Bydd aelod o’r tîm ar gael bob wythnos i gefnogi myfyrwyr a staff yn ein sesiynau galw heibio Sgiliau Digidol. Gallwn eich helpu i ddod o hyd i adnoddau i ddatblygu eich sgiliau digidol; rhoi cyngor cyffredinol i chi am ddatblygu eich sgiliau digidol; ac rydym hefyd yn hapus iawn i drafod eich adroddiadau Offeryn Darganfod Digidol.
📍 Byddwn yn yr Hwb Sgiliau (a ddangosir gan y seren ar y ddelwedd isod) yn Lefel D, Llyfrgell Hugh Owen ar y dyddiau Mawrth a Mercher isod drwy gydol semester 1. Os oes gennych unrhyw gwestiynau, mae croeso mawr i chi e-bostio digi@aber.ac.uk.
Ydych chi’n gweithio ar un sgrin ac yn ei chael hi’n anodd? Ydych chi wedi blino ar newid rhwng dwy ffenestr?
Oeddech chi’n gwybod y gallwch chi hollti’ch sgrin i weld dau beth ar unwaith sy’n ei gwneud hi’n llawer haws edrych ar ddwy ffenestr ar yr un pryd? Mae hyn yn golygu y gallwch weithio ar ddogfennau, tabiau a llawer mwy ochr yn ochr.
Ar eich bysellfwrdd, i ochr chwith y bar gofod mae’r botwm Windows.
Daliwch y botwm Windows ac yna tapio unrhyw allwedd saeth yr hoffech. Er enghraifft, daliwch y fysell Windows ac yna tapiwch y fysell saeth chwith.
Bydd hyn yn symud eich dogfen i ochr chwith eich sgrin.
Byddwch yn gweld yr holl ffenestri agored sydd gennych i lenwi gweddill y sgrin. Dewiswch ba ffenestr yr hoffech ei hagor.
I ddilyn ein TipiauDigi, tanysgrifiwch i’n Blog Sgiliau Digidol. Neu, gallwch hefyd ddilyn y dudalen hon, lle bydd TipDigi newydd yn cael ei ychwanegu bob wythnos!
Croeso cynnes i’n Pencampwyr Digidol Myfyrwyr a ymunodd â’r Tîm Sgiliau Digidol ar ddechrau mis Medi! Fe fydd y tri yn gweithio gyda ni drwy gydol y flwyddyn academaidd i annog myfyrwyr ar draws y brifysgol i ddatblygu eu sgiliau digidol ac i roi mewnwelediadau gwerthfawr i’r cymorth y mae myfyrwyr ei eisiau.
Noel Czempik
“Helo! Noel ydw i ac rwy’n fyfyriwr Geneteg israddedig sydd â diddordeb arbennig mewn meddygaeth bersonol. Rwyf hefyd yn gerddor ac yn mwynhau bod yn greadigol yn y gwaith, boed hynny mewn labordy neu stiwdio recordio. Mae fy niddordebau’n cynnwys peintio, dylunio mewnol, cerddoriaeth fyw, teithiau ffordd, teithiau natur, chwilota a choginio. Rwyf hefyd yn casglu recordiau a ffigurynnau ysbrydion.
Fe wnes i gais am rôl Pencampwr Digidol Myfyrwyr er mwyn cymryd rhan mewn gwaith creadigol ac ystyrlon a datblygu fy sgiliau digidol ymhellach. Rwy’n angerddol am brofiad myfyrwyr yn y brifysgol ac yn chwilfrydig ynghylch goblygiadau iechyd a chymdeithasol bywyd digidol. Edrychaf ymlaen at gefnogi’r Tîm Sgiliau Digidol, yn arbennig wrth gefnogi lles digidol.”
