Aseiniadau Grŵp Blackboard i Hyfforddwyr

https://help.blackboard.com/Learn/Instructor/Assignments/Create_and_Edit_Assignments/Group_Assignments

Cyn gosod gwaith grŵp

Ni fyddwch yn dymuno i’ch myfyrwyr ystyried gweithgareddau grŵp yn waith prysur. Os nad yw gwaith grŵp yn hyrwyddo eich amcanion dysgu ac yn cynnig gwerth, ystyriwch dechnegau addysgu amgen. Defnyddiwch waith grŵp yn unig ar gyfer prosiectau na all myfyriwr unigol eu gwneud cystal yn annibynnol a’u gorffen erbyn y dyddiad a nodir.

Mae gwaith ymchwil yn dangos bod myfyrwyr yn gweithio’n galetach os bydd eraill yn dibynnu arnynt. Er mwyn annog cyd-ddibyniaeth, crewch aseiniadau grŵp sy’n gofyn i’r myfyrwyr rannu’r gwaith er mwyn cwrdd â’r amcan, cwestiynu a herio syniadau ei gilydd, a rhannu adborth ac anogaeth.

Cyn ymgorffori gwaith grŵp i’ch cwrs, ystyriwch y cwestiynau hyn:

• A fydd y gwaith grŵp yn hyrwyddo amcanion y cwrs?
• Pa ddeunydd rhagarweiniol neu wybodaeth am adnoddau i’r grŵp allaf eu darparu i helpu myfyrwyr i lwyddo?
• Sut bydd y grwpiau’n cael eu ffurfio?
• A fyddwch yn cynnwys y myfyrwyr wrth gynllunio’r grwpiau?
• Sut byddaf yn asesu dysgu myfyrwyr ac yn sicrhau atebolrwydd unigolion? A fydd angen cyflawniadau grŵp arnaf?
• Sut byddaf yn ymdrin â phryderon a phroblemau?

Aseiniadau Grŵp Blackboard i Fyfyrwyr

Rhai Ystyriaethau cyn dechrau arni

Rhaid i grŵp cwrs fodoli cyn y gallwch greu aseiniadau grŵp ar ei gyfer.

• Bydd myfyrwyr sy’n perthyn i fwy nag un grŵp sy’n derbyn yr un aseiniad yn gallu cyflwyno’r aseiniad hwn fwy nag unwaith. Efallai y bydd yn rhaid ichi roi gradd gyffredinol i’r myfyrwyr hyn am yr aseiniad.
• Ni fydd gan fyfyrwyr sydd heb gofrestru ar yr adeg y cyflwynir yr aseiniad grŵp fynediad at y cyflwyniad hwnnw. Dim ond gweld bod y cyflwyniad wedi digwydd fydd y myfyrwyr hyn.
• Ni fydd y myfyrwyr y byddwch yn eu dileu o’r grŵp yn gallu gweld aseiniadau’r grŵ Gallant weld eu cyflwyniadau drwy My Grades.
• Os byddwch yn golygu’r aseiniad rhwng y dyddiad creu a’r dyddiad y mae’n ddyledus, gall y grŵp cyfan golli’r gwaith sydd eisoes ar y gweill.
• Os byddwch yn dileu grŵp o’r aseiniad ar ôl i’r myfyrwyr ddechrau cynnig ond cyn iddynt ei gyflwyno, byddant yn colli mynediad at yr aseiniad ac yn colli’u gwaith.

Rydych yn creu aseiniad grŵp yn yr un ffordd ag y byddwch yn creu aseiniad i fyfyrwyr ei gwblhau’n annibynnol. Wrth greu aseiniad grŵp, bydd eitem llyfr graddau yn cael ei greu yn awtomatig. Gallwch greu aseiniadau grŵp mewn meysydd cynnwys, modiwlau dysgu, cynlluniau gwersi, a ffolderi. Bydd yr aseiniad grŵp yn ymddangos yn y maes cwrs y’i crëwyd ynddo ac ar hafan y grŵp.

