Deallusrwydd Artiffisial a’r Llyfrgell. Wythnos Pedwar. Perplexity AI – Adolygiad o offeryn.

WordPress User [sif4] Dysgu, Sgiliau Gwybodaeth, Ymchwil Leave a comment

Does dim angen inni eich atgoffa chi mae’n siŵr—mae yna lawer o adnoddau Deallusrwydd Artiffisial (DA) mas yna. Er taw ChatGPT sydd wedi bachu’r penawdau yn gynnar, mae Perplexity AI yn prysur ddatblygu’n un o’n ffefrynnau ni yma yn y llyfrgell.

Mae Perplexity AI yn ennill ei blwyf ym myd adfer gwybodaeth, ac am reswm da. Yn wahanol i’w gymar mwy sgyrsiol, ChatGPT, sy’n aml yn mwynhau deialogau hir, mae Perplexity yn mabwysiadu dull uniongyrchol ac effeithlon o ateb ymholiadau. Mae hyn yn ei wneud yn offeryn delfrydol ar gyfer y rhai sydd angen ffeithiau cyflym, ymchwil trylwyr, neu wybodaeth am bynciau penodol. Ar ben hynny, mae’n darparu dyfyniadau ar gyfer ei holl ymatebion.

Pam dewis Perplexity?

Dyma’r nodweddion amlwg sy’n gwneud Perplexity yn ddewis da:

  • Gwybodaeth amser real: Mae Perplexity yn tynnu data newydd yn uniongyrchol o’r we, gan sicrhau eich bod bob amser yn cael yr wybodaeth ddiweddaraf.
  • Crynodebau clir: Yn hytrach na’ch boddi mewn dolenni diddiwedd, mae’n darparu atebion cryno, uniongyrchol er mwyn arbed amser i chi.
  • [A dyma’r enillydd clir i ni] Gwirio ffeithiau: Daw pob ymateb gyda dyfyniadau, fel y gallwch wirio hygrededd yr wybodaeth yn hawdd ac archwilio ymhellach os oes angen.

Sut gall Perplexity eich helpu chi?

  • Darganfod adnoddau.  Gall awgrymu geiriau allweddol neu ymadroddion effeithiol i fireinio’ch gwaith chwilio yng nghatalog y llyfrgell neu gronfeydd data ar-lein eraill. (Cadwch lygad ar ein blogbost nesaf am sut i fod yn glyfar wrth chwilio am eiriau allweddol)
  • Cymorth astudio: Gall egluro pynciau’n gyflym, darparu esboniadau cryno, neu archwilio pynciau ymhellach er mwyn i chi eu deall yn well, a gall pob un o’r pethau hyn arbed amser yn ystod sesiynau astudio.
  • Gwirio ffeithiau: Gall Perplexity wirio hawliadau neu ystadegau ar gyfer traethodau neu gyflwyniadau – a hynny’n gyflym, gan sicrhau bod eich gwaith yn gywir ac yn gredadwy.

Ambell i beth i’w gofio am Perplexity

  • Prinder dyfnder sgwrsio Dyw Perplexity ddim mor dda â ChatGPT wrth gynnal dilyniant cyd-destunol neu sgwrs estynedig.
  • Dibyniaeth ar ffynonellau allanol: Er bod dyfyniadau yn elfen gref, mae cywirdeb yr offeryn yn dibynnu ar ansawdd y ffynonellau mae’n cyfeirio atyn nhw. Cofiwch wirio gwybodaeth hanfodol bob amser lle bo hynny’n bosibl.
  • Dim allbynnau creadigol neu agored: Dyw Perplexity ddim wedi’i gynllunio ar gyfer tasgau fel ysgrifennu creadigol, taflu syniadau, neu drafodaethau archwiliadol—mae ChatGPT yn llawer mwy addas i’r tasgau hyn.

I gloi

Mae Perplexity AI yn offeryn pwerus i fyfyrwyr ac ymchwilwyr, gan gynnig mynediad cyflym at wybodaeth gyfredol a dyfyniadau defnyddiol ar gyfer gwirio ffeithiau ac astudio ymhellach.

