarth mewn amgylchedd y maen nhw’n teimlo’n gyfforddus ynddo. Gan ddibynnu ar y math o gwestiwn a ddewiswch (ceir llawer o fathau o gwestiynau), gall y profion gael eu marcio’n awtomatig a gall yr adborth gael ei ryddhau i’r myfyrwyr ar ôl iddynt sefyll y prawf. Wrth gwrs, mae’n rhaid gwneud peth gwaith ar gyfer profion a rhaid ichi sicrhau eich bod yn gwybod pam y dymunwch ddefnyddio’r prawf er mwyn iddo fod yn ddefnyddiol i chi a’ch myfyrwyr.
Fel trwch cynnwys Blackboard, ceir llawer o osodiadau y gallwch eu defnyddio i baru’r prawf i’ch anghenion a’ch gofynion dysgu. Mae’r Grŵp E-ddysgu yn wastad yn barod i wirio prawf, edrych drwy’r gosodiadau neu hefyd gynorthwyo wrth ddewis y math cywir o gwestiwn ar gyfer eich gweithgarwch dysgu. Beth am greu prawf i helpu’ch myfyrwyr â’u gwaith adolygu?
Beth hoffech chi ei wneud yn wahanol (2)?
Siarad Cyhoeddus a mynediad i sgiliau craidd
Fe wnaeth sgwrs Rob Grieve fy helpu i werthfawrogi faint o broblem yw siarad cyhoeddus i rai unigolion. Roedd y cyngor am fod yn ‘siaradwr diffuant’ yn arbennig o ddefnyddiol i mi. Peidio â blaenoriaethu arddull dros sylwedd, canolbwyntio ar y wybodaeth y dymunaf ei chyflwyno a cheisio siarad mewn ffordd sy’n naturiol i mi yw’r strategaethau y bwriadaf eu defnyddio i wella fy ngallu i siarad yn gyhoeddus.
Cefais f’ysbrydoli hefyd gan gyflwyniad Debra Croft ar y Brifysgol Haf. Dyma brosiect sy’n rhoi cyfle amhrisiadwy i’r bobl ifanc sy’n cymryd rhan. Gwnaeth amrywiaeth y pynciau a drafodir yn ystod 6 wythnos yn unig, gan gynnwys sgiliau bywyd yn ogystal â phynciau academaidd, argraff fawr arnaf. Roedd cynllun hyblyg a chreadigol y gweithgareddau a’r asesiadau wedi’u teilwra ar gyfer anghenion y myfyrwyr yr un mor drawiadol. Dangosodd y cyflwyniad hwn sut gall darparu ar gyfer y gwahaniaethau gael effaith sylweddol ar fywydau pobl.
Cyflwyno cynnig ar gyfer y Gynhadledd Dysgu ac Addysgu flynyddol eleni
Gan fod cynifer o awgrymiadau a myfyrdodau defnyddiol, roedd dewis un ar gyfer pob un ohonom yn dipyn o dasg! Gallwch weld adroddiad llawn am y gynhadledd fach wedi’i rannu yn ddau bostiad blog (Rhan 1 a Rhan 2). Fe’ch atgoffir bod Galwad am Gynigion ar gyfer ein prif Gynhadledd Dysgu ac Addysgu ar gael yma a’n bod yn croesawu cynigion o bob ardal yn y Brifysgol.
[Yn ystod yr wythnosau diwethaf, bûm yn dilyn cwrs FutureLearn o’r enw Using Technology in Evidence-Based Teaching and Learning sy’n cael ei redeg gan y Coleg Addysgu Siartedig ac yn canolbwyntio ar ddefnyddio technolegau dysgu mewn addysg gynradd ac uwchradd. Er bod y cyd-destun yn wahanol i addysg uwch, bu’n gwrs diddorol a goleuedig iawn. Bu’n ddefnyddiol i ganfod mwy am y system addysg y daw ein myfyrwyr ohoni, ac mae’n dda hefyd i ddysgu mwy am wahanol offerynnau a thechnolegau na ddefnyddiwn i’r un graddau efallai mewn prifysgolion.
