Bydd modiwlau Blackboard Uwchraddedig ar gyfer blwyddyn academaidd 2019/20 yn cael eu creu heb gynnwys. Yn flaenorol, roedd y cynnwys yn cael ei gopïo drosodd bob blwyddyn yn awtomatig ar gyfer holl fodiwlau Blackboard.
Bydd paratoi modiwlau Uwchraddedig ar gyfer y flwyddyn nesaf yn golygu bod cydlynwyr y modiwlau’n copïo deunydd presennol drosodd neu’n uwchlwytho deunydd newydd i’r ailadroddiad o’u modiwl. Bydd yr holl fodiwlau’n cynnwys templed o ddewislen adrannol y cytunwyd arni a bydd rhaid trefnu’r cynnwys yn unol â’r ddewislen hon.
Hoffem gynorthwyo staff i baratoi modiwlau gymaint ag y gallwn. Rydym yn fodlon dod i’r swyddfa neu i chi ddod i ymweld â ni. Os hoffech drefnu apwyntiad gydag aelod o’r Grŵp E-ddysgu, rhowch wybod i ni lle a phryd yr hoffech gwrdd.
Rydym wedi paratoi’r Cwestiynau Cyffredin hyn sydd â chanllawiau manwl ar sut i gopïo elfennau gwahanol ar Blackboard ac wedi cynhyrchu’r daflen wybodaeth sy’n cael ei harddangos ar yr ochr chwith.
Rydym yn edrych ymlaen at weithio’n agos â’r holl staff a’ch cynorthwyo mewn unrhyw ffordd sy’n gyfleus i chi.
Yn dilyn y Gynhadledd Fach ddiweddar ar Addysg Gynhwysol, rydym wedi bod yn myfyrio ar ein profiad o’r digwyddiad. Mae pob aelod o’r Grŵp E-ddysgu wedi ysgrifennu darn byr ar un agwedd ar y Gynhadledd Fach.
Niwroamrywiaeth
Roedd sesiwn Janet a Caroline yn ddiddorol o ran y pwnc a’r ffordd y cafodd ei gyflwyno. Fel hyfforddwr, rwy’n chwilio byth a hefyd am syniadau newydd a ffyrdd newydd o gyflwyno gwybodaeth, ac roedd llawer yn y sesiwn hwn. O ymarferion paru i waith grŵp, roedd hwn yn gyflwyniad arbennig o weithredol.
Yn ogystal â helpu i ddeall bod ymennydd pawb yn gweithio’n wahanol iawn, a bod y rheiny â chyflwr niwroamrywiaeth yn aml yn gorfod gweithio’n galed iawn i gyflawni tasgau y byddai pobl niwronodweddiadol yn eu cymryd yn ganiataol. Er y gallai hyn arwain at fwy o straen a llwyth gwaith, y mae hefyd yn fanteisiol gan y gall pobl â niwroamrywiaeth hefyd fod yn gryf, yn greadigol a chanfod ffyrdd newydd ac arloesol o weithio er mwyn cyrraedd eu deilliannau.
Roedd y sesiwn yn amlygu’r ffaith fod llawer o arwyddion allanol niwroamrywiaeth yn debyg iawn, ac y gall newidiadau bach i’r ffordd yr ydym yn addysgu fod o gymorth.
Cyflwynodd Janet a Caroline eu sesiwn mewn ffordd ryngweithiol oedd yn ennyn diddordeb – a byddaf yn sicr yn cofio’r ymarfer lle gwnaethom geisio egluro gwyliau heb ddefnyddio’r llythyren e! Rhowch gynnig arni … bydd yn rhoi syniad sydyn i chi o sut mae gweithio o gwmpas rhywbeth y mae pawb yn ei gymryd yn ganiataol yn arwain at waith caled iawn, a cham-gychwyn dro ar ôl tro – ond hefyd ffordd newydd a gwahanol o fynegi eich hun.
