Mae’r Tîm Sgiliau Digidol yn falch o gyhoeddi lansiad y Llyfrgell Sgiliau Digidol newydd i staff. Mae’r Llyfrgell Sgiliau Digidol yn gasgliad ar-lein o adnoddau a ddewiswyd yn benodol gan PA ac adnoddau allanol i helpu pob aelod o staff i ddatblygu eu sgiliau digidol. Mae hyn yn cynnwys ffyrdd o gefnogi eich hunaniaeth ddigidol a’ch lles, arweiniad ynghylch dysgu a datblygu megis cyfarwyddiadau CMS, cyngor i wella’ch cyfathrebu digidol a llawer mwy.
Mae’r Llyfrgell Sgiliau Digidol ar gael i’r holl staff ddatblygu eu sgiliau digidol. Fodd bynnag, yn ogystal â hyn, mae gennym adnoddau penodol hefyd i helpu gydag addysgu, gan gynnwys cyngor ar Blackboard, canllawiau llyfrgell ac adnoddau i gefnogi addysgu ar-lein.
Os oes gennych unrhyw gwestiynau, problemau wrth geisio cael mynediad i’r Llyfrgell Sgiliau Digidol, neu awgrymiadau ar gyfer adnoddau newydd, cysylltwch â’r Tîm Sgiliau Digidol yn digi@aber.ac.uk.
Blogbost gan Jeffrey Clark (Pencampwr Digidol Myfyrwyr)
Fel Microsoft Word, mae PowerPoint yn rhaglen Microsoft arall yr ydych chi fwy na thebyg wedi’i defnyddio o’r blaen. Gall cynllunio ar gyfer rhoi cyflwyniad fod yn dasg frawychus i rai, oherwydd nid yn unig y mae’n rhaid i chi siarad o flaen eich cyd-fyfyrwyr, ond bydd eich cyflwyniad PowerPoint hefyd yn cael ei arddangos ar sgrin fawr. Ond, peidiwch â phoeni oherwydd bydd gan y blogbost hon rai awgrymiadau a thriciau gwerthfawr i’ch helpu i droi cyflwyniad da yn gyflwyniad GWYCH!
Awgrym 1: Mewnosod data Excel i PowerPoint
Os yw’ch cyflwyniad yn gofyn i chi ddangos data o ddogfen Microsoft Excel sy’n bodoli eisoes, mae ffordd hawdd o’i arddangos o fewn PowerPoint.
Ar y sleid yr ydych am i’ch data ymddangos arni, ewch i Insert > Object
O’r ffenestr Insert Object, dewiswch Create from file > Browse > yna dewiswch y ffeil Microsoft Excel lle mae’r siart yr hoffech ei chynnwys wedi’i lleoli > OK
Bydd hyn yn mewnosod y data a’r siart yn awtomatig o’ch dogfen Microsoft Excel
Gallwch olygu’r data hwn yn uniongyrchol yn eich dogfen PowerPoint trwy glicio ddwywaith ar y siart ar eich sleid
Cliciwch y tu allan i’r siart pan fyddwch chi wedi gorffen, a bydd PowerPoint yn cynhyrchu siart gyda’ch data Excel!
Rydym yn edrych i benodi dau Bencampwr Digidol Myfyrwyr i weithio yn ein Tîm Sgiliau Digidol am gyfanswm o 25 wythnos (5 awr yr wythnos ar Gyflog Gradd 2) y flwyddyn academaidd nesaf, gan ddechrau ym mis Medi 2023.
Bydd y Pencampwyr Digidol Myfyrwyr yn cefnogi gwaith y Tîm Sgiliau Digidol drwy annog myfyrwyr eraill i fanteisio ar amryw o adnoddau i’w cefnogi i ddatblygu eu sgiliau digidol. Bydd hefyd gofyn iddynt ddarparu persbectif gwerthfawr ar faterion sy’n ymwneud â chefnogi datblygiad sgiliau digidol myfyrwyr yn gyffredinol.
Dyma beth oedd gan ein dau Bencampwr Digidol Myfyrwyr presennol i’w ddweud am eu profiadau yn y rôl eleni:
“Mae fy mlwyddyn ddiwethaf yn gweithio fel Pencampwr Digidol Myfyrwyr wedi bod yn ddiddorol iawn, yn werth chweil ac yn rhywbeth hollol wahanol i mi. Roeddwn i’n chwilio am rywbeth i’w wneud ochr yn ochr â’m lleoliad ymchwil labordy eleni ac er nad oedd gen i unrhyw brofiad blaenorol mewn sgiliau digidol, neu hyd yn oed diddordeb digidol blaenorol, rwyf wedi ei fwynhau’n fawr iawn. Rwyf wedi bod wrth fy modd yn gallu defnyddio’r swydd fel dihangfa greadigol ac i ddatblygu fy sgiliau dylunio graffig, ond rwyf hefyd wedi datblygu llawer o sgiliau newydd fel arwain grwpiau ffocws a chyfweliadau; dadansoddi profiadau defnyddwyr; dylunio a chynhyrchu cynnwys ar-lein ar gyfer llwyfannau amrywiol; ac ysgrifennu blogbyst. Mae hyblygrwydd y swydd wedi bod yn wych, ac rwy’n edrych ymlaen at barhau i weithio gyda’r tîm y flwyddyn nesaf (sydd, gyda llaw, yn grŵp o bobl hollol hyfryd), fel newid golygfa o fy ngwaith prifysgol arferol.”
