Yn Cyflwyno: LibKey Nomad

6 Chwefror 20236 Chwefror 2023 Abigail Crook [abc27] Sgiliau Gwybodaeth, Ymchwil Leave a comment

Estyniad porwr gwe i’w lawrlwytho yw LibKey Nomad. Mae’n darparu dolenni at erthyglau o gyfnodolion y mae eich llyfrgell yn tanysgrifio iddynt yn awtomatig. Bydd mynediad un-clic LibKey Nomad at erthyglau sy’n cael eu cyfeirnodi ar wefannau ysgolheigaidd a pheiriannau chwilio yn gwneud eich ymchwil a dod o hyd i ffynonellau yn gyflymach ac yn haws o lawer.

Lawrlwytho LibKey Nomad yma

Mae LibKey Nomad yn hawdd i’w ddefnyddio. Ewch i’r dudalen lawrlwytho ac ychwanegwch yr estyniad at eich porwr o ddewis. Ar ôl ei osod, bydd gofyn ichi ddewis eich sefydliad. Dewiswch Prifysgol Aberystwyth a bydd LibKey Nomad yn rhoi gwybod ichi am erthyglau sydd ar gael trwy’r llyfrgell lle bynnag y byddwch chi’n crwydro ar-lein.

Bydd LibKey Nomad hefyd yn cyfoethogi eich profiad ar safleoedd poblogaidd fel PubMed, Wikipedia, Scopus, Web of Science a mwy.

Cymhariaeth

Dyma enghraifft o restr gyfeirnodau ar Wikipedia cyn i LibKey Nomad gael ei osod ac ar ôl ei osod (sgroliwch ar draws i gymharu):

*Cyfeirnodau ar Wikipedia cyn ac ar ôl gosod yr estyniad Libkey Nomad ar eich porwr gwe*

Gallwch weld bod LibKey Nomad yn ychwanegu dolen at yr erthygl os oes mynediad gan y llyfrgell. Mae clicio ar y ddolen yn mynd â chi’n uniongyrchol i’r ffynhonnell.

Dysgwch ragor am LibKey Nomad yn y fideo isod:

Os oes gennych unrhyw gwestiynau neu adborth am LibKey Nomad, anfonwch e-bost atom ar llyfrgellwyr@aber.ac.uk. Fel bob amser, os oes angen help arnoch i ddod o hyd i adnoddau ar gyfer eich astudiaethau, cysylltwch â’ch Llyfrgellydd Pwnc.

Dyma gyflwyno BrowZine

3 Tachwedd 202221 Tachwedd 2022 Abigail Crook [abc27] Dysgu, Sgiliau Gwybodaeth, Ymchwil Leave a comment

Mae BrowZine yn ffordd newydd o bori a chwilio miloedd o gyfnodolion electronig sydd ar gael i chi fel aelod o Brifysgol Aberystwyth.

Tudalen hafan BrowZine

Gan ddefnyddio BrowZine gallwch:

Pori neu chwilio yn ôl maes pwnc i ddod o hyd i e-gyfnodolion o ddiddordeb
Chwilio am deitl penodol
Creu eich silff lyfrau eich hun o’ch hoff e-gyfnodolion a’u trefnu sut y dymunwch
Dilyn eich hoff deitlau a derbyn hysbysiadau pan fydd rhifyn newydd yn cael ei gyhoeddi
Cadw erthyglau yn eich llyfrgell bersonol a fydd yn cysoni ar draws eich dyfeisiau

Gallwch ddefnyddio BrowZine ar eich cyfrifiadur, neu lawrlwythwch yr ap i’w ddefnyddio ar ddyfais Android neu Apple. Bydd BrowZine yn cysoni ar draws sawl dyfais fel y gallwch chi ddarllen eich e-gyfnodolion lle bynnag y byddwch.

Dewch o hyd iddo ar Primo, catalog y llyfrgell, drwy glicio ar y botwm Chwiliad e-gyfnodolion ar frig y dudalen neu lawrlwythwch yr ap o’ch siop apiau.

*Sut i gyrraedd BrowZine o Primo, catalog y llyfrgell*

Wythnos Llyfrgelloedd 2022 – Dysgu Gydol Oes

7 Hydref 20223 Hydref 2022 Abigail Crook [abc27] Cymorth a chyngor, Dysgu, Sgiliau Gwybodaeth, Ymchwil Leave a comment

Thema Wythnos Llyfrgelloedd eleni yw’r rhan ganolog sydd gan lyfrgelloedd yn cefnogi dysgu gydol oes.

