Dewch i nabod eich llyfrgellwyr

Mae Llyfrgellwyr Pwnc yn darparu hyfforddiant ar sgiliau gwybodaeth ac yn cynnig cymorth a chyngor ar ddefnyddio’r llyfrgelloedd, dod o hyd i adnoddau ar gyfer eich aseiniadau a chyfeirnodi. Maen nhw hefyd yn edrych ar ôl eich rhestrau darllen a’ch canllawiau pwnc. 

8 Llyfrgellydd Pwnc sy’n gweithio i Lyfrgelloedd Prifysgol Aberystwyth, pob un a’i faes arbenigedd. 

Mae croeso mawr ichi drefnu cyfarfod MS Teams gyda’ch Llyfrgellydd Pwnc os oes gennych unrhyw gwestiynau am ddefnyddio’r Llyfrgell neu os hoffech gyngor – cewch wneud hyn ar-lein yma, neu drwy e-bost. Anfonnwch neges atyn nhw i ddweud helo!

Simone Anthonysia1@aber.ac.uk

Simone yw ein Llyfrgellydd Pwnc newydd sbon ar gyfer Addysg Gofal Iechyd.

Pan oeddwn i’n bedair ar ddeg oed, gwirfoddolais yn fy llyfrgell leol i gael profiad gwaith. Mwynheais dreulio oriau yn didoli’r cardiau llyfrgell cardbord i’r drôr derw hardd yn nhrefn yr wyddor. Mi wnaeth yr awydd i deithio yn ddiweddarach fy arwain i ddilyn gyrfa ym myd dawns. Dychwelais i fyd llyfrgelloedd trwy raddio gyda gradd Addysg ac Astudiaethau Gwybodaeth a Llyfrgell, yn dri deg tri oed, ar ôl astudio’n rhan-amser o amgylch swydd amser-llawn fel hyfforddwr dawns yng Nghanolfan y Celfyddydau, Aberystwyth.

Rwyf wedi cael fy nghyflogi yn Llyfrgell Hugh Owen ers 2017, ac mae’n anrhydedd o’r mwyaf mai fi yw llyfrgellydd pwnc cyntaf Aberystwyth ar gyfer Gofal Iechyd.

Joy Cadwallader jrc Joy Cadwallader – jrc@aber.ac.uk

Llyfrgellydd Pwnc ar gyfer Astudiaethau Theatr, Ffilm a Theledu, Ieithoedd Modern a Saesneg ac Ysgrifennu Creadigol yw Joy.

Rwyf newydd gwblhau diploma ôl-raddedig mewn rheoli gwybodaeth a gwasanaethau llyfrgell ac wedi dechrau dysgu Cymraeg, gwell hwyr na hwyrach! Cyn Cofid, roeddwn yn mwynhau dawnsio Ballroom a Lladin, teithio a karaoke. Yn y byd sydd ohoni, rwyf wrth fy modd yn ymweld â phrosiectau bywyd gwyllt lleol sydd wedi ailagor a gwylio seiclo proffesiynol ar y teledu.

Simon French sif4 Simon French – sif4@aber.ac.uk

Cyfrifiadureg, Daearyddiaeth a Gwyddorau Daear, Gwleidyddiaeth Ryngwladol, Mathemateg a Ffiseg yw meysydd arbenigedd Simon.

Yn blentyn, roeddwn i’n ddarllenydd ac yn gasglwr llyfrau brwd. Fel oedolyn, bues i’n gweithio am lawer o flynyddoedd anhapus yn y fasnach lyfrau ail-law a phrin cyn dod yn llyfrgellydd yma ym Mhrifysgol Aberystwyth. Gallai hyn oll eich arwain i feddwl fy mod yn dipyn o ferlod un tric, ond hoffwn ei gwneud yn gwbl glir fy mod yn mwynhau pethau ar wahân i lyfrau, fel… yym…

Anita Saycell aiv Anita Saycell – aiv@aber.ac.uk

Edrycha Anita ar ôl Busnes, Gwyddor Chwaraeon ac Ymarfer Corff ac Astudiaethau Gwybodaeth.