Joel Williams
“Helo, Joel Williams ydw i, rydw i’n fyfyriwr yn y 3edd flwyddyn yn astudio Daearyddiaeth. Fy meysydd o ddiddordeb yw folcanoleg ac effeithiau newid yn yr hinsawdd, gan ganolbwyntio ar sut mae’r ddau yn effeithio ar bobl. Fe wnes i gais i fod yn Bencampwr Digidol Myfyrwyr oherwydd roedd yn rhoi cyfle i mi adeiladu ar fy sgiliau digidol fy hun a gwella’r profiad i fyfyrwyr ym Mhrifysgol Aberystwyth.
Ers fy ail flwyddyn rwyf wedi bod yn Gynrychiolydd Academaidd ar gyfer fy adran. Rwyf wedi mwynhau’r rôl hon yn fawr gan ei bod wedi galluogi i mi a’m cyfoedion leisio ein barn i’r Brifysgol ac yna gweld canlyniadau pendant hyn. Mae fy niddordebau’n cynnwys, tynnu lluniau tirweddau a bywyd gwyllt, nofio (fel arfer mewn pwll nofio), a than yn ddiweddar roeddwn i’n chwarae pêl-droed Americanaidd i’r Brifysgol.”
Laurie Stevenson
“Helo, Laurie ydw i ac rydw i yn fy mhedwaredd flwyddyn yn astudio gradd Cadwraeth Bywyd Gwyllt. Rwy’n edrych ymlaen at weithio gyda’r Tîm Sgiliau Digidol eto eleni fel Pencampwr Digidol Myfyrwyr sy’n dychwelyd. Fe wnes i fwynhau’r rôl y llynedd yn fawr iawn a sut y gwnaeth fy helpu i ddatblygu sgiliau cyfathrebu a chreadigrwydd digidol yn ogystal â’m gwthio y tu hwnt i’m cilfan gysurus wrth arwain grwpiau ffocws a chynnal cyfweliadau. Rwy’n gobeithio parhau i ddysgu sgiliau newydd eleni ac rwy’n edrych ymlaen yn fawr at weithio ochr yn ochr â dau bencampwr newydd!”
🔔 Dilynwch ein categori Pencampwyr Digidol Myfyrwyr i gael yr wybodaeth ddiweddaraf am yr holl gynnwys cyffrous y bydd y pencampwyr yn ei gyhoeddi ar ein blog drwy gydol y flwyddyn, a hefyd ar draws sianeli cyfryngau cymdeithasol Gwasanaethau Gwybodaeth!
Ydych chi eisiau cynyddu eich cynhyrchiant wrth helpu’r blaned? Bydd y Forest App yn helpu i leihau oedi ac amhariadau a rhoi’r cymhelliant ychwanegol i chi aros yn gynhyrchiol, trwy dyfu coed ac ennill darnau arian rhithwir i ddatgloi planhigion newydd gan ddibynnu ar ba mor hir yr ydych chi wedi aros yn gynhyrchiol.
Wrth i’ch coedwig dyfu, gallwch weld sut olwg sydd ar eich dosbarthiad amser penodol dros amser, gyda siartiau manwl amrywiol wedi’u cynnwys yn yr ap.
Gyda’r Forest App yn partneru â sefydliad plannu coed go iawn, pan fydd defnyddwyr yn gwario eu darnau arian rhithwir ar blannu coed newydd, gall tîm Forest App roi cyfraniad i’r sefydliad plannu coed go iawn i greu archebion plannu!
Gallwch lawrlwytho’r Forest App drwy’r Storfa Apiau ar ddyfeisiau iOS ac Android.
Am ragolwg cyflym, edrychwch ar y sgrin luniau uchod i weld sut gall yr Forest App edrych ar eich dyfais symudol.
I ddilyn ein TipiauDigi, tanysgrifiwch i’n Blog Sgiliau Digidol. Neu, gallwch hefyd ddilyn y dudalen hon, lle bydd TipDigi newydd yn cael ei ychwanegu bob wythnos!