Gwirydd Hygyrchedd
O ganlyniad i’r sesiwn, mae gennyf bellach agwedd newydd tuag at yr offerynnau a ddefnyddiaf a’r deunyddiau a luniaf ar gyfer fy myfyrwyr fel addysgwr. Byddaf yn gwneud ymdrech i beidio â meddwl am fyfyrwyr ag anghenion dysgu penodol fel unigolion y mae’n rhaid imi greu deunyddiau pwrpasol personol ar eu cyfer. Nid oes gan fyfyrwyr ag anawsterau dysgu penodol arddull ddysgu unigryw. Maen nhw’n gwneud dewis fel ag y mae gweddill y myfyrwyr i ryw raddau. Mae’n well meddwl y gall eu harddulliau dysgu neu ddewisiadau penodol fod o fudd i’r holl fyfyrwyr.
Byddaf yn defnyddio offerynnau cynwysedig fel y gwirydd hygyrchedd yn Word. Nid oes angen anfon fy ngwaith at arbenigwr neu ddefnyddio rhaglenni cymhleth. Po fwyaf syml yw’r deunyddiau a gynhyrchaf, gorau oll yw hynny ar gyfer cydweddu â thechnoleg gynorthwyol. Nid yw hygyrchedd yn golygu bod yn rhaid imi ddefnyddio ffont ‘comic sans’ ar gyfer pob dim. Pethau bach fel ychwanegu testun amgen ar gyfer llun, defnyddio teitlau a phenawdau’n gywir yn hytrach na chwarae gyda ffontiau. Nid oes disgwyl i bob dim a gynhyrchaf gyfateb i lawysgrif euraidd. Rhaid iddo fod yn ymarferol er mwyn iddo ateb y gofyn o gyflwyno gwybodaeth, sef yr hyn a wnaf wrth addysgu beth bynnag.
Beth hoffech chi ei wneud yn wahanol (1)?
Defnyddio Profion Blackboard i ehangu mynediad i ddysgu
Mae Profion Blackboard yn ffordd wych o greu adnodd dysgu i fyfyrwyr. Fel technolegydd dysgu a rhywun sy’n aml ond yn gweld ochr dechnegol profion, roedd yn ddefnyddiol iawn i glywed Jennifer Wood yn cyflwyno ei phrofiad ei hun o’r manteision niferus o ddefnyddio’r offeryn hwn. Mae Jennifer yn addysgu Sbaeneg yn yr Adran Ieithoedd Modern ac mae defnyddio profion wedi galluogi Jennifer i ryddhau amser gwerthfawr yn y dosbarth i ganolbwyntio ar drafodaethau mwy defnyddiol. Cyn defnyddio Profion Blackboard, byddai myfyrwyr yn treulio cyfran o’u hamser yn y dosbarth yn gwneud profion. Bellach gall myfyrwyr brofi eu gwybodaeth a’u dysgu y tu allan i’r ystafell ddosbarth mewn amgylchedd y maen nhw’n teimlo’n gyfforddus ynddo. Gan ddibynnu ar y math o gwestiwn a ddewiswch (ceir llawer o fathau o gwestiynau), gall y profion gael eu marcio’n awtomatig a gall yr adborth gael ei ryddhau i’r myfyrwyr ar ôl iddynt sefyll y prawf. Wrth gwrs, mae’n rhaid gwneud peth gwaith ar gyfer profion a rhaid ichi sicrhau eich bod yn gwybod pam y dymunwch ddefnyddio’r prawf er mwyn iddo fod yn ddefnyddiol i chi a’ch myfyrwyr.
Fel trwch cynnwys Blackboard, ceir llawer o osodiadau y gallwch eu defnyddio i baru’r prawf i’ch anghenion a’ch gofynion dysgu. Mae’r Grŵp E-ddysgu yn wastad yn barod i wirio prawf, edrych drwy’r gosodiadau neu hefyd gynorthwyo wrth ddewis y math cywir o gwestiwn ar gyfer eich gweithgarwch dysgu. Beth am greu prawf i helpu’ch myfyrwyr â’u gwaith adolygu?
Beth hoffech chi ei wneud yn wahanol (2)?