Rhai nodiadau am farcio Aseiniadau Grŵp Blackboard

• Wrth farcio aseiniad grŵp gan ddefnyddio Inline Grading, bydd y marc edinol a roddir yn cael ei anfon yn awtomatig ar gyfer holl fyfyrwyr y grŵp ac yn weladwy yn y Grade Centre. Fodd bynnag, gallwch addasu marciau myfyrwyr unigol, os bydd angen.
• Ni ellir cymhwyso marciau unigol ar gyfer aseiniadau grŵp dienw, ac ni fydd hi’n bosibl  adnabod myfyrwyr unigol.

Trafodaethau Blackboard i Hyfforddwyr

https://help.blackboard.com/Learn/Instructor/Interact/Discussions

Mae manteision unigryw yn perthyn i drafodaethau ar-lein. Gan fod myfyrwyr yn gallu cymryd amser i ystyried cyn iddynt bostio eu syniadau, mae’n bosibl y byddwch yn gweld mwy o sgyrsiau ystyrlon. Gallwch arsylwi wrth i’r myfyrwyr ddangos eu gafael ar y deunydd a chywiro camsyniadau. Gallwch ymestyn eich oriau swyddfa a chyrraedd myfyrwyr yn fwy aml yn ystod yr wythnos er mwyn i’r dysgu fod yn barhaus.

Mae datblygu ymdeimlad o gymuned ymhlith y myfyrwyr yn hanfodol ar gyfer profiad ar-lein llwyddiannus. Gyda thrafodaethau ar-lein, gall aelodau’r cwrs atgynhyrchu’r trafodaethau grymus sy’n digwydd yn yr ystafell ddosbarth draddodiadol.

Ar gyfer grwpiau cwrs llai, gallwch hefyd gynnig trafodaethau grŵp, a fydd ar gael i aelodau’r grŵp yn unig.

Trafodaethau Blackboard i Fyfyrwyr

https://help.blackboard.com/Learn/Student/Interact/Discussions

Mewn trafodaethau, gallwch rannu syniadau am ddeunyddiau’r dosbarth. Yn Blackboard Learn, gall aelodau’r cwrs gynnal trafodaethau ystyrlon sy’n digwydd yn yr ystafell ddosbarth draddodiadol, ond gyda manteision cyfathrebu anghydamserol. Nid oes yn rhaid i’r sawl sy’n cymryd rhan fod yn yr un lleoliad na’r un parth amser, a gallwch gymryd amser i ystyried eich ymatebion yn ofalus.

Gallwch ddefnyddio trafodaethau ar gyfer y tasgau hyn:

• Cwrdd â’ch cyd-fyfyrwyr ar gyfer cydweithredu a rhyngweithio.
• Holi cwestiynau am aseiniadau gwaith cartref, gwaith darllen, a chynnwys cyrsiau.
• Dangos eich dealltwriaeth neu’r ffordd y byddwch yn defnyddio deunyddiau cwrs.

Gweler Cwestiynau a Holir yn Aml Aberystwyth ar Drafodaethau:

faqs.aber.ac.uk a chwilio “Trafodaeth”

Wicis Blackboard i Hyfforddwyr

https://help.blackboard.com/Learn/Instructor/Interact/Wikis

Mae wicis yn galluogi aelodau’r cwrs i gyfrannu at ac addasu un neu ragor o dudalennau o ddeunyddiau sy’n gysylltiedig â’r cwrs ac yn ffordd o rannu a chydweithredu. Gall aelodau’r cwrs greu a golygu tudalennau yn gyflym, ac olrhain newidiadau ac ychwanegiadau, sy’n caniatáu cydweithredu effeithiol rhwng llawer o awduron. Gallwch greu un neu fwy o wicis er mwyn i holl aelodau’r cwrs gyfrannu ato a wicis y gall grwpiau penodol eu defnyddio er mwyn cydweithredu.

