Mae’n bleser gennym gadarnhau ein prif siaradwr ar gyfer y Gynhadledd Dysgu ac Addysgu Flynyddol eleni. Mae’r cyfnod archebu ar gyfer y gynhadledd eisoes ar agor. 

Bydd Dr Neil Currant yn ymuno â ni ar gyfer prif gyflwyniad wyneb-yn-wyneb a gweithdy dosbarth meistr ar ail ddiwrnod y gynhadledd, ddydd Mercher 9 Gorffennaf.

Bydd Neil yn trafod rôl bwysig asesu tosturiol, perthyn, ac arferion asesu cynhwysol.

Yn y gweithdy, bydd cyfle i gydweithwyr fyfyrio ar eu harferion asesu eu hunain a’r ffyrdd y gallent eu hymgorffori a’u haddasu yn seiliedig ar gyflwyniad Neil. Mae’r gwaith hwn yn adeiladu ar y gwaith hanfodol sy’n cael ei wneud yn y Gwasanaethau Cymorth i Fyfyrwyr. 

Gweler bywgraffiad y siaradwr a dolenni at weithiau a phrosiectau dethol isod:

Mae Dr Neil Currant yn Uwch Ddatblygwr Addysgol ym Mhrifysgol Swydd Bedford. Cyn hynny, bu’n Bennaeth Datblygu Addysgol ym Mhrifysgol Brookes Rhydychen a’r Coleg Milfeddygol Brenhinol. Mae Neil wedi bod yn cefnogi arferion addysgu, dysgu ac asesu ym maes addysg uwch ers ugain mlynedd, ac mae ganddo arbenigedd mewn cynhwysiant ac asesu.

Mae Neil wedi bod yn rhan o brosiectau ymchwil a ariennir gan JISC ar ddefnyddio technoleg dysgu, prosiect a ariennir gan AU Ymlaen ar ddinasyddiaeth fyd-eang, ymchwil sefydliadol ar fylchau dyfarnu a phrosiectau a ariennir gan ASA ar berthyn a thosturi.

Mae Neil yn adolygydd ac yn achredwr ar gyfer AU Ymlaen. Cyd-sefydlodd Neil y Rhwydwaith Asesu Tosturiol mewn Addysg Uwch, ac ar hyn o bryd mae’n ymchwilio i arferion asesu sy’n gysylltiedig â thosturi, effaith affeithiol adborth, a pheidio â defnyddio graddau.

Ymchwil perthyn – Teaching Insights journal.

Rethinking assessment? Research into the affective impact of higher education grading

Prosiect perthyn – https://www.qaa.ac.uk/membership/collaborative-enhancement-projects/assessment/belonging-through-assessment-pipelines-of-compassion

Prosiect Asesu Tosturiol – https://www.qaa.ac.uk/membership/collaborative-enhancement-projects/assessment/compassionate-assessment-in-higher-education

Byddwn yn cyhoeddi siaradwyr allanol pellach maes o law.

Galw am Gynigion

Mae ein Cais am Gynigion yn dal ar agor, ac yn cau ar 8 Ebrill. Rydym yn croesawu cynigion sy’n ymwneud â themâu’r gynhadledd, ond hefyd y rhai sy’n arddangos yr arferion addysgu rhagorol sy’n digwydd ym Mhrifysgol Aberystwyth.

Cyfnod Archebu ar agor

Mae’r cyfnod archebu ar gyfer y gynhadledd eisoes ar agor. Cwblhewch ein harolwg ar-lein i archebu eich lle.

Os oes gennych unrhyw gwestiynau, cysylltwch â threfnwyr y gynhadledd ar eddysgu@aber.ac.uk. 

Rydym yn falch o gyhoeddi thema’r 13eg Gynhadledd Dysgu ac Addysgu Flynyddol a gynhelir rhwng 8 a 10 Gorffennaf 2025.

Y thema yw:  “Llwybrau Arloesol i Rymuso Dysgwyr:  Addasu, Ymroi, a Ffynnu”.

Bydd y gynhadledd yn cynnwys y meysydd canlynol:

• Dylunio asesiadau y gellir eu haddasu
• Ymroddiad myfyrwyr a dysgu annibynnol
• Meithrin cymuned  
• Technolegau i wella dysgu
• Dysgu ar-lein

Bob blwyddyn, rydym yn siarad â’n grŵp rhanddeiliaid ac aelodau eraill o’r Brifysgol i benderfynu ar bynciau a fydd yn ddefnyddiol i’n cydweithwyr. 

Mae’r maes cyntaf, sef dylunio asesiadau y gellir eu haddasu, yn dwyn ynghyd ddarn o waith gan gydweithwyr yn y Gwasanaethau i Fyfyrwyr, sy’n amlygu dulliau hyblyg o ddylunio asesiadau, asesiadau â sawl fformat, a dylunio asesu dilys.

Mae ymroddiad myfyrwyr a meithrin dysgu annibynnol yn parhau i fod yn her allweddol i gydweithwyr.  Yn y maes hwn, mae gennym ddiddordeb mewn strategaethau ar gyfer meithrin annibyniaeth wrth ddysgu, ffyrdd y gellir sgaffaldio dysgu, ac ymgorffori sgiliau ar gyfer dysgu a’r gweithle i raddedigion. 

Mae ein trydydd maes, sef meithrin cymuned, yn ceisio tynnu sylw at les yn y cwricwlwm gan ystyried dulliau o weithio sydd yn fwy ystyriol o drawma, sut mae cymunedau dysgu ar-lein yn cael eu creu, a defnyddio dadansoddeg dysgu.  Mae addysgeg gynhwysol yn ganolog i’r holl themâu hyn. 

Yn y maes technolegau i wella dysgu, bydd gennym ddiddordeb i glywed am astudiaethau achos cadarnhaol ac am ffyrdd o ymgorffori DA yn yr ystafell ddosbarth, am ffyrdd uwch a rhagorol o ddefnyddio Blackboard Ultra, ac am arferion da mewn addysgu yn yr oes ddigidol. 

Mae ein maes olaf, sef dysgu ar-lein, yn cyfeirio at waith Prosiect Dysgu Aber Ar-lein mewn partneriaeth â HEP, yn pontio dysgu ar y campws i ddysgu ar-lein, a strategaethau i ennyn diddordeb myfyrwyr mewn dysgu ar-lein.

Bydd yr Alwad am Gynigion yn agor yn fuan a chyfle i archebu eich lle ar gyfer y gynhadledd.

Os oes gennych unrhyw gwestiynau, cysylltwch â threfnwyr y gynhadledd ar eddysgu@aber.ac.uk. 

Mae’n bleser gan yr Uned Gwella Dysgu ac Addysgu gyhoeddi dyddiad yr 12fed Gynhadledd Flynyddol Dysgu ac Addysgu. Cynhelir y gynhadledd o ddydd Mawrth 8 Gorffennaf hyd ddydd Iau 10 Gorffennaf 2025.

Cadwch lygad am Alwadau am Gynigion a chyhoeddi thema’r gynhadledd. Yn ôl ein harfer, byddwn yn diweddaru ein tudalennau gwe ynghylch y Gynhadledd Dysgu ac Addysgu yn ogystal â’n blog er mwyn rhoi’r wybodaeth ddiweddaraf ichi ynghylch sut mae pethau’n datblygu.