Siarad Cyhoeddus a mynediad i sgiliau craidd
Fe wnaeth sgwrs Rob Grieve fy helpu i werthfawrogi faint o broblem yw siarad cyhoeddus i rai unigolion. Roedd y cyngor am fod yn ‘siaradwr diffuant’ yn arbennig o ddefnyddiol i mi. Peidio â blaenoriaethu arddull dros sylwedd, canolbwyntio ar y wybodaeth y dymunaf ei chyflwyno a cheisio siarad mewn ffordd sy’n naturiol i mi yw’r strategaethau y bwriadaf eu defnyddio i wella fy ngallu i siarad yn gyhoeddus.
Cefais f’ysbrydoli hefyd gan gyflwyniad Debra Croft ar y Brifysgol Haf. Dyma brosiect sy’n rhoi cyfle amhrisiadwy i’r bobl ifanc sy’n cymryd rhan. Gwnaeth amrywiaeth y pynciau a drafodir yn ystod 6 wythnos yn unig, gan gynnwys sgiliau bywyd yn ogystal â phynciau academaidd, argraff fawr arnaf. Roedd cynllun hyblyg a chreadigol y gweithgareddau a’r asesiadau wedi’u teilwra ar gyfer anghenion y myfyrwyr yr un mor drawiadol. Dangosodd y cyflwyniad hwn sut gall darparu ar gyfer y gwahaniaethau gael effaith sylweddol ar fywydau pobl.
Cyflwyno cynnig ar gyfer y Gynhadledd Dysgu ac Addysgu flynyddol eleni
Gan fod cynifer o awgrymiadau a myfyrdodau defnyddiol, roedd dewis un ar gyfer pob un ohonom yn dipyn o dasg! Gallwch weld adroddiad llawn am y gynhadledd fach wedi’i rannu yn ddau bostiad blog (Rhan 1 a Rhan 2). Fe’ch atgoffir bod Galwad am Gynigion ar gyfer ein prif Gynhadledd Dysgu ac Addysgu ar gael yma a’n bod yn croesawu cynigion o bob ardal yn y Brifysgol.
Yn y blog hwn byddwn yn edrych at sut y gallwn gipio darlithoedd yn fwy effeithiol i ehangu dysgu a chofio gwybodaeth. Byddwn yn adeiladu ar ein blog blaenorol o’r enw Defnyddio’r adnodd capsiynau a chwis yn Panopto.
Mae’r awgrymiadau a’r drafodaeth isod yn seiliedig ar bapur sy’n cael ei gyhoeddi eleni gan seicolegwyr o Brifysgolion Glasgow, Dundee, Sheffield ac Aberdeen, ar y cyd â staff o’r Gwasanaethau TG ym Mhrifysgol Manceinion. Mae’r papur, ‘Lecture capture: Practical recommendations for students and lecturers’, wedi cael ei ysgrifennu o fewn cyd-destun dysgu hunanreoledig ac mae’n cynnig cyfarwyddyd i staff a myfyrwyr ar sut i fanteisio i’r eithaf ar recordiadau darlith. Gwnaeth Prifysgol Aberystwyth gyflwyno ei Pholisi Cipio Darlithoedd yn 2016 yn sgil cyflwyno Panopto yn 2013. Gan fod cipio darlithoedd wedi cynyddu ledled y sector Addysg Uwch yn y DU[1], mae’r ffocws yn symud nawr i sut mae’n gweithio o ran dysgu.
