Ddydd Mawrth 8 Ebrill, fe wnaethom gyd-gynnal ein Cynhadledd Fer ddiweddaraf gyda chydweithwyr o’r Gwasanaeth Gyrfaoedd a Chyflogadwyedd. Fe wnaethom groesawu 50 o fynychwyr o bob rhan o’r Brifysgol a chawsom 5 sesiwn.

Mae deunyddiau’r gynhadledd bellach ar gael ar ein tudalennau gwe.

Dechreuodd y gynhadledd gyda chroeso gan yr Athro Anwen Jones, Dirprwy Is-Ganghellor ar gyfer Addysg a Phrofiad y Myfyrwyr. Yn dilyn anerchiad Anwen, rhoddodd Dr Aranee Manhoaran o King’s College Llundain y prif anerchiad. Yn ei phrif anerchiad, nododd Aranee fframwaith Cyflogadwyedd y gellir ei gymhwyso i’r cwricwlwm. Yn ogystal â hyn, rhoddwyd strategaethau ynglŷn â sut i fapio’r fframwaith hwn ar y cwricwlwm i adolygu dulliau asesu.

Rhoddodd Dr Saffron Passam o’r adran Seicoleg gyflwyniad a oedd yn canolbwyntio ar Gydraddoldeb, Amrywioldeb a Chynhwysiant fel sgil cyflogadwyedd hanfodol.

Rhoddodd Dr Louise Ritchie o Astudiaethau Theatr, Ffilm a Theledu drosolwg o’r modd y mae’r Cwricwlwm Drama a Theatr yn gweithio mewn partneriaeth â’r Gwasanaeth Gyrfaoedd a Chyflogadwyedd i wella amlygrwydd a chanlyniadau graddedigion.

Amlinellodd Annabel Latham o’r Ysgol Addysg gynllun asesu arloesol gyda’r Gwasanaeth Gyrfaoedd a Chyflogadwyedd. Roedd yr asesiad yn cynnwys gweithdai, creu posteri, a thrafodaeth ar ôl yr aseiniad.

Yn olaf, rhoddodd Bev Herring a Jo Hiatt o’r Gwasanaeth Gyrfaoedd a Chyflogadwyedd grynodeb o ddigwyddiad y bore a chynhaliwyd cyflwyniad rhyngweithiol i gydweithwyr i fyfyrio ar ba mor gyfforddus yr oeddent yn teimlo wrth integreiddio sgiliau cyflogadwyedd yn eu cwricwlwm.

Diolch yn fawr i’n cyflwynwyr am sesiynau hynod ddiddorol ac i’r rhai a fynychodd.

Edrychwn ymlaen at ein Cynhadledd Fer nesaf. Yn y cyfamser, gall cydweithwyr archebu lle ar y Gynhadledd Dysgu ac Addysgu Flynyddol sy’n cael ei chynnal rhwng 8 a 10 Gorffennaf.