Dechreuais wirfoddoli mewn llyfrgelloedd yn 14 oed, yna cefais fy swydd llyfrgell â thâl gyntaf yn 16 oed yn gweithio ar ddyddiau Sadwrn – a dyna fy rhoi i ar ben ffordd.  Pan nad ydw i allan yn beicio ar fryniau tonnog Ceredigion, rwy’n mwynhau addysgu a helpu pobl, felly cysylltwch ag unrhyw gwestiwn waeth pa mor fawr neu fach! 

Non Jones nrb Non Jones – nrb@aber.ac.uk

Gwyddorau Bywyd a’r BVSc Gwyddor Milfeddygaeth yw meysydd pwnc Non.  

Ers i mi gael profiad gwaith yn fy llyfrgell gyhoeddus leol yma yn Aberystwyth pan yn ddisgybl yn yr ysgol uwchradd (…a dwi’n mynd nôl sawl blwyddyn nawr!), roeddwn yn gwybod mai ym myd y llyfrau yr hoffwn fod. Ymunais â Gwasanaethau Gwybodaeth yn 2001 a sawl blwyddyn yn ddiweddarach ennillais radd ôl-raddedig mewn Astudiaethau Gwybodaeth a Llyfrgell yma yn y Brifysgol fel dysgwr o bell.  Yn fy amser sbâr – rhwng edrych ar ôl y teulu, cathod, ieir a bochdewion – rwy’n mwynhau darllen a bod yn greadigol gyda chelf, crefft a chaligraffi.

Sarah Gwenlan ssg Sarah Gwenlan – ssg@aber.ac.uk

Mae Sarah yn Llyfrgellydd Pwnc ar gyfer Addysg, y Ganolfan Saesneg Ryngwladol a Seicoleg.

Cyn dod i weithio ym Mhrifysgol Aberystwyth, bues i’n dysgu Saesneg yn Sbaen, y Weriniaeth Tsiec, yr Eidal a Gwlad Pwyl. Rwyf hefyd wedi gweithio yn y Gwasanaethau Gyrfaoedd yn SOAS a Chasnewydd, felly gallech ddweud fy mod yn gyfarwydd â gweithio gyda myfyrwyr! Cysylltwch os oes angen help arnoch, dyna pam rwyf yma!

Lloyd Roderick glr9Lloyd Roderick – glr9@aber.ac.uk

Mae Lloyd yn gyfrifol am y pynciau Celf a Hanes CelfCyfraith a ThroseddegCymraeg ac Astudiaethau Celtaidd Hanes a Hanes Cymru. 

Roeddwn i eisiau gweithio mewn llyfrgelloedd ar ôl treulio llawer o amser yn hongian o gwmpas y casgliad cerddoriaeth yn Llyfrgell Gyhoeddus Llanelli ar ôl sylweddoli bod ôl-gatalog Sonic Youth ar gael i’w fenthyg. Ar ôl y brifysgol, bues i’n gweithio yn Llyfrgell y Sefydliad Astudiaethau Cyfreithiol Uwch, Prifysgol Llundain, yna astudiais MSc mewn Gwyddor Gwybodaeth a Llyfrgellyddiaeth.  Yn ddiweddarach, gweithiais yn llyfrgelloedd cyhoeddus Casnewydd a Llyfrgell Sefydliad Celf Courtauld.  Yn ddiweddarach, ymgymerais â PhD yn astudio casgliadau celf yn Llyfrgell Genedlaethol Cymru…. mae hyn i gyd wedi gosod sylfaen dda i mi gefnogi myfyrwyr a staff yn yr adrannau rwy’n gweithio gyda nhw fel Llyfrgellydd Pwnc ym Mhrifysgol Aberystwyth.  

Yn fy amser hamdden rwy’n asesydd ar Banel Cofrestru Proffesiynol CILIP (Sefydliad Siartredig Llyfrgellwyr a Gweithwyr Gwybodaeth Proffesiynol) ac rwyf wedi curadu arddangosfeydd ar foderniaeth a chelf gyfoes yng Nghymru. 

Connie Davage hodConnie Davage – hod@aber.ac.uk

Connie sy’n edrych ar ôl Dysgu Gydol Oes.