Mae’r erthygl ar gael ar-lein ac mae wedi’i rhannu’n 4 adran:
Cyflwyniad
Dysgu hunanreoledig fel fframwaith damcaniaethol ar gyfer gweithredu cipio darlithoedd
Argymhellion i fyfyrwyr
Argymhellion i staff
Yn ogystal â hyn, mae awduron yr astudiaeth wedi creu ffeithlun i fyfyrwyr sy’n cynnwys eu prif ddarganfyddiadau:
Trafododd y Grŵp E-ddysgu’r papur hwn yn rhan o’r awr hyfforddiant tîm rheolaidd. Isod ceir rhai o’r pwyntiau yr hoffem eu hamlygu i staff a myfyrwyr:
Dylai myfyrwyr ystyried y recordiadau fel ychwanegiad at eu dysgu ac nid i gymryd lle presenoldeb. Mae astudiaethau wedi dangos bod presenoldeb yn y sesiwn fyw yn golygu perthynas gryfach o ran y radd derfynol gyda chipio darlithoedd yn cael ei ddefnyddio i gynorthwyo’r dysgu.[2]
Cyflwynwch y myfyrwyr i system cymryd nodiadau Cornell a’u hannog i gymryd nodiadau yn ystod darlithoedd. Mae cymryd nodiadau yn helpu’r gallu i gadw gwybodaeth, ond mae’n dasg sy’n golygu ymdrech gwybyddol felly gall defnyddio strategaethau megis system cymryd nodiadau Cornell helpu myfyrwyr i fanteisio i’r eithaf arno. Mae fideo sy’n cyflwyno nodiadau Cornell ar gael yma.
Ymgorfforwch adolygu recordiadau fideo i’r gweithgareddau ‘gwaith cartref’, gan eu hannog i fynd drwy’u nodiadau ac ail-wylio adrannau penodol o’r recordiadau’n unig. Dylai myfyrwyr ail-wylio’r ddarlith o fewn rhai diwrnodau i fynychu’r sesiwn, ond nid yn syth ar ôl y sesiwn. Mae cael toriad rhwng adolygu yn cynyddu’r gallu i gadw gwybodaeth. Mae gwylio’r fideo yn llawn yn ei gwneud hi’n fwy tebygol y byddant yn cael trafferth canolbwyntio, felly dylai myfyrwyr ganolbwyntio ar yr adrannau hynny nad ydynt yn eu cofio na’u deall a defnyddio’r recordiad i wella’r nodiadau y gwnaethant eu cymryd yn y lle cyntaf. Dylent adolygu eu nodiadau wrth wylio’r recordiad.
Os bydd myfyriwr yn colli darlith fe’u cynghorir i wylio’r recordiad yn llawn cyn gynted â phosibl ac yna ail-wylio’r recordiad ymhen rhai diwrnodau gan wylio adrannau penodol fel y nodwyd uchod. Dylent wylio’r recordiad ar y cyflymder arferol a chymryd nodiadau wrth wylio yn yr un modd ag y buasent yn ei wneud mewn sesiwn fyw.
Defnyddio’r gweithgareddau dysgu gweithredol – gallai’r rhain gynnwys trafodaethau gyda chymheiriaid, cwestiynau ymarfer ar ddiwedd y sesiwn, pleidleisio yn y dosbarth. Mae tystiolaeth yn dangos bod mwy o weithgareddau rhyngweithiol yn fwy tebygol o annog myfyrwyr i ddod i’r darlithoedd yn hytrach na gwylio’r recordiad. Ystyriwch ddefnyddio cwisiau yn Panopto i brofi eu gwybodaeth neu i weld a ydynt wedi deall y deunydd: https://faqs.aber.ac.uk/index.php?id=2771
Byddwn yn mewnosod yr awgrymiadau o’r papur hwn i’n sesiynau hyfforddi sydd i ddod
E-ddysgu Uwch: Defnyddio Offer E-ddysgu ar gyfer Gweithgareddau Adolygu (27 Mawrth am 3yp yn E3, Ystafell Hyfforddi E-ddysgu)
Rydym bob amser yn chwilio am flogwyr gwadd felly os ydych chi’n defnyddio Panopto mewn ffordd benodol, e-bostiwch ni.
Cyfeiriadau
Credé, M., Roch, S.G., & Kieszczynka, U. M. (2010). Class attendance in college: A meta-analytic review of the relationship of class attendance with grades and student characteristics. Review of Educational Research, 80 (2), 272-295.https://doi.org/10.3102%2F0034654310362998
Nordmann, E., Kuepper-Tetzel, C. E., Robson, L., Phillipson, S., Lipan, G., & Mcgeorge, P. (2018). Lecture capture: Practical recommendations for students and lecturers. https://doi.org/10.31234/osf.io/sd7u4
[1] Mae Newland, 2017 yn adrodd bod gan 86% o Sefydliadau Addysg Uwch dechnoleg cipio darlithoedd.