Heddiw, rydym yn canolbwyntio ar ein myfyrwyr Dysgu Gydol Oes a’n defnyddwyr allanol.

Dysgu Gydol Oes

Ein canllaw Dysgu Gydol Oes yw eich canllaw cyflawn i’r llyfrgell a’r adnoddau dysgu ar gyfer eich pynciau. Yma cewch fanylion am adnoddau allweddol a chanllawiau ar sut i ddefnyddio’r llyfrgell a chysylltiadau cymorth.

Casgliad Astudio Effeithiol Mae’r Casgliad Astudio Effeithiol wedi’i gynllunio i’ch helpu chi astudio. Mae’n ymdrin â phynciau fel sut i wneud ymchwil a sut i astudio, sgiliau ysgrifennu, ysgrifennu academaidd, defnyddio’r Saesneg, rheoli amser, sgiliau cyfathrebu a rhai canllawiau cyffredinol ynglŷn ag ymchwil ac astudio ym maes y celfyddydau.

Os ydych yn dychwelyd i fyd addsyg ar ôl seibiant, mynnwch olwg.

Mannau astudio a chyfleusterau TG yn y llyfrgell Peidiwch anghofio y gall myfyrwyr Dysgu Gydol Oes ddefnyddio holl gyfleusterau’r llyfrgell megis mannau astudio tawel, cyfrifiaduron, Wi-Fi ardderchog, a’r argraffwyr / copïwyr. Porwch yr A i Y o Wasanaethau’r Llyfrgell yma.

Y Casgliad Celtaidd Mae’r Casgliad Celtaidd yn cynnwys tua 25,000 o lyfrau yn ymwneud â Llydaw, Cernyw, Ynys Manaw, Iwerddon, yr Alban a Chymru. Mae’r casgliad yn cynnwys deunydd ar bob pwnc sy’n ymwneud â’r gwledydd Celtaidd, ac mae’n adnodd bendigedig i ymchwilwyr a selogion.

Dysgu Cymraeg neu am wella eich sgiliau? Dewch chi o hyd i bopeth sydd ei angen arnoch i ymarfer a datblygu’ch sgiliau darllen a siarad yn y casgliad hwn – o nofelau graddedig gyda geirfa i wers-lyfrau.

Dewch o hyd i’r casgliad ar Lefel F, Llyfrgell Hugh Owen:

Rhai o adnoddau dysgu Cymraeg yn y Casgliad Celtaidd

Digimap Mae’r gwasanaeth hwn yn darparu data mapiau Arolwg Ordnans llawn a chynhwysfawr a mapiau hanesyddol yn ogystal â data daearegol. Mae Digimap yn adnodd hudol ac yn ddefnyddiol tu hwnt i ymchwilwyr hanes lleol a Gwyddorau Daear fel ei gilydd. Yr unig beth sydd angen arnoch yw cyfrif e-bost Prifysgol Aberystwyth i gofrestru i’w weld.

Linkedin Learning Caiff holl fyfyrwyr ddefnyddio’r cyfoeth o gyrsiau gan arbenigwyr sydd ar gael ar-lein am ddim ac yn ddiderfyn 24/7 trwy Linkedin Learning.

Dyma ddetholiad o gyrsiau ddewiswyd gan ein Pencampwr Digidol Myfyrwyr, Urvashi Verma, a allai fod o ddefnydd i fyfyrwyr Dysgu Gydol Oes

Casgliad Dysgu Gydol Oes Casgliad o gyrsiau a fideos byrion i’ch helpu chi ddatbygu’ch sgiliau astudio a rheoli’ch amser yn well.

Urvashi Verma

Defnyddwyr Allanol

Mae ein llyfrgelloedd yn croesawu gwahanol gategorïau o ddefnyddwyr allanol, o gyn-fyfyrwyr ac aelodau o staff sydd wedi ymddeol ac sy’n awyddus i ddal i ddefnyddio adnoddau’r llyfrgell, myfyrwyr o sefydliadau eraill sy’n ymweld ag Aber ac angen lle i astudio neu drigolion lleol.

Rhowch gip ar y categorïau a’r manylion cofrestru: Gwybodaeth ar gyfer Ymwelwyr a Defnyddwyr Allanol.