Gall holl aelodau’r cwrs hefyd ddefnyddio’r offer wicis i gofnodi gwybodaeth a gweithredu fel ystorfa ar gyfer gwybodaeth y cwrs. Mae wici cwrs yn ffynhonnell wybodaeth helaeth a grëwyd gan aelodau’r cwrs. Gall wicis helpu i feithrin cymuned o gydweithredu a dysgu. Mae rhyngweithio cymdeithasol yn cynyddu wrth gyfnewid gwybodaeth.

Manteision defnyddio wicis

Gall wicis helpu aelodau’r cwrs i greu ystorfa wybodaeth ar y cyd. Wrth i’r wybodaeth ehangu, gallwch ddisgwyl rhyw elfen o ddifrifoldeb a sefydlogrwydd i’r wici.

Trwy eu defnyddio’n benodol, gallwch ddefnyddio wicis ar gyfer y dibenion addysgiadol hyn:

• Darparu amgylchedd hawdd ei ddefnyddio ar gyfer cyfathrebu
• Hyrwyddo cydweithredu yn hytrach na chystadlu
• Meithrin agwedd gymdeithasol a rhyngweithiol at ddysgu
• Datblygu partneriaethau er mwyn elwa o gryfderau eraill
• Amlhau sgiliau datblygu rhwydweithiau, ymddiriedaeth, a negodi
• Darparu cefnogaeth ac adborth prydlon
• Darparu un man ar gyfer chwilio, diweddaru, a chael mynediad at wybodaeth yn rhwydd ac yn gyflym
• Cynyddu a datblygu’r posibilrwydd o greadigrwydd, naturioldeb, ac arloesedd drwy ddefnyddio meddwl myfyriol

Wicis Blackboard i Fyfyrwyr

https://help.blackboard.com/Learn/Student/Interact/Wikis

Offer cydweithredol yw wici sy’n eich galluogi i gyfrannu at ac addasu un neu ragor o dudalennau o ddeunyddiau sy’n gysylltiedig â cwrs. Mae’r wici yn darparu ardal er mwyn cydweithredu ynghylch y cynnwys. Gall aelodau’r cwrs greu a golygu tudalennau wici sy’n ymwneud â’r cwrs neu â grŵp cwrs.

Gall hyfforddwyr a myfyrwyr roi sylwadau, a gall eich hyfforddwr raddio gwaith unigolion.

Gweler Cwestiynau a Holir yn Aml Aberystwyth ar Wicis:

faqs.aber.ac.uk a chwilio “Wicis”

Blogiau Blackboard i Hyfforddwyr

https://help.blackboard.com/Learn/Instructor/Interact/Blogs

Dyddiadur ar-lein personol yw blog sy’n cael ei ddiweddaru’n gyson, gyda’r bwriad o’i rannu ag eraill. Mae gan y rhan fwyaf o flogiau nodwedd ar gyfer cynnig sylwadau, er mwyn i bobl allu ymateb i syniadau ei gilydd. Mae blogiau yn annog myfyrwyr i fynegi eu syniadau yn glir. Gall blogiau hefyd fynd i’r afael â’r angen i ymestyn gwahanol agweddau ar ddysgu cymdeithasol. O safbwynt yr hyfforddwr, mae blogiau yn ffordd effeithiol o gael blas ar weithgareddau’r myfyrwyr ac yn ffordd o rannu’r wybodaeth a’r deunyddiau a gesglir.

Mae’r hyfforddwyr yn creu ac yn rheoli blogiau yn Blackboard Learn, a dim ond defnyddwyr sydd wedi’u cofrestru all weld a chreu blogiau a chyflwyno sylwadau. Mae blogiau yn debyg i ddyddiaduron, a gallwch eu defnyddio ar gyfer aseiniad y byddwch yn ei raddio neu er mwyn casglu barn a gwybodaeth heb bennu gradd.

