Cydweithwyr yr adran Gwasanaethau Gwybodaeth yw’r cydweithwyr gorau erioed :)

Mae’r gwaith adnewyddu wedi amharu llawer ar gydweithwyr y Gwasanaethau Gwybodaeth ac mae pob un ohonynt wedi bod mor gefnogol a chydweithredol wrth i’r gwaith adnewyddu fynd rhagddo. Boed yn storio darnau o ddodrefn yn eu swyddfeydd, neu’n cwtsio lan i wneud lle i gydweithwyr sydd wedi gorfod symud o Lawr D dros dro, neu golli ystafell baned y staff dros gyfnod y gwaith, maent wedi bod yn wych. Diolch i chi gyd.
Dyma rai ohonynt yn defnyddio ein hystafell baned dros dro.

Pam mae Llawr D, Llyfrgell Hugh Owen yn cael ei adnewyddu?

Mewn adborth diweddar gan fyfyrwyr a staff PA i’r llyfrgell, dywedwyd:

  • “Credaf yn gryf y dylai Llyfrgell Hugh Owen gael ei adnewyddu’n llwyr. Y tu mewn a’r tu allan yn ddelfrydol.”
  • “[hoffwn weld rhagor o] ardaloedd astudio i grwpiau (nad ydynt yn rhai tawel), gyda chyfrifiaduron. Mae angen diffiniad rhwng ardaloedd astudio tawel a’r ardaloedd nad ydynt yn rhai tawel. Mwy o ystafelloedd fel Ystafell Joy Welch y gellir eu llogi. Hefyd [mwy] o doiledau […]
  • “[hoffwn weld rhagor o] welliannau i greu llyfrgell oleuach a disgleiriach.”

O ganlyniad i adborth gan ddefnyddwyr y llyfrgell a’r angen amlwg i ddiweddaru adeilad sydd wedi dyddio, cyflwynodd y Gwasanaethau Gwybodaeth (GG) gynnig am adnewyddiad gwerth £2M i Lyfrgell Hugh Owen dros gyfnod o 4 blwyddyn ariannol, 4 cyfran o £500k. Cam cyntaf y gwaith fydd adnewyddu Llawr D dros 2 flwyddyn ariannol (2016-17 – 2017-18), gyda Llawr E ac F yn cael eu hadnewyddu yn ystod 2 flwyddyn olaf y prosiect.

Fel gwasanaeth allweddol yn y Brifysgol drwy gydol y flwyddyn, mae’n hanfodol bod y llyfrgell yn aros ar agor trwy gydol y gwaith adnewyddu a chytunwyd y byddem yn dechrau gyda phrif fynedfa’r Llyfrgell ar Lawr D.

Dyma rai o’r ffactorau a gyfrannodd tuag at wneud cais am y prosiect:

  • Yn ôl adborth rheolaidd gan fyfyrwyr, mae’n amlwg bod angen mwyhau, diweddaru a gwella’r ardaloedd astudio i fyfyrwyr ar Lawr D. Mae’r gofod sydd yno ar hyn o bryd wedi dyddio’n sylweddol ac nid yw bellach yn bodloni anghenion y defnyddwyr a’r staff.
  • Mae’r gofod i staff sy’n gweithio ar Lawr D yn gyfyng ac mae’r cynllun presennol yn golygu bod y rhai hynny nad ydynt ar yr amserlen i weithio ar y ddesg ymholiadau yn dal i fod yng ngolwg y defnyddwyr. Golyga hyn fod defnyddwyr yn torri ar draws gwaith y staff yn aml ac mae’n rhoi profiad gwael i ddefnyddwyr a allai feddwl bod y staff hyn yn eu hanwybyddu.
  • Er bod y GG wedi sgorio’n dda iawn yn yr arolwg ‘Aber Ydym Ni’, ein sgôr salaf oedd “Mae gan yr adran adnoddau a/neu ddeunyddiau sy’n ddeniadol yr olwg” cwestiwn y cawsom gyfradd bodlonrwydd o 56.7% ar ei gyfer; roedd pob sgôr arall i’r GG rhwng 70% ac 86%.
  • Mae tystiolaeth o’r sector yn dangos pwysigrwydd mawr y llyfrgell a’r adnoddau gwybodaeth o ran bodlonrwydd y myfyrwyr a recriwtio myfyrwyr. Gweler https://www.timeshighereducation.com/student/news/student-experience-survey-2017-expectations-are-high-for-learning-resources a https://www.timeshighereducation.com/news/student-experience-survey-2017-build-facilities-and-students-will-come
  • Gwella’r gofod a’r gwasanaethau ar Lawr D, ble ceir mynedfa’r Llyfrgell a lleoliad y Ddesg Ymholiadau Llyfrgell a TG, fyddai’n cael y mwyaf o effaith ar fyfyrwyr presennol, a’r llawr hwn hefyd yw ein ffenestr siop ar gyfer darpar fyfyrwyr.