Casgliadau Arbennig Gall Ddefnyddwyr Allanol wneud cais i ddefnyddio cyfleusterau TG a mannau astudio’r llyfrgell ac hefyd drefnu i weld eitemau hardd yn ein Casgliadau Arbennig.

Wythnos Llyfrgelloedd 2022 – Myfyrwyr

5 Hydref 20225 Hydref 2022 Abigail Crook [abc27] Addysgu, Cymorth a chyngor, Dysgu, Ymchwil Leave a comment

Thema Wythnos Llyfrgelloedd eleni ydy’r rhan ganolog sydd gan lyfrgelloedd yn cefnogi dysgu gydol oes.

Heddiw, rydym yn canolbwyntio ar gyfleodd dysgu i fyfyrwyr Prifysgol Aberystwyth y tu allan i’r ystafelloedd dysgu gydag adnoddau’r llyfrgell.

Teithiau llyfrgell Os ydych chi’n newydd i Brifysgol Aberystwyth, yn gyntaf, croeso! Yn ail, dewch ar daith o amgylch y llyfrgell! Mae staff cyfeillgar y llyfrgell yma i’ch tywys o gwmpas ac i ddangos y llyfrgell i chi. Does dim angen archebu lle ymlaen llaw ac mae croeso i bawb – amseroedd a manylion yma.

Mae taith rithiol Llyfrgell Hugh Owen ar gael i’w gweld isod a dyma restr ddefnyddiol A i Y o Wasanaethau Llyfrgell i’ch rhoi ar ben ffordd.

Meddalwedd a Gwasanaethau TG Cymerwch olwg ar ein tudalennau gwe i weld pa wasanaethau ac adnoddau TG sydd ar gael ichi. Os oes angen help neu gyngor arnoch, cysylltwch â thîm y Ddesg Wasanaeth ar-lein neu dros y ffôn.

Ffuglen a darllen er pleser Does dim prinder llyfrau yn ein llyfrgelloedd ac os ydych chi’n chwilio am rywbeth i’w ddarllen – sydd ddim yn werslyfr cwrs – mi allwn ni helpu! Porwch drwy Primo, catalog y llyfrgell ar-lein er mwyn dod o hyd i lyfrau ac e-lyfrau, rhowch gip ar ein casgliad o Ffuglen Gyfoes ger y Ddesg Ymholiadau ar Lefel F, porwch y silffoedd o farc dosbarth PN neu ddewch o hyd i filoedd o lyfrau Cymraeg yn y Casgliad Celtaidd. Mae yma nofelau graffig hefyd a llawer o lyfrau ffeithiol a barddoniaeth.

Ewch i Primo, catalog y llyfrgell i gael golwg.

*Casgliad ffuglen gyfoes, Llyfrgell Hugh Owen*

Linkedin Learning Mae miloedd o gyrsiau ar-lein dan arweiniad arbenigwyr ar gael i holl fyfyrwyr PA gyda Linkedin Learning.

Dyma ddetholiad bach o gyrsiau a allai’ch helpu i ddatblygu sgiliau newydd a mynd ar drywydd diddordebau a hobïau newydd gan Laurie Stevenson, Pencampwr Digidol Myfyrwyr:

Casgliad Gweithgareddau Allgyrsiol i Fyfyrwyr Dyma gasgliad o gyrsiau ag amrywiaeth o sgiliau a gweithgareddau creadigol y gallech fod â diddordeb yn eu dysgu ar y cyd â’ch astudiaethau, i gael saib o’ch aseiniadau neu i lenwi ennyd o ddiflastod!
Laurie Stevenson

Dysgu Cymraeg Awydd dysgu neu loywi eich Cymraeg yn ystod eich cyfnod yn Aber? Does dim angen chwilio ymhellach na’r Casgliad Celtaidd! Mae’r casgliad yn cynnwys cannoedd o lyfrau i’ch helpu i ddysgu a datblygu eich Cymraeg, o gyrsiau iaith cyflawn a llyfrau gramadeg i ffuglen gyda geirfa ddefnyddiol.

Dewch o hyd i’r casgliad ar Lefel F.

*Adnoddau dysgu Cymraeg yn y Casgliad Celtaidd*

Canllawiau’r Llyfrgell Ymgyfarwyddwch â dewis y llyfrgell o LibGuides. Cewch yma eich canllaw pwnc a fydd yn eich cynorthwyo i ddod o hyd i adnoddau ar gyfer eich pwnc, yn ogystal ag amrywiaeth o ganllawiau i’ch cynorthwyo i wneud y mwyaf o’r llyfrgell, datblygu eich sgiliau llythrennedd gwybodaeth a gwella eich cyflogadwyedd.