Roeddwn i’n hoffi helpu fy nghydweithiwr yn llyfrgell yr ysgol lle’r oeddwn yn dysgu. Rwy’n dyfalu mai dyna lle dechreuodd fy nhaith i lyfrgellyddiaeth. Rwy’n mwynhau teithio, garddio a phobi. Yn bennaf oll, rwy’n mwynhau gallu helpu pobl, felly cysylltwch â fi os oes gennych unrhyw gwestiynau. 

Diwrnod Shwmae Su’mae – 15 Hydref

I ddathlu Diwrnod Shwmae Su’mae eleni, rydym yn rhannu blog gan ein blogiwr gwadd, Pencampwr Digidol Myfyrwyr, Laurie Stevenson, ac yn cael cip sydyn ar rai adnoddau llyfrgell i’ch helpu i ymarfer a datblygu eich sgiliau darllen a siarad Cymraeg.

Laurie Stevenson

Dw i’n dysgu Cymraeg!

Ar y 15fed o Hydref bydd hi’n Ddiwrnod Shwmae Su’mae, sy’n ddiwrnod o ddathlu a hyrwyddo’r Gymraeg. Felly roedd arna i eisiau manteisio ar y cyfle hwn fel un o Bencampwyr Digidol y Myfyrwyr i ddefnyddio’r blog i rannu fy mhrofiadau fy hun fel dysgwr Cymraeg.

Pam y gwnes i benderfynu cael gwersi Cymraeg?

Fe wnes i syrthio mewn cariad â Chymru o fewn dim imi symud yma ac roeddwn i’n gwybod ers cychwyn cyntaf fy nghwrs gradd bod arna i eisiau dysgu mwy am ddiwylliant Cymru a dysgu’r iaith fel ffordd o barchu’r diwylliant a theimlo fy mod i’n perthyn yma. Rwy’n mwynhau heriau deallusol ond wnes i erioed weld diben dysgu ieithoedd fel Ffrangeg neu Sbaeneg os nad oeddwn i am allu eu defnyddio mewn bywyd go iawn. Trwy gydol fy nyddiau ysgol, roeddwn i’n ei chael hi’n anodd teimlo unrhyw fath o frwdfrydedd tuag at ddysgu ieithoedd fel yna. Ond pan gefais gyfle i ddysgu Cymraeg roeddwn i’n hynod o awyddus. Rydw i wrth fy modd yn gallu cynnal sgyrsiau syml ar y bws neu mewn siop neu gaffi ac rydw i wir yn mwynhau’r wên sy’n dod i wynebau pobl pan maen nhw’n sylweddoli fy mod i’n dysgu’r iaith.

Sut y gwnes i fynd ati i ddysgu Cymraeg?

Fe wnes i ofyn am wersi Cymraeg yn fy mlwyddyn gyntaf ond oherwydd Covid doedden nhw ddim yn cael eu cynnal. Ond pan es i i Ffair y Glas yn fy ail flwyddyn siaradais gyda rhywun ar stondin UMCA – Undeb Myfyrwyr Cymraeg Aberystwyth – a rhoi fy enw i lawr. Mae’r gwersi’n cael eu darparu gan dysgucymraeg.cymru ac fe ddechreuais i gyda’u cwrs blasu, gyda sesiynau awr o hyd bob wythnos. Eleni rydw i wedi symud ymlaen i’r cwrs lefel mynediad, sydd yn cael ei achredu, ac mae hwnnw’n ddwyawr yr wythnos. Rydw i hefyd yn defnyddio Duolingo i gyd-fynd â’r gwersi ac mae hynny’n help er mwyn cofio gwybodaeth rhwng y gwersi.

Pa adnoddau defnyddiol ydw i wedi dod o hyd iddynt ym Mhrifysgol Aberystwyth?