Cynhelir Cynhadledd Fer yr Academi eleni ar ddydd Mercher 10 Ebrill am 2yp yn E3, Ystafell Hyfforddi E-ddysgu, Academi Aber, Adeilad Hugh Owen. Yn sgil cyflwyno Rheoliadau Hygyrchedd newydd ar gyfer cynnwys ar-lein ym mis Medi 2018 ac o ganlyniad i ymwybyddiaeth gynyddol o sicrhau bod profiadau dysgu ar gael i bawb, bydd thema’r gynhadledd fer eleni’n canolbwyntio ar Addysg Gynhwysol.
Rydym yn chwilio am ddatganiadau o ddiddordeb gan aelodau o’r Brifysgol i gynnal cyflwyniadau, arddangosiadau, gweithdai a thrafodaethau ar eu harferion addysgu cynhwysol.
Dyma rai pynciau posibl:
Asesiadau cynhwysol a chreadigol
Ehangu cyfranogiad
Defnyddio technoleg ar gyfer profiadau dysgu cynhwysol
Os hoffech gyflwyno cynnig ar gyfer y gynhadledd fer eleni, llenwch y ffurflen ar-lein hon cyn dydd Gwener 15 Mawrth.
Gallwch gofrestru i ddod i’r Gynhadledd Fer trwy glicio ar y ddolen hon. Os oes gennych chi unrhyw ymholiadau, e-bostiwch eddysgu@aber.ac.uk.
Mae’r Grŵp E-ddysgu’n gobeithio eich bod wedi cael amser braf dros y gwyliau. Wrth i bethau ac wrth i ni ddechrau ar gyfnod yr arholiadau, roeddem yn meddwl y byddai’n ddefnyddiol i ni nodi pa gymorth sydd ar gael i gydweithwyr sy’n darparu cymorth gweinyddol i weithgareddau dysgu ac addysgu.
Yn ogystal â’n Cwestiynau Cyffredin, mae gennym hefyd Ganllawiau E-ddysgu ar gael ar ein gweddalennau. Cynlluniwyd y canllawiau hyn i’ch tywys drwy broses lawn o’r dechrau i’r diwedd ac maent yn ddefnyddiol i’r rhai sydd eisiau meithrin dealltwriaeth o’r broses lawn. Rydym hefyd yn hapus i gwrdd wyneb i wyneb ac wrth gwrs gallwn roi cymorth dros y ffôn a thrwy e-bost. Rydym hefyd yn barod i roi hyfforddiant i chi a’ch cydweithwyr. Os hoffech chi a’ch cydweithwyr wneud cais am sesiwn hyfforddi, cysylltwch â ni. Efallai fod yna sesiynau hyfforddi eraill a fyddai’n ddefnyddiol i chi. Ceir ein rhaglen lawn o sesiynau hyfforddi ar gyfer 2018/19 ar ein gweddalennau.
Mae gan y Gwasanaethau Gwybodaeth offer sydd ar gael i’w llogi i gynorthwyo’r dysgu a’r addysgu. Mae rhestr lawn o offer sydd ar gael i’w benthyca gan y Gwasanaethau Gwybodaeth ar gael yma. I logi’r offer, e-bostiwch gg@aber.ac.uk / 01970 62 2400 gyda’ch gofynion.
Isod ceir rhai o’r eitemau a allai fod o ddiddordeb penodol.
Lego
Coventry Disruptive Media Learning Lab oedd ein siaradwyr gwadd yn y Gynhadledd Dysgu ac addysgu flynyddol y llynedd. Yn ogystal â’u cyflwyniad, gwnaethant hefyd gynnal rhai gweithdai i’r unigolion a fynychodd y gynhadledd. Cafodd un o’r gweithdai hyn ei arwain gan Oliver Wood, cynhyrchydd cymunedol yn DMLL, ac roedd yn canolbwyntio ar chwarae gyda LEGO i Ehangu Dysgu.