Yn wahanol i ChatGPT, sy’n rhagori ar sgyrsiau, mae Perplexity yn darparu atebion cryno, sy’n golygu ei fod yn ddelfrydol ar gyfer gwaith academaidd. Mae hefyd yn eich helpu i ddarganfod rhagor o adnoddau drwy awgrymu geiriau allweddol ar gyfer chwilio effeithiol. Fodd bynnag, does dim cymaint o ddyfnder sgwrsio ganddo â ChatGPT, ac mae ei gywirdeb yn dibynnu ar ansawdd y ffynonellau y mae’n eu dyfynnu. Drwy gyfuno’r ddau offeryn, gallwch wneud y gorau o’ch amser astudio a rhoi mwy o ganolbwynt effeithiol i’c

DA a’r Llyfrgell Wythnos tri. Adeiladu anogwyr: Sut i ysgrifennu anogwyr effeithiol ar gyfer canlyniadau DA gwell

WordPress User [abc27] Cymorth a chyngor, Dysgu, Sgiliau Gwybodaeth, Ymchwil Leave a comment

Gall DA fod yn adnodd gwerthfawr i’ch helpu i fanteisio i’r eithaf ar eich amser yn y llyfrgell. Trwy ddefnyddio arddull sgyrsiol adnoddau megis ChatGPT, gallwch gydweithio â’r DA i fireinio chwiliadau, cael argymhellion personol, a darganfod adnoddau perthnasol sy’n diwallu eich anghenion academaidd penodol yn gyflym.

Er mwyn cael y canlyniadau gorau gan DA, mae’n bwysig gofyn y cwestiynau cywir, ac mae hyn yn sgìl ynddo’i hun.

Pixabay

Mae’r sgìl hwn, a elwir yn adeiladu anogwr neu beirianneg anogwr, yn cynnwys strwythuro’ch ymholiadau mewn ffordd sy’n effeithio’n uniongyrchol ar ddefnyddioldeb ymatebion yr adnodd DA. Gall meistroli’r dechneg hon wella’ch canlyniadau o adnodd DA yn sylweddol. (Am fwy o wybodaeth am bwysigrwydd adeiladu anogwyr effeithiol, gweler ein canllaw DA a’r Llyfrgell yma).

Beth yw anogwr effeithiol?

Mae anogwr DA effeithiol yn gryno, yn strwythuredig, ac yn benodol. Meddyliwch am y peth fel fformiwla, lle mae pob elfen yn chwarae rhan i sicrhau bod yr anogwr yn glir, wedi’i dargedu, ac yn canolbwyntio ar y canlyniad a ddymunir.

Efallai y bydd elfennau’r fformiwla yn edrych rhywbeth fel hyn:

Tasg + Pwnc + Strwythur + Arddull + Lefel

Gadewch i ni edrych ar yr hyn y mae’r elfennau hyn yn ei olygu a sut y gallem eu cymhwyso i sefyllfa llyfrgell.

Mae’r elfen  Tasg  o’r fformiwla yn nodi beth yr hoffech i’r adnodd ei wneud. Dyma rai enghreifftiau posibl: Darganfod; Crynhoi; Esbonio; Disgrifio; Cymharu.

Mae’r Pwnc yn diffinio’r pwnc neu’r senario yr ydym ei eisiau i’r Dasg ei ystyried. Dyma rai enghreifftiau posibl: Gwreiddiau’r Ail Ryfel Byd; Rhamantiaeth mewn Llenyddiaeth Saesneg; Amcanion Seicoleg Gadarnhaol.

Mae’r  Strwythur  yn nodi’r fformat y dylid cyflwyno’r ymateb. Gallwch ofyn am atebion mewn: Un frawddeg; 200 o eiriau; Rhestr o bwyntiau bwled; Tabl; Graffig neu Siart.

Mae’r  Arddull  yn nodi sut y dylai’r cynnwys gael ei ysgrifennu. Dyma rai arddulliau posibl: Ffurfiol; Anffurfiol; Academaidd; Ffraeth.

Mae Lefel y manylion yn dangos dyfnder a chwmpas yr wybodaeth sydd ei hangen. Gallai’r lefel hon o fanylder fod yn Drosolwg Sylfaenol neu’n Ddadansoddiad Manwl (neu’n unrhyw beth yn y canol!)