Drwy UMCA y gwnes i ddod o hyd i’r cyrsiau, ac maen nhw hefyd yn cynnal digwyddiadau Cymraeg eu hiaith a digwyddiadau diwylliannol, ac yn rhoi cyfle i ddysgwyr gwrdd ac ymarfer eu Cymraeg gyda siaradwyr Cymraeg. Mae dolenni i’r cyrsiau ar gael ar wefan y Brifysgol hefyd, a dolenni i adnoddau ar-lein i’ch helpu wrth ichi ddysgu. Mae gan y llyfrgell adnoddau gwych hefyd, gan gynnwys llyfrau, geiriaduron a llyfrau o ymadroddion er mwyn dysgu’r iaith.

Laurie Stevenson

Dysgwch ragor am Laurie a gwaith y Pencampwyr Digidol Myfyrwyr ar y Blog Galluoedd Digidol

Adnoddau Llyfrgell

Os ydych wedi cychwyn ar eich taith i ddysgu Cymraeg, yn meddwl am fentro, neu os ydych yn siaradwr Cymraeg ac am roi sglein ar eich sgiliau, mae gan y llyfrgell ystod eang o adnoddau defnyddiol.

Ewch i’r Casgliad Celtaidd ar Lefel F yn Llyfrgell Hugh Owen ac mi ddewch o hyd i filoedd o lyfrau i’ch helpu i ymarfer a datblygu eich sgiliau darllen a siarad – o nofelau gyda geirfa, i lyfrau gramadeg, i gyrsiau iaith cyflawn.

A chofiwch ddweud su’mae wrth staff y Llyfrgell!

Wythnos Llyfrgelloedd 2022 – Dysgu Gydol Oes

Thema Wythnos Llyfrgelloedd eleni yw’r rhan ganolog sydd gan lyfrgelloedd yn cefnogi dysgu gydol oes.

Heddiw, rydym yn canolbwyntio ar ein myfyrwyr Dysgu Gydol Oes a’n defnyddwyr allanol.

Dysgu Gydol Oes

Ein canllaw Dysgu Gydol Oes yw eich canllaw cyflawn i’r llyfrgell a’r adnoddau dysgu ar gyfer eich pynciau. Yma cewch fanylion am adnoddau allweddol a chanllawiau ar sut i ddefnyddio’r llyfrgell a chysylltiadau cymorth.

Hafan LibGuide Dysgu Gydol Oes

Casgliad Astudio Effeithiol Mae’r Casgliad Astudio Effeithiol wedi’i gynllunio i’ch helpu chi astudio. Mae’n ymdrin â phynciau fel sut i wneud ymchwil a sut i astudio, sgiliau ysgrifennu, ysgrifennu academaidd, defnyddio’r Saesneg, rheoli amser, sgiliau cyfathrebu a rhai canllawiau cyffredinol ynglŷn ag ymchwil ac astudio ym maes y celfyddydau.

Os ydych yn dychwelyd i fyd addsyg ar ôl seibiant, mynnwch olwg.

Mannau astudio a chyfleusterau TG yn y llyfrgell Peidiwch anghofio y gall myfyrwyr Dysgu Gydol Oes ddefnyddio holl gyfleusterau’r llyfrgell megis mannau astudio tawel, cyfrifiaduron, Wi-Fi ardderchog, a’r argraffwyr / copïwyr. Porwch yr A i Y o Wasanaethau’r Llyfrgell yma.

Y Casgliad Celtaidd Mae’r Casgliad Celtaidd yn cynnwys tua 25,000 o lyfrau yn ymwneud â Llydaw, Cernyw, Ynys Manaw, Iwerddon, yr Alban a Chymru. Mae’r casgliad yn cynnwys deunydd ar bob pwnc sy’n ymwneud â’r gwledydd Celtaidd, ac mae’n adnodd bendigedig i ymchwilwyr a selogion.

Dysgu Cymraeg neu am wella eich sgiliau? Dewch chi o hyd i bopeth sydd ei angen arnoch i ymarfer a datblygu’ch sgiliau darllen a siarad yn y casgliad hwn – o nofelau graddedig gyda geirfa i wers-lyfrau.

