Llongyfarchiadau mawr a hwyl fawr i Lloyd Roderick sy’n ymgymryd â rôl newydd yn Llyfrgell Genedlaethol Cymru ar ôl deng mlynedd o wasanaeth rhagorol yn y tîm Ymgysylltu Academaidd.
Cyn ymuno â ni, roedd Lloyd wedi ennill PhD mewn Celfyddyd Gain yn Aberystwyth ac wedi cael profiad eang yn y sector, gan weithio yn yr Advanced Institute of Legal Studies, Llyfrgell Courtauld a llyfrgelloedd cyhoeddus Casnewydd ymhlith eraill.
Fel Llyfrgellydd Pwnc Celf, Hanes a Hanes Cymru, y Gyfraith a Throseddeg a’r Gymraeg ac Astudiaethau Celtaidd yn Aberystwyth, mae Lloyd wedi meithrin perthynas ardderchog rhwng Llyfrgell y Brifysgol ac adrannau academaidd a bydd pawb sydd wedi gweithio gydag ef ar draws y Brifysgol yn gweld ei eisiau yn fawr. Mae wedi bod yn aelod penigamp o’r tîm, yn athro arbennig o sgiliau gwybodaeth ac wedi dod â gwybodaeth bwnc ddofn i’w gyfrifoldebau.
Un etifeddiaeth y mae’n ei adael i’r tîm Ymgysylltu Academaidd yw’r cwis “dyfalu faint o bobl sydd yn y llyfrgell” – dim gwobrau, dim ond hwyl i bawb sy’n cymryd rhan! Byddwn yn parhau â’r cwis bob dydd Gwener er anrhydedd i ti, Lloyd!
Pob lwc yn dy swydd newydd gan bob un ohonom. Rydym yn falch nad wyt ti’n mynd yn bell ac yn edrych ymlaen at dy weld eto cyn bo hir.
Wrth i flwyddyn academaidd arall ddod i ben, rydym yn gyffrous i rannu rhai o gyflawniadau a datblygiadau allweddol eich Gwasanaethau Llyfrgell yn 2024–25.
Mae wedi bod yn flwyddyn brysur arall i’r llyfrgell wrth i’n defnyddwyr barhau i fenthyg miloedd o lyfrau ac e-lyfrau, cyrchu miloedd o erthyglau cyfnodolion, a defnyddio ein hystod ehangach o adnoddau digidol a mannau llyfrgell. Mae rhestrau darllen yn parhau i fod yn rhan greiddiol o’ch gwaith academaidd ac mae ein staff yn gweithio i wneud yn siŵr bod y llyfrau, yr erthyglau a’r adnoddau sydd eu hangen arnoch fwyaf ar flaenau eich bysedd bob amser. Mae ein Llyfrgellwyr Pwnc yn parhau i ddarparu cymorth a chyngor arbenigol i’r holl staff a myfyrwyr ac mae ein tîm Darganfod Adnoddau yn helpu i hwyluso a lledaenu ymchwil o’r radd flaenaf y Brifysgol.
Porwch ein Cynlluniau Gweithredu’r Llyfrgell i ddarganfod sut mae Gwasanaethau Llyfrgell wedi cefnogi eich addysgu, eich dysgu a’ch ymchwil ym Mhrifysgol Aberystwyth dros y flwyddyn ddiwethaf.
Wrth i’r flwyddyn academaidd ddod i ben, dyma’r amser perffaith i fyfyrio ar y cyfraniadau gwych a wnaed gan ein myfyrwyr Llwybrau Proffesiynol yn ystod eu lleoliadau gwaith gyda ni yng Ngwasanaethau Llyfrgell.
Eleni roeddem yn falch iawn o groesawu tri myfyriwr a weithiodd ar draws gwahanol dimau o fewn Gwasanaethau Llyfrgell ac a ddaeth yn aelodau gwerthfawr o staff yn gyflym.
Ein Myfyrwyr Lleoliad
Tayyibah Shabbir, Tîm Cyfathrebu, Ansawdd a Marchnata
Daeth Tayyibah â chymysgedd unigryw o fewnwelediad seicolegol, profiad uniongyrchol fel myfyriwr Aberystwyth, ac angerdd gwirioneddol am ddarllen; rhinweddau a oedd yn amhrisiadwy i’n gwaith. Roedd ei chariad at lyfrgelloedd hefyd yn amlwg o’r dechrau ac rydym yn gobeithio bod ei hamser gyda ni wedi helpu i feithrin y cariad hwnnw!