Un o’r offerynnau y mae athrawon mewn ysgolion yn ei ddefnyddio’n aml yw Padlet. Gwyddom fod Padlet yn cael ei ddefnyddio mewn prifysgolion ac efallai bod defnyddwyr Padlet ymhlith ein darllenwyr. Ond, nid oedd yn rhywbeth yr oeddwn i wedi’i ddefnyddio ryw lawer, felly penderfynais gael golwg arno.
Mae Padlet (https://padlet.com/) yn ei ddisgrifio ei hun yn ‘feddalwedd cynhyrchiant’ sy’n gwneud cydweithredu yn haws. Fe’i cynlluniwyd o amgylch y syniad o wal neu fwrdd y gallwch chi a defnyddwyr eraill ychwanegu cerdiau neu nodiadau ato. Gall y cerdiau gynnwys testun, lluniau, dolenni cyswllt, fideos a ffeiliau.
I greu bwrdd Padlet, bydd yn rhaid ichi greu cyfrif – gallwch gael cyfrif am ddim sy’n darparu 3 bwrdd a hawl i uwchlwytho 10Mb. Byddwch hefyd yn gweld hysbysebion yn y fersiwn hwn. Gallwch gofrestru drwy Google neu greu eich cyfrif eich hun. Gall myfyrwyr gyfrannu at y byrddau heb greu cyfrif, ond os byddant yn dymuno gwybod pwy sydd wedi postio beth, bydd yn rhaid iddynt greu cyfrif. Gall byrddau fod yn breifat neu’n gyhoeddus, a gallwch reoli pwy i’w gwahodd i bostio i’r byrddau. (Mynnwch olwg ar ein post ar feddalwedd pleidleisio ac ystyriaethau preifatrwydd).
Ceir dau ddefnydd posibl amlwg ar gyfer Padlet – gweithgareddau curadu neu ymchwilio yw’r cyntaf, a chasglu adborth i fyfyrwyr yw’r ail. Gallwch ddod o hyd i lawer o astudiaethau achos o ysgolion, colegau a phrifysgolion yn defnyddio Padlet i alluogi myfyrwyr i gasglu adnoddau a deunyddiau ar y cyd, e.e. ar gyfer cyflwyniadau a phrosiectau grŵp neu ar gyfer paratoi seminarau. Mae gwaith israddedigion Blwyddyn Sylfaen Seicoleg Prifysgol Sussex yn enghraifft hyfryd (https://journals.gre.ac.uk/index.php/compass/article/view/714)
Mae’n bosib y bydd llawer ohonom hefyd wedi gweld Padlet yn cael ei ddefnyddio i hwyluso rhyngweithio mewn darlithoedd neu gyflwyniadau. Gall myfyrwyr bostio eu cwestiynau ar wal Padlet yn ystod darlith i alluogi’r darlithydd i weld sylwadau a chwestiynau. O’i ddefnyddio yn y modd hwn, mae gan Padlet rai o’r un offerynnau â mathau eraill o feddalwedd pleidleisio. Er nad yw’n galluogi cyfranogwyr i ateb cwestiynau, mae’n ffordd wych o gasglu ymatebion ysgrifenedig y gellir eu defnyddio’n ddiweddarach, neu eu harchifo i gyfeirio atynt yn y dyfodol.
Ddiwedd mis diwethaf, gwnaethom flogio am gael ein dwylo ar amgylchedd profi Blackboard SaaS. Y mis hwn rydym wedi dechrau’r broses o brofi’r amgylchedd i weld beth sy’n debyg ac yn wahanol rhwng SaaS a’n fersiwn presennol o Blackboard.