Eich llyfrgellwyr pwnc sydd yn gyfrifol am y LibGuides ac maen nhw yma i’ch helpu gydag adnoddau academaidd ac arbenigol ar gyfer eich astudiaethau. Gallant eich helpu i ganfod a gwerthuso’r wybodaeth sydd ei hangen arnoch a’ch helpu i’w chyfeirnodi’n gywir. Chwiliwch am fanylion cyswllt eich llyfrgellydd ar dudalen ein Llyfrgellwyr Pwnc.

Benthyg DFDs Cewch fenthyg DFDau am ddim o’r casgliad DFD mawr ar Lefel F. Edrychwch drwy’r hyn sydd ar gael yn Primo, catalog y llyfrgell.

Darllen yn Well – Casgliad Lles Mae Casgliad Lles y llyfrgell yma i’ch cynorthwyo i ddeall a rheoli llawer o gyflyrau iechyd meddwl cyffredin neu deimladau a phrofiadau anodd. Mae’r teitlau sydd wedi eu cynnwys yn y casgliad ar y rhestr Darllen yn Well, yn llyfrau ac e-lyfrau ac maent wedi’i threfnu yn ôl meysydd pwnc er mwyn eich helpu i ddod o hyd i’r hyn sydd ei angen arnoch.

Gwyliwch y fideo fer hon i ddysgu rhagor:

Wythnos Llyfrgelloedd 2022 – Staff

3 Hydref 20223 Hydref 2022 Abigail Crook [abc27] Cymorth a chyngor, Dysgu, Sgiliau Gwybodaeth, Ymchwil Leave a comment

Thema Wythnos Llyfrgelloedd eleni ydy’r rhan ganolog sydd gan lyfrgelloedd yn cefnogi dysgu gydol oes.

Heddiw byddwn yn canolbwyntio ar holl staff Prifysgol Aberystwyth a rhai o adnoddau’r llyfrgell sy’n cynorthwyo unigolion i ddatgloi a chyflawni eu potensial ar bob cam o’u bywydau a’u gyrfaoedd.

Gale OneFile News Gallwch weld y newyddion ar-lein, gan gynnwys gweisg masnachol proffesiynol. Mae Newyddion Gale OneFile yn caniatáu ichi chwilota drwy 2,300 o bapurau newydd mawr, gan gynnwys miloedd o ddelweddau, darllediadau radio a theledu a thrawsgrifiadau.

Digimap Mae’r gwasanaeth hwn yn darparu data mapiau Arolwg Ordnans llawn a chynhwysfawr a mapiau hanesyddol yn ogystal â data daearegol. Adnodd hynod ddefnyddiol a difyr yw Digimap, a fydd yn diddanu ymchwilwyr hanes lleol a phobl sy’n ymwneud â’r Gwyddorau Daear fel ei gilydd. Yr unig beth sydd angen arnoch yw cyfrif e-bost Prifysgol Aberystwyth i gofrestru i ddefnyddio’r adnodd.

Box of Broadcasts Ydych chi’n gwneud rhywfaint o ymchwil? Mae Box of Broadcasts (BoB) yn wasanaeth teledu a radio ar alw i staff a myfyrwyr at ddefnydd academiadd, sy’n cynnig mynediad at ddwy filiwn o ddarllediadau o dros 65 o sianeli teledu am ddim. Erbyn hyn mae BoB hefyd yn cynnwys archif y BBC, sef rhaglenni radio a theledu hanesyddol.

Y Weithfan Ystafell astudio 24 awr yw’r Weithfan, sydd yn darparu cyfrifiaduron, peiriannau argraffu, WiFi, ac ystafell astudio i grwpiau / ystafell gyfarfod i fyfyrwyr a staff PA. Dewch o hyd i’r Weithfan wrth ymyl y Wetherspoons ger gorsaf drenau Aberystwyth a dewch â’ch Cerdyn Aber i gael mynediad.

Gwasanaethau Gyrfaoedd i holl staff PA A wyddoch y gall aelodau staff Prifysgol Aberystwyth hefyd fanteisio ar wasanaethau gyrfaoedd arbenigol y Brifysgol? Ewch draw i’n Canllaw Cyflogadwyedd i ddechrau arni.