Blogiau Blackboard i Fyfyrwyr

https://help.blackboard.com/Learn/Student/Interact/Blogs

Eich dyddiadur ar-lein personol yw blog. Gall pob cofnod yn eich blog gynnwys unrhyw gyfuniad o eiriau, lluniau, dolenni cyswllt, amlgyfrwng, clytweithiau [mashups], ac atodiadau. Mae blogiau yn ffordd effeithiol ichi rannu gwybodaeth a deunyddiau a grëwyd a chasglu yn y cwrs. Gallwch bostio blogiau newydd ac ychwanegu sylwadau at flogiau sydd eisoes yn bodoli. Defnyddiwch eich blog i fynegi eich syniadau a’u rhannu â’r dosbarth.

Fel perchennog blog, gallwch greu cofnod a gall eich hyfforddwr a’ch cyd-fyfyrwyr ychwanegu sylwadau. Gall cwrs neu grŵp hefyd fod yn berchen ar flog. Yn yr ardal grŵp, gall holl aelodau’r grŵp greu cofnodion ar gyfer yr un blog, a’i ddatblygu. Gall unrhyw aelod o’r cwrs ddarllen a chyflwyno sylwadau ar flog grŵp, ond ni all greu cofnod os nad yw’r defnyddiwr yn aelod o’r grŵp. Gall eich hyfforddwr hefyd gynnig sylwadau a graddio cofnodion.

Gweler Cwestiynau a Holir yn Aml Aberystwyth ar Flogiau:

faqs.aber.ac.uk a chwilio “Blogiau”

Grwpiau Blackboard i Hyfforddwyr

https://help.blackboard.com/Learn/Instructor/Interact/Course_Groups

Mae dysgu cydweithredol yn cynnig llawer mwy o fanteision na hyfforddiant traddodiadol. Dengys yr astudiaethau fod myfyrwyr, wrth weithio mewn tîm, yn datblygu agweddau cadarnhaol, yn datrys problemau’n fwy effeithiol, ac yn profi mwy o falchder wrth lwyddo.

Gallwch drefnu’r myfyrwyr mewn grwpiau er mwyn iddynt ryngweithio â’i gilydd a chyflwyno eu gwybodaeth wrth ddysgu i werthfawrogi safbwynt eraill.

Gallwch greu grwpiau cwrs un ar y tro neu mewn setiau.

Yn yr Original Course View, mae gan bob grŵp ei hafan ei hun â dolenni cyswllt i’w cysylltu ag offer i helpu’r myfyrwyr i gydweithio. Dim ond chi ac aelodau’r grŵp all ddefnyddio offer y grŵp.

Yn y Control Panel, ehangwch yr adran Users and Groups a dewis Groups. Ar y tudalen Groups, gallwch weld a golygu eich grwpiau presennol, a chreu grwpiau newydd a setiau grwpiau.

Grwpiau Blackboard i Fyfyrwyr

https://help.blackboard.com/Learn/Student/Interact/Groups

Gall hyfforddwyr greu grwpiau o fyfyrwyr o fewn eu cyrsiau. Mae’r grwpiau fel arfer yn cynnwys nifer bychan o fyfyrwyr ar gyfer grwpiau astudio neu brosiectau. Mae gan y grwpiau hyn eu meysydd cydweithredu yn y cwrs er mwyn iddynt allu cyfathrebu a rhannu ffeiliau.

Bydd eich hyfforddwr yn eich gosod mewn grŵp neu’n eich galluogi i ddewis y grŵp y dymunwch ymuno ag ef. Bydd eich hyfforddwr yn dewis pa offer cyfathrebu a chydweithredu fydd ar gael i’r grŵp.

Gweler Cwestiynau a Holir yn Aml Aberystwyth am greu grwpiau:

Sut mae creu grŵp i fyfyrwyr yn Blackboard? (Staff)

faqs.aber.ac.uk/534 neu chwiliwch am “grwpiau”

Yn sgil eich sylwadau, rydym wedi penderfynu cynnal Fforwm Dysgu o Bell ychwanegol.

Goruchwylio o Bell

Dyddiad: 11.03.2020

Amser: 14:00-15:30

Lleoliad: E3, Ystafell Hyfforddiant E-ddysgu

Mae’r fforwm hwn yn cynnig cyfle i bobl drafod yr arfer dda ar draws y Brifysgol ar sawl cynllun a modiwl dysgu o bell. I’r rhai ohonoch sydd eisoes yn goruchwylio o bell, gobeithiwn y byddwch yn gallu rhannu eich arbenigedd a’ch gwybodaeth â’r rhai sy’n llai cyfarwydd â’r broses. 