Dyma enghraifft y gallwch ei defnyddio yn y llyfrgell. Rydych chi eisiau dod o hyd i rai adnoddau yn y llyfrgell a fydd yn eich helpu i ateb y cwestiwn canlynol: “Dadansoddwch themâu a nodweddion Rhamantiaeth Saesneg ym marddoniaeth William Wordsworth a Samuel Taylor Coleridge.”

  • Tasg: Darganfod
  • Pwnc: Llyfrau sy’n trafod Rhamantiaeth Saesneg a barddoniaeth William Wordsworth a Samuel Taylor Coleridge.
  • Strwythur: Rhestr o bwyntiau bwled
  • Arddull: Academaidd
  • Lefel:     Trosolwg rhagarweiniol.

Byddai’r anogwr llawn yn edrych yn debyg i hyn:

Dewch o hyd i rai llyfrau academaidd sy’n rhoi trosolwg rhagarweiniol o Ramantiaeth Saesneg a barddoniaeth William Wordsworth a Samuel Taylor Coleridge a’u dangos mewn rhestr o bwyntiau bwled. 

Dyma’r allbwn a ddarparwyd gan y adnodd DA* (Yn yr enghraifft hon, rydym yn defnyddio perplexity.ai, adnodd y byddwn yn ei adolygu yn ein blogbost DA nesaf. Nodyn: Mi wnaethom chwilio yn Saesneg yn yr enghraifft hon, ond mae modd chwilio yn Gymraeg a chael ymateb yn Gymraeg hefyd):

*Rydym bob amser yn argymell gwirio unrhyw allbynnau DA am gywirdeb.

Trwy fynd i’r afael â’r grefft o adeiladu anogwyr, gallwch gyfleu’ch anghenion i’r anodd DA yn fwy effeithiol. Mae hyn yn sicrhau bod yr ymatebion yn berthnasol yn academaidd a’u bod yn diwallu eich anghenion dysgu penodol – gan arbed amser i chi wrth chwilio. Yna gallwch ymweld â Primo, catalog y llyfrgell i weld a oes gan y llyfrgell y teitlau awgrymedig ar gael i chi.

Fel y dangosir yn ein henghraifft, gall anogwr wedi’i strwythuro’n dda eich helpu i ddatgelu adnoddau academaidd gwerthfawr a all eich helpu i gael gwell dealltwriaeth o bynciau yn gyflym.

Eich Llyfrgellwyr Pwnc: Rhowch Hwb i’ch Astudiaethau gydag Arf Cyfrinachol y Llyfrgell!

WordPress User [sif4] Cymorth a chyngor, Dysgu, Sgiliau Gwybodaeth Leave a comment

Croeso (nôl) i’r Brifysgol! P’un a ydych yn fyfyriwr newydd neu’n dychwelyd am flwyddyn arall, mae eich Llyfrgellydd Pwnc yma i’ch helpu i fanteisio i’r eithaf ar adnoddau’r llyfrgell yn Aberystwyth.

Mae gan bob adran lyfrgellydd pwnc (gellir dod o hyd i restr ohonynt yma)

Dyma rai o’r pethau y gallant eich helpu â hwy:

Dysgu eich ffordd o amgylch y llyfrgell.

Mynd i’r afael â chatalog y llyfrgell (Primo) gan gynnwys:

  • Dod o hyd i lyfrau ac erthyglau: Cael cymorth i ddod o hyd i lyfrau, erthyglau mewn cyfnodolion, a deunyddiau eraill ar gyfer eich gwaith.
  • Defnyddio Cronfeydd Data: Dysgu sut i lywio cronfeydd data academaidd i ddod o hyd i wybodaeth o safon uchel.

Deall sut i werthuso’r wybodaeth yr ydych chi’n dod o hyd iddi a sut i adnabod camwybodaeth bosibl.

Dysgu sut i gyfeirnodi a dyfynnu eich ffynonellau yn gywir mewn gwahanol arddulliau (APA, Harvard, MLA, ac ati)

Gallwch drefnu cyfarfod un-i-un gyda’ch llyfrgellydd yma, neu fel rheol bydd un o’r tîm ar ddesg Llawr F ar lawr uchaf Llyfrgell Hugh Owen rhwng 10yb a 5yp.

Am fwy o wybodaeth am wasanaethau’r llyfrgell gweler ein Canllawiau Llyfrgell yma.