Mae llawer o’r gwaith y mis hwn yn cael ei wneud gan ein Rheolwr Prosiect Blackboard yn Amsterdam. Mae Blackboard wedi cymryd copi llawn o’n fersiwn lleol ni ac yn ei fewnforio i’r system SaaS newydd. Pan fydd hyn wedi cael ei wneud, bydd modd i ni edrych ar ein cyrsiau presennol, gwirio bod y broses fudo wedi gweithio a bod popeth yn gweithio fel y disgwyl. Bydd hyn yn golygu edrych ar gynnwys presennol, profi bod yr holl offer yn gweithio’n iawn, a mynd trwy’r holl brosesau dyddiol arferol yr ydym yn eu defnyddio.
Yn y cyfamser, rydym yn profi’r holl flociau adeiladu sydd wedi cael eu datblygu’n fewnol yn PA. Blociau adeiladu yw enw Blackboard am offer estyniad – rhai o’r blociau adeiladu y byddwch chi’n eu hadnabod yw Turnitin a Panopto. Mae bloc adeiladu yn mewnosod gweithrediadau trydydd parti i Blackboard, er enghraifft defnyddio cofrestriadau Blackboard i reoli caniatâd, a’i gwneud hi’n haws arddangos cynnwys mewn modiwl Blackboard. Ond, mae offer eraill yr ydych yn eu defnyddio bob dydd, ond nad ydych yn gwybod eu bod wedi cael eu creu yn PA hyd yn oed. Mae’r faner sgrolio a’r blwch Fy Modiwlau yn enghreifftiau o’r rhain. Mae gennym ni hefyd offer yr ydym ni fel Gweinyddwyr System yn eu defnyddio ac na fydd defnyddwyr arferol byth yn eu gweld – pethau sy’n galluogi i ni gyflwyno gwybodaeth yr ACF i fyfyrwyr y drydedd flwyddyn neu ddarparu porth Blackboard i ApAber.
Mae’r broses brofi wedi golygu dogfennu beth mae pob offer yn ei wneud a sut mae’n gweithio nawr. Rydym wedyn yn defnyddio’r un offer yn ein hamgylchedd SaaS i wirio ei fod yn cael yr un canlyniad ac yn gweithio yn yr un modd. Rydym yn gwneud yn siŵr bod yr holl flociau adeiladu’n cael eu profi mewn nifer o borwyr, yn ogystal ag ar gyfrifiaduron PC ac Apple. Pan fo’n briodol byddwn hefyd yn profi ar ddyfais symudol. Ac wrth gwrs, byddwn yn gwirio yn Gymraeg a Saesneg. Pan fydd hyn wedi cael ei wneud, byddwn yn pasio’r adborth ymlaen i’n datblygwyr lleol i wneud unrhyw newidiadau angenrheidiol. Ac yna bydd y broses yn dechrau eto.
Rydym hefyd yn dod i arfer â’r cylch adleoli parhaus y gwnaethom siarad amdano yn y blog diwethaf. Golyga hyn ein bod yn gwneud yn siŵr ein bod yn derbyn y negeseuon e-bost sy’n dod gan Blackboard ac yn eu darllen yn ofalus i weld beth sy’n newid ar gyfer ein hamgylchedd. Efallai fod gennym ddatrysiadau i broblemau yr ydym wedi rhoi gwybod amdanynt neu offer newydd/diwygiedig. Ar ôl gosod yr adleoli, bydd angen i ni wedyn brofi pob un o’r eitemau newydd i wneud yn siŵr eu bod yn gwneud beth maent i fod i’w wneud yn ogystal â gwneud yn siŵr bod y nam wedi’i drwsio pan fo’n briodol. Efallai y bydd angen i ni hefyd ddiweddaru ein dogfennau, Cwestiynau Cyffredin ac ati i adlewyrchu’r newidiadau a fydd yn cael eu gwneud.
