Wedi’i guddio ar y pedwerydd llawr, y tu ôl i ffasâd coch trawiadol Adeilad y Gwyddorau Ffisegol, y mae ail lyfrgell Prifysgol Aberystwyth. Er mai myfyrwyr Mathemateg, Ffiseg a Chyfrifiadureg sy’n gweithio gerllaw sy’n ymweld â hi’n bennaf fel man astudio cyfleus (a thrawiadol), gobeithio y bydd rhai o’r newidiadau a welwch yma yn ysbrydoli ymweliad â’r llyfrgell swynol hon.

Yn ddiweddar mae’r Llyfrgellwyr Pwnc Anita Saycell a Sarah Gwenlan wedi ymdrechu i wella’r llyfrgell gydag arddangosfeydd a chasgliadau newydd.

Er bod y Llyfrgell yn gartref i gasgliadau a deunyddiau ymchwil Mathemateg, Ffiseg a Chyfrifiadureg, peidiwch â gadael i hynny eich darbwyllo na ddylech chi alw heibio gyda llyfr ffuglen da. Mae’r casgliad ffuglen newydd sydd wedi’i leoli yn Llyfrgell y Gwyddorau Ffisegol ar y dde wrth fynd i mewn i’r ystafell, ac mae’n cynnwys llyfrau sy’n amrywio o Dune gan Frank Herbert i Project Hail Mary gan Andy Weir.

Wrth ymyl hwn ceir arddangosfa newydd arall – un sy’n cynrychioli’r casgliad gwasgarog o gyfnodolion Gwasanaethau’r Llyfrgell. Mae’r cyfnodolion hyn eisoes ar gael ar-lein trwy Primo ac ar silffoedd Llyfrgell y Gwyddorau Ffisegol, ac ar loriau E ac F Llyfrgell Hugh Owen. Mae’r arddangosfa hon yn eu dangos ochr yn ochr â’u cloriau a chod QR hawdd ei ddefnyddio ar gyfer mynediad hawdd.

Mae’r Llyfrgell yn lle gwych i weithio ac i fod, diolch i waith ei Llyfrgellwyr Pwnc! Gobeithiwn y gallwch ddod i ymweld â hi, ac efallai godi llyfr ar hyd y ffordd.

Os ydych chi’n bwriadu ymweld, dyma’r wybodaeth hygyrchedd ar gyfer y llyfrgell, a fideo byr yn dangos y llwybr o fynedfa Adeilad y Gwyddorau Ffisegol a golygfa o’r ystafell ei hun.

Eich Llyfrgellwyr Pwnc yw:

Anita Saycell aiv@aber.ac.uk    Archebu amser gydag Anita Saycell [aiv] (Staff)   

Sarah Gwenlan ssg@aber.ac.uk   Archebu amser gyda Sarah Gwenlan [ssg] (Staff)

Cewch wybodaeth am adnoddau pwnc yn ein Canllawiau Llyfrgell: https://libguides.aber.ac.uk/en

Cysylltwch â llyfrgellygwyddorauffisegol@aber.ac.uk i gael rhagor o wybodaeth.