Roedd eu dulliau yn adeiladu ar fethodoleg Serious Play LEGO ac yn ei haddasu ar gyfer Gweithgareddau Dysgu ac Addysgu. Ceir rhagor o wybodaeth ar sut yr oeddent yn defnyddio LEGO ar eu tudalennau gwe.
Roedd y sesiwn yn adeiladu ar gynhadledd fer y llynedd, Chwarae o Ddifrif ar gyfer Dysgu, a oedd yn dangos sut yr oedd LEGO yn cael ei ddefnyddio mewn amrywiaeth o ddisgyblaethau ledled y Brifysgol. Mae gan y Gwasanaethau Gwybodaeth 4 bocs mawr ac 1 bocs bach o LEGO ar gael i’w llogi.
Pensetiau Realiti Rhithwir a Chamera 3D
Mae nifer o Bensetiau Realiti Rhithwir a Chamera 3D ar gael i’w benthyca gan y Gwasanaethau Gwybodaeth. Dros y blynyddoedd diwethaf rydym wedi gweld cynnydd yn y defnydd o Realiti Rhithwir mewn Dysgu ac Addysgu. Mae Dr Steve Atherton, Darlithydd yn yr Adran Addysg, yn defnyddio Realiti Rhithwir i drochi myfyrwyr mewn amgylcheddau gwahanol a phrofi plentyndod ac addysg o wahanol gyd-destunau. Cewch ragor o wybodaeth ynghylch sut mae Steve yn defnyddio Realiti Rhithwir trwy wylio’r fideo hwn.
Yn y Gynhadledd Dysgu ac Addysgu flynyddol y llynedd, gwnaeth Joe Smith ac Aled John o’r Tîm Marchnata gyflwyno gweithdy ar ddefnyddio Camera 3D a gogls Realiti Rhithwir. Ceir recordiad o’r gweithdy yma.
Seinyddion Jabra
Mae’n bosibl llogi seinyddion gan y Gwasanaethau Gwybodaeth ar gyfer sesiynau Skype for Business hefyd. Mae Skype for Business ar gael yn rhan o danysgrifiad Office 365 y Brifysgol. Gallwch osod a defnyddio Skype for Business o gysur eich swyddfa eich hun.
Rydym wedi gweld cydweithwyr ledled y Brifysgol yn defnyddio Skype for Business ar gyfer sesiynau gweminar i fyfyrwyr sydd allan ar leoliad a hefyd i gynnig sesiynau adolygu i fyfyrwyr i baratoi ar gyfer eu harholiadau. Gallai Skype for Business fod yn ddefnyddiol i’r rhai sy’n gweithio gyda myfyrwyr Dysgu o Bell i ddarparu amgylcheddau ystafell ddosbarth rhithwir. Mae gan Skype for Business rai nodweddion rhyngweithiol hefyd, megis pleidleisio byw, a all helpu i ehangu’r sesiwn ar-lein.
Mae canllaw ar sut i ddefnyddio Skype for Business ar gyfer gweithgareddau dysgu ac addysgu ar gael ar ein tudalennau gwe. Os oes gennych ddiddordeb mewn defnyddio Skype for Business ac yr hoffech drafod ymhellach neu os oes arnoch angen unrhyw gymorth, cysylltwch â’r Grŵp E-ddysgu (eddysgu@aber.ac.uk / 01970 62 2472).
Mae’r Grŵp E-ddysgu wedi bod yn cynorthwyo cydweithwyr yn yr Adran Addysg i ddefnyddio Skype for Business er mwyn cyflwyno gweminar i fyfyrwyr TAR sydd allan ar leoliad mewn ysgolion. Mae’r weminar yn cynnig cymorth i fyfyrwyr ynghylch eu haseiniadau.
Mae Skype for Business ar gael i bob aelod o’r Brifysgol yn rhan o becyn Office 365. Yn ogystal â chreu cyfarfodydd rhithiol, mae hefyd yn eich galluogi i gyflwyno ystafelloedd dosbarth rhithiol o’ch swyddfa eich hun ar amser sy’n gyfleus i chi. Mae’n hawdd iawn i fyfyrwyr fewngofnodi i’r weminar – yr unig beth sydd angen iddynt ei wneud yw bod wedi’u cysylltu â’r Rhyngrwyd.