Archebu lle ar-lein: https://stafftraining.bis.aber.ac.uk/sd/list_courses.php

Mae’n bleser gan yr Uned Gwella Dysgu ac Addysgu gyhoeddi dyddiad yr 8fed Gynhadledd Flynyddol Dysgu ac Addysgu. Cynhelir y gynhadledd o ddydd Llun 7 Medi hyd ddydd Mercher 9 Medi 2020.

Cadwch lygad am Alwadau am Gynigion a chyhoeddi thema’r gynhadledd yn ddiweddarach y fis hwn. Yn ôl ein harfer, byddwn yn diweddaru ein tudalennau gwe ynghylch y Gynhadledd Dysgu ac Addysgu yn ogystal â’n blog er mwyn rhoi’r wybodaeth ddiweddaraf ichi ynghylch sut mae pethau’n datblygu.

Y llynedd, fe gyflwynwyd Trosglwyddo Marciau, sef trefn o drosglwyddo marciau o Ganolfan Raddau Blackboard i gofnod y modiwl ar AStRA.

Ers hynny, rydym wedi bod wrthi’n gweithio i wella’r drefn, sydd wedi arwain at ambell newid. Bydd y rhan fwyaf o’r syniad o Drosglwyddo Marciau yn aros yr un peth. I’r rheiny yn eich plith sy’n defnyddio Trosglwyddo Marciau, fe welwch fod rhyngwyneb y system newydd ychydig yn wahanol wrth fapio’r colofnau a throsglwyddo’r graddau. Byddwn yn defnyddio Apex, offeryn cymwysiadau ar-lein, i fapio, cadarnhau, a throsglwyddo’r marciau i AStRA.

Byddwch yn gallu defnyddio’r offeryn Trosglwyddo Marciau yn yr un ffordd ag o’r blaen drwy fewngofnodi i Blackboard, canfod y modiwl, ehangu’r Offerynnau Cwrs o dan Reoli’r Cwrs a dewis AStRA::Map Columns. Fel ag o’r blaen, rhaid ichi fod yn Weinyddwr Adrannol neu’n Hyfforddwr ar y modiwlau y dymunwch eu trosglwyddo.

Mae’r gwelliannau yn cynnwys:

• Mapio colofnau i amryfal fodiwlau. Gallu mapio’r un golofn i fodiwl gwahanol fydd yn caniatáu i fodiwlau Rhiant a Phlentyn gael eu mapio.
• Gweld y marciau cyn ichi eu trosglwyddo. Mae’r rhyngwyneb newydd yn cynnwys rhagolwg fydd yn caniatáu ichi gadarnhau eich bod wedi mapio’r golofn gywir cyn cadarnhau eu bod yn gywir.
• Gwiriadau amlwg ar gyfer 0 marc. Yn ogystal â’r rhagolwg, bydd neges weledol wrth ymyl marciau o 0 er mwyn ichi gadarnhau bod pob dim yn gywir.

Er mwyn eich helpu gyda’r newid hwn, byddwn yn cynnal ein sesiynau E-learning Essential: Introduction to Component Marks ar:

• 03.12.2019, 10yb-11yb
• 06.01.2020, 2yp-3yp
• 13.01.2020, 11yb-12yp
• 06.05.2020, 2yp-3yp
• 19.05.2020, 11yb-12yp

Gellir archebu lle ar gyfer y sesiynau hyn ar lein. Yn y sesiynau hyn, byddwn yn trafod y syniad o drosglwyddo marciau yn ogystal â’ch cyflwyno a’ch arwain trwy’r rhyngwyneb newydd.

Diweddarwyd ein canllawiau Trosglwyddo Marciau ar lein i gynnwys y rhyngwyneb newydd ac maen nhw i’w gweld ar ein tudalennau gwe.