Mae’r Grŵp E-ddysgu’n cynnal nifer o Fforymau Academi trwy gydol y flwyddyn. Diben y Fforymau Academi yw dod ag aelodau ynghyd ar draws y Brifysgol i drafod mater yn ymwneud â Dysgu ac Addysgu. Roedd ein Fforwm Academi ddiwethaf yn canolbwyntio ar Feithrin Hunanddisgyblaeth mewn Dysgwyr. Cafodd y pwnc hwn ei awgrymu yn dilyn Cynhadledd Dysgu ac Addysgu Flynyddol y llynedd. Yn y gynhadledd, gwnaeth Dr Simon Payne, Liz Titley a Liam Knox roi cyflwyniad ar hunanddisgyblaeth. Yn ogystal â hyn gwnaeth y Grŵp E-ddysgu gynnal Arddangosfa Academi ble roedd Simon yn cyflwyno strategaethau ar gyfer meithrin hunanddisgyblaeth.
Mae nodiadau llawn o’r Fforymau Academi ar gael ar Wici arbennig sydd ar gael yn y modiwl Dysgu trwy gyfrwng Technoleg, ac mae gan bob aelod o staff fynediad i hwn.
Ceir crynodeb o’n trafodaethau isod:
Strategaethau ar gyfer annog hunanddisgyblaeth mewn gweithgareddau dysgu ac addysgu
Mae myfyrwyr yn treulio mwy o amser yn dysgu y tu allan i’r dosbarth felly fe ddylem fod yn eu dysgu sut i ddysgu
Pa sgiliau sydd gan fyfyrwyr pan fônt yn cyrraedd a beth sydd angen i ni eu dysgu er mwyn iddynt fod yn ddysgwyr hunan-ddisgybledig
Sut allwn ni bwysleisio a mesur gwelliant
Os hoffech ymchwilio ymhellach i hunanddisgyblaeth gallwch wylio’r recordiad o Arddangosfa Academi Simon yn ddiweddar. Yn ogystal â hyn, efallai y bydd yr erthyglau hyn o ddiddordeb:
Cassidy, S. 2011. Self-regulated learning in higher education: Identifying component process Studies in Higher Education 36: 8. tt. 989-1000. https://doi.org/10.1080/03075079.2010.503269
Zimmerman, B. J. 2002. Becoming a Self-Regulated Learner: An Overview. Theory into Practice. 41: 2. tt. 64-70. https://www.jstor.org/stable/1477457
Cynhelir ein Fforwm Academi nesaf ar 9 Mai am 11yb a bydd yn canolbwyntio ar y pwnc ‘Sut mae gwybod fy mod yn addysgu’n llwyddiannus?’ Mae’r fforymau’n ffordd dda o rannu profiadau a dysgu gan eraill a hefyd myfyrio ar eich dulliau eich hun o ymdrin â’r pwnc. Os hoffech awgrymu pwnc ar gyfer Fforwm Academi y flwyddyn nesaf cysylltwch â ni. Gallwch gofrestru ar gyfer y Fforwm Academi drwy archebu ar-lein.
Mae’r Grŵp E-ddysgu yn cynnal cynhadledd fechan ar Addysg Gynhwysol Ddydd Mercher 10 Ebrill am 1pm yn E3, Ystafell Hyfforddi E-ddysgu, Academi Aber. Yn ychwanegol at ein postiad blog blaenorol yn cyhoeddi’r siaradwyr ar gyfer y gynhadledd fechan, rydym yn falch o gyhoeddi hefyd y bydd Dr Rob Grieve yn rhoi cyflwyniad wedi’i recordio dan y teitl Stand Up and Be Heard: Student Fear of Public Speaking.