Dewch o hyd i’r casgliad ar Lefel F, Llyfrgell Hugh Owen:

Rhai o adnoddau dysgu Cymraeg yn y Casgliad Celtaidd

Digimap Mae’r gwasanaeth hwn yn darparu data mapiau Arolwg Ordnans llawn a chynhwysfawr a mapiau hanesyddol yn ogystal â data daearegol. Mae Digimap yn adnodd hudol ac yn ddefnyddiol tu hwnt i ymchwilwyr hanes lleol a Gwyddorau Daear fel ei gilydd. Yr unig beth sydd angen arnoch yw cyfrif e-bost Prifysgol Aberystwyth i gofrestru i’w weld.

Linkedin Learning Caiff holl fyfyrwyr ddefnyddio’r cyfoeth o gyrsiau gan arbenigwyr sydd ar gael ar-lein am ddim ac yn ddiderfyn 24/7 trwy Linkedin Learning.

Dyma ddetholiad o gyrsiau ddewiswyd gan ein Pencampwr Digidol Myfyrwyr, Urvashi Verma, a allai fod o ddefnydd i fyfyrwyr Dysgu Gydol Oes

Casgliad Dysgu Gydol Oes Casgliad o gyrsiau a fideos byrion i’ch helpu chi ddatbygu’ch sgiliau astudio a rheoli’ch amser yn well.

Urvashi Verma

Defnyddwyr Allanol

Mae ein llyfrgelloedd yn croesawu gwahanol gategorïau o ddefnyddwyr allanol, o gyn-fyfyrwyr ac aelodau o staff sydd wedi ymddeol ac sy’n awyddus i ddal i ddefnyddio adnoddau’r llyfrgell, myfyrwyr o sefydliadau eraill sy’n ymweld ag Aber ac angen lle i astudio neu drigolion lleol.

Rhowch gip ar y categorïau a’r manylion cofrestru: Gwybodaeth ar gyfer Ymwelwyr a Defnyddwyr Allanol.

Casgliadau Arbennig Gall Ddefnyddwyr Allanol wneud cais i ddefnyddio cyfleusterau TG a mannau astudio’r llyfrgell ac hefyd drefnu i weld eitemau hardd yn ein Casgliadau Arbennig.

Wythnos Llyfrgelloedd 2022 – Myfyrwyr

Thema Wythnos Llyfrgelloedd eleni ydy’r rhan ganolog sydd gan lyfrgelloedd yn cefnogi dysgu gydol oes.

Heddiw, rydym yn canolbwyntio ar gyfleodd dysgu i fyfyrwyr Prifysgol Aberystwyth y tu allan i’r ystafelloedd dysgu gydag adnoddau’r llyfrgell.

Teithiau llyfrgell Os ydych chi’n newydd i Brifysgol Aberystwyth, yn gyntaf, croeso! Yn ail, dewch ar daith o amgylch y llyfrgell! Mae staff cyfeillgar y llyfrgell yma i’ch tywys o gwmpas ac i ddangos y llyfrgell i chi. Does dim angen archebu lle ymlaen llaw ac mae croeso i bawb – amseroedd a manylion yma.

Mae taith rithiol Llyfrgell Hugh Owen ar gael i’w gweld isod a dyma restr ddefnyddiol A i Y o Wasanaethau Llyfrgell i’ch rhoi ar ben ffordd.

Meddalwedd a Gwasanaethau TG Cymerwch olwg ar ein tudalennau gwe i weld pa wasanaethau ac adnoddau TG sydd ar gael ichi. Os oes angen help neu gyngor arnoch, cysylltwch â thîm y Ddesg Wasanaeth ar-lein neu dros y ffôn.

Ffuglen a darllen er pleser Does dim prinder llyfrau yn ein llyfrgelloedd ac os ydych chi’n chwilio am rywbeth i’w ddarllen – sydd ddim yn werslyfr cwrs – mi allwn ni helpu! Porwch drwy Primo, catalog y llyfrgell ar-lein er mwyn dod o hyd i lyfrau ac e-lyfrau, rhowch gip ar ein casgliad o Ffuglen Gyfoes ger y Ddesg Ymholiadau ar Lefel F, porwch y silffoedd o farc dosbarth PN neu ddewch o hyd i filoedd o lyfrau Cymraeg yn y Casgliad Celtaidd. Mae yma nofelau graffig hefyd a llawer o lyfrau ffeithiol a barddoniaeth.

Ewch i Primo, catalog y llyfrgell i gael golwg.