Yn ogystal â’r hyfforddiant, rydym yn fodlon cynnig hyfforddiant pwrpasol i grwpiau o 5 neu ragor o gyd-weithwyr. Os hoffech drefnu sesiwn hyfforddiant arbennig, anfonwch e-bost at eddysgu@aber.ac.uk.  

Os oes gennych gwestiynau am y drefn hon, cysylltwch ag eddysgu@aber.ac.uk / 01970 62 2472.

Rhagair

Meddalwedd e-gyflwyno yw Turnitin a ddefnyddir gan fyfyrwyr wrth gyflwyno eu gwaith a chan aelodau o staff wrth farcio. Caiff y marcio ei wneud trwy Stiwdio Adborth Turnitin, sy’n cynnwys llawer o nodweddion, megis cyfarwyddiadau, ffurflenni gradd, Quick Marks, crynodebau adborth, a sylwadau y gellir eu mewnosod. Yn y canllaw hwn, byddwn yn edrych yn benodol ar Adborth Clywedol, nodwedd sy’n caniatáu i hyfforddwyr recordio eu crynodebau adborth, a myfyrwyr i wrando yn ôl arnynt.

Mae defnyddio Adborth Clywedol yn cynnig llawer o fanteision, ac rydym yn gweld bod cydweithwyr ar draws y sector yn defnyddio’r nodwedd hon. Mewn astudiaeth ddiweddar ar effaith Adborth Clywedol, a gynhaliwyd gan gydweithwyr ym Mhrifysgol Lerpwl, nodwyd bod ‘ansawdd adborth a boddhad myfyrwyr […] yn uwch ar gyfer adborth clywedol nag ar gyfer adborth ysgrifenedig’ (Voelkel & Mello, 2014.: 29). Yn ogystal â hyn, dangosodd yr astudiaeth nad oes unrhyw wahaniaeth, o ran cynnydd a chyrhaeddiad, rhwng y myfyrwyr a gafodd adborth clywedol a’r rhai a gafodd adborth ysgrifenedig. Serch hynny, amlygodd yr astudiaeth fod myfyrwyr yn fwy tebygol o ailymweld ag adborth ysgrifenedig nag adborth clywedol.

Er mwyn cefnogi’r defnydd cynyddol o Adborth Clywedol, rydym wedi creu’r adnodd hwn i helpu staff i ddarparu adborth effeithiol i’w myfyrwyr. Os gennych ddiddordeb mewn defnyddio adborth clywedol, mae ein tudalennau E-gyflwyno yn cynnwys gwybodaeth ynglŷn â sut i greu mannau cyflwyno aseiniadau a darparu adborth ar Turnitin.

Polisïau ac Ymarfer Gorau

Yma ym Mhrifysgol Aberystwyth, mae gennym bolisi sy’n ymdrin ag adborth ar asesiadau (3.2.17) sydd i’w gael o dan Asesu Cynlluniau trwy Gwrs yn y Llawlyfr Ansawdd Academaidd. Mae’r egwyddorion sy’n ymwneud ag adborth yn berthnasol i adborth ysgrifenedig yn ogystal ag adborth clywedol. Nid yw adborth clywedol nac adborth ysgrifenedig yn cael eu trin yn wahanol o dan y polisïau hyn. Dylid strwythuro adborth clywedol yn yr un modd ag adborth ysgrifenedig, neu mewn modd tebyg, gan nodi cryfderau, gwendidau a phwyntiau i’w gwella.  

Yn ogystal â hyn, efallai y bydd y crynodeb o’r cyflwyniad gan Dr Gareth Norris, Dr Heather Norris ac Alexandra Brooks o’r Adran Seicoleg, o’r enw ‘Delivering Feedback through Audio Commentary’ a roddwyd yng Nghynhadledd Flynyddol Dysgu ac Addysgu 2018, yn ddefnyddiol i chi. Mae recordiad cryno o’r cyflwyniad hwnnw ar gael ar-lein.

