Pan fydd adborth ar aseiniadau a marciau yn cael eu rhyddhau, mae’n demtasiwn edrych ar y marc a symud ymlaen yn syth i’r darn nesaf o waith. Fodd bynnag, gall rhoi amser i ddarllen a deall eich adborth eich helpu i wella a chael canlyniadau gwell mewn aseiniadau yn y dyfodol.
Dyma ein prif awgrymiadau ar gyfer manteisio i’r eithaf ar eich adborth. A chofiwch, mae yna ddigonedd o bobl a all helpu os nad ydych chi’n siŵr am unrhyw beth.
1. Dewch o hyd i’ch adborth
Edrychwch ar Blackboard i weld eich adborth a’ch marciau. Y ffordd orau o weld eich adborth yw clicio ar y ddolen yr oeddech chi’n ei defnyddio i gyflwyno. Edrychwch ar ein Cwestiynau Cyffredin ar Turnitin a Blackboard Assignment am ragor o wybodaeth.
2. Darllenwch eich holl adborth
Peidiwch ag edrych ar y marc yn unig. Darllenwch drwy’r holl sylwadau, gan gynnwys unrhyw gyfarwyddiadau marcio, adborth ar eich aseiniad, a sylwadau cyffredinol. Efallai y bydd gennych hefyd adborth sain ar gael i wrando arno.
3. Dathlwch yr hyn a aeth yn dda
Cymerwch sylw o’r sylwadau cadarnhaol a gewch. Mae’r rhain yn tynnu sylw at y sgiliau a’r dulliau sy’n gweithio’n dda ac sy’n werth eu parhau mewn aseiniadau yn y dyfodol.
4. Nodwch ffyrdd o wella
Chwiliwch am gyngor y gallwch ei gymhwyso y tro nesaf. Er enghraifft, os yw’ch adborth yn awgrymu gwella eich strwythur, defnyddio tystiolaeth gryfach, neu ddatblygu eich dadl ymhellach, gwnewch nodyn o’r pwyntiau hyn a cheisiwch eu defnyddio yn eich darn nesaf o waith.
5. Daliwch ati i ddod yn ôl at yr adborth
Bydd eich adborth yn dal i fod yno pan fyddwch chi’n dechrau eich aseiniad nesaf. Gall ailymweld ag adborth blaenorol fod yn ffordd wych o’ch atgoffa’ch hun o beth i’w wneud a beth i weithio arno.
6. Gofynnwch gwestiynau
Os oes unrhyw beth nad ydych chi’n ei ddeall, siaradwch â’ch darlithydd. Maen nhw yno i helpu a gallant esbonio’r adborth, egluro’r sylwadau, ac awgrymu ffyrdd o wella.
Gair i gall
Meddyliwch am adborth fel cyngor ar gyfer eich aseiniad nesaf, nid dim ond sylwadau ar eich aseiniad diwethaf. Po fwyaf y byddwch chi’n ymgysylltu ag ef, y mwyaf defnyddiol fydd yr adborth.
Daeth yr adeg unwaith eto! Mae’r amser yn prysur nesáu, mae’r llyfrgell yn llenwi, ac yn sydyn mae pawb yn siarad am adolygu ac arholiadau. Rydyn ni gyd wedi bod yn yr sefyllfa, ac er nad oes unrhyw un yn hoffi arholiadau, dyma eich cyfle i ddangos popeth rydych chi wedi’i ddysgu eleni.
Cymerwch anadl. Ewch amdani – ac mae cefnogaeth ar gael yma yn y llyfrgell.
Adolygu, ond mewn ffordd sy’n gweithio i chi
Nid oes un ateb a fydd yn gweddu i bawb pan ddaw hi i adolygu. Mae rhai pobl yn credu’n gryf mewn nodiadau lliwgar a chardiau fflach, mae eraill angen cerddoriaeth gefndir, ac mae rhai eisiau distawrwydd llwyr a choffi cryf. Y newyddion da? Mae yna lawer o gefnogaeth yn y llyfrgell i’ch helpu i ddarganfod beth sy’n gweithio orau i chi.
Canllawiau ymarferol ar sut i adolygu’n effeithiol gan gynnwys ble i ddod o hyd i hen bapurau
Gwahanol ddulliau adolygu i roi cynnig arnynt (y tu hwnt i ail-ddarllen nodiadau yn unig)
Awgrymiadau a chyngor gan eich cyfoedion sydd eisoes wedi bod drwy’r profiad
P’un a ydych chi’n llenwi’ch pen â gwybodaeth funud olaf, yn cynllunio wythnosau ymlaen llaw, neu rywle rhwng y ddau, mae’n lle cadarn i ddechrau.
Yn ôl i’r rhestr ddarllen
Mae nawr yn amser da i ail-ymgyfarwyddo â rhestr ddarllen y modiwl. Does dim angen i chi ddarllen popeth o glawr i glawr – meddyliwch amdano fel gloywi yn hytrach nag ailgychwyn.