Casgliad ffuglen gyfoes, Llyfrgell Hugh Owen

Linkedin Learning Mae miloedd o gyrsiau ar-lein dan arweiniad arbenigwyr ar gael i holl fyfyrwyr PA gyda Linkedin Learning.

Dyma ddetholiad bach o gyrsiau a allai’ch helpu i ddatblygu sgiliau newydd a mynd ar drywydd diddordebau a hobïau newydd gan Laurie Stevenson, Pencampwr Digidol Myfyrwyr:

Casgliad Gweithgareddau Allgyrsiol i Fyfyrwyr Dyma gasgliad o gyrsiau ag amrywiaeth o sgiliau a gweithgareddau creadigol y gallech fod â diddordeb yn eu dysgu ar y cyd â’ch astudiaethau, i gael saib o’ch aseiniadau neu i lenwi ennyd o ddiflastod! 

Laurie Stevenson

Dysgu Cymraeg Awydd dysgu neu loywi eich Cymraeg yn ystod eich cyfnod yn Aber? Does dim angen chwilio ymhellach na’r Casgliad Celtaidd! Mae’r casgliad yn cynnwys cannoedd o lyfrau i’ch helpu i ddysgu a datblygu eich Cymraeg, o gyrsiau iaith cyflawn a llyfrau gramadeg i ffuglen gyda geirfa ddefnyddiol.

Dewch o hyd i’r casgliad ar Lefel F.

Adnoddau dysgu Cymraeg yn y Casgliad Celtaidd

Canllawiau’r Llyfrgell Ymgyfarwyddwch â dewis y llyfrgell o LibGuides. Cewch yma eich canllaw pwnc a fydd yn eich cynorthwyo i ddod o hyd i adnoddau ar gyfer eich pwnc, yn ogystal ag amrywiaeth o ganllawiau i’ch cynorthwyo i wneud y mwyaf o’r llyfrgell, datblygu eich sgiliau llythrennedd gwybodaeth a gwella eich cyflogadwyedd.

Eich llyfrgellwyr pwnc sydd yn gyfrifol am y LibGuides ac maen nhw yma i’ch helpu gydag adnoddau academaidd ac arbenigol ar gyfer eich astudiaethau. Gallant eich helpu i ganfod a gwerthuso’r wybodaeth sydd ei hangen arnoch a’ch helpu i’w chyfeirnodi’n gywir. Chwiliwch am fanylion cyswllt eich llyfrgellydd ar dudalen ein Llyfrgellwyr Pwnc.

Benthyg DFDs Cewch fenthyg DFDau am ddim o’r casgliad DFD mawr ar Lefel F. Edrychwch drwy’r hyn sydd ar gael yn Primo, catalog y llyfrgell.

Y casgliad o DFDau

Darllen yn Well – Casgliad Lles Mae Casgliad Lles y llyfrgell yma i’ch cynorthwyo i ddeall a rheoli llawer o gyflyrau iechyd meddwl cyffredin neu deimladau a phrofiadau anodd. Mae’r teitlau sydd wedi eu cynnwys yn y casgliad ar y rhestr Darllen yn Well, yn llyfrau ac e-lyfrau ac maent wedi’i threfnu yn ôl meysydd pwnc er mwyn eich helpu i ddod o hyd i’r hyn sydd ei angen arnoch.

Gwyliwch y fideo fer hon i ddysgu rhagor:

Wythnos Llyfrgelloedd 2022 – Staff

Thema Wythnos Llyfrgelloedd eleni ydy’r rhan ganolog sydd gan lyfrgelloedd yn cefnogi dysgu gydol oes.

Heddiw byddwn yn canolbwyntio ar holl staff Prifysgol Aberystwyth a rhai o adnoddau’r llyfrgell sy’n cynorthwyo unigolion i ddatgloi a chyflawni eu potensial ar bob cam o’u bywydau a’u gyrfaoedd.

Gale OneFile News Gallwch weld y newyddion ar-lein, gan gynnwys gweisg masnachol proffesiynol. Mae Newyddion Gale OneFile yn caniatáu ichi chwilota drwy 2,300 o bapurau newydd mawr, gan gynnwys miloedd o ddelweddau, darllediadau radio a theledu a thrawsgrifiadau.