Cyngor ar ddefnyddio Adborth Clywedol

1.      Cynlluniwch eich adborth

Rydym ni i gyd yn gwybod pa mor bwysig yw adborth i fyfyrwyr, yn enwedig o safbwynt rhoi arweiniad ar sut i wella eu perfformiad mewn aseiniadau yn y dyfodol. Os nad ydych wedi defnyddio Adborth Clywedol o’r blaen, efallai yr hoffech gynllunio’r hyn rydych yn bwriadu ei ddweud – trwy ddefnyddio pwyntiau bwled ar gyfer prif rannau eich adborth, bydd modd i chi gadw’ch ffocws wrth recordio eich adborth.  Yn wahanol i adborth ysgrifenedig, mae’r amser sydd gennych i recordio wedi’i gyfyngu i 3 munud, ac fe all fynd yn eithaf cyflym felly cynlluniwch ymlaen llaw i sicrhau eich bod yn cynnwys eich prif bwyntiau i gyd. Yn yr un modd ag adborth ysgrifenedig, mae’n bwysig bod yr adborth clywedol yn mynd i’r afael â meini prawf yr aseiniad. Gweler y pwynt ynglŷn â chynllunio, ond dylech hefyd nodi’n glir yn eich adborth clywedol pa rannau o’r meini prawf y mae eich adborth yn mynd i’r afael â hwy.

2.      Ystyriwch dôn eich llais

Bydd ychwanegu elfen glywedol i’ch adborth yn golygu y bydd angen i chi ystyried tôn eich llais. Yn aml, wrth roi adborth ar lafar, wyneb-yn-wyneb, gallwn gyfleu mwy o ystyr i’r unigolion, yn ogystal â sylwi ar arwyddion gweledol gan y myfyriwr sy’n derbyn yr adborth. Gydag adborth clywedol, mae’n bwysig cofio y bydd y myfyriwr yn gwrando ar yr adborth ar ei ben ei hun. Gwnewch yn siŵr eich bod yn nodi agweddau cadarnhaol y gwaith, yn ogystal â rhannau y gellir eu datblygu.

3.      Gwrandewch yn ôl ar eich adborth clywedol

Mae bob amser yn rhyfedd gwrando yn ôl arnoch chi’ch hun yn siarad, ond am yr ychydig droeon cyntaf y byddwch yn defnyddio adborth clywedol, gallwch gael teimlad o sut mae’r adborth yn swnio. Bydd gwrando’n ôl ar yr adborth yn caniatáu i chi sicrhau bod yr adborth yn gysylltiedig â’r meini prawf asesu. Yn anffodus, nid oes adnodd golygu ar gyfer adborth clywedol, ond gallwch bob amser ei ddileu a’i ail-recordio. Bydd gwrando’n ôl ar yr adborth hefyd yn caniatáu i chi ystyried a yw’r adborth yn mynd i’r afael â’r meini prawf. Yn ogystal â hyn, bydd modd i chi wneud yn siŵr nad ydych chi wedi recordio unrhyw beth nad oeddech am ei recordio, fel ci yn cyfarth neu larwm tân yn seinio.

4.      Gwnewch yn siŵr bod myfyrwyr yn gwybod sut i gael gafael ar eu hadborth

Er bod myfyrwyr yn aml yn defnyddio Turnitin i gyflwyno eu haseiniadau ac i gael adborth, mae’n bwysig rhoi gwybod i’r myfyrwyr y byddant yn cael adborth clywedol ar eu haseiniadau. Er ein bod yn gweld cynnydd yn nifer y staff sy’n defnyddio adborth clywedol, mae’n bwysig cofio y gallai myfyrwyr fod yn defnyddio’r nodwedd hon am y tro cyntaf. I glywed yr adborth clywedol, bydd rhaid i’r myfyrwyr ddod o hyd i’w haseiniad, ei agor, a chlicio ar y botwm chwarae yn ffenestr y crynodeb adborth:

Fel ag unrhyw adborth arall, gwnewch yn siŵr bod myfyrwyr yn gwybod sut i gysylltu â chi os oes ganddynt unrhyw ymholiadau ynglŷn â’u hadborth.