Laurie Stevenson(Myfyriwr blwyddyn mewn diwydiant, Cadwraeth Bywyd Gwyllt)
“Fel Pencampwr Digidol Myfyrwyr, rwyf wedi dysgu llawer o sgiliau gwerthfawr a fydd yn fy helpu yn fy ngyrfa yn y dyfodol. Mae dod i adnabod rhaglenni fel Word, Excel, a Piktochart wedi bod yn amhrisiadwy i’m datblygiad fel myfyriwr ac fel gweithiwr. Mae helpu gyda rhedeg stondinau a digwyddiadau i hyrwyddo gwaith y tîm ar y campws wedi rhoi hwb mawr i’m hyder a’m sgiliau cyfathrebu rhyngbersonol. Rwy’n argymell y rhaglen Pencampwyr Digidol Myfyrwyr i unrhyw un sy’n ysu i helpu myfyrwyr eraill, ac i unrhyw un sy’n mwynhau rhoi cynnig ar bethau newydd.”
Jeffrey Clark(Myfyriwr 3ydd blwyddyn, Saesneg ac Ysgrifennu Creadigol)
Dyma enghreifftiau o’r gwahanol weithgareddau ac adnoddau y mae’r Pencampwyr Digidol Myfyrwyr wedi’u creu eleni!
Y dyddiad cau ar gyfer y swyddi hyn yw Dydd Llun 31 Gorffennaf 2023. I gael rhagor o wybodaeth ac i wneud cais, ewch i Gwaith Aber. Os nad oes gennych chi gyfrif Gwaith Aber, neu am unrhyw ymholiadau, cysylltwch â digi@aber.ac.uk.
Blogbost gan Laurie Stevenson (Pencampwr Digidol Myfyrwyr)
Cyhoeddais Ran 1 o’r blogbost hwn yn gynharach yr wythnos hon, lle cyflwynais 5 syniad ac awgrymiad i’ch helpu i wneud y gorau o Excel, ac mae’r blogbost hyn yn cynnwys 5 awgrym pellach! Os ydych chi eisiau dysgu mwy am Excel, ewch i’m casgliad Excel newydd yn LinkedIn Learning.
Awgrym 6: Ychwanegu nifer o resi neu golofnau ar yr un pryd
Os hoffech chi ychwanegu mwy nag un rhes neu golofn ar yr un pryd bydd yr awgrym hwn yn arbed yr amser o orfod gwneud hyn fesul un.
Amlygwch nifer y rhesi neu’r colofnau yr hoffech eu hychwanegu
Cliciwch fotwm de’r llygoden arnynt
Dewiswch Mewnosod o’r gwymplen sy’n ymddangos
Awgrym 7: Ychwanegu pwyntiau bwled
Nid yw dod o hyd i’r botwm i ychwanegu’r rhain mor hawdd ag y mae ar Microsoft Word ond yn ffodus mae yna gwpwl o ffyrdd i wneud hyn.
Blogbost gan Laurie Stevenson (Pencampwr Digidol Myfyrwyr)
Ydych chi’n cael ymdeimlad o arswyd bob tro y mae’n rhaid i chi ddefnyddio Excel yn ystod eich gradd? Wel, rydyn ni yma i helpu! Bydd angen defnyddio Excel ar ryw adeg ar gyfer nifer o gynlluniau gradd er mwyn dadansoddi data, gwneud cyfrifiadau mathemateg, creu graff neu siart, rheoli prosiectau a llawer mwy.
Gall Excel ymddangos yn gymhleth ac yn frawychus i rai, yn enwedig os ydych chi’n gymharol newydd iddo, felly rydw i wedi llunio rhestr o syniadau ac awgrymiadau yn ogystal â chasgliad Excel newydd yn LinkedIn Learning i’ch rhoi ar ben ffordd.
Cadwch lygad ar ein blog ddiwedd yr wythnos, gan y byddaf yn cyhoeddi ail ran y blogbost hwn, a fydd yn cynnwys 5 o syniadau ac awgrymiadau eraill ar ddefnyddio Excel!
