Mae’r adnodd Cynorthwyydd Dylunio DA ddiweddaraf wedi’i alluogi yn Blackboard.

Mae AI Conversations yn darparu bot sgwrsio i fyfyrwyr ryngweithio ag ef fel rhan o weithgaredd dysgu.

Mae dau opsiwn o fewn AI Conversations:

• Cwestiynau Socrataidd
  • Mae hyn yn annog myfyrwyr i feddwl yn feirniadol trwy gyfrwng anogwyr holi parhaus
• Chwarae rôl
  • Mae hyn yn caniatáu i fyfyrwyr actio senario gyda’r persona DA a ddyluniwyd ac a grëwyd gan yr hyfforddwr

Ar ôl ei osod, gall myfyrwyr gymryd rhan yn y gweithgareddau hyn i ddatblygu eu gwybodaeth a’u dealltwriaeth o’r pwnc ymhellach.

Mae myfyrwyr yn teipio ymateb i’r cwestiynau a ofynnir gan y bot sgwrsio DA. Ar ddiwedd y gweithgaredd, mae myfyrwyr yn ymateb i gwestiwn myfyriol i amlinellu sut y gwnaeth y sgwrs helpu gyda’u dealltwriaeth o’r pwnc.

Byddwn yn arddangos AI Conversations yn ein Cynhadledd Fer ar-lein ddydd Mercher 18 Rhagfyr. Mae rhagor o wybodaeth ar gael ar ein blog.

E-ddysgu Uwch:  Mae cyflwyniad i hyfforddiant Cynorthwyydd Dylunio DA hefyd wedi’i ddiweddaru i gynnwys AI Conversations. Gallwch archebu lle ar y cwrs ar y system archebu Digwyddiadau a Hyfforddiant.

Gweler Sgwrs ag AI am ragor o wybodaeth.

Ymhlith yr adnoddau Cynorthwyydd Dylunio DA eraill sydd ar gael yn Blackboard y mae:

• Creu Modiwlau Dysgu
• Creu Cwestiynau Prawf a Banciau Cwestiynau
• Creu geiriau allweddol ar gyfer llyfrgell ddogfennau Unsplash
• Creu Cyfnodolion
• Creu Trafodaethau
• Creu Aseiniadau

Rydym wedi casglu rhai enghreifftiau ynghyd isod i ddangos sut y gallech ddefnyddio’r adnodd AI Conversations.

1.     Cwestiynau Socrataidd:

Gofynnwch i’ch myfyrwyr roi eu barn ar bwnc penodol. Er enghraifft, beth yw eich dealltwriaeth bresennol o effaith newid yn yr hinsawdd?

Mae’r math hwn o weithgaredd yn caniatáu i fyfyrwyr fyfyrio ar eu gwybodaeth eu hunain ac ymateb i’r cwestiynau y mae’r bot sgwrsio DA yn eu gofyn.

2.     Chwarae rôl:

Trefnwch weithgaredd chwarae rôl i’ch myfyrwyr gymryd rhan ynddo a meddyliwch sut y gallent gymhwyso’r pwnc i senario penodol.

Er enghraifft, gallech ddefnyddio AI Conversations i wneud diagnosis o glaf, rhoi datrysiad i gleient, neu egluro damcaniaeth.

Cynllunio eich gweithgaredd

Wrth gynllunio a dylunio eich gweithgaredd, bydd angen ystyried:

1. Beth yw canlyniadau dysgu’r gweithgaredd? Beth hoffech chi i’ch myfyrwyr allu ei wneud ar ôl ymgysylltu â’r gweithgaredd? Sut mae’r gweithgaredd hwn yn integreiddio â gweddill y cwrs?
2. Ydych chi wedi profi’r gweithgaredd eich hun? Mae’n bosibl y bydd angen mireinio’r senario a’r persona felly gwnewch yn siŵr eich bod chi’n arbrofi gyda hyn. Gallwch wneud hyn heb ei ryddhau i’r myfyrwyr.
3. Ydych chi wedi amlinellu i fyfyrwyr faint o amser y dylent ei dreulio ar y gweithgaredd? Nid oes terfyn amser na therfyn hyd testun ar hyn o bryd, felly gwnewch yn siŵr bod disgwyliadau’r myfyrwyr yn cael eu rheoli. Efallai yr hoffech nodi faint o ryngweithio â’r adnodd sy’n ddisgwyliedig.
4. Cadwch at weithgareddau ymarfer arddull ffurfiannol sy’n helpu i atgyfnerthu dysgu a rhoi cyfleoedd i fyfyrio.
5. Rhowch wybod i’r myfyrwyr beth yw manteision cymryd rhan yn y gweithgaredd – bydd hyn o gymorth i hybu ymgysylltiad.
6. Mae opsiwn i gynnwys cwestiwn myfyriol ar ddiwedd y gweithgaredd i fyfyrwyr i amlinellu sut y gwnaeth y gweithgaredd helpu i ddatblygu eu dealltwriaeth ymhellach; ystyriwch ddefnyddio’r opsiwn hwn i sicrhau bod y gweithgaredd yn bodloni eich gofynion.

Gweler ein tudalennau gwe ar gyfer AI Conversations a’r Cynorthwyydd Dylunio DA yn ehangach.

Rydym yn awyddus i weithio gyda chydweithwyr ar ddylunio gweithgareddau ystyrlon. Os oes gennych ddiddordeb yn hyn, neu os oes gennych chi unrhyw gwestiynau am Blackboard, cysylltwch ag eddysgu@aber.ac.uk.