Mae ein cynlluniau ar gyfer Llawr D yn cynnwys:

  • Aildrefnu’r cynllun i wella’r llif drwy’r adeilad a mynediad y defnyddwyr i’r adnoddau a’r gwasanaethau. Bydd hyn yn cynnwys symud prif fynedfa’r llyfrgell i wynebu’r Piazza.
  • Agor a newid diben rhai o’r ardaloedd yn y cefn i roi lle ychwanegol i ddefnyddwyr. Bydd hyn yn cynnwys ardal i beiriannau bwyd a diod, ystafelloedd astudio grŵp ychwanegol y gellir eu llogi, toiledau i fyfyrwyr a lle i eistedd ar gyfer defnyddio cyfrifiaduron ac ar gyfer astudio’n unigol ac mewn grwpiau.
  • Gwella’r golau, y gwres a’r awyriad i sicrhau amgylchedd mwy cyfforddus i’n defnyddwyr.
  • Diweddaru’r addurniadau a’r dodrefn i ddarparu lle modern, sy’n bodloni anghenion ein defnyddwyr.

Er y bydd Llawr D ar gau yn ystod y gwaith adnewyddu, bydd y Llyfrgell yn parhau i fod ar agor trwy gydol y gwaith. Bydd y staff a’r gwasanaethau’n cael eu symud i Lawr E y Llyfrgell a’r oriau agor yn aros yr un fath. Gallwch weld ein cynlluniau ar weddalen adnewyddu’r llyfrgell a chroeso i chi anfon eich adborth atom: https://www.aber.ac.uk/cy/is/news/librefurb/

Mae Desg Ymholiadau Llyfrgell Hugh Owen bellach wedi’i symud dros dro o Lawr D i Lawr E

Yr wythnos hon agorodd ein Desg Ymholiadau Llyfrgell a TG ar Lawr E yn Llyfrgell Hugh Owen. Mae’r Ddesg Ymholiadau hon wedi’i lleoli o flaen drysau’r brif fynedfa ar Lawr E. Mae’r staff wrth y Ddesg Ymholiadau’n croesawu eich ymholiadau.

Rydym wedi bod yn brysur yn adleoli rhai casgliadau o lyfrau a gwasanaethau er mwyn paratoi ar gyfer dechrau’r gwaith adeiladu ar Lawr D y llyfrgell. Er bod gennym arwyddion i fyny o amgylch y llyfrgell yn cyfeirio defnyddwyr y llyfrgell at y fynedfa newydd i’r llyfrgell ac i’r llyfrau a’r gwasanaethau sydd wedi’u symud, os ydych chi’n cael unrhyw broblem dod o hyd i’r llyfrau neu os oes arnoch angen cymorth, mae croeso i chi gysylltu ag aelod o’n staff.
Cofiwch hefyd fod croeso i chi gysylltu â ni drwy e-bost, ffôn neu sgwrs ar-lein i gael unrhyw gymorth neu i ofyn unrhyw gwestiwn am ddefnyddio gwasanaethau ac adnoddau’r llyfrgell/TG: https://www.aber.ac.uk/cy/is/help/contactus/

Mae Llawr D y llyfrgell bellach wedi cael ei wagio o’r holl ddodrefn yn barod ar gyfer y contractwyr adeiladu, sy’n dod i ddechrau gweithio yn ystod wythnos olaf mis Mehefin. Dyma sut olwg oedd ar Lawr D ar ddiwrnod ola’r tymor (ddydd Sadwrn diwethaf)

A dyma Lawr D heddiw, yn barod ar gyfer y gwaith adnewyddu.

Nodyn i’ch atgoffa bod gweddalen o’r gwaith adnewyddu i Lawr D Llyfrgell Hugh Owen ar gael ar: https://www.aber.ac.uk/cy/is/news/librefurb/

Diolch i bawb a gymerodd ran yn y gwaith o adleoli’r gwasanaeth hwn i Lawr E. Rydym yn edrych ymlaen at weld y gwaith adeiladu yn dechrau.

Elizabeth

Ail-leoli Gwasanaethau

Helo,

Dechreuodd y gwaith o symud ein gwasanaethau Llyfrgell, TG, Cyfryngau a Gwerthiannau i Lawr E o ddifrif ddoe.