Awgrym 1: Llwybrau byr defnyddiol ar y bysellfwrdd
Mae llwybrau byr bysellfwrdd yn golygu pwyso mwy nag un fysell ar yr un pryd a thrwy eu cofio, gall arbed llawer iawn o amser i chi, er enghraifft defnyddio CTRL+A i ddewis yr holl gelloedd mewn taenlen. Cymerwch olwg ar y rhestr ganlynol o’r rhai da i’w dysgu:
Ctrl + N
Creu llyfr gwaith (workbook) newydd
Ctrl + O
Agor llyfr gwaith sy’n bodoli eisoes
Ctrl + S
Cadw’r llyfr gwaith gweithredol
F12
Cadw’r llyfr gwaith gweithredol o dan enw newydd – Bydd hyn yn dangos y blwch deialog Save As
Ctrl + W
Cau’r llyfr gwaith gweithredol
Ctrl + C
Copïo cynnwys y celloedd a ddewiswyd i’r Clipfwrdd
Ctrl + X
Torri cynnwys y celloedd a ddewiswyd i’r Clipfwrdd
Ctrl + V
Gludo/mewnosod cynnwys y Clipfwrdd yn y celloedd a ddewiswyd
Wrth i ni agosáu at ddechrau cyfnod yr arholiadau, rydym wedi rhestri amrywiaeth o adnoddau i’ch helpu i wneud y gorau o dechnoleg wrth i chi baratoi ac adolygu ar gyfer eich arholiadau.
Gall tymor yr arholiadau fod yn gyfnod heriol i fyfyrwyr. Mae’r casgliad hwn yn cynnig rhai strategaethau a chyngor er mwyn ichi allu rheoli eich straen adeg yr arholiadau
Blogbost gan Jeffrey Clark (Pencampwr Digidol Myfyrwyr)
Mae’r rhyngrwyd yn lle gwych i gysylltu â ffrindiau, gweithio ar brosiectau, a gwneud arian hyd yn oed. Fodd bynnag, mae rhai pobl yn defnyddio’r rhyngrwyd i geisio cymryd eich arian CHI! Yn anffodus, mae dulliau twyllo’n dod yn fwyfwy datblygedig ond peidiwch â phoeni, rydw i yma i helpu! Yn y blogbost hwn byddwn yn edrych ar e-byst twyll, beth ydyn nhw, sut i’w hadnabod a beth i’w wneud pan fyddwch chi’n eu derbyn.
Gwnewch yn siŵr eich bod yn darllen tudalen Prifysgol Aberystwyth ar e-byst sbam cyn darllen y blogbost hwn.
Beth yw e-bost gwe-rwydo?
E-bost sydd wedi ei gynllunio i geisio cael eich data personol sensitif yw e-bost gwe-rwydo. Gallai’r data fod ar ffurf eich cyfeiriad, gwybodaeth cerdyn credyd, neu eich manylion banc hyd yn oed! Mae e-byst gwe-rwydo fel arfer yn cael eu gwneud i edrych fel e-byst busnes cyfreithlon fel yr enghraifft isod.
Delwedd o Wikimedia Commons
Mae’n hawdd gweld sut y gallai rhywun gael ei dwyllo gan e-bost gwe-rwydo fel hwn. Yn gyntaf, mae’r e-bost yn rhoi gwybod i’r sawl y mae’n ei dargedu y gallai ei gyfrif banc fod wedi’i beryglu, sy’n annog y darllenwr i weithredu ar frys. Yn ail, does dim byd yn amheus am y cyswllt ar yr olwg gyntaf. Felly sut y gallwch chi ddweud y gwahaniaeth rhwng e-bost busnes cyfreithlon ac e-bost gwe-rwydo?
Mae LinkedIn Learning, llwyfan dysgu ar-lein y mae gan bob myfyriwr ac aelod o staff PA fynediad am ddim iddo, wedi rhyddhau tair nodwedd newydd a chyffrous yn ddiweddar. Edrychwch ar y wybodaeth a’r canllawiau isod i ddysgu sut i fanteisio i’r eithaf ar y nodweddion newydd hyn.
Nodwedd newydd 1: Canllawiau Rôl
Yn ddiweddar mae LinkedIn Learning wedi rhyddhau Canllawiau Rôl. Bydd y rhain yn eich galluogi i archwilio a dod o hyd i gynnwys sy’n gysylltiedig ag amrywiaeth eang o lwybrau gyrfa. Er enghraifft, os ydych yn dyheu i fod yn Wyddonydd Data, gallwch ddilyn y canllaw rôl Gwyddonydd Data i ddod o hyd i gyrsiau, llwybrau dysgu, mewnwelediadau sgiliau, a gofodau grŵp cymunedol sy’n gysylltiedig â’r rôl benodol hon.
Edrychwch ar y fideo isod (dim sain) i ddysgu sut i gael mynediad i’r Canllawiau Rôl, a gallwch hefyd gael gwybod mwy amdanynt trwy’r ddolen hon Canllawiau rôl LinkedIn Learning.