Peidiwch â meddwl ein bod wedi anghofio am athrawon neu ymchwilwyr. Cysylltwch â’ch llyfrgellydd pwnc gydag unrhyw gwestiynau sy’n ymwneud â’r llyfrgell ac fe wnawn ein gorau i’ch helpu. Gallwch hefyd ddod o hyd i wybodaeth am ein Canllaw Llyfrgell i Athrawon yma, a’n Canllaw Llyfrgell i Ymchwilwyr yma.

Diwrnod Shwmae Su’mae

WordPress User [abc27] Cymorth a chyngor, Dysgu Leave a comment

15 Hydref 2024

Heddiw ydy Diwrnod Shwmae Su’mae, sy’n ddiwrnod o ddathlu a hyrwyddo’r Gymraeg.

Cewch lawer o gyfleoedd i ddysgu ac i ddefnyddio’r iaith yma yn Aberystwyth, felly dyma gipolwg ar sut y gallwch chi wneud y mwyaf o’r cyfleoedd hyn.

Dysgu Cymraeg

Mae gwybodaeth am gyrsiau Cymraeg ym Mhrifysgol Aberystwyth ar gael ar wefan y Brifysgol. Am fwy o wybodaeth am wersi Cymraeg, cysylltwch â learnwelsh@aber.ac.uk neu ewch i learnwelsh.cymru.

Cofiwch, gallwch hefyd lawrlwytho ap, megis Duolingo, i ymarfer eich sgiliau rhwng y gwersi.

Adnoddau Llyfrgell

Os ydych wedi cychwyn ar eich taith i ddysgu Cymraeg, yn meddwl am fentro, neu os ydych yn siaradwr Cymraeg ac am roi sglein ar eich sgiliau, mae gan y llyfrgell ystod eang o adnoddau defnyddiol a diddorol.

Ewch i’r Casgliad Celtaidd ar Lefel F yn Llyfrgell Hugh Owen ac mi ddewch o hyd i filoedd o lyfrau i’ch helpu i ymarfer a datblygu eich sgiliau darllen a siarad – o nofelau gyda geirfa, i lyfrau gramadeg, i gyrsiau iaith cyflawn.

A chofiwch ddweud su’mae a mwy wrth staff y Llyfrgell! Cewch adnabod y rhai sy’n siarad neu’n dysgu Cymraeg yn ôl eu laniardiau a’u bathodynnau ‘Siarad Cymraeg’

Astudio a Gweithio trwy Gyfrwng y Gymraeg

Mae’r cyfoeth o adnoddau datblygu sgiliau SgiliauAber ar gael yn y Gymraeg a’r Saesneg. Mae’r llyfrgellwyr yn cynnig gweithdai yn y ddwy iaith hefyd – cynhelir gweithdai yn iaith eu teitl ar y dudalen restru: https://www.aber.ac.uk/cy/aberskills/skills-workshops/

Piciwch draw i’n Blog Sgiliau Digidol i gael rhai awgrymiadau ar gyfer gwneud gweithio yn Gymraeg ar eich cyfrifiadur yn llawer mwy hwylus.: https://wordpress.aber.ac.uk/digital-capabilities/cy/2024/03/01/gweithio-ar-eich-cyfrifiadur-yn-gymraeg/

Ac a wyddoch chi? Gallwch ddefnyddio’r rhan fwyaf o systemau a gwasanaethau GG gan gynnwys Primo, Libguides a Rhestrau Darllen Aspire yn Gymraeg neu yn Saesneg. Cliciwch ar yr iaith ar ochr dde uchaf y dudalen we neu ar eicon y byd i newid rhwng ieithoedd.

UMCA – Undeb Myfyrwyr Cymraeg Aberystwyth

Mae UMCA yn darparu llais a cymuned i fyfyrwyr Cymraeg eu hiaith, dysgwyr a’r chwilfrydig! Maen nhw hefyd yn cynnal digwyddiadau Cymraeg eu hiaith a digwyddiadau diwylliannol, ac yn rhoi cyfle i ddysgwyr gwrdd ac ymarfer eu Cymraeg gyda siaradwyr Cymraeg. Dilynwch UMCA ar y cyfryngau cymdeithasol i ddysgu rhagor.