Mae Rob yn Uwch Ddarlithydd mewn Ffisiotherapi yn Adran y Proffesiynau Perthynol i Iechyd ym Mhrifysgol Gorllewin Lloegr (UWE). Yn ogystal â’i brif faes ymchwil a’i brif weithgareddau dysgu, mae Rob hefyd yn un o ymddiriedolwyr Cymdeithas Atal Dweud Prydain. Yn rhinwedd hynny, mae wedi siarad mewn sawl digwyddiad am ddefnyddio cyflwyniadau fel math o asesu a rhoi i fyfyrwyr y sgiliau angenrheidiol ar gyfer siarad cyhoeddus. Yn y cyflwyniad hwn, bydd Rob yn cyfeirio at ambell un o’r cyflwyniadau y mae wedi’u rhoi yn ddiweddar yn Advance Higher Education. Bydd Rob hefyd yn myfyrio ar weithdai Stand Up and Be Heard y mae wedi bod yn eu cynnal i fyfyrwyr y mae arnynt ofn siarad yn gyhoeddus. Nod y gweithdai oedd cefnogi dysgu ac addysgu ym maes cyflwyniadau a siarad cyhoeddus trwy gyfrwng strategaethau penodol, ac adolygu manteision cyffredinol siarad cyhoeddus fel sgìl trosglwyddadwy ar gyfer y brifysgol, bywyd, a chyflogaeth yn y dyfodol. Mae Rob yn adeiladu ar sail arolwg a gynhaliwyd yn 2012 a dystiodd fod 80% o fyfyrwyr yn dweud iddynt brofi pryder cymdeithasol yn rhan o aseiniadau a oedd yn cynnwys siarad cyhoeddus (Russell a Topham, 2012). Yn ogystal â hyn, canfu astudiaeth bellach (Marinho et al, 2017) fod gan 64% o fyfyrwyr ofn siarad yn gyhoeddus, tra byddai 89% wedi hoffi petai eu rhaglen israddedig wedi cynnwys dosbarthiadau ar wella eu siarad cyhoeddus. Ceir rhagor o wybodaeth am waith Rob yn y postiad blog hwn. Enw ei gyfrif ar Twitter yw @robgrieve17.
Gobeithio y gallwch ymuno â ni yn ein cynhadledd fechan. Mae ambell le ar gael o hyd. Gallwch archebu eich lle ar-lein.
Cyfeiriadau
Marinho, ACF., de Madeiros, AM., Gama, AC., & Teixeir, LC. 2017. Fear of Public Speaking: Perception of College Students and Correlates. Journal of Voice. 31:1 DOI: 10.1016/j.jvoice.2015.12.012
Russell, G. a Topham, P. 2012. The impact of social anxiety on student learning and wellbeing in higher education. Journal of Mental Health 21:4. Tt. 375-385. https://doi.org/10.3109/09638237.2012.694505
Er bod unigolion sy’n defnyddio rhithrealiti yn ymwybodol o’r ffaith nad yw eu profiadau’n rhai real, mae’r ymatebion corfforol a seicolegol a ysgogir ganddo yn debyg i’r rhai a brofir mewn sefyllfaoedd gwirioneddol.
Mae defnyddio triniaethau iechyd meddwl rhithrealiti yn agor posibiliadau o weithio trwy’r ymatebion i ysgogiadau problematig heb orfod eu hwynebu mewn bywyd go iawn. Mae i hyn fudd amlwg, ymarferol; er enghraifft, mae creu efelychiad o hedfan ar gyfer unigolyn sy’n brwydro â ffobia ynglŷn â hedfan yn ateb llawer haws na threfnu taith awyren i’r unigolyn.
Ar ben hyn, gall y therapydd weithio nid yn unig ar sail disgrifiad y claf ond gall wylio’u hymatebion. Gall y therapydd a’r claf ill dau reoli’r ysgogiadau a gall hynny wneud y driniaeth yn ddiogelach yn gorfforol a seicolegol.
‘Mae gan rithrealiti’r gallu i drawsnewid y ffordd o asesu, deall a thrin problemau iechyd meddwl’ (Freeman, et al., t. 2392). Cafodd ei ddefnyddio ar gyfer asesu a thrin ffobiâu, pryder, PTSD, caethiwed, paranoia, anhwylderau bwyta ac awtistiaeth. Er enghraifft, mae ap Rhithrealiti, a grëwyd yn Ysgol Gwaith Cymdeithasol Tulane yn rhwystro cleifion caeth i gyffuriau a diod rhag llithro’n ôl ‘trwy ddefnyddio sgiliau hunan-reolaeth ac ymwybyddiaeth mewn efelychiadau realistig lle mae cyffuriau a diod wrth law’ (Leatham, 2018, para.13).