Tayyibah oedd y grym y tu ôl i’n nifer o’n mentrau. Cydlynodd arddangosfeydd llyfrau creadigol yn Llyfrgell Hugh Owen i nodi digwyddiadau allweddol fel Diwrnod Iechyd Meddwl y Brifysgol a Dydd Sant Ffolant, gan ddod ag ymwybyddiaeth ac ymdeimlad o hwyl i’n gofodau.
Arddangosfa llyfrau Sant Ffolant ar Lefel F, Llyfrgell Hugh Owen
Arddangosfa llyfrau Diwrnod Iechyd Meddwl y Brifysgol
Roedd ei dealltwriaeth o brofiad y myfyriwr hefyd yn allweddol wrth inni lansio ein cylchlythyr Newyddion Llyfrgell PA. Gyda help Tayyibah, llwyddon i lunio cynnwys a oedd yn atseinio gyda myfyrwyr trwy gydol y flwyddyn academaidd, gan sicrhau bod ein cyfathrebiadau yn parhau i fod yn amserol ac yn berthnasol.
Roedd ei sgiliau dadansoddol yn disgleirio yn ei gwaith ar werthuso gwasanaethau a phrofiad defnyddwyr. Cynorthwyodd Tayyibah i gasglu data trwy amrywiaeth o dechnegau ymchwil, gan gynnwys helpu gyda’n gweithdy ‘Sŵn mewn Llyfrgelloedd‘ a chynnal astudiaethau arsylwi ar ein ciosgau MapLlawr y Llyfrgell. Mae’r mewnwelediadau hyn eisoes wedi ein helpu i nodi meysydd lle mae angen mwy o gefnogaeth ar rai myfyrwyr i lywio’r llyfrgell. Diolch i’w hargymhellion, rydym bellach yn datblygu adnoddau newydd i wneud dod o hyd i lyfrau a defnyddio ein gwasanaethau hyd yn oed yn haws.
Cydnabuwyd cyflawniadau Tayyibah yn nigwyddiad dathlu Myfyrwyr Llwybrau Proffesiynol ar 11 Mehefin, lle cafodd ei gwahodd i gyflwyno ar ei lleoliad gwaith.
Tayyibah Shabbir yn derbyn ei thystysgrif am gwblhau ei lleoliad Llwybrau Proffesiynol yn llwyddiannus gan yr Athro Anwen Jones, Dirprwy Is-Ganghellor (Addysg a Phrofiad Myfyrwyr)
Kirill Kulikovskii, Tîm Ymgysylltu Academaidd
Cafodd Kirill Kulikovskii, myfyriwr Cyfrifiadureg, ei leoliad Llwybrau Proffesiynol gyda’r tîm Ymgysylltu Academaidd yn y llyfrgell. Datblygodd sgript Python i’w defnyddio i nodi dolenni sydd wedi’u torri ar draws ystod o fathau o adnoddau yn Rhestrau Darllen Aspire sydd bellach wedi’u trwsio. Cysylltodd hefyd â staff TG i drefnu i’r app gael ei hychwanegu at Company Portal y Brifysgol fel y gall staff ei lawrlwytho a’i ddefnyddio i wirio am ddolenni newydd sydd wedi torri yn y dyfodol.
App Kiril ar gael i’w lawrlwytho yn Company Portal y Brifysgol
Roedd hwn yn lleoliad llwyddiannus iawn a chafodd Kirill ei enwebu a’i roi ar y rhestr fer ar gyfer Gwobr Aelod Staff Myfyrwyr y Flwyddyn Undeb Aber 2025.
Ewan Price, Tîm Sgiliau Digidol
Cwblhaodd Ewan Price ei Leoliad Llwybrau Proffesiynol gyda’r Tîm Sgiliau Digidol. Yn gyntaf, creodd gyfres o TipiauDigidol i helpu myfyrwyr a staff i ddatblygu eu sgiliau digidol, roedd tipiau Ewan yn amrywio o ddefnyddio graffiau yn Excel i sut i fod yn fwy effeithiol yn Teams trwy ddefnyddio gorchmynion.
Helpodd Ewan hefyd i gynnal ein Llyfrgell Sgiliau Digidol trwy wirio’r holl adnoddau i wneud yn siŵr eu bod yn dal i fod yn briodol ac yn berthnasol i’n defnyddwyr – boed yn staff neu fyfyrwyr.
