Yr wythnos nesaf bydd yr adnodd TipDigidol, ein hawgrym unwaith yr wythnos i’ch helpu gyda’ch Sgiliau Digidol! Gallwch weld y TipDigidol a bostiwyd y llynedd yma a darganfod pa 5 oedd y mwyaf poblogaidd yn y blogbost hwn. Cofiwch gadw eich llygaid allan am bob TipDigidol eleni trwy danysgrifio i’r blog!
Blogbost gan Shân Saunders (Cydlynydd Datblygu Sgiliau a Galluoedd Digidol)
Ym mis Medi 2023, dechreuodd y Tîm Sgiliau Digidol TipDigidol – blogbost wythnosol i dynnu sylw at awgrymiadau defnyddiol y gallwch eu defnyddio i wneud eich bywyd digidol dyddiol yn haws. Isod ceir y 5 prif TipDigidol o 2023/24.
Ydych chi’n gweithio ar un sgrin ac yn ei chael hi’n anodd? Ydych chi wedi blino ar newid rhwng dwy ffenestr? Oeddech chi’n gwybod y gallwch chi hollti’ch sgrin i weld dau beth ar unwaith sy’n ei gwneud hi’n llawer haws edrych ar ddwy ffenestr ar yr un pryd? Mae hyn yn golygu y gallwch weithio ar ddogfennau, tabiau a llawer mwy ochr yn ochr.
Bydd y rhan fwyaf ohonom yn fwy cyfarwydd â defnyddio emojis ar ein ffonau symudol 📱, ond bydd adegau pan fyddwn eisiau cynnwys emojis wrth ddefnyddio ein gliniaduron neu gyfrifiaduron 💻. Yn hytrach na chwilio ar y we am yr emoji sydd ei angen arnoch, beth am ei gyrchu’n uniongyrchol o’ch bysellfwrdd!
Ydych chi’n cael trafferth canolbwyntio ar eich gwaith? Ydych chi’n oedi a gohirio ar gyfryngau cymdeithasol? Ydych chi angen cyfyngu eich amser sgrolio? Oeddech chi’n gwybod y gallwch chi nawr gyfyngu ar eich amser sgrolio Instagram trwy’r gosodiadau ar Instagram?
Ydych chi erioed wedi copïo a gludo cynnwys o dudalen we neu ddogfen arall i ddogfen Word newydd a chanfod ei fod yn gwneud llanast llwyr o’ch fformatio? Yn ffodus, mae opsiynau ychwanegol y tu allan i’r opsiwn gludo sylfaenol (ctrl + v) a all helpu i ddatrys hyn!
Weithiau, efallai y bydd angen i chi neilltuo peth amser i ganolbwyntio ar ddarn penodol o waith, ond sut allwch chi ddangos i bobl eraill sydd ar-lein hefyd eich bod chi’n brysur? Mae Microsoft Teams yn caniatáu ichi osod eich statws i Do not disturb, sy’n golygu na fydd hysbysiadau neu alwadau Teams yn tarfu arnoch (oni bai eich bod yn dewis derbyn y rhain gan bobl benodol), ond gall fod yn hawdd anghofio diffodd y statws hwn ar ôl i chi orffen.
Ymunwch â ni ym mis Hydref 2024 am fwy o’r TipDigidol, i ddilyn ein TipDigidol, tanysgrifiwch i’n Blog Sgiliau Digidol. Neu fel arall, gallwch lyfrnodi’r dudalen we hon, lle ychwanegir TipDigidol newydd bob wythnos gan ddechrau o fis Hydref!
Blogbost gan Shân Saunders (Cydlynydd Datblygu Sgiliau a Galluoedd Digidol)
Ym mis Chwefror fe wnaethon ni ysgrifennu blogbost am apiau i helpu gyda’ch arferion darllen. Gan ei fod yn Ddiwrnod Cenedlaethol Carwyr Llyfrau, mae diweddariadau newydd i un o’r apiau a grybwyllir – Fable. Mae Fable yn gyfuniad o ap darllen a chyfryngau cymdeithasol lle gallwch weld diweddariadau gan ddarllenwyr eraill gan gynnwys eu barn am y llyfrau rydych eisoes wedi’u darllen a’r llyfrau yr hoffech eu darllen.