Yn ddiweddar, mae Gareth Norris a Rachel Rahman o Adran Seicoleg Prifysgol Aberystwyth ar y cyd â chydweithwyr o’r Adran Cyfrifiadureg wedi cynnal prosiect ymchwil arbrofol sy’n defnyddio rhithrealiti trwy edrych ar ei bosibiliadau ar gyfer hel atgofion mewn oedolion hŷn.
Llwyddodd y Grŵp E-ddysgu i gaffael setiau pen rhithrealiti a chamera y gall staff eu defnyddio wrth addysgu ac mewn ymchwil. Gallwch greu amgylcheddau dysgu ymdrwytho neu ddefnyddio deunydd rhithrealiti sydd eisoes ar gael. Archebwch y setiau rhithrealiti a’r camera o stoc y llyfrgell.
Freeman, D., Reeve. S., Robinson, A., Ehlers, A., Clark, D., Spanlang, B. & Slater, M. (2017). Virtual reality in the assessment, understanding, and treatment of mental health disorders. Psychological Medicine, 47 (2393-2400).
Ddydd Mercher 10 Ebrill, bydd y Grŵp E-ddysgu’n cynnal Cynhadledd Fer yr Academi eleni. Mae’r Gynhadledd Fer yn fersiwn llai o’n Cynhadledd Dysgu ac Addysgu Flynyddol sy’n ein galluogi i gasglu ynghyd gyfres o gyflwyniadau a gweithdai sy’n ymwneud â phwnc dysgu ac addysgu penodol. Thema’r Gynhadledd Fer eleni yw Addysg Gynhwysol.
Mae’n bleser gennym gadarnhau ein rhaglen ar gyfer y prynhawn:
Debra Croft (CWPSI) – Making ‘Core Skills’ Exciting and Accessible
Bydd y cyflwyniadau hyn yn cynnig cyfres o awgrymiadau ymarferol a fydd yn helpu i wneud eich dogfennau a’ch amgylcheddau dysgu yn fwy cynhwysol. Yn ogystal â hyn, byddwn yn edrych ar sut y gellid defnyddio’r strategaethau hyn yn ymarferol ac o fewn cyd-destun addysgu.
Gobeithio y bydd modd i chi ymuno â ni ar gyfer y digwyddiad hwn. Nifer cyfyngedig o leoedd sydd ar gael yn y Gynhadledd Fer felly archebwch le drwy’r dudalen archebu hon.
Yn sgil y neges ar ddefnyddio meddalwedd pleidleisio ar gyfer addysgu cawsom ymholiad ynghylch y posibilrwydd o ddefnyddio meddalwedd pleidleisio megis PollEverywhere neu Mentimeter ar gyfer modiwlau Dysgwyr o Bell.
Isod ceir canlyniadau ein profi a’n hymchwil.
Mentimeter
Gan fod gan bob cyflwyniad god gwahanol ar gyfer cael mynediad i’r pôl, gallwch bleidleisio hyd yn oed pan nad yw’r cyflwyniad yn cael ei arddangos. Ond, os nad yw’n cael ei ddefnyddio ar gyfer pleidleisio byw, dylai pob cyflwyniad gynnwys un sleid yn unig. Os yw’r cyflwyniad yn cynnwys dau neu fwy o sleidiau (ac nad yw wedi’i arddangos gan awdur y pôl) dim ond i’r sleid gyntaf y caiff y cyfranogwyr fynediad iddi.
PollEverywhere
Mae gan PollEverywhere swyddogaeth sy’n caniatáu i chi grwpio cwestiynau/polau a’u troi’n arolwg y gellir ei rannu a’i lenwi gan gyfranogwyr yn eu hamser eu hunain. Ond bydd yn rhaid i chi ‘ysgogi’r arolwg a dim ond un cyflwyniad y gallwch ei ysgogi ar y tro (https://www.polleverywhere.com/faq cwestiwn: Can I combine multiple questions (polls) into a survey?)