Dyma rai awgrymiadau technegol i’ch helpu i ddefnyddio’r nodwedd adborth clywedol:

• Defnyddiwch Chrome neu Firefox i gael mynediad i Turnitin
• Bydd neges yn ymddangos yn gofyn a ydych chi am gadw’r adborth – gwnewch yn siŵr eich bod yn gwneud hyn trwy glicio ar yr eicon cadw
• Peidiwch â thoglo rhwng aseiniadau a chofiwch gau’r aseiniad ar ôl i chi orffen ei farcio

Os oes gennych unrhyw ymholiadau ynglŷn â defnyddio adborth clywedol, mae croeso i chi gysylltu â’r Uned Cyfoethogi Dysgu ac Addysgu.

Cyfeiriadau

Prifysgol Aberystwyth. 2019. ‘Adran 3: Asesu Cynlluniau trwy Gwrs’ Llawlyfr Ansawdd Academaidd. Ar gael ar-lein: https://www.aber.ac.uk/en/media/departmental/academicregistry/admissions/academicqualityhandbook/partb-rulesregs/chapterpdfx27s/01.-ALL-IN-ONE—Chapter-3—v3-Sept-2019.pdf. Dyddiad cyrchu diwethaf: 05.11.2019.

Voelkel, S. & Mello, L. 2014.   ‘Audio Feedback – Better Feedback?’ yn Bioscience Education . 22: 1. https://doi.org/10.11120/beej.2014.00022 Tud. 16-30. Dyddiad cyrchu diwethaf: 04.11.2019.

Mae’n bleser gan yr Uned Datblygu Dysgu ac Addysgu gyhoeddi mai’r Athro John Traxler fydd y prif siaradwr yn ein Cynhadledd Fer.

Bydd y gynhadledd fer yn canolbwyntio ar Waith Grŵp ac Asesiad Grŵp ac fe’i cynhelir ddydd Llun 16 Rhagfyr, 10:30yb-4yp yn B.03,Canolfan Ddelweddu.

Gallwch archebu lle ar y digwyddiad ar-lein

Cynhadledd Fer Cyweirnod: Gwaith (Grŵp) yn yr Oes Ddigidol

Ers troad y ganrif, gwelsom dechnolegau digidol yn esblygu o fod yn ddrud, bregus, prin, tila ac anodd, ac yn aml ddim ond yn sefydliadol, i fod yn rymus, yn hollbresennol, hawdd, rhad a chadarn, a phersonol a chymdeithasol. Yn y cyfnod hwn, maent wedi newid natur y nwyddau, asedau, trafodion a threfniadaeth sy’n creu ein bywydau economaidd; wedi herio agweddau sicr materion, ymlyniadau a phrosesau gwleidyddol; mewn ieithoedd, daeth geirfaoedd, ffurfiau, a thafodieithoedd newydd i’r golwg; maent wedi bwydo braw moesol a chreu dulliau newydd o niweidio, sarhau a chamymddwyn.

Ar ben hynny, maent wedi rhoi i fyfyrwyr y modd a’r cyfle i greu, rhannu, trawsnewid, trafod a chael gafael ar syniadau, delweddau, hunaniaethau a gwybodaeth ac, wrth wneud hynny, wedi rhoi o fewn eu gafael y gallu i fygwth proffesiynau, sefydliadau a dulliau addysg sefydledig, i newid perchnogaeth a rheolaeth yr hyn sy’n wybyddus, pwy sy’n ei wybod a’r ffordd i gaffael yr wybodaeth.

Hwn felly yw’r byd y mae graddedigion yn mynd iddo, byd gwaith wedi’i drawsnewid a phopeth arall mewn bywyd yn ddi-ddiffiniad. Mae Prifysgolion yn mynd â hwy o strwythur a diogelwch yr ysgol i fydoedd lle nad yw’r naill na’r llall ar gael. Sut y gall furfiau pedagogaidd megis asesu a gwaith grŵp gefnogi’r trawsnewid hwn?