Mae diweddariadau diweddar yn cynnwys cael eich pyliau darllen a’ch cynnydd ar y dudalen hafan i gael mynediad hawdd. Yn ogystal, mae Fable bellach yn ymestyn allan o lyfrau gyda’r opsiwn i nodi’ch cynnydd ac ymuno â chlybiau ar gyfer rhaglenni teledu sy’n golygu y gallwch wylio penodau a thrafod eich hoff raglenni gyda selogion eraill. Ar hyn o bryd mae Fable hefyd yn profi sgwrsfot DA newydd o’r enw Scout lle rydych chi’n ychwanegu ysgogiadau am awgrymiadau ac argymhellion ar gyfer eich darlleniadau nesaf yn seiliedig ar ymadroddion a genres neu os ydych chi’n chwilio am rywbeth tebyg i’w ddarllen.
Y brif nodwedd newydd yw’r dudalen ystadegau. O dan eich proffil defnyddiwr, mae crynodeb darllenydd erbyn hyn, crynodeb DA sy’n diweddaru’n awtomatig ar ôl pob darlleniad. O fewn hyn mae graff hefyd o’r llyfrau rydych chi wedi’u darllen eleni gyda mewnwelediad darllenydd i pryd y disgwylir i chi gyrraedd eich targed darllen. Ynghyd â’r teclyn pyliau darllen ar y dudalen hafan, gallwch weld faint rydych chi wedi’i ddarllen yn ystod y misoedd blaenorol gan gynnwys eich pwl darllen hiraf. Gallwch hefyd weld graff gyda’r genres a ddarllenwyd amlaf gennych ac o dan hyn gallwch weld y sgôr cyfartalog o lyfrau rydych chi wedi’u darllen.
Blogbost gan Shân Saunders (Cydlynydd Datblygu Sgiliau a Galluoedd Digidol)
Mae DA a DA cynhyrchiol wedi ymwreiddio fwyfwy i’n bywydau p’un ai trwy ddefnydd personol neu broffesiynol. Mae gan LinkedIn Learning amrywiaeth o wybodaeth i’ch helpu i ddysgu mwy am DA gan gynnwys sut i ddefnyddio DA yn gyfrifol. Gweler isod am y 10 cwrs gorau sydd ar gael ar DA a DA cynhyrchiol ar LinkedIn Learning. Noder nad yw LinkedIn Learning ar hyn o bryd yn cefnogi cyrsiau yn Gymraeg.
Mae LinkedIn Learning yn adnodd rhad ac am ddim sydd ar gael i holl fyfyrwyr a staff Prifysgol Aberystwyth. Os oes angen cymorth arnoch i gael mynediad i’ch cyfrif LinkedIn, edrychwch ar ein tudalen Cwestiynau Cyffredin neu gallwch anfon e-bost atom yn digi@aber.ac.uk.
Blogbost gan Shân Saunders (Cydlynydd Datblygu Sgiliau a Galluoedd Digidol)
Ym mis Tachwedd 2023, cynhaliwyd Gŵyl Sgiliau Digidol gyntaf Prifysgol Aberystwyth. Gwnaethom gynnal 28 o ddigwyddiadau gwahanol dros 5 diwrnod a oedd yn rhychwantu amrywiaeth o feysydd sgiliau digidol gan gynnwys sesiynau a gynhaliwyd ar Ddeallusrwydd Artiffisial, seiberddiogelwch, LinkedIn Learning, lles digidol, Excel a llawer mwy!
Gallwch weld yr holl weithdai a chyflwyniadau a gynhaliwyd ar wefan yr Ŵyl Sgiliau Digidol o dan y tab recordiadau ac adnoddau 2023 lle gallwch wylio’r sesiynau eto ac ar gyfer sesiynau ymarferol gallwch weithio ar y taflenni gwaith a ddarperir.
Os oes gennych unrhyw broblemau wrth gael mynediad i’r recordiadau, cysylltwch â’r Tîm Sgiliau Digidol yn digi@aber.ac.uk a chadwch lygad am wybodaeth sydd ar ddod am Ŵyl Sgiliau Digidol 2024 a fydd yn dychwelyd yn ddiweddarach eleni!
Blogbost gan Shân Saunders (Cydlynydd Datblygu Sgiliau a Galluoedd Digidol)
Mae 8 Mehefin 2024 yn Ddiwrnod Lles Byd-eang, diwrnod i fyfyrio ar eich lles a’ch iechyd meddwl. Eleni cyflwynodd Hyrwyddwyr Digidol y Myfyrwyr Gyfres Lles Digidol a oedd yn ymdrin ag ystod eang o fywyd digidol i helpu i wella lles digidol eraill gydag awgrymiadau a thriciau.