Mae offer arolygon ar-lein eraill ar gael megis Google Forms neu Wufoo. Gellir eu defnyddio gan nifer anghyfyngedig o gyfranogwyr (ond nid yw hyn yn wir am PollEverywhere, y cyfyngiad gyda’r cynllun rhad ac am ddim yw 25 o ymatebwyr). Fodd bynnag, nid oes gan yr offer hyn gymaint o amrywiaeth o gwestiynau (yn arbennig o’i gymharu â PollEverywhere) ac nid ydynt mor ddeniadol eu golwg.
Gellir rhannu’r ddolen i unrhyw un o’r arolygon ar-lein gyda myfyrwyr drwy e-bost, cyhoeddiad neu ddolen yn yr ardal gynnwys ar Blackboard (yn achos PollEverywhere dim ond un arolwg ar y tro y cewch ei rannu, yr un sydd wedi’i ‘ysgogi’).
Rhannu canlyniadau â myfyrwyr:
Nid yw’r offer adrodd am ganlyniadau yn Mentimeter a PollEverywhere ar gael o fewn y cynllun rhad ac am ddim. Gallech rannu’r canlyniadau â’r myfyrwyr drwy gymryd sgrinluniau o’r graffiau gyda’r ymatebion a’u cyflwyno fel delwedd, eitem neu un o’r sleidiau mewn cyflwyniad PowerPoint ar Blackboard.
Yn Google Forms a Wufoo gallwch lawrlwytho’r canlyniadau i Excel. Ond, os hoffech gyflwyno’r canlyniadau mewn modd hygyrch a gweledol, byddai’n well defnyddio’r dull sgrinlun a ddisgrifir uchod. Pan fyddwch yn defnyddio profion neu arolygon Blackboard, gallwch weld yr ystadegau drwy’r Ganolfan Raddau ac naill ai eu lawrlwytho i Excel neu’u cadw fel dogfen pdf.
Os oes gennych chi unrhyw gwestiynau neu awgrymiadau, mae croeso i chi eu rhannu â ni.
Gwahoddir staff, cynorthwywyr dysgu uwchraddedig a myfyrwyr i gyflwyno cynigion ar gyfer 7fed Cynhadledd Dysgu ac Addysgu, Dydd Llun 8 Gorffennaf – Dydd Mercher 10 Gorffennaf 2019.
Gallwch gyflwyno a gweld yr alwad am gynigion yma.
Mae thema’r gynhadledd eleni, Dysgu o Ragoriaeth: Arloesi, Cydweithio, Cymryd Rhan!,yn adlewyrchu’r ymroddiad sydd gan staff Prifysgol Aberystwyth i wella profiad dysgu eu myfyrwyr. Dyma dair prif gangen y gynhadledd eleni:
Sut mae myfyrwyr yn dysgu
Cynllunio dysgu effeithiol ac arloesol
Addysgu drwy ymchwil i ehangu dysgu
Profiadau dysgu cydweithredol a chyfranogol
Mae croeso i staff, cynorthwywyr dysgu uwchraddedig, a myfyrwyr gynnig sesiynau ar unrhyw bwnc sy’n berthnasol i ddysgu, yn enwedig os ydynt yn canolbwyntio ar ymgorffori a defnyddio technoleg wrth ddysgu. Mae croeso i chi gyflwyno pynciau eraill, hyd yn oed os nad ydynt yn cyd-fynd ag un o’r canghennau uchod.
Rydym yn annog cyflwynwyr i ystyried defnyddio fformatau amgen sy’n cyd-fynd â’r hyn a drafodir yn eu sesiynau. Gan hynny, ni fyddwn yn gofyn am fformat cyflwyno safonol.
Gofynnwn i chi lenwi’r ffurflen hon erbyn 10 Mai 2019.
Os oes gennych chi unrhyw gwestiynau, mae croeso i chi gysylltu â’r Grŵp E-ddysgu am eddysgu@aber.ac.uk, neu ffonio ar estyniad 2472.