  • Mae’r Peiriant Hunan Fenthyca sydd ag Adnodd Talu Dirwyon wedi’i symud o Lawr D i Ystafell Iris De Freitas
  • Mae’r cyfrifiaduron y tu allan i’r lifft ar Lawr E wedi cael eu symud a chânt eu hailddosbarthu drwy’r llyfrgell. Edrychwch ar y dudalen Argaeledd Cyfrifiaduron Computer Availability page i ddod o hyd i gyfrifiadur sydd ar gael.
  • Mae’r byrddau y tu allan i’r lifft ar Lawr E wedi cael eu symud i’r ardal y tu allan i’r lifft ar Lawr F.
  • Mae Tîm y Ddesg Gwasanaethau TG wrthi’n ail-leoli i Ystafell Hyfforddiant Hugh Owen.
  • Mae cydweithwyr yn y gwasanaeth Cyfryngau a Gwerthiannau wedi symud i ardal yr Academi ar Lawr E.
  • Bydd Tîm y Ddesg Gwasanaethau Llyfrgell yn symud ddydd Llun i’r swyddfa cynllun agored i staff ar Lawr E.

Nodyn i’ch atgoffa y bydd Llawr D yn cau i bawb am 5:30yp ddydd Llun 5 Mehefin.

O 8:30yb ddydd Mawrth 6 Mehefin bydd ein gwasanaethau rheng flaen yn cael eu cyflwyno o Lawr E.

Ewch i mewn ac allan o’r llyfrgell drwy’r fynedfa Hygyrchedd ar Lawr E (mae’r fynedfa’n wynebu’r cyntedd uchaf ar ochr ddeheuol adeilad Hugh Owen – uwchlaw’r fynedfa i Adran y Gymraeg ac Astudiaethau Celtaidd).

Diolch yn fawr iawn i’r Porthorion sydd wedi gweithio’n galed iawn i symud dodrefn o amgylch y llyfrgell. Diolch hefyd i staff y Gweithdy sydd wedi bod yn brysur yn symud cyfrifiaduron o un lle i’r llall.

Bydd rhagor o symud ddydd Llun a dydd Mawrth nesaf ac fe geisiaf roi’r wybodaeth ddiweddaraf i chi gyd eto’n fuan.

Cynllun dros dro y desgiau ar Lawr E.


Lleoliad newydd y Peiriant Hunan Fenthyca gydag adnodd Talu Dirwyon.

Cynllun terfynol, lliwiau a ffabrigau

Helo bawb,
Mae’n bleser gennyf rannu’r fersiwn terfynol (bron iawn) o gynllun newydd Llawr D.



Cynllun Llawr D 2017

Rydym yn parhau i addasu fymryn ar y cynllun llawr ond mae hwn yn rhoi syniad da i chi o’r newidiadau sydd ar droed.
Bydd y gwaith adeiladu yn:

  • Symud y fynedfa i wynebu’r gynteddfa.
  • Symud y ddesg ymholiadau.
  • Creu Dwy Ystafell Astudio i Grwpiau.
  • Creu Ardal i Beiriannau Gwerthu Bwyd a Diod.
  • Creu mwy o ofod i astudio ac i gyfrifiaduron.
  • Creu toiledau niwtral o ran y rhywiau.

Rydym wedi bod yn brysur yn dewis lliwiau a ffabrigau ar gyfer y dodrefn. Cafodd tîm y prosiect ‘Weithdy Lliw’ cynhyrchiol iawn gyda BOF Furniture ym Mhen-y-Bont ar Ogwr. Isod ceir lluniau o’r gorffeniadau, y lliwiau a’r patrymau y byddwn yn eu defnyddio i ddodrefnu’r Llawr D newydd.



Yr ydym hefyd yn falch iawn o allu rhannu delweddau sy’n rhoi syniad o sut yr yr ydym yn dychmygu’r gofod wedi’r gwaith ailwampio. Mae’r delweddau yma ar gael trwy garedigrwydd Dodrefn BOF – Swyddfa Penybont.

Bydd y contract ar gyfer y gwaith adeiladu yn cael ei ddyfarnu’n fuan, a gyda llai na thair wythnos cyn y bydd y staff yn gadael Llawr D, mae cyffro mawr yma.

Ar ran tîm y prosiect, hoffwn ddymuno’n dda iawn i’r holl fyfyrwyr sy’n sefyll arholiadau ac yn cyflwyno aseiniadau a thraethodau estynedig!

Estyn Amserlen Prosiect

I sicrhau ein bod yn cwblhau’r prosiect ailwampio hwn i safon uchel, mae’n rhaid i ni ganiatáu rhagor o amser ar gyfer y gwaith nag y rhagwelwyd yn wreiddiol. Amcangyfrifir y bydd y gwaith yn cymryd tan fis Rhagfyr 2017. Rydym yn gobeithio y bydd y gwaith yn dechrau ym mis Mehefin, ond ni fydd modd i ni gadarnhau amserlen benodol nes ein bod wedi penodi contractwyr.