Fe wnaethant ystyried ergonomeg ddigidol gan gynnwys creu casgliad LinkedIn Learning am y gosodiad gorau ar gyfer eich desg a chyngor ar sut i leihau straen llygaid drwy’r rheol 20-20-20 a galluogi modd tywyll. Dechreuodd un o’n hyrwyddwyr digidol ar gyfnod o ddadwenwyno digidol a oedd yn cynnwys dileu pob ap cyfryngau cymdeithasol, analluogi hysbysiadau, disodli ID wyneb gyda chyfrinair bwriadol a bod yn fwy ystyriol o’r rheswm y maent ar eu ffôn. Fe wnaethant adrodd am y manteision, yr anfanteision a rhoi cyngor i unrhyw un arall sy’n awyddus i roi cynnig ar ddadwenwyno digidol.
Yn ogystal, gwnaeth ein hyrwyddwr digidol ddarganfod bod ap ScreenZen yn fendith yn ystod eu dadwenwyno digidol i helpu i orfodi ffiniau gwell wrth ryngweithio ag apiau a dod yn fwy ymwybodol o’ch defnydd digidol. Edrychodd y gyfres Lles Digidol hefyd ar bwysigrwydd trefnu eich gofodau digidol, gan gynnwys creu ffolderi gwell, addasu eich sgriniau cartref, a chlirio eich ffolder lawrlwytho.
Mae adnoddau lles digidol eraill yn cynnwys blogbost ar gyfer unrhyw ddefnyddiwr iPhone am y nodweddion sydd ar gael yn y gosodiadau i helpu gyda’ch terfyn amser sgrin a nodwedd i helpu i gadw pellter eich ffôn i leihau straen llygaid.
Os hoffech edrych ar adnoddau pellach, mae croeso i chi edrych ar yr adran lles digidol ar y Llyfrgell Sgiliau Digidol neu yng nghasgliad LinkedIn Learning. Gallwch hefyd weld y sesiwn lles digidol a gynhaliwyd gennym yng Ngŵyl Sgiliau Digidol 2023.
Blogbost gan Shân Saunders (Cydlynydd Datblygu Sgiliau a Galluoedd Digidol)
Wrth i wyliau’r haf agosáu, oeddech chi’n gwybod os ydych chi’n staff neu’n fyfyriwr PA cyfredol, y gallwch barhau i ddysgu a datblygu sgiliau newydd gyda LinkedIn Learning? Efallai fod yna sgiliau penodol yr hoffech eu datblygu, neu efallai fod gennych ddiddordeb mewn chwilio am sgiliau penodol a fydd arnoch eu hangen o bosibl ar gyfer cyflogaeth yn y dyfodol. A nawr, gyda’r ap LinkedIn Learning, gallwch ddysgu wrth fynd, lle bynnag yr ydych. Mae’r ap yn cynnwys y gallu i lawrlwytho cyrsiau i barhau i ddysgu all-lein neu i ymgysylltu â chyrsiau fel sain yn unig. Am fwy o wybodaeth am y nodweddion newydd a sut i ddysgu wrth fynd, darllenwch ein blogbost blaenorol: O le i le gydag Ap LinkedIn Learning! 📲 | (aber.ac.uk)
Nodyn ar gyfer myfyrwyr sy’n graddio: bydd gennych fynediad i’ch cyfrif LinkedIn Learning tra byddwch yn dal i fod yn fyfyriwr, ond byddwch yn colli mynediad ar ôl i chi raddio, felly gwnewch yn siŵr eich bod yn lawrlwytho’ch tystysgrifau tra gallwch. Dysgwch sut i wneud hyn trwy ddarllen ein blogbost blaenorol am ychwanegu tystysgrifau i’ch cyfrif LinkedIn personol.
Gallwch ddysgu mwy am y nodweddion ar LinkedIn Learning gan gynnwys ychwanegu tystysgrifau at eich proffil LinkedIn a mwy drwy sesiwn yr Ŵyl Sgiliau Digidol: Cychwyn arni gyda LinkedIn Learning – Gŵyl Sgiliau Digidol 2023 (6 – 10 Tachwedd) (aber.ac.uk)
Os oes gennych unrhyw gwestiynau am ddefnyddio LinkedIn Learning cysylltwch â’r Tîm Sgiliau Digidol (digi@aber.ac.uk) neu edrychwch ar y Cwestiwn Cyffredin LinkedIn Learning: Sut mae defnyddio LinkedIn Learning? (aber.ac.uk).