Nodwedd newydd 2: GitHub Codespaces
Mae LinkedIn Learning hefyd wedi rhyddhau GitHub Codespaces, sy’n caniatáu i chi ymarfer meistroli’r ieithoedd rhaglennu cyfrifiadurol gorau a phynciau cysylltiedig eraill megis Deallusrwydd Artiffisial (AI).
Mae LinkedIn Learning wedi datblygu dros 50 o gyrsiau sy’n cynnwys ymarfer ymarferol trwy integreiddio â GitHub Codespaces, sy’n amgylchedd datblygu yn y cwmwl. Gallwch gael mynediad at bob un o’r 50+ o gyrsiau yma, neu dechreuwch drwy edrych ar y dewis o gyrsiau isod:
Nodwedd newydd 3: Gosod Nodau Gyrfa
Gallwch bersonoli’r cynnwys y mae LinkedIn Learning yn ei argymell i chi hyd yn oed ymhellach drwy osod Nodau Gyrfa i chi’ch hun. Y ddwy brif fantais o osod nodau gyrfa yw:
Eich cysylltu â chyfleoedd datblygu gyrfa yn seiliedig ar y nodau yr ydych wedi’u gosod i chi’ch hun
Eich helpu i feithrin amrywiaeth o sgiliau a fydd yn eich helpu i gyflawni eich nodau
Gallwch osod eich Nodau Gyrfa trwy glicio ar Fy Nysgu Ac yna Fy Nodau, ac edrych ar y Canllaw defnyddiol hwn i’ch helpu chi i fanteisio i’r eithaf ar y nodwedd newydd hon.
Am unrhyw gymorth neu ymholiadau am y nodweddion newydd hyn, neu ar gyfer unrhyw gwestiynau cyffredinol am LinkedIn Learning, cysylltwch â’r Tîm Sgiliau Digidol (digi@aber.ac.uk).
Ydych chi eisiau datblygu eich sgiliau digidol ymhellach? Ydych chi’n ei chael hi’n anodd dod o hyd i gyrsiau a fideos o LinkedIn Learning sy’n gysylltiedig â’r sgiliau penodol hynny rydych chi am eu datblygu? Os felly, efallai mai ein casgliadau sgiliau digidol newydd yw’r hyn sydd ei angen arnoch!
Mae gan bob myfyriwr ac aelod o staff PA fynediad am ddim i LinkedIn Learning, llwyfan dysgu ar-lein. Darllenwch ein postiad blog blaenorol i ddarganfod mwy am y llwyfan.
Rydym wedi datblygu 30 o gasgliadau newydd (15 i fyfyrwyr a 15 i staff) i’ch cefnogi i ddod o hyd i’r cynnwys mwyaf priodol o LinkedIn Learning er mwyn i chi allu datblygu amrywiaeth o sgiliau digidol. Mae pob casgliad yn cynnwys 9 adnodd a gall y rhain amrywio o fideos byr 3 munud i gyrsiau mwy manwl.
Dyma enghraifft o 6 adnodd y byddwch chi’n dod o hyd iddyn nhw, ac o ba gasgliad y maent yn dod ohono:
Os ydych am ddod o hyd i adnoddau ychwanegol i’ch helpu i ddatblygu eich sgiliau digidol, edrychwch ar ein Llyfrgell Sgiliau Digidol myfyrwyra lansiwyd gennym yr wythnos diwethaf (bydd y llyfrgell staff ar gael ym mis Mehefin 2023).
Os oes gennych unrhyw gwestiynau am y casgliadau LinkedIn Learning, cysylltwch â’r Tîm Sgiliau Digidol (digi@aber.ac.uk).
Fe gyhoeddon ni bostiad blog yn gynharach yr wythnos hon yn eich cyflwyno i’n Llyfrgell Sgiliau Digidol newydd. Mae’r Llyfrgell Sgiliau Digidol yn cynnwys chwe chasgliad o adnoddau PA ac allanol i gefnogi myfyrwyr Prifysgol Aberystwyth i ddatblygu ystod o sgiliau digidol newydd a presennol.
Rydym wedi bod yn lansio’r casgliadau hyn ar sianeli cyfryngau cymdeithasol GG drwy gydol yr wythnos hon, ond gallwch hefyd edrych ar y delweddau isod i ddarganfod yr ystod o sgiliau digidol y gallech chi eu dysgu ym mhob un o’r chwe chasgliad.
Bydd y Llyfrgell Sgiliau Digidol ar gyfer staff yn cael ei lansio ym mis Mehefin 2023. Os oes gennych unrhyw gwestiynau neu broblemau yn defnyddio’r Llyfrgell Sgiliau Digidol, cysylltwch â’r Tîm Sgiliau Digidol (digi@aber.ac.uk).