Prosiect mwyaf Ewan oedd creu gwefan SharePoint newydd sbon “Hanfodion Digidol ar gyfer Staff” i helpu staff newydd i gyda phopeth digidol y gallai fod angen iddynt ei wybod pan fyddant yn dechrau gweithio ym Mhrifysgol Aberystwyth. Llwyddodd Ewan i gasglu adnoddau, creu cynllun a gweithio ar y cyd ag aelodau eraill y gweithgor i wneud penderfyniadau ar gynnwys a dyluniad y safle. Datblygodd hefyd ei sgiliau hwyluso a’i sgiliau cyfathrebu trwy gysylltu â rhanddeiliaid yn y Brifysgol i gasglu adborth i wella’r adnodd cyn iddo gael ei lansio.
Roedd cyfraniadau Ewan yn dra gwerthfawr i’r tîm dros y misoedd diwethaf. Roedd y gwaith o gwblhau’r prosiectau hyn dim ond yn bosibl diolch i’w arbenigedd mewn Cyfrifiadureg. Mae wedi gwneud inni edrych o’r newydd ar sut rydym yn darparu ein hadnoddau.
I’r Dyfodol
Rydym yn hynod falch o’r hyn y mae ein Myfyrwyr Llwybrau Proffesiynol wedi’i gyflawni yn ystod eu hamser gyda ni. Mae eu brwdfrydedd, eu chwilfrydedd a’u parodrwydd i ddysgu, yn ogystal â’u sgiliau a’u mewnwelediadau unigol wedi dod â phersbectif newydd ac egni i’n gwaith. Ysbrydoledig oedd gweld eu hyder yn tyfu wrth iddynt ymgymryd â heriau newydd, cydweithio, a gweld effaith gadarnhaol eu gwaith ar ddefnyddwyr ein gwasanaethau.
Dymunwn y gorau iddynt yn eu gyrfaoedd yn y dyfodol!
Gall ceisio dod o hyd i’ch ffordd o gwmpas y byd gofal iechyd deimlo’n hynod llethol. Mae’r teimlad nad oes gennych ddigon o amser wrth i chi gydbwyso ymrwymiadau personol, darlithoedd, a lleoliadau clinigol yn gallu bod yn heriol dros ben. Felly, wrth ymchwilio ar gyfer aseiniadau neu i ddeall cyflyrau cymhleth, gall fod yn anodd gwybod ble i ddechrau.
Yn hytrach na threulio amser yn gwneud chwiliadau diddiwedd ar-lein a all eich arwain at wefannau o ansawdd amheus a gwybodaeth nad yw’n gyfredol mwyach, mae eich llyfrgell yn buddsoddi mewn cronfeydd data gofal iechyd safonol fel CINAHL, MEDLINE, Cronfa Ddata Nyrsio Prydain (a llawer mwy!) am reswm – maent yn drysorfa o ymchwil credadwy, wedi’i adolygu gan gymheiriaid, yn benodol ar gyfer gweithwyr proffesiynol ym maes gofal iechyd fel chi.
Mae ein tudalen ‘Chwiliad Cronfeydd Data’ yn rhan o brif adnodd chwilio’r llyfrgell a gellir ei gweld ar frig Primo, felly nid oes angen ichi gofio unrhyw gyfeiriadau gwe ar wahân.
Mae’r adnodd i Chwilio am Gronfeydd Data wedi’i rannu’n bynciau gwahanol felly gallwch bori drwy’r adnoddau sy’n berthnasol i’ch cwrs chi. Neu gallwch chwilio yn ôl termau allweddol a chywain canlyniadau o’r casgliad cyfan.
Ymgyfarwyddwch â’r cronfeydd data hyn i gael:
Tystiolaeth ddibynadwy a chyfredol: Mae’r cronfeydd data hyn yn curadu gwybodaeth o gyfnodolion cydnabyddedig.
Gwybodaeth wedi’i Thargedu: Defnyddiwch allweddeiriau a hidlwyr penodol i ganfod erthyglau sy’n uniongyrchol gysylltiedig â’ch pwnc, boed trin clwyfau, nyrsio iechyd meddwl, neu diabetes.
Ymarfer Seiliedig ar Dystiolaeth ar Flaenau eich Bysedd: Mae’r cronfeydd data hyn yn helpu i ddarparu’r sylfaen ar gyfer deall y “pam” y tu ôl i’r arfer, gan helpu i ddarparu’r gofal gorau posibl ar sail ymchwil gadarn.
Llwyddiant Academaidd: Bydd defnyddio ffynonellau credadwy o’r cronfeydd data hyn yn cryfhau eich dadleuon, yn dangos meddwl beirniadol, ac yn arwain at farciau gwell yn y pen draw.
Ehangu eich Gwybodaeth: Ehangwch eich dealltwriaeth o bynciau gofal iechyd i fod yn barod am yrfa yn y maes.