Yn ogystal â chreu ystafell ddosbarth ar-lein, mae gan Skype for Business nodweddion ychwanegol hefyd a allai fod o ddefnydd. Gellir recordio cyfarfodydd Skype for Business a’u huwchlwytho i Panopto. Yn ogystal â hyn, mae ganddo nodweddion rhyngweithiol y gellir eu defnyddio gan gyfranogwyr yn y sesiwn ei hun. Mae’r nodweddion hyn yn cynnwys meddalwedd pleidleisio:
Mae gan Skype for Business hefyd wasanaeth gwibnegeseua er mwyn i gyfranogwyr y weminar allu gofyn cwestiynau ac ymateb i ymholiadau trwy gydol y sesiwn.
Mae cynlluniau ar y gweill i ymchwilio i weithgareddau dysgu ac addysgu gwahanol y gall Skype for Business eu cynorthwyo, gan gynnwys cael ei ddefnyddio ar gyfer sesiwn adolygu arbennig.
Os oes gennych ddiddordeb mewn defnyddio Skype for Business ar gyfer gweithgareddau dysgu ac addysgu, gan gynnwys gweminarau, mae’r Grŵp E-ddysgu’n cynnal sesiwn hyfforddi ar 18 Rhagfyr, 3yp-4yp yn E3, Ystafell Hyfforddi E-ddysgu. Bydd y sesiwn yn trafod sut i drefnu cyfarfod Skype for Business, sut i lwytho cyflwyniad, sut i ddefnyddio nodweddion rhyngweithiol y feddalwedd a sut i recordio’r sesiwn. Gallwch archebu lle ar y sesiwn ar-lein yma.
Os oes gennych ddiddordeb mewn defnyddio Skype for Business ac nad oes modd i chi ddod i’r sesiwn hyfforddi, e-bostiwch y Grŵp E-ddysgu a byddwn yn barod iawn i drefnu ymgynghoriad. Mae ein Canllaw Skype for Business ar gael ar ein gweddalennau.
Mae cyfnod cyflwyno ceisiadau am y Gwobrau Cwrs Nodedig bellach wedi dechrau. Y dyddiad cau i wneud cais yw 12 yp 1af Chwefror 2019. I gyflwyno cais, lawrlwythwch ffurflen gais fan hyn a darllenwch y cyfarwyddiadau sydd ar ein gweddalennau.
Cynlluniwyd y Wobr Cwrs Nodedig i gydnabod arfer canmoladwy ym modiwlau Blackboard. Ers ei lansio yn 2013, gwobrwywyd 5 o fodiwlau canmoladwy, cafodd 8 gymeradwyaeth uchel a 3 arall eu cymeradwyo.
Eleni mae’r gwobrau ychydig yn wahanol. Er bod y Wobr yn dal i gael ei seilio ar Gyfarwyddyd Rhaglen Cwrs Nodedig Blackboard, gwnaethom rai addasiadau er mwyn pwysleisio’r dulliau rhyngweithiol y gellir defnyddio Blackboard i ddarparu amgylchedd dysgu cymysg i fyfyrwyr. Ar ben hyn, rhoddwyd pwys ychwanegol ar y meini prawf hygyrchedd er mwyn sicrhau bod pawb sy’n dysgu yn gallu cael defnydd o fodiwlau Blackboard.
Byddwn yn cynnal sesiynau hyfforddi i’r rhai sy’n ystyried cyflwyno cais am y Wobr ddydd Mercher 12 Rhagfyr, 3pm-4pm yn E3, Ystafell Hyfforddi E-ddysgu a dydd Mawrth 8 Ionawr, 3pm-4pm. Gallwch archebu lle trwy fynd i dudalennau archebu cwrs y GDSYA.