Gall ailymweld â thestunau allweddol eich helpu i:
Lenwi’r bylchau yn eich dealltwriaeth
Ailgysylltu pynciau darlithoedd â darlleniadau craidd
Cryfhau eich hyder wrth adolygu meysydd anodd
Defnyddiwch eich rhestr ddarllen i ganolbwyntio ar benodau hanfodol neu adrannau sy’n gysylltiedig â phynciau arholiadau, a phorwch drwy destunau a argymhellir am eglurhad neu enghreifftiau. Mae gan y llyfrgell gopïau ar gael fel y gallwch ailymweld â’r deunydd pan fydd yn cyd-fynd â’ch amserlen adolygu. Gallwch ddod o hyd i bopeth yn hawdd trwy restrau darllen Aspire a Primo, catalog y llyfrgell, i wirio argaeledd, eich hanes benthyca, gweld testunau ar-lein, neu ddod o hyd i eitemau ar y silffoedd.
Casgliad Astudio Effeithiol
Ddim yn siŵr sut i adolygu, heb sôn am beth i’w adolygu? Gall Casgliad Astudio Effeithiol y Llyfrgell eich helpu.
Mae’r casgliad print ac ar-lein hwn yn llawn llyfrau sgiliau adolygu ac astudio sydd wedi’u cynllunio i’ch helpu i astudio’n fwy craff. P’un a ydych chi’n chwilio am awgrymiadau cyflym neu i ailwampio eich strategaeth adolygu yn llwyr, mae’r llyfrau hyn yn berffaith ar gyfer pori drwyddynt pan fydd arnoch angen arweiniad ychwanegol. Yn ddelfrydol ar gyfer mireinio sgiliau, rhoi hwb i hyder, neu roi cynnig ar ddull newydd o astudio. Porwch y tro nesaf y byddwch chi yn y llyfrgell – fe welwch y casgliad ar Lawr F, gyferbyn â’r lifft yn Llyfrgell Hugh Owen, a gyferbyn â’r Ddesg Ymholiadau yn Llyfrgell y Gwyddorau Ffisegol.
Dewch o hyd i’ch man astudio perffaith
Mae’n ymwneud â lleoliad, lleoliad, lleoliad! Os oes arnoch angen amser tawel i ganolbwyntio, mae gan Lyfrgell Hugh Owen, a Llyfrgell y Gwyddorau Ffisegol ar y campws, yn ogystal â’r Weithfan yn y dref ddigon o fannau astudio tawel wedi’u cynllunio ar gyfer adolygu.
A yw’n well gennych adolygu ar eich pen eich hun? Mae carelau astudio unigol y Llyfrgell yn ddewis gwych. Wedi’u cynllunio ar gyfer astudio annibynnol, maent yn rhoi lle i chi ganolbwyntio, gweithio trwy’ch nodiadau, a mynd i’r afael ag adolygu ar eich cyflymder eich hun. Pan fyddwch chi eisiau llai o ymyriadau a mwy o ganolbwyntio, dyma’r lleoliad perffaith.
A yw’n well gennych adolygu gyda ffrindiau? Mae’r ystafelloedd astudio i grŵp hefyd ar gael – perffaith ar gyfer trafod pethau, profi eich gilydd, neu ddim ond teimlo’n llai unig yn ystod diwrnodau adolygu hir.
Tylluan y nos? Llenwi’ch pen â gwybodaeth ben bore? Rhywle yn y canol? Nid yw adolygu yn cadw oriau swyddfa – ac nid yw’r llyfrgell chwaith. Yn ystod cyfnod yr arholiadau ac adolygu, mae holl loriau Llyfrgell Hugh Owen ar agor 24/7 fel y gallwch bori trwy lyfr, gwirio cyfeirnod eto, neu wasgu rhywfaint o adolygu munud olaf pryd bynnag y byddwch yn teimlo’r cymhelliad. Ac os ydych chi’n astudio ar ôl oriau craidd ac yn awyddus i adolygu am 2yb, gwnewch yn siŵr bod gennych eich Cerdyn Aber i fynd i mewn ac allan o Lyfrgell Hugh Owen.
Mae arholiadau’n heriol – allwch chi ddim gwadu hynny – ond pan fyddwch chi’n camu’n ôl, cofiwch mai dim ond un rhan o’ch taith yn y brifysgol ydyn nhw. Byddwch yn garedig â chi’ch hun, cymerwch seibiannau, bwytewch brydau go iawn (nid byrbrydau yn unig), a sicrhewch eich bod yn cael rhywfaint o gwsg. Gall manteisio i’r eithaf ar y cymorth adolygu a’r mannau astudio sydd ar gael yn y llyfrgell eich helpu i aros ar y trywydd iawn.
Rydych chi wedi dysgu llawer – nawr yw’r amser i ddod â’r cyfan at ei gilydd.