Darllen er pleser Mae gan y llyfrgell gasgliadau sylweddol o ffuglen, llyfrau ffeithiol a barddoniaeth ar gyfer darllen er pleser. Porwch ein casgliad Ffuglen Gyfoes wrth ymyl y Ddesg Ymholiadau ar Lefel F neu ewch at y silffoedd o’r nod dosbarth PN (neu catalog y llyfrgell, Primo).

Y Casgliad Celtaidd Os ydych yn chwilio am nofel, barddoniaeth, llyfr hanes neu lyfrau i’ch helpu ddysgu neu loywi’ch Cymraeg, cofiwch fod miloedd o lyfrau Cymraeg ar bob pwnc dan haul yn y Casgliad Celtaidd. Mae’r casgliad yn cynnwys cannoedd o lyfrau i’ch helpu i ddatblygu eich Cymraeg, o gyrsiau iaith cyflawn a llyfrau gramadeg i ffuglen gyda geirfa ddefnyddiol. Dewch o hyd i’r casgliad ar Lefel F.

Casgliad Astudio Effeithiol Efallai y bydd ambell deitl yn ein Casgliad Astudio Effeithiol o ddefnydd ichi wrth ddatblygu’ch sgiliau astudio neu’ch sgiliau proffesiynol, megis sgiliau cyflwyno neu ymchwil.

Linkedin Learning Gall pob myfyriwr ac aelod o staff PA ddefnyddio’r cyfoeth o gyrsiau sydd ar gael ar-lein yn rhad ac am ddim ac sydd wedi’u harwain gan arbenigwyr trwy Linkedin Learning.

Dyma ddetholiad bach o gyrsiau a allai fod yn ddefnyddiol i staff PA a grëwyd gan Jeffrey Clark, Pencampwr Digidol Myfyrwyr:

Casgliad Datblygiad Personol a Phroffesiynol – Mae’r casgliad hwn yn cynnwys cyfres o gyrsiau sydd wedi’u cynllunio i gynorthwyo aelodau o staff i ddatblygu eu sgiliau proffesiynol a phersonol.
Jeffrey Clark

Mae Archif Hanesyddol y BBC ar gael nawr trwy Box of Broadcasts.

17 Mawrth 2022 Simon French [sif4] Addysgu, Dysgu, Ymchwil Leave a comment

An old-time television set Efallai eich bod chi, fel finnau, yn llawenhau o glywed fod archif y BBC o raglennu radio a theledu hanesyddol erbyn hyn ar gael trwy Box of Broadcasts.

O’m rhan i, rwy’n ysu am gael gwylio hwyl a sbri ôl-apocalyptaidd Z for Zachariah (a ddarlledwyd yn 1984 fel rhan o’r gyfres Play for Today). Os nad yw hwn at eich dant, beth am Allen Ginsberg a William Burroughs yn siarad am Jack Kerouac ar Arena yn 1988? Na, ddim i chi? Beth am bennod, efallai, o Horizon o’r flwyddyn 1980 sy’n edrych ar sut mae prosesyddion geiriau sy’n cael eu rheoli â llais yn mynd i chwyldroi bywyd y swyddfa? Neu beth am daith bersonol o gwmpas Stratford upon Avon yng nghwmni’r dramodydd Huw Lloyd Edwards yn y rhaglen Arall Fyd o’r flwyddyn 1972?

Wrth gwrs, y BBC yw hon, ac felly mae cymaint mwy i’w gael: uchafbwyntiau diwylliannol (Shakespeare ar Deledu’r BBC); adloniant ysgafn arloesol (Multi-Coloured Swap Shop – dyna fy mhlentyndod i!). Mae rhaglenni newyddion blaenllaw (Newsnight) ac adroddiadau hanesyddol o ddigwyddiadau cymdeithasol a diwylliannol o bwys (Yesterday’s Witness). Dyma gasgliad o adnoddau sy’n unigryw o ran ansawdd a dyfnder.

Mae Box of Broadcasts wedi paratoi gwybodaeth ddefnyddiol i’ch helpu i ddod o hyd i’r cynnwys hanesyddol yn yr archif, ond os cewch anhawster gydag unrhyw beth, cofiwch gysylltu â’ch llyfrgellydd pwnc am gymorth.

Dyma ambell ddolen ddefnyddiol arall i’ch helpu i ymgyfarwyddo â Box of Broadcasts.

A rhai dolenni defnyddiol ar gyfer staff sy’n addysgu:

Blog y Llyfrgellwyr

Categori: Ymchwil