Digimap Mae’r gwasanaeth hwn yn darparu data mapiau Arolwg Ordnans llawn a chynhwysfawr a mapiau hanesyddol yn ogystal â data daearegol. Adnodd hynod ddefnyddiol a difyr yw Digimap, a fydd yn diddanu ymchwilwyr hanes lleol a phobl sy’n ymwneud â’r Gwyddorau Daear fel ei gilydd. Yr unig beth sydd angen arnoch yw cyfrif e-bost Prifysgol Aberystwyth i gofrestru i ddefnyddio’r adnodd.  

Map o Aberystwyth yn 1880 – Digimap

Box of Broadcasts Ydych chi’n gwneud rhywfaint o ymchwil? Mae Box of Broadcasts (BoB) yn wasanaeth teledu a radio ar alw i staff a myfyrwyr at ddefnydd academiadd, sy’n cynnig mynediad at ddwy filiwn o ddarllediadau o dros 65 o sianeli teledu am ddim. Erbyn hyn mae BoB hefyd yn cynnwys archif y BBC, sef rhaglenni radio a theledu hanesyddol.

Y Weithfan Ystafell astudio 24 awr yw’r Weithfan, sydd yn darparu cyfrifiaduron, peiriannau argraffu, WiFi, ac ystafell astudio i grwpiau / ystafell gyfarfod i fyfyrwyr a staff PA. Dewch o hyd i’r Weithfan wrth ymyl y Wetherspoons ger gorsaf drenau Aberystwyth a dewch â’ch Cerdyn Aber i gael mynediad.

Gwasanaethau Gyrfaoedd i holl staff PA A wyddoch y gall aelodau staff Prifysgol Aberystwyth hefyd fanteisio ar wasanaethau gyrfaoedd arbenigol y Brifysgol? Ewch draw i’n Canllaw Cyflogadwyedd i ddechrau arni.

Darllen er pleser Mae gan y llyfrgell gasgliadau sylweddol o ffuglen, llyfrau ffeithiol a barddoniaeth ar gyfer darllen er pleser. Porwch ein casgliad Ffuglen Gyfoes wrth ymyl y Ddesg Ymholiadau ar Lefel F neu ewch at y silffoedd o’r nod dosbarth PN (neu catalog y llyfrgell, Primo).

Casgliad Ffuglen Gyfoes

Y Casgliad Celtaidd Os ydych yn chwilio am nofel, barddoniaeth, llyfr hanes neu lyfrau i’ch helpu ddysgu neu loywi’ch Cymraeg, cofiwch fod miloedd o lyfrau Cymraeg ar bob pwnc dan haul yn y Casgliad Celtaidd. Mae’r casgliad yn cynnwys cannoedd o lyfrau i’ch helpu i ddatblygu eich Cymraeg, o gyrsiau iaith cyflawn a llyfrau gramadeg i ffuglen gyda geirfa ddefnyddiol. Dewch o hyd i’r casgliad ar Lefel F.

Casgliad Astudio Effeithiol Efallai y bydd ambell deitl yn ein Casgliad Astudio Effeithiol o ddefnydd ichi wrth ddatblygu’ch sgiliau astudio neu’ch sgiliau proffesiynol, megis sgiliau cyflwyno neu ymchwil.

Linkedin Learning Gall pob myfyriwr ac aelod o staff PA ddefnyddio’r cyfoeth o gyrsiau sydd ar gael ar-lein yn rhad ac am ddim ac sydd wedi’u harwain gan arbenigwyr trwy Linkedin Learning.

Dyma ddetholiad bach o gyrsiau a allai fod yn ddefnyddiol i staff PA a grëwyd gan Jeffrey Clark, Pencampwr Digidol Myfyrwyr:

Casgliad Datblygiad Personol a Phroffesiynol –  Mae’r casgliad hwn yn cynnwys cyfres o gyrsiau sydd wedi’u cynllunio i gynorthwyo aelodau o staff i ddatblygu eu sgiliau proffesiynol a phersonol.

Jeffrey Clark