Yn aml gall hysbysiadau a negeseuon gan ffrindiau a theulu dynnu eich sylw a’ch cadw’n effro. Oeddech chi’n gwybod y gallwch chi osod amserlen “Peidiwch â Tharfu” fel nad ydych bellach yn cael eich rhybuddio am hysbysiadau neu alwadau sy’n dod i mewn er eu bod yn dal i gael eu derbyn?
Gallwch wneud hyn trwy fynd i:
Gallwch hefyd bersonoli’r ‘Focus’ i ganiatáu rhai galwadau neu hysbysiadau gan gysylltiadau allweddol.
Mae yna hefyd fathau eraill o ffocws megis gyrru.
Edrychwch ar y clip byr isod i weld sut i osod yr amserlen.
Noder, mae’r cyfarwyddiadau hyn ar gyfer ffonau iPhone. Ar gyfer ffonau Androids, edrychwch ar y cyfarwyddiadau canlynol: Cyfyngu ar ymyriadau gyda Peidiwch â Tharfu ar Android – Android Help (google.com)
Bob wythnos byddwn yn postio TipDigidol defnyddiol i’ch helpu i wneud y defnydd gorau o dechnoleg. I ddilyn ein TipiauDigidol, tanysgrifiwch i’n Blog Sgiliau Digidol. Neu, gallwch hefyd ddilyn y dudalen hon, lle bydd TipDigidol newydd yn cael ei ychwanegu bob wythnos!
Blogbost gan Shân Saunders (Cydlynydd Datblygu Sgiliau a Galluoedd Digidol)
Sylwer mai dim ond trwy gyfrwng y Saesneg y ceir holl ddarpariaethau LinkedIn ar hyn o bryd.
Wrth i ddiwedd y flwyddyn academaidd agosáu, efallai eich bod yn dechrau meddwl am ragolygon swyddi a’ch gyrfaoedd yn y dyfodol a ble i ddechrau ar y daith hon. Mae LinkedIn bellach yn cynnig gweminarau “Rock your Profile” i’ch helpu i ddysgu sut i adeiladu proffil diddorol sy’n apelio at eich cynulleidfa ddelfrydol yn ogystal â thynnu sylw at nodweddion allweddol ac arferion gorau ar gyfer adeiladu proffil atyniadol. Mae’r gweminarau hyn ar gael ar wahanol adegau o’r dydd, cofrestrwch yma nawr: Rock Your Profile (linkedin.com).
Mae Gwasanaeth Gyrfaoedd Prifysgol Aberystwyth hefyd yn cynnig adolygu proffiliau CV a LinkedIn a rhoi cyngor ar eu gwella. Gallwch ddefnyddio’r gwasanaethau hyn drwy alw heibio yn bersonol i Lyfrgell Hugh Owen Lefel D yn ystod y tymor. Mae’r tîm Gyrfaoedd hefyd ar gael drwy e-bost yn: gyrfaoedd@aber.ac.uk. Fel arall, mae’r tîm Gyrfaoedd hefyd yn cynnal sesiynau ar sut i greu CV a phroffil LinkedIn yn llwyddiannus. Mae’r sesiynau hyn yn cael eu hysbysebu ar y porth gyrfaoedd: www.aber.ac.uk/gyrfaoeddABER. Cawsom hefyd sesiwn am sut i ddefnyddio LinkedIn yn ein Gŵyl Sgiliau Digidol y gallwch ei weld yma: Sut i ddefnyddio LinkedIn – Gŵyl Sgiliau Digidol 2023 (6 – 10 Tachwedd) (aber.ac.uk). Gallwch weld rhagor o adnoddau ar LinkedIn drwy’r fideos isod:
P’un a ydych chi’n gweithio ar un sgrin neu ddwy, mae’n debygol iawn fod gennych chi sawl ffenestr ar agor ac o’r herwydd, rwy’n siŵr eich bod wedi canfod eich hun yn ceisio dod o hyd i’r ffenestr yr ydych chi’n chwilio amdani.
Mae gan TipDigidol 29 yr ateb!
Gallwch weld a chyfnewid rhwng eich holl ffenestri agored trwy ddefnyddio bysell Windows + Tab.
Edrychwch ar y clip byr isod i weld y llwybr byr ar waith.
Bob wythnos byddwn yn postio TipDigidol defnyddiol i’ch helpu i wneud y defnydd gorau o dechnoleg. I ddilyn ein TipiauDigidol, tanysgrifiwch i’n Blog Sgiliau Digidol. Neu, gallwch hefyd ddilyn y dudalen hon, lle bydd TipDigidol newydd yn cael ei ychwanegu bob wythnos!