Mae’r Academi Arddangos yn lle i rannu arferion da ymhlith staff o Aberystwyth, Bangor a sefydliadau Addysg Uwch eraill. Bob blwyddyn rydym yn cynnal dwy sesiwn gyda dau gyflwyniad ym mhob sesiwn, un o Aber ac un o Fangor. Gall unrhyw un ymuno â’r Academi Arddangos o’u peiriannau eu hunain drwy ddefnyddio’r ddolen sydd ar gael yma
Rydym yn edrych ymlaen at y cyflwyniadau eleni a gobeithio y bydd modd i rai ohonoch ymuno â ni.
Academi Gweminar Aberystwyth/Bangor 2018/19:
21 Tachwedd 2018 am 1yp -2yp
Using Flashcards to Encourage Student Learning Dr Basil Wolf and Dr Ruth Wonfor (Aberystwyth)
Surveys of our students show that many of them rely heavily on rereading and exam cramming, methods that might be successful in getting them through exams, but which are suboptimal in developing long-term memory and ability to develop expertise in their subject area. There is considerable research to show that long-term memory is boosted by repeated retrieval practice that is spaced over time. Flashcards offer one method of achieving this. We will talk about our experiences and present use of Anki, a freeware flashcard programme, in teaching anatomy and physiology to first year students.
Distance Learning to promote best practices and behaviours in infection prevention: The potentioal of the MOOC – Using Blackboard Ultra by Lynne Wiliams (Bangor)
20 Mawrth 2019 am 1yp-2yp
Potential, (un)realised: Is self-regulation the differentiator between our students and what can we do about it? Dr Simon Payne (Aberystwyth)
We asked AU students and staff questions such as, “Why do students underachieve or even drop out?,” “What distractions do students face that interfere with their best intentions to study and improve?,” and “What happens to ‘turn students off’ from learning and striving to achieve?” The answers were remarkably similar from both groups, suggesting agreement on the problem and potential alignment on solutions. Self-regulation is the voluntary control of impulses which can facilitate or hinder us from achieving our goals. Hence, self-regulation includes the ability to regulate cognitive processes and activities, e.g. to plan, monitor and reflect on problem solving activities. Self-regulation also includes the control of one’s competing/conflicting motivational and emotional impulses and processes, e.g., overcoming social anxiety to contribute in class. Clearly, the development of self-regulation skills will help students achieve their objectives for entering HE. This presentation will provide techniques for tutors to help their students and tutees to be better self-regulators, and introduce and rationalise an ambitious AU-wide programme of studies that target student self-regulation ability.
Mae Fforymau Academi eleni wedi cychwyn o ddifri erbyn hyn. Eleni, mae ein Fforymau Academi wedi’u strwythuro o amgylch themâu sy’n deillio o’r Gynhadledd Dysgu ac Addysgu Flynyddol ac a gynigiwyd gan fynychwyr y gynhadledd.
Mae ein Fforymau Academi’n darparu gofod anffurfiol i aelodau o gymuned y Brifysgol ddod ynghyd i drafod materion sy’n ymwneud â dysgu ac addysgu a dysgu trwy gyfrwng technoleg.
Roedd Fforymau Academi’r llynedd yn seiliedig ar gardiau ehangu profiad digidol myfyrwyr gan JISC. O fewn y Grŵp E-ddysgu, gwnaethom ddechrau datblygu ein Strategaeth Ymgysylltu Myfyrwyr ein hunain a dechrau meddwl sut y gallem weithio’n agosach â’r myfyrwyr. Yn ogystal â hyn gwnaethom ddechrau gweithio gyda chydweithwyr yn y gwasanaeth Gyrfaoedd i siarad am y sgiliau digidol sydd eu hangen yn y gweithle.
Cynhelir y Fforymau Academi yn E3, yr Ystafell Hyfforddiant E-ddysgu. I gael mynediad i E3, byddwch angen eich Cerdyn Aber. Ewch i mewn i adeilad Hugh Owen drwy’r Labordai Iaith a mynd i fyny’r grisiau i Lawr E. Defnyddiwch eich Cerdyn Aber i ddod trwy’r drws ac mae Ystafell Hyffordd E3 rownd y gornel ar yr ochr dde.
Os hoffech ymuno â rhestr bostio’r Fforwm Academi, e-bostiwch eddysgu@aber.ac.uk.
