Mae’r Canllawiau Llyfrgell wedi cael eu diweddaru i sicrhau bod yr holl ddolenni’n gweithio a bod yr holl lyfrau a restrir yn cynnwys y rhifyn diweddaraf, sy’n golygu eu bod yn well nag erioed! Mae pob Canllaw Llyfrgell wedi’i theilwra i bwnc penodol, sy’n golygu bod yr wybodaeth yn arbenigol i’r hyn yr ydych chi’n chwilio amdano. Dyma lle gallwch gael eich cyfeirio at, ac archebu cyfarfod â’ch llyfrgellydd pwnc, darganfod pa lyfrau y dylech eu darllen, cael cymorth i gyfeirnodi, a llawer mwy! Os ydych chi’n cael trafferth gyda chyfeirio, aseiniadau, neu eich traethawd hir, dyma’r lle i fynd. Mae’r Canllawiau Llyfrgell yn hawdd iawn i’w defnyddio, gyda chyfeiriadau a gwybodaeth wedi’u gosod yn glir.

Rydym yn drist iawn ein bod wedi ffarwelio ag aelod gwerthfawr o’r Tîm Ymgysylltu Academaidd, Connie Davage. Ymunodd Connie â’n tîm nôl yn 2018 gan ddod â’i chyfoeth o brofiad o Dîm Desg Gwasanaeth y Llyfrgell i gyfuno’r rôl hon â chefnogi’r tîm lle bynnag y bo angen. Roedd Connie hefyd yn cefnogi’r Adran Dysgu Gydol Oes a bydd holl staff yr Adran yn gweld ei heisiau’n fawr.

Mae nifer o gydweithwyr ar draws y Brifysgol wedi cael cymorth Connie dros y blynyddoedd, o gefnogaeth ar gyfer Rhestr Ddarllen Aspire, i geisiadau digideiddio a chymorth llyfrgell gwerthfawr.

Hoffem ddymuno’r gorau i Connie yn ei rôl newydd fel llyfrgellydd ym Mhrifysgol Cymru, Y Drindod Dewi Sant a diolch iddi am fod yn gydweithiwr gwych, yn bobydd o fri ac yn ffrind i bawb yn y tîm.

Rydym wedi bod yn tanysgrifio i adnodd gwych ‘LISA’, ers blynyddoedd lawer. Mae’r adnodd hwn wedi bod yn amhrisiadwy i fyfyrwyr a staff Astudiaethau Gwybodaeth ers tro byd.
Mae LISA (Library & Information Science Abstracts) yn helpu i ganolbwyntio chwiliadau am destunau ysgolheigaidd rhyngwladol ar lyfrgellyddiaeth a gwyddor gwybodaeth. Ond, fel mae’r enw yn ei awgrymu, gwasanaeth crynodebau yn unig yw hwn.
Rydym yn falch iawn o gyhoeddi bod gennym nawr fynediad i’r Casgliad Llyfrgellyddiaeth a Gwyddor Gwybodaeth. Mae’r casgliad newydd hwn bellach yn chwilio adnodd poblogaidd LISA yn ogystal â’r Gronfa Ddata Testun Llawn Llyfrgellyddiaeth.
I grynhoi, mae gennym bellach dros 300 o gyfnodolion testun llawn wedi’u cynnwys pan fyddwch yn chwilio’r ‘Casgliad Llyfrgellyddiaeth a Gwyddor Gwybodaeth’.

LibGuide Astudiaethau Gwybodaeth