Rydym yn gweithio ar gynlluniau i sicrhau nad ydym yn cael gormod o effaith ar ein cwsmeriaid a’n staff yn ystod y cyfnod hwn, gan gynnwys sicrhau bod yr holl wasanaethau presennol, a’r ardaloedd astudio a’r ystafelloedd cyfrifiaduron ar gael, ond mae’n anochel y bydd rhywfaint o aflonyddwch, ac ymddiheurwn am hyn o flaen llaw. Bydd y gwasanaethau a’r Ddesg Ymholiadau Llyfrgell a TG ar Lawr E llyfrgell Hugh Owen trwy gydol cyfnod y gwaith ailwampio.

Dros y diwrnodau nesaf byddaf yn rhannu dyluniadau terfynol y penseiri o’r cynllun newydd a hefyd yn rhoi syniad i chi o’r math o ddodrefn yr ydym yn gobeithio eu rhoi ar Lawr D.
Yn y cyfamser gobeithio eich bod wedi cael gwyliau braf.

Cyfarfod adborth â’r myfyrwyr sydd â phroblemau symudedd neu wahaniaethau dysgu.

Helo eto,

Ddydd Gwener byddwn yn cynnal cyfarfod adborth â’r myfyrwyr sydd â phroblemau symudedd neu wahaniaethau dysgu. Mae tîm y prosiect yn awyddus iawn i glywed beth sydd gennych chi i’w ddweud am y cynllun newydd arfaethedig; efallai y bydd modd i chi amlygu problem nad oeddem wedi ei hystyried eto. Byddwn yn edrych ar y cynllun, y cynllun lliw arfaethedig a rhai o’r dodrefn. Mae’r rheoliadau adeiladu’n ymdrin â’r problemau symudedd sylfaenol a fydd yn codi ond rydym hefyd eisiau ystyried materion yn ymwneud â’r synhwyrau a’r clyw. Dim ond gyda’ch cymorth chi y gallwn ni wneud hyn.

Cynhelir y cyfarfod am 10yb yn ystafell hyfforddi Hugh Owen (yr ystafell fach ger yr ystafell gyfrifiaduron fawr ar lawr E) fore dydd Gwener (24ain). Mae croeso i ddefnyddwyr sydd â phroblemau symudedd, sydd eisoes wedi trefnu mynediad drwy’r Gwasanaethau Cymorth i Fyfyrwyr, ddefnyddio’r fynedfa hygyrchedd ar Lawr E.

Os ydych chi’n fyfyriwr gyda phroblemau symudedd neu wahaniaeth dysgu dewch i roi gwybod beth ydych chi’n ei feddwl.

Adborth gan Ddefnyddwyr

Un peth yr anghofiais sôn amdano yn fy neges ddiwethaf oedd bod y cynlluniau wedi’u seilio’n fawr iawn ar yr adborth yr ydym eisoes wedi’i gael (mae’r llun uchod yn dangos y bwrdd adborth a ddefnyddiwyd yn y llyfrgell i gasglu eich sylwadau drwy gyfrwng nodiadau Post-It). Pan fo’n bosibl, rydym wedi ymgorffori’ch awgrymiadau ac rydym yn gwerthfawrogi’ch ymrwymiad a’ch brwdfrydedd tuag at y prosiect hyd yma.

Er bod y manylion bach yn dal i gael eu trafod mae rhai o’r newidiadau pensaernïol mawr yn fwy cadarn ac rydym ar fin dod at garreg filltir fawr yn y prosiect gan ein bod yn mynd i dendr am y contract adeiladu ddiwedd y mis. Rhagor cyn hir!

Croeso i Blog Ailwampio Lefel D

Helo, Lucy O’Donnell ydw i, Rheolwr Prosiect Adnewyddu Llawr D Llyfrgell Hugh Owen, ac rwy’n blogio ar ran Tîm Adnewyddu’r Llyfrgell. Rwyf wedi bod yn llyfrgellydd yn y Gwasanaethau Gwybodaeth ers 2012 ac rwy’n raddedig o Brifysgol Aberystwyth.

Nod y blog hwn yw darparu’r wybodaeth ddiweddaraf am y cynlluniau adnewyddu i holl ddefnyddwyr Llyfrgell Hugh Owen, ac i ofyn am eich cyfranogiad a’ch barn ar y prosiect.

Yma fe welwch gynllun diweddaraf y penseiri ar gyfer y gwaith adnewyddu (llun trwy garedigrwydd Pensaernïaeth DarntonB3 Architecture)
Hugh Owen Level D Option G – Architect Design

Sylwch bod y cynlluniau hyn ar ffurf drafft ar hyn o bryd. Os oes gennych unrhyw adborth am y prosiect mae croeso i chi gynnig sylwadau neu gysylltu â ni trwy: is-feedback@aber.ac.uk.
Am ragor o wybodaeth gweler y dudalen ganlynol: https://www.aber.ac.uk/cy/is/news/librefurb/
Anelwn at flogio bob wythnos i roi gwybod i chi sut mae’r gwaith yn dod yn ei flaen.
Diolch!
Lucy