Rydym yn falch o gyhoeddi lansiad Hanfodion Digidol ar gyfer addysgu GG, safle Blackboard Learn Ultra newydd sydd wedi’i gynllunio i gefnogi staff addysgu newydd ym Mhrifysgol Aberystwyth.
Mae’r safle hwn yn dwyn ynghyd yr holl gyngor a gwybodaeth ddefnyddiol o Wasanaethau Gwybodaeth y bydd ei hangen ar staff addysgu newydd, gan sicrhau eu bod yn cael eu paratoi’n ‘ddigidol’ ar gyfer addysgu. P’un ai yw hynny’n arweiniad ar ddefnyddio OneDrive i storio gwaith; sut i osod modiwl newydd yn Blackboard Learn Ultra; neu ddod o hyd i ganllawiau ar gipio darlithoedd.
Gyda rhestr wirio ddefnyddiol a mynediad awtomatig i bawb drwy Blackboard Learn Ultra, gobeithiwn y bydd y safle’n arbed amser gwerthfawr i staff, yn ogystal â bod yn adnodd defnyddiol i holl staff adrannol.
Ar Ddydd Mercher 11 Hydref (2-3yh), hoffem wahodd staff addysgu newydd i ymuno â ni am baned yn D54, Hugh Owen (cyfarwyddiadau ar sut i ddod o hyd i’r ystafell). Bydd yn gyfle i staff addysgu newydd gwrdd â’i gilydd, yn ogystal â chwrdd â chydweithwyr o Wasanaethau Gwybodaeth. Nid oes angen i chi archebu lle ar gyfer y digwyddiad.
Os oes gennych unrhyw gwestiynau, neu os hoffech roi adborth am y safle, cysylltwch â’r Tîm Sgiliau Digidol (digi@aber.ac.uk).
O Ddydd Mercher 27 Medi 2023, byddwn yn galluogi fersiwn newydd o’r offeryn sy’n caniatáu i staff ymgorffori cynnwys LinkedIn Learning o fewn eu modiwlau yn Blackboard Learn Ultra. Mae nifer o fanteision i alluogi’r fersiwn newydd hon. Fodd bynnag, bydd hyn yn golygu y bydd angen i staff sydd eisoes wedi ymgorffori cynnwys LinkedIn Learning yn eu modiwlau presennol, ddilyn ychydig o gamau cyn ac ar ôl y dyddiad hwn.
O 27 Medi 2023 gall yr holl staff ymgorffori cynnwys LinkedIn Learning yn eu modiwlau Blackboard Learn Ultra gan ddefnyddio’r fersiwn newydd o’r offeryn – mae cyfarwyddyd pellach ar gael o’r Cwestiynau Cyffredin hwn.
Beth sydd angen i mi ei wneud os oes gen i gynnwys LinkedIn Learning wedi’i ymgorffori yn fy modiwlau Blackboard Learn Ultra presennol?
Cyn Dydd Mercher 27 Medi, bydd angen i chi nodi pa gyrsiau LinkedIn Learning rydych chi eisoes wedi’u hymgorffori yn eich modiwlau.
Yna, gallwch ddileu’r cyrsiau hyn o’ch modiwl.
O Ddydd Mercher 27Medi, bydd angen i chi ail-ychwanegu’r cyrisau hyn gan ddefnyddio’r fersiwn newydd o’r offeryn (sut ydw i’n gwneud hynny?)
Noder: O 27 Medi ymlaen, bydd unrhyw gynnwys LinkedIn Learning sydd wedi’i ymgorffori gan ddefnyddio’r hen fersiwn o’r offeryn yn ymddangos fel dolenni sydd wedi torri i fyfyrwyr.
Beth yw manteision y fersiwn newydd?
Bydd ymgorffori cynnwys yn arbed amser i staff, gan y bydd yn tynnu teitl a disgrifiad y cynnwys trwyddo i’ch modiwl yn awtomatig.
Gall staff chwilio am gynnwys LinkedIn Learning yn uniongyrchol o Blackboard Learn Ultra.
Yn flaenorol, dim ond cyrsiau LinkedIn Learning oedd yn gallu cael eu hymgorffori o fewn modiwlau, ond mae’r fersiwn newydd yn caniatáu i fathau eraill o gynnwys o LinkedIn Learning, gan gynnwys fideos, ffeiliau sain, a Llwybrau Dysgu, gael eu hymgorffori.
Bydd myfyrwyr yn gallu gweld y cynnwys yn uniongyrchol yn Blackboard Learn Ultra, heb orfod mewngofnodi i LinkedIn Learning ar wahân.
Mae’r fideo isod (dim sain) yn dangos pa mor hawdd fydd hi i fyfyrwyr gael mynediad at gynnwys LinkedIn Learning o fewn Blackboard Learn Ultra os ydynt wedi’u hymgorffori gan ddefnyddio’r offeryn newydd.
Ar gyfer unrhyw ymholiadau sy’n ymwneud ag ymgorffori cynnwys LinkedIn Learning yn Blackboard, cysylltwch â’r Tîm Sgiliau Digidol (digi@aber.ac.uk).
A oes gennych chi ddiddordeb mewn dysgu pa adnoddau sydd ar gael i’ch helpu i asesu a datblygu eich sgiliau digidol? Neu, efallai bod diddordeb gennych chi mewn dysgu mwy am sut y gallwch gefnogi’ch myfyrwyr i ddatblygu eu sgiliau digidol?
Byddwn ni’n cynnal nifer o sesiynau hyfforddi i staff drwy gydol Semester 1. Os nad oes modd ichi fynychu’r sesiynau, mae croeso mawr i chi e-bostio digi@aber.ac.uk a gallwn drefnu sgwrs i chi ag aelod o’n tîm.
Bydd y Tîm Sgiliau Digidol yn cynnal sesiynau hyfforddi ym mis Medi ar gyfer staff academaidd a fydd yn cefnogi eu myfyrwyr i adolygu eu hadroddiadau Offeryn Darganfod Digidol, a fydd yn hwyluso sgyrsiau gyda myfyrwyr am eu sgiliau digidol yn gyffredinol.
Bydd sesiynau ar-lein ar gael yn Gymraeg a Saesneg ar y dyddiadau canlynol:
12 Medi ’23(10:00-11:00): Introduction to the Digital Discovery Tool (Sicrhewch eich lle)
Fe wnaeth y Pencampwr Digidol Myfyrwyr gwrdd â grwpiau o fyfyrwyr yn ystod mis Mawrth 2023 i gasglu eu barn ar LinkedIn Learning, platfform dysgu ar-lein sydd ar gael am ddim i holl fyfyrwyr a staff PA.
O 6 – 10 Tachwedd 2023 rydym yn cynnal Gŵyl Sgiliau Digidol Prifysgol Aberystwyth ac rydym yn chwilio am fyfyrwyr uwchraddedig i gyflwyno sesiynau. Gallwch gyflwyno sesiwn naill ai ar-lein neu wyneb yn wyneb a gall fod yn weithdy, sesiwn galw heibio neu’n arddangosiad ar sgil ddigidol neu feddalwedd yr ydych chi’n ei ddefnyddio’n fedrus. Er enghraifft, hoffem gael rhai sesiynau ar y sgiliau a’r meddalwedd canlynol:
Pecynnau Microsoft – Hanfodol neu Uwch
SPSS
NVivo
ArcGIS
Python (neu feddalwedd rhaglennu arall)
Adobe Photoshop
Cyfryngau Cymdeithasol e.e. creu deunydd ar gyfer Instagram Reels, TikTok, Twitter, YouTube ac ati.
Creu neu olygu fideos
ProTools
Discord
Rydym hefyd yn agored i unrhyw sgiliau neu feddalwedd arall sy’n bwysig ac y dylid eu darparu